ልደቱና ተአምራቱ

§49. ልደቱና ተአምራቱ። አስክሊፒዮስን፣ ሄራክሊስንና ዲዮኒሶስን ስለ ሥራዎቻቸው አማልክት ትሏቸዋላችሁ። ሥራዎቻቸውን ከእርሱ ሥራዎች ጋር፣ በሞቱ ጊዜ ከሆኑት ድንቆችና ከመሳሰሉት ጋር አነጻጽሩ።

ከተወለዱት ሰዎች መካከል ከድንግል ብቻ ለራሱ ሥጋን ያበጀ ማን ነው? ወይስ የሁሉ የጋራ ጌታ የፈወሳቸውን የመሰሉ በሽታዎችን የፈወሰ ሰው ማን ነው? ወይስ ለሰው ባሕርይ የጐደለውን የመለሰ፣ ዕውር ሆኖ የተወለደውንም ያሳየ ማን ነው? 2. አስክሊፒዮስ ሕክምናን ስለ ተለማመደና ለታመሙ አካላት ዕፀዋትን ስላገኘ በእነርሱ ዘንድ አምላክ ተደረገ፤ ዕፀዋቱን ግን ራሱ ከምድር አላበጃቸውም፤ ከተፈጥሮ በተገኘ እውቀት አገኛቸው እንጂ። መድኃኒታችን ቍስልን ከመፈወስ ይልቅ የሰውን ከተወለደ ጀምሮ የነበረውን ባሕርይ አስተካክሎ ሥጋውን ሙሉ አድርጎ ከመለሰበት ሥራ ጋር ሲነጻጸር ግን ይህ ምንድር ነው? 3. ሄራክሊስ መሰሎቹ ከሆኑ ሰዎች ጋር ስለ ተዋጋና የዱር አራዊትን በተንኰል ስላጠፋ በግሪኮች ዘንድ እንደ አምላክ ይመለካል። ቃል በሽታዎችንና አጋንንትን፣ ሞትንም ራሱን ከሰው በማባረር ካደረገው ጋር ሲነጻጸር ይህ ምንድር ነው? ዲዮኒሶስ ሰውን ስካርን ስላስተማረ በእነርሱ ዘንድ ይመለካል፤ እውነተኛው መድኃኒትና የሁሉ ጌታ ግን ራስን መግዛትን ስላስተማረ በእነዚህ ሰዎች ይዘበትበታል። 4. ነገር ግን እነዚህ ነገሮች ይለፉ። ስለ ሌሎቹ የመለኮቱ ተአምራት ምን ይላሉ? በማን ሰው ሞት ፀሐይ ጨለመች፣ ምድርም ተናወጠች? እነሆ፣ እስከ ዛሬ ድረስ ሰዎች ይሞታሉ፤ በጥንትም ሞተዋል። በእነርሱ ላይ እንዲህ ያለ ድንቅ መቼ ሆነ? 5. ወይም በሥጋው የተደረጉትን ሥራዎች አልፈን ከሥጋው ትንሣኤ በኋላ የሆኑትን ብንጠቅስ፦ ከነበሩት ሰዎች ሁሉ፣ አምልኮው በየአገሩ ሁሉ እንደ ክንፍ እስኪበርር ድረስ፣ ከምድር ዳርቻ እስከ ዳርቻ አንድና ያው ሆኖ በሁሉ ስፍራ የበረታ የማን ሰው ትምህርት ነው? 6. ወይስ እነርሱ እንደሚሉት ክርስቶስ እግዚአብሔር ቃል ሳይሆን ሰው ከሆነ፣ አምልኮው እነርሱ ወዳሉበት ምድር እንዳይገባ ያሏቸው አማልክት ለምን አይከለክሉትም? ወይስ በተቃራኒው ቃል ራሱ በዚህ በመካከላችን አድሮ በትምህርቱ አምልኮአቸውን ለምን ያስቆማል? ማታለላቸውንስ ለምን ያሳፍራል?