Kwa Ajili Yetu Mtoto Amezaliwa

Kwa maana kwa ajili yetu mtoto amezaliwa, tumepewa mtoto mwanamume; na uweza wa kifalme utakuwa begani mwake; naye ataitwa jina lake, Mshauri wa ajabu, Mungu mwenye nguvu, Baba wa milele, Mfalme wa amani.

Hiyo ndiyo iliyokuwa shangwe ya ushindi ya Kanisa la Agano la Kale! Matumaini yao yaliyo bora kabisa yalijengwa juu ya ahadi ya MASIHI; nyimbo zao zilizo tukufu kabisa zilitokana na matazamio ya Kuja kwake. Kwa imani, ambayo ni kuwa na hakika ya mambo yatarajiwayo, waliyahesabu matamko ya neema ya Mungu mwaminifu asiyebadilika kuwa tayari yametimizwa, ingawa utimizo wenyewe ulihusu kipindi ambacho, wakati huo, kilikuwa bado kijacho na cha mbali. Hasa kwa kuwa waumini, chini ya mpango ule, tayari waliihisi nguvu ya ukombozi ambao MASIHI angeukamilisha katika utimilifu wa wakati. Kule kujua kwamba alikuwa amejifunga kusimama kwa ajili ya wenye dhambi ndiko kulikozipa uzima na maana taratibu zote za sheria ya kiibada, ambazo vinginevyo, ingawa ziliwekwa na Mungu, zingekuwa nira nzito na yenye kulemea (Matendo 15:10) Kwa hiyo Isaya anawaandalia watumishi wa kweli wa Mungu walioishi zamani zake wimbo wake wa furaha; na ingawa ilikuwa siku ya taabu na ya kukemewa, walipewa fidia ya kutosha kwa mateso yao yote, kwa kuwa walikuwa na haki ya kusema, kwa ajili yetu mtoto amezaliwa, tumepewa mtoto mwanamume; na uweza wa kifalme utakuwa begani mwake, n.k.

Wimbo huu wa kale bado ni mpya. Umeimbwa, na utaendelea kuimbwa kizazi hata kizazi na Kanisa la Agano Jipya, kwa faida iliyo kubwa zaidi. Natumaini wengi wenu mnauelewa vyema, na kuufurahia kila siku. Kwa asili wanadamu hutafuta kitu cha kufurahia na kujisifia. Wenye hekima (Yeremia 9:23) wana sababu ndogo ya kujisifia hekima yao wanayodhani wanayo, wala wenye nguvu kujisifia nguvu zao zinazofifia, wala matajiri kujisifia mali yao ipitayo; lakini hii ndiyo sababu ya haki isiyokoma ya kujisifu kwa Wakristo wa kweli, kwamba kwa ajili yetu mtoto amezaliwa, tumepewa mtoto mwanamume, n.k.

Mwenye dhambi anapotiwa nuru na Roho Mtakatifu, akaelewa tabia na huduma za MASIHI, akaelewa uweza wake wa kuwaokoa walio karibu kupotea, na furaha ya wote wanaoletwa chini ya utawala wake wa neema; na anapoanza kuhisi matokeo yenye kuchangamsha ya imani katika jina lake, hapo wimbo huu unakuwa wimbo wake mwenyewe, nao unalingana kabisa na hisia na shukrani za moyo wake. Lakini watu wengi watamdharau na kumhurumia kama mshabiki dhaifu [mtu wa itikadi kali] . Na bado, labda, hawaifikirii vibaya hivyo ile furaha kuu ya Archimedes, ambaye inasimuliwa kwamba, alipogundua ghafla jibu la tatizo gumu wakati alipokuwa akioga, alijawa na furaha kiasi kwamba alisahau hali aliyokuwa nayo, akaruka mara moja kutoka bafuni, akakimbia katikati ya mji akipiga kelele, “Nimeipata! Nimeipata!” Kwa kawaida hashtakiwi kuwa na wazimu kwa sababu hiyo, ingawa bila shaka udhihirisho wa furaha yake ulizidi kiasi cha jambo lenyewe. Ukweli ni kwamba ulimwengu utakubali bidii inayokaribia kuchanganyikiwa kwa furaha karibu katika kila jambo, isipokuwa katika lile moja tu ambalo, kuliko mengine yote, lingeihalalisha. Mtu ambaye angedhaniwa kukosa ladha ya sanaa kama hangeguswa na muziki ambao maneno haya yametungiwa, wakati huo huo angehatarisha sifa yake ya busara mbele ya waamuzi fulani, kama angekiri kwamba ameguswa na maana ya wazi ya maneno yenyewe. Hakika ni waamuzi wasiofaa! ambao huridhika kukubali joto na hisia za roho, mradi jambo lenyewe ni dogo, na huvilaumu tu katika mambo yaliyo ya maana kuu kuliko yote! Lakini, natumaini, hali ya wasikilizaji wangu ni tofauti kabisa, na kwamba wengi wenu mnatamani kuingia katika roho ya maneno haya, na kuwa na ufahamu ulio hai zaidi wa fungu lenu wenyewe ndani yake. Bwana na awajalie haja yenu, na kuyaambatanisha tafakari zetu juu yake na uweza wake na baraka yake!

Kila kifungu katika maneno haya kingeweza kutoa somo la hotuba ndefu; lakini mpango wangu utaniruhusu tu kugusia kwa ufupi mambo yake mbalimbali, jambo ambalo litatuongoza kwenye marudio au muhtasari wa yale ambayo tayari yametafakariwa kwa upana zaidi kuhusu Nafsi, Huduma, na Utukufu wa MASIHI. Tunayo,

I.

Kufanyika kwake mwili. Kwa ajili yetu mtoto amezaliwa. Katika hali yetu ya kibinadamu, amezaliwa na mwanamke: Tumepewa mtoto mwanamume, si mtoto wa kiume tu, bali, kwa msisitizo, Mwana, Mwana wa Mungu. Hiki kilikuwa kipawa cha thamani