Mnakwenda Kasi Mno

Wanasema tunakwenda kasi mno! Shutuma hii inatoka pande zote. Adui zetu hawaipendi kasi yetu, na rafiki zetu wanaiogopa. Wanamaanisha nini? Kama wangelalamika kwamba hatuendi kasi ya kutosha, ningewaelewa. Kama adui zetu wangedai kwamba, baada ya yote tunayoyasema juu ya maovu ya dhambi, vitisho vya Siku ya Hukumu, na hukumu ya milele ya jehanamu, sisi wenyewe hatuyaamini mambo haya, ningeelewa hilo, na ningejinyenyekeza chini ya mashtaka yao.

Kama rafiki zetu wangekusanyika pamoja na kusema, "Kwa nini hamwongezi kasi? Tazameni mamilioni wanaokufa nyumbani na ng'ambo. Ni wazi mnayo njia ya ajabu ya kuwafikia watu wengi. Mmefanikisha yale ambayo hakuna shirika lingine limeweza. Mnaweza kujizoesha kwa watu wa kila aina, nchi zote na hali zote za hewa. Kwa nini hamsongi mbele kwa kasi zaidi? Kwa nini hamwafunzi makadeti wengi zaidi - kuwatuma maafisa wengi zaidi - kuwatafuta wahalifu, walevi na wanawake walioanguka wengi zaidi? Nendeni kasi zaidi; ongezeni mvuke!" Basi, inaonekana kwangu kwamba hiyo ndiyo ingekuwa njia ya kawaida ya kusema kwa adui na rafiki pia. Lakini sivyo! Kilio si "Nendeni kasi zaidi" bali "Mnakwenda kasi mno!" Wanamaanisha nini?

Kasi ni jambo jema, na ikiambatana na usalama, kadiri inavyozidi ndivyo inavyokuwa bora. Huhesabiwa kuwa jambo jema katika usafiri. Sijui treni yoyote inayokwenda kasi ya kutosha kwangu. Wakati ni wa thamani mno kiasi kwamba, usipotumika kwa kulala au kufanya kazi, kila dakika yake naihurumia. Kila ninapokuwa ndani ya treni hisia yangu ni hii: "Haya, dereva wa injini, fanya uwezavyo, na upae!"

Kasi huhesabiwa kuwa jambo jema katika kutafuta fedha. Nani angelalamika kama tungekuwa Kampuni ya Uwekezaji inayoendeleza mgodi wa dhahabu wenye faida? Watu wale wale wanaolalamikia kasi yetu katika kueneza wokovu na kuwaokoa wanadamu wote wangetaka kununua hisa, kuwa washirika wetu, au kutununua kabisa.

Kama tungekuwa jeshi la kuua, hakuna mtu angelalamika kwamba tunakwenda kasi mno katika njia ya ushindi, tukiwachinja Waarabu, au Waafghani, au Wazulu, au mtu mwingine yeyote asiyeishi upande wetu wa bahari. Kama tungewaua wengi wao, kuchoma nyumba nyingi, na kuteka nyara nyingi, tungeuvutia ulimwengu tena kama Napoleon alivyofanya kwa kasi ya mafanikio yake. Wachoraji na washairi na waandishi wa magazeti wangeijaza dunia nzima kwa sifa zetu.

Lakini kwa sababu Mungu ametupa mafanikio kidogo katika kuwaokoa wanaume na wanawake kutoka katika hukumu ya milele isiyo na mwisho, na kuupanua Ufalme wa Yesu Kristo, kuna kelele kubwa - hasa kutoka kwa wale ambao kila asubuhi huomba "Ufalme wako uje!" - kwamba tunakwenda kasi mno; wanasema tuna tamaa ya makuu na tunajitafutia mambo makubwa.

Je, tunaweza kwenda kasi mno, wenzangu katika kuokoa roho? Sitajaribu kulijibu swali hilo. Hakuna askari yeyote wa Jeshi la Wokovu ambaye angeuliza swali kama hilo. Ni tusi kwa Biblia - kwa walimu wa Ukristo. Nakataa kulijibu.

Kama bado yupo mtu anayetaka jibu, na awaulize roho zilizopotea kuzimu ambao ndugu zao wa kiume na wa kike wanawafuata huko. Na aende akawaulize umati waliooshwa kwa damu walioko Mbinguni, ambao macho yao hatimaye yamefunguka kabisa kuiona thamani ya wokovu. Na aitangulie Siku ya Hukumu, na kwa roho asimame mbele ya Kiti cha Enzi, kisha, kama anathubutu, amwulize Mungu Mwenyezi swali hilo. Nadhani kutoka Kuzimu, Mbinguni na kutoka kwenye Kiti Kikuu Cheupe cha Enzi, jibu lingerudi hivi; "Kasi zaidi! Nendeni haraka zaidi!" Hata kama itabidi kusimamisha mabunge, anasa, biashara, na shughuli na kazi zote za wakati huu, songeni mbele! Harakisheni kwenda mbele! Uokoeni ulimwengu!

