ሊነሡ የሚችሉ ሌሎች ተቃውሞዎች

§24. ሊነሡ የሚችሉ ሌሎች ተቃውሞዎች አስቀድመው ተመለሱ። የሚሞትበትን ዓይነት ሞት ራሱ አልመረጠም፤ በማናቸውም መልኩ ቢመጣ ሞትን ድል የሚነሣ መሆኑን ሊያሳይ ነበረና፤ (የጎበዝ ታጋይ ምሳሌ)። ሊያዋርዱት የተመረጠው ሞት በሞት ላይ የድል ምልክት ሆነ፤ ደግሞም ሥጋውን ሳይከፋፈል ጠበቀው።

ሌሎች ደግሞ ሊሉት የሚችሉትን አስቀድመን መመለስ ይገባናል። ምናልባት አንድ ሰው እንዲህ ይል ይሆናል፦ የትንሣኤው ወሬ ደግሞ ይታመን ዘንድ ሞቱ በሁሉ ፊትና በምስክሮች ፊት መፈጸም ግድ ከነበረ፣ የመስቀልን ውርደት ለማምለጥ ብቻ እንኳ ቢሆን ለራሱ የከበረ ሞት ቢያዘጋጅ በእርግጥ በተሻለ ነበር። 2. ነገር ግን ይህን እንኳ ቢያደርግ ኖሮ በሞት ሁሉ ላይ ሳይሆን ለራሱ ባዘጋጀው ሞት ላይ ብቻ ኃይል እንዳለው በራሱ ላይ ጥርጣሬ ባስነሣ ነበር፤ እንዲሁም ደግሞ ስለ ትንሣኤው ላለማመን ምክንያት በተገኘ ነበር። ስለዚህ ሞት ወደ ሥጋው የመጣው ከራሱ ሳይሆን ከጠላቶች ምክር ነው፤ ይህም በመድኃኒታችን ላይ ያመጡትን ማናቸውንም ሞት ፈጽሞ ያስወግደው ዘንድ ነው። 3. በጥበብና በድፍረት ታላቅ የሆነ ጎበዝ ታጋይ ከአንዳንዶቹ እንደሚፈራ ጥርጣሬ እንዳያስነሣ ተጋጣሚዎቹን ለራሱ እንደማይመርጥ፣ ነገር ግን ምርጫውን ለተመልካቾች—ይልቁንም ጠላቶቹ ቢሆኑ—እንደሚተው፣ ይህም ከማንም ጋር ቢያጋጥሙት እርሱን ጥሎ ከሁሉ የሚበልጥ መሆኑ እንዲታመን እንደ ሆነ፣ እንዲሁ ደግሞ የሁሉ ሕይወት፣ ጌታችንና መድኃኒታችን ክርስቶስ፣ ሌላን ሞት የሚፈራ መስሎ እንዳይታይ ለገዛ ሥጋው ሞትን አላዘጋጀም፤ ነገር ግን ሌሎች፣ ይልቁንም ጠላቶቹ፣ አስፈሪ፣ አዋራጅና ሊጋፈጡት የማይቻል ብለው ያሰቡትን ያደረሱበትን ሞት በመስቀል ላይ ተቀብሎ ታገሠ፤ ይህም ይህ ሞት ደግሞ ሲጠፋ፣ እርሱ ራሱ ሕይወት እንደ ሆነ እንዲታመን፣ የሞትም ኃይል ፈጽሞ እንዲሻር ነው። 4. ስለዚህ የሚያስገርምና የሚያስደንቅ ነገር ሆነ፤ ውርደት አድርገው ሊያመጡበት ያሰቡት ሞት በእውነት በሞት ራሱ ላይ የድል መታሰቢያ ሆነ። ስለዚህም አንገቱ ተቈርጦ እንደ ዮሐንስ አልሞተም፤ እንደ ኢሳይያስም በመጋዝ አልተሰነጠቀም፤ ይህም በሞቱ እንኳ ሥጋውን ሳይከፋፈልና ፍጹም ጤናማ አድርጎ ይጠብቅ ዘንድ፣ ቤተ ክርስቲያንንም ሊከፋፍሉ ለሚሹ ምክንያት እንዳይሰጥ ነው።