ስለ ትንሣኤ ትምህርት ሲባል በሕዝብ ፊት መሞቱ አስፈላጊ ነበረ

§23. ስለ ትንሣኤ ትምህርት ሲባል በሕዝብ ፊት መሞቱ አስፈላጊ ነበረ።

ያለ ምንም በሽታና ያለ ምንም ሕመም ሥጋውን በስውር ለብቻው «በማዕዘን»፣ ወይም በምድረ በዳ፣ ወይም በቤት ውስጥ፣ ወይም በየትም ስፍራ ቢሰውረውና ከዚያም በኋላ ድንገት ተገልጦ ከሙታን እንደ ተነሣ ቢናገር ኖሮ፣ በሁሉ ዘንድ ተረት የሚያወራ መስሎ በታየ ነበር፤ ለሞቱም የሚመሰክር አንድም ሰው ስላልነበረ ስለ ትንሣኤ የተናገረው ይበልጥ ባልታመነ ነበር። ሞት ትንሣኤን ሊቀድም ግድ ነው፤ ሞት ባይቀድም ትንሣኤ አይሆንምና። ስለዚህ የሥጋው ሞት በአንድ ስፍራ በስውር ተፈጽሞ፣ ሞቱ ያልተገለጠና በምስክሮች ፊት ያልተፈጸመ ቢሆን ኖሮ፣ ትንሣኤውም የተሰወረና ማስረጃ የሌለው በሆነ ነበር። 2. ወይስ ከተነሣ በኋላ ትንሣኤውን የሚያውጅ ከሆነ ሞቱን ለምን በስውር ያደርገዋል? ወይስ በእነዚህ ነገሮች የእግዚአብሔር ቃል እንደ ሆነ ይታመን ዘንድ ርኵሳን መናፍስትን በሁሉ ፊት ያወጣ፣ ዕውር ሆኖ የተወለደውንም ሰው ያሳየ፣ ውኃውንም ወደ ወይን ጠጅ የለወጠ ከሆነ፣ እርሱ ራሱ ሕይወት እንደ ሆነ ይታመን ዘንድ ሟች የሆነውን ሰውነቱን የማይበሰብስ አድርጎ በሁሉ ፊት ለምን አይገልጠውም? 3. ወይስ ደቀ መዛሙርቱ አስቀድሞ እንደ ሞተ መናገር ባይችሉ ኖሮ ስለ ትንሣኤ በድፍረት እንዴት ይናገሩ ነበር? ወይስ በድፍረት የሚናገሩላቸውን ሰዎች የሞቱ ምስክሮች አድርገው ባያገኙ ኖሮ፣ አስቀድሞ ሞት ከዚያም ትንሣኤ ሆነ ብለው ሲናገሩ እንዴት ይታመኑ ነበር? ሞቱና ትንሣኤው በሁሉ ፊት ተፈጽሞ ሳለ እንኳ የዚያን ዘመን ፈሪሳውያን ካላመኑ፣ ትንሣኤውን ያዩትንም እንዲክዱት ካስገደዱ፣ እነዚህ ነገሮች በስውር ተፈጽመው ቢሆን ኖሮ ላለማመን ስንት ምክንያት ባልፈጠሩ ነበር? 4. ወይስ በሁሉ ዓይን ፊት ሞትን ተገዳድሮ በሥጋው አለመበስበስ ከዚያ ወዲያ የተሻረና የሞተ መሆኑን ባያሳይ ኖሮ፣ የሞት ፍጻሜና በእርሱ ላይ የተገኘው ድል እንዴት ሊረጋገጥ ይችል ነበር?