Wengine hutuonya, "lakini kuna hatari katika kasi kubwa". Huenda ipo, lakini hilo si hakika; na hata kama ipo, nakataa kupunguza kasi ili kuiepuka hatari hiyo. Ikiwa jambo hili linastahili kufanywa, na tulifanye kwa nguvu zetu zote. Wanasema, "lakini mkiendelea kwa mwendo huu mtaanguka vipande vipande". Sawa, huenda ikawa hivyo. Huenda Mungu atamwacha Ibilisi na wale wanaomsaidia walivunje Jeshi la Wokovu. Walimvunja Yesu Kristo. Kulikuwa na masingizio na ghasia na majeraha, yaliyoishia kwa Kusulubiwa. Kisha umati mkubwa ukatazama na kusema, "Si nilikwambia!" Kama watalivunja Jeshi la Wokovu, pia kutakuwa na umati mkubwa unaotazama na kuwahimiza wafanye hivyo, na kusema neno lile lile. Hata hivyo, hakuna dalili zilizo wazi za hatari hii ya kutisha. Kwa miaka ishirini tumeendelea kulipa madeni yetu, kuvunja na kutwaa maeneo mapya, na kuyashikilia baada ya kuyakalia; na, Mungu ashukuriwe! Leo tumefungamana zaidi - tumeunganika zaidi katika roho ya kuhurumiana na umoja kuliko tulivyopata kuwa hapo kabla.

Je, kasi yetu kwa kweli ni kubwa mno? Je, maneno haya yote si udanganyifu tu? Kasi ni jambo la kulinganisha, na usahihi wa makadirio hutegemea kipimo unachotumia kuipima. Gari la farasi la abiria ni chombo chepesi likilinganishwa na mkokoteni wa zamani wa mbeba mizigo, lakini ni la polepole sana likiwekwa kando ya treni ya kifalme ya mwendo kasi. Wapinzani wetu wanatupima kwa kipimo gani? Vyovyote vile, nakataa kupimwa kwa kipimo cha mkokoteni wa mbeba mizigo.

Je, wokovu husafiri kasi kama dhambi? Tazama jinsi uovu unavyoenea. Sema juu ya moto wa nyika - unateketeza kila kitu kilicho mbele yake. Je, Wokovu unaenda sambamba na idadi ya watu wetu inayozidi kuongezeka? Fanya hesabu katika miji yako ya Kikristo iliyobarikiwa zaidi, nawe utaona kwamba tuko nyuma mno katika mashindano. Je, tunaenda sambamba na mashetani kwa nguvu na kazi isiyochoka? Je, tunaenda kasi kama mauti? Lo, usiseme zaidi! Tutaziba masikio yetu kwa tamko hili la kutoamini lililo baridi, lisilo na huruma, lenye moyo wa jiwe.

TUENDE KASI ZAIDI! Lazima tuongeze kasi ikiwa tunataka kwenda sambamba na shauku ya Moyo Mweza-Yote wa Upendo, ambaye hutaka watu wote waokolewe. Lazima twende kasi zaidi ikiwa tunataka kushiriki katika kutimizwa kwa unabii. Soma sura ya sitini ya Isaya, na ufikiri juu ya kasi itakayopaswa kufikiwa kabla yote hayo hayajatimia. Lazima twende kasi zaidi ikiwa tunataka kufuta aibu na dhihaka za makafiri wenye kudhihaki, ambao daima wanadai uthibitisho ulio hai kwamba Mungu yupo. Lazima tuongeze mwendo wetu kabla maombi yetu wenyewe hayajajibiwa, matarajio yetu wenyewe hayajatimia, jamaa zetu wenyewe hawajaongoka, na uaminifu wetu wenyewe haujathibitishwa.

Wenzangu, Jenerali anatoa amri kwa kila nchi, na kwa kila divisheni, na kwa kila kikosi, na kwa kila askari - kusonga mbele. Mwendo wa zamani hautakuwa kipimo cha siku zijazo. Lazima twende kasi zaidi. Vizuizi, magumu, na adui watafagiliwa mbali mbele yetu, na vinywa vya wale wanaotuhukumu vitafumbwa milele mbele za Bwana.