ተጨማሪ ማስረጃዎች

§48. ተጨማሪ ማስረጃዎች። የደናግልና በተጋድሎ የሚኖሩ ሰዎች ክርስቲያናዊ ንጽሕና። ሰማዕታት። መስቀል በአጋንንትና በአስማት ላይ ያለው ኃይል። ክርስቶስ በኃይሉ ከሰው በላይ፣ ከአስማተኛ በላይ፣ ከመንፈስም በላይ መሆኑን ያሳያል፤ እነዚህ ሁሉ ፈጽመው ለእርሱ የተገዙ ናቸውና። ስለዚህ እርሱ የእግዚአብሔር ቃል ነው።

እንግዲህ ይህ የእኛ ማስረጃ ቃል ብቻ አይደለም፤ ይልቁንም ለእውነትነቱ ምስክር የሚሆን ተጨባጭ ልምድ አለው። 2. የሚወድ ሁሉ ይውጣና በክርስቶስ ደናግልና ቅዱስ ንጽሕናን በሚጠብቁ ወጣቶች ዘንድ የበጎነትን ማስረጃ፣ ይህን ያህል ታላቅ በሆነው የሰማዕታቱ ሠራዊት ዘንድም የአለመሞትን ማረጋገጫ ይመልከት። 3. አሁን የተናገርነውን በልምድ ሊፈትን የሚሻ ሰው ይምጣ፤ በአጋንንት ማታለል፣ በጥንቆላ ቃሎች ማጭበርበርና በአስማት ድንቆች ፊት ቆሞ፣ በእነርሱ ዘንድ መሳለቂያ የሆነውን የዚያን መስቀል ምልክት ይጠቀም፤ በእርሱም አማካይነት አጋንንት እንዴት እንደሚሸሹ፣ የጥንቆላ ቃሎች እንዴት እንደሚቆሙ፣ አስማትና መተት ሁሉ እንዴት ከንቱ እንደሚሆኑ ያያል። 4. እንግዲህ በገዛ ስሙና በመገኘቱ በሁሉ አቅጣጫ ያሉትን ነገሮች ሁሉ የሚያደበዝዝና ከንቱ የሚያደርግ፣ በሁሉም ላይ ብቻውን የሚበረታ፣ ዓለምንም ሁሉ በትምህርቱ የሞላ ይህ ክርስቶስ ማን ነው? ምን ያህልስ ታላቅ ነው? መሳለቅ ደስ የሚያሰኛቸውና የማያፍሩት ግሪኮች ይንገሩን። 5. ሰው ከሆነ፣ አንድ ሰው እነርሱ ራሳቸው አማልክት አድርገው የሚቈጥሯቸውን ሁሉ ኃይል እንዴት በለጠ? ምንም እንዳልሆኑስ በገዛ ኃይሉ እንዴት ገለጣቸው? አስማተኛ ነው ቢሉት ግን፣ አስማት ሁሉ በአስማተኛ ከመጽናት ይልቅ እንዴት ሊጠፋ ይችላል? አንዳንድ አስማተኞችን ብቻ ድል አድርጎ ወይም በአንዱ ብቻ ላይ አይሎ ቢሆን ኖሮ፣ ከሌሎቹ በላቀ ብልሃት በልጦአቸዋል ብለው ማሰባቸው ተገቢ በሆነ ነበር፤ 6. መስቀሉ ግን በአስማት ሁሉ ላይ፣ በስሙም ላይ እንኳ ፈጽሞ ድል ከተቀዳጀ፣ በሌሎቹ አስማተኞች የሚጠሩት አጋንንት እንኳ ከእርሱ እንደ ጌታቸው ስለሚሸሹ፣ መድኃኒታችን አስማተኛ እንዳልሆነ ግልጥ ሊሆን ይገባል። 7. እንግዲህ እርሱ ማን እንደ ሆነ፣ ብቸኛ ቁም ነገራቸው ቀልድ የሆነው ግሪኮች ይንገሩን። ምናልባት እርሱ ደግሞ ጋኔን ነበር፣ ብርታቱም ከዚያ የተነሣ ነው ይሉ ይሆናል። ነገር ግን የፈለጉትን ያህል ይህን ቢሉ፣ በቀደሙት ማስረጃዎቻችን እንደ ገና ሊያፍሩ ስለሚችሉ፣ ሳቁ በራሳቸው ላይ ይመለሳል። አጋንንትን የሚያወጣ እርሱ እንዴት ጋኔን ሊሆን ይችላል? 8. አንዳንድ አጋንንትን ብቻ አውጥቶ ቢሆን ኖሮ፣ አይሁድ ሊሰድቡት በፈለጉ ጊዜ እንዳሉት፣ በአጋንንት አለቃ በታናናሾቹ ላይ አይሏል ተብሎ መታሰቡ ተገቢ በሆነ ነበር። ነገር ግን ስሙ በተጠራ ጊዜ የአጋንንት እብደት ሁሉ ተነቅሎ የሚባረር ከሆነ፣ በዚህም ደግሞ እንደ ተሳሳቱ፣ ጌታችንና መድኃኒታችን ክርስቶስም እነርሱ እንደሚያስቡት አንድ አጋንንታዊ ኃይል እንዳልሆነ ግልጥ ሊሆን ይገባል። 9. እንግዲህ መድኃኒታችን ተራ ሰው ብቻ ወይም አስማተኛ ወይም አንድ ጋኔን ካልሆነ፣ ይልቁንም በገዛ መለኮቱ በገጣሚዎች ዘንድ የሚገኘውን ትምህርት፣ የአጋንንትን ማታለልና የአሕዛብን ጥበብ ከንቱ አድርጎ ካደበዘዘ፣ ይህ እውነተኛው የእግዚአብሔር ልጅ፣ ማለትም ከመጀመሪያ ጀምሮ የአብ ቃልና ጥበብ ኃይልም የሆነው እርሱ እንደ ሆነ ግልጥ ሊሆንና በሁሉ ዘንድ ሊታመን ይገባዋል። ስለዚህም ደግሞ ሥራዎቹ የሰው ሥራዎች አይደሉም፤ ይልቁንም ከራሳቸው ከድርጊቶቹና ከ[ሌላው] የሰው ዘር ጋር በማነጻጸር ከሰው በላይ የሆኑና በእውነትም የእግዚአብሔር ሥራዎች እንደ ሆኑ ይታወቃሉ።