የጌታችን የአብነት ጸሎት

እግዚአብሔር በከንቱ እንዳንጸልይ በምን ቃላትና በምን ሁኔታ ወደ እርሱ እንድንጸልይ እንደሚፈልግ ከራሱ ከእግዚአብሔር መማር እንዴት ያለ እርካታ ሊሆን ይገባዋል! የዚህን ጸሎት ዋጋ፤ የሚጠይቀውን አክብሮትና ትኩረት፤ ሊሰጠው የሚገባውን ቅድሚያ፤ ሙላቱንና ፍጹምነቱን፤ ልንጠቀምበት የሚገባንን ተደጋጋሚነት፤ ይዘነው ልንቀርብ የሚገባንንም መንፈስ በበቂ አናስተውልም። «ጌታ ሆይ፥ እንጸልይ ዘንድ አስተምረን።»—አዳም ክላርክ።

ኢየሱስ በተለምዶ «የጌታ ጸሎት» ተብሎ በሚታወቀው ጸሎት ውስጥ የጸሎትን አብነት ይሰጠናል። በዚህ አብነት በሆነ ፍጹም ጸሎት ውስጥ የምንከተለውን የሕግ ቅርጽ ይሰጠናል፤ ሆኖም ስንጸልይ እንደ ወሰንነው የምንሞላውና የምናሰፋው ቅርጽ ነው። ንድፉና ቅርጹ የተሟሉ ናቸው፤ ቢሆንም ፍላጎቶቻችንና በልባችን የተረዳናቸው ነገሮች የሚሞሉአቸው ብዙ ባዶ ቦታዎች ያሉት ንድፍ ብቻ ነው።

ክርስቶስ በከንፈሮቻችን ላይ ቃላትን ያኖራል፤ እነዚህም በቅዱስ ሕይወት ሊነገሩ የሚገባቸው ቃላት ናቸው። ቃላት የጸሎት ሕይወት ክፍል ናቸው። ቃል አልባ ጸሎቶች እንደ ሰው መንፈስ ናቸው፤ ንጹሕና ከፍ ያሉ ሊሆኑ ይችላሉ፤ ነገር ግን ለምድራዊ ተጋድሎና ለምድራዊ ፍላጎቶችና ጥቅሞች እጅግ ረቂቆችና የማይዳሰሱ ናቸው። ሥጋና ደም የለበሰ መንፈስ ሊኖረን ይገባል፤ ጸሎታችንም እንዲሁ ትርጉምና ኃይል፣ የሚኖርበት ስፍራና ስም ይኖረው ዘንድ ቃላትን መልበስ አለበት።

ደቀ መዛሙርቱ «ጌታ ሆይ፥ እንጸልይ ዘንድ አስተምረን» ብለው በመለመናቸው የተገኘው ይህ «የጌታ ጸሎት» ትምህርት በቅርጹና በአነጋገሩ ከተራራው ስብከት የጸሎት ክፍሎች ጋር የሚመሳሰል ነገር አለው። «በሰማያት የምትኖር አባታችን ሆይ» ብሎ የመጸለይ ያው ታላቅ ትምህርት ነው፤ የማያቋርጥ ጽናትም ትምህርት ነው። ያለ እርሱ የትኛውም የጸሎት ትምህርት የተሟላ አይሆንም። የጸሎት የመጀመሪያውና የመጨረሻው ትምህርት ክፍል ነው። የእግዚአብሔር አባትነት ለጸሎታችን ሁሉ ቅርጽን፣ ዋጋንና መተማመንን ይሰጣል።

የእግዚአብሔርን ስም መቀደስ ከጸሎቶች ሁሉ የመጀመሪያውና ታላቁ እንደ ሆነ ያስተምረናል። የእግዚአብሔር የከበረ መንግሥት በክብር እንዲመጣና በክብር እንዲጸና መመኘት በዋጋም በቅደም ተከተልም የእግዚአብሔርን ስም ከመቀደስ ቀጥሎ ይመጣል። የእግዚአብሔርን ስም በእውነት የሚቀድስ ሰው የእግዚአብሔርን መንግሥት መምጣት በደስታ ይቀበላል፤ ያ መንግሥት እንዲመጣና እንዲጸናም ይደክማል፤ ይጸልያልም። በጸሎት ትምህርት ቤት ያሉ የክርስቶስ ተማሪዎች የእግዚአብሔርን ስም እንዲቀድሱ፣ ለእግዚአብሔር መንግሥት እንዲሠሩ፣ የእግዚአብሔርንም ፈቃድ በሰማይ እንደሚደረግ በፍጹምነት፣ በሙላትና በደስታ እንዲያደርጉ በትጋት ሊማሩ ይገባል።

ጸሎት የእግዚአብሔርን ከፍተኛ ጉዳይ ይመለከታል፤ ከፍተኛውን ክብሩንም ያስገኛል። የእግዚአብሔር ስም፣ የእግዚአብሔር መንግሥትና የእግዚአብሔር ፈቃድ ሁሉም በውስጡ አሉ። ያለ ጸሎት ስሙ ይረክሳል፣ መንግሥቱ ይወድቃል፣ ፈቃዱም ይነቀፋል፤ ተቃውሞም ይገጥመዋል። የእግዚአብሔር ፈቃድ በሰማይ እንደሚደረግ በምድርም ሊደረግ ይችላል። በምድር የሚደረገው የእግዚአብሔር ፈቃድ ምድርን እንደ ሰማይ ያደርጋታል። የእግዚአብሔርን ፈቃድ በሰማይ እንደ ጸና በምድርም የሚያጸናው ብርቱ ኃይል በጽናት የሚቀርብ ጸሎት ነው።

አሁንም ጸሎት ለዕለት እንጀራ የምናደርገውን የዕለት ድካም እንደሚቀድስ፣ ተስፋ ያለውና ጣፋጭም እንደሚያደርገው ያስተምረናል። የኃጢአት ይቅርታ በጸሎት ሊፈለግ ይገባዋል፤ ለይቅርታ የምናቀርበውም ታላቅ የጸሎት ልመና የበደሉንን ሁሉ ይቅር ማለታችን ነው። ይህም ጠላቶቻችንን እስከ መውደድ ያደርሳል — ስለ እነርሱ እስክንጸልይ፣ እንድንመርቃቸውና እንዳንረግማቸው፣ በእኛ ላይ ያደረሱትንም በደል ምንም ቢሆን ይቅር እንድንል።

«ወደ ፈተና አታግባን» ብለን ልንጸልይ ይገባናል፤ ይህም እንዲህ ብለን ስንጸልይ ፈታኙንና ፈተናውን እንድንጠነቀቅ፣ እንድንቃወም፣ በጸሎትም እንድንዋጋቸው ነው።

እነዚህን ሁሉ በዚህ የጸሎት ሕግ ውስጥ ደንግጎአል፤ ነገር ግን በሕግ ለደነገገው ለዚህ ሕጉ ብዙ ቀላል የማብራሪያ፣ የማስፋፊያና የአገላለጽ ትምህርቶችን ይጨምርበታል።

በዚህ ጸሎት ደቀ መዛሙርቱን ያስተምራል፤ ይህ ጸሎት በልጅነታቸው በእናታቸው ጉልበት ሥር ለተማሩት በዛሬው ዘመን ላሉ በሺዎች ለሚቈጠሩ ሰዎች የታወቀ ነው። ቃላቱ እንደ ሕፃን ቀላል ስለ ሆኑ ልጆች ተንበርክከው ሲጸልዩ በእነርሱ ውስጥ ትምህርትን፣ መታነጽንና መጽናናትን ያገኛሉ። በመንፈሳዊ ተመስጦ እጅግ የሚነድደው ሰውም ሆነ እጅግ ጠንቃቃው አሳቢ በእነዚህ ቀላል የጸሎት ቃላት ውስጥ እያንዳንዱ የራሱን ቋንቋ ያገኛል። እነዚህ ቃላት ውብና የተከበሩ ቢሆኑም ለመጽናናት፣ ለእርዳታና ለመማር የእኛው ቃላት ናቸው።

በእርሱ ፈለግ እንድንከተል በጸሎት መንገዱን መራ። ወደር የሌለው ጸሎት ወደር የሌለው መሪ! ጌታ ሆይ፥ አንተ ራስህ እንደ ጸለይህ እንድንጸልይ አስተምረን!

በሊቀ ካህንነት ጸሎቱና በዚህ «የጌታ ጸሎት» መካከል — ለደቀ መዛሙርቱ የጸሎት የመጀመሪያ ፊደላት አድርጎ በሰጣቸው በዚህ የጸሎት ቅጂ መካከል — ያለው ልዩነት እንዴት ጎልቶ ይታያል! እንዴት ቀላልና እንደ ሕፃን የዋህ ነው! በልመናዎቹ እጅግ ቀላል ሆኖ በጥያቄዎቹ ሁሉ ደግሞ እጅግ ሁሉን አቀፍ የሆነ ጸሎትን በማዘጋጀት ማንም ወደዚህ የቀረበ የለም።

ጌታችን የሰጠን እነዚህ ቀላል የጸሎት መሠረታውያን እንዴት ልባችንን ይማርካሉ! ይህ ጸሎት በመጀመሪያ ለተሰጣቸው ብቻ ሳይሆን ለእኛም ነው። የጸሎትን ሀ ሁ ለሚቈጥር ሕፃን ነው፤ ከፍተኛ የትምህርት ተቋማትን ላጠናቀቀ ምሩቅም ነው። ፍላጎታችንን ሁሉ የሚደርስና ኃጢአታችንን ሁሉ የሚሸፍን ግላዊ ጸሎት ነው። ስለ ሌሎች የሚቀርብ ከፍተኛው የጸሎት ዓይነትም ነው። ተማሪ በኋላ በሚያደርገው ጥናትና ትምህርት ሁሉ ያለ ሀ ሁ ፈጽሞ እንደማይችል፣ ፊደልም ለኋለኛው ትምህርት ሁሉ ቅርጽን፣ ቀለምንና አገላለጽን እንደሚሰጥ፣ ሁሉን እንደሚያጠግብና ሁሉን እንደሚመሠርት፣ እንዲሁ በክርስቶስ የሚማር ሰው ያለ ጌታ ጸሎት ፈጽሞ ሊሆን አይችልም። ነገር ግን የጌታን ጸሎት ለከፍተኛው ጸሎቱ — በሊቀ ካህንነት ጸሎት ውስጥ ላለው ስለ ሌሎች ለሚቀርበው ምልጃ — መሠረት ሊያደርገው ይችላል።

የጌታ ጸሎት ከእናታችን ጉልበት ሥር ጀምሮ የእኛ ነው፤ በደስታ በተሞላው የክርስቲያን ሕይወት ደረጃዎች ሁሉ ይስማማናል። የሊቀ ካህንነት ጸሎትም በእግዚአብሔር ፊት እንደ አማላጆች በንጉሣዊ ክህነታችን ደረጃዎችና ተግባር ውስጥ የእኛ ነው። በዚህ ውስጥ ከእግዚአብሔር ጋር አንድነት፣ ጥልቅ መንፈሳዊ አንድነትና ለእግዚአብሔር የማይናወጥ ታማኝነት አለን — እግዚአብሔርን ለማክበር እየኖርንና እየጸለይን።