እውነተኛው ትምህርት

§3. እውነተኛው ትምህርት። ፍጥረት ከምንም ተገኘ፤ ይህም እግዚአብሔር ህልውናን በልግስና ከሚሰጥበት ቸርነቱ የተነሣ ነው። ሰው ከሌሎቹ ፍጥረታት በላይ ተፈጠረ፤ ነገር ግን በራሱ ኃይል ጸንቶ ለመኖር አይችልም ነበር። ስለዚህ በእግዚአብሔር መልክ የመሆንን ልዩና ከባሕርይ በላይ የሆነ ስጦታ ተቀበለ፤ በጸጋውም ጸንቶ ቢኖር የብፅዕና ተስፋ ተሰጠው።

እንዲህ በከንቱ ይገምታሉ። ነገር ግን እግዚአብሔርን የመምሰል ትምህርትና እንደ ክርስቶስ ያለው እምነት የሞኝነት ንግግራቸውን የክህደት ንግግር ብሎ ይፈርድበታል። ዓለም በራሱ እንዳልተገኘ ያውቃልና፤ መግቦት አልተለየውምና፤ ደግሞም ከነበረ ጥሬ ነገር አልተሠራም፤ እግዚአብሔር ደካማ አይደለምና፤ ይልቁንም ከምንም፣ አስቀድሞም ፈጽሞ ያልነበረውን ዓለም እግዚአብሔር በቃሉ እንዲኖር እንዳደረገው ያውቃል፤ ይህንም በመጀመሪያ በሙሴ አማካይነት፦ «በመጀመሪያ እግዚአብሔር ሰማይንና ምድርን ፈጠረ» ብሎ ይናገራል፤ ሁለተኛም እጅግ በሚያንጸው «እረኛው» በተባለው መጽሐፍ፦ «ከሁሉ አስቀድሞ ሁሉን የፈጠረና ያዘጋጀ፣ ከምንምም አስገኝቶ እንዲኖሩ ያደረገ እግዚአብሔር አንድ መሆኑን እመን» ይላል። 2. ጳውሎስም፦ «ዓለሞች በእግዚአብሔር ቃል እንደ ተዘጋጁ፥ ስለዚህም የሚታየው ነገር ከሚታዩት እንዳልሆነ በእምነት እናስተውላለን» ሲል ይህንኑ ያመለክታል። 3. እግዚአብሔር ቸር ነውና፤ ይልቁንም በባሕርዩ የቸርነት ምንጭ ነው፤ ቸር የሆነ ደግሞ ለማንም ምንም አይነፍግም፤ ስለዚህ ለማንም ህልውናን ሳይነፍግ ሁሉን በገዛ ቃሉ በጌታችን በኢየሱስ ክርስቶስ ከምንም ፈጠረ። ከእነዚህም መካከል በምድር ላይ ካሉት ነገሮች ሁሉ በላይ ለሰው ዘር በተለየ ሁኔታ ራራለት፤ ከአስገኘቱም ሁኔታ የተነሣ በአንድ ሁኔታ ጸንቶ ለመኖር እንደማይችል አይቶ ተጨማሪ ስጦታ ሰጣቸው፤ ሰውንም በምድር ላይ እንዳሉት አእምሮ እንደሌላቸው ፍጥረታት ሁሉ እንዲያው ብቻ አልፈጠረውም፤ ነገር ግን የገዛ ቃሉን ኃይል እንኳ በማካፈል በገዛ መልኩ ፈጠራቸው፤ ይኸውም የቃሉ ነጸብራቅ የሚመስል ነገር ኖሯቸው፣ ነባቢያን (አእምሮ ያላቸው) ሆነው፣ በገነት ያሉ ቅዱሳን የሚኖሩትን እውነተኛውን ሕይወት እየኖሩ ዘወትር በብፅዕና ጸንተው እንዲኖሩ ነው። 4. ደግሞም የሰው ፈቃድ ወደ ሁለቱም ወገን ሊያዘነብል እንደሚችል ስለ ተገነዘበ፣ የሰጣቸውን ጸጋ በሕግና ባኖራቸው ስፍራ አስቀድሞ አጸናላቸው። ወደ ገዛ ገነቱ አግብቶ ሕግን ሰጣቸውና፤ ይኸውም ጸጋውን ጠብቀው በበጎነት ቢጸኑ በገነት ያለውን ሕይወት ያለ ኀዘን፣ ያለ ሕመምና ያለ ጭንቀት እንዲቀጥሉበት፣ ከዚህም በላይ በሰማይ የአለመበስበስ ተስፋ እንዲኖራቸው ነው፤ ነገር ግን ቢተላለፉና ወደ ኋላ ቢመለሱ፣ ክፉዎችም ቢሆኑ፣ በባሕርያቸው የነበረባቸውን በሞት ያለውን መበስበስ በራሳቸው ላይ እንደሚያመጡ እንዲያውቁ ነው፤ ከዚያም ወዲያ በገነት እንዳይኖሩ፣ ከእርሷ ተባርረው ከዚያ ጊዜ ጀምሮ እንዲሞቱና በሞትና በመበስበስ እንዲኖሩ ነው። 5. ቅዱሱ መጽሐፍም በእግዚአብሔር አንደበት ሲናገር ስለዚህ ነገር ያስጠነቅቃል፦ «በገነት ካለው ዛፍ ሁሉ መብላትን ትበላለህ፤ ነገር ግን መልካምንና ክፉን ከሚያስታውቀው ዛፍ አትብሉ፤ በበላችሁበት ቀን ሞትን ትሞታላችሁና።» «ሞትን ትሞታላችሁ» ሲል ግን መሞትን ብቻ ሳይሆን በሞት መበስበስ ውስጥ ዘወትር መኖርን እንጂ ሌላ ምን ሊያመለክት ይችላል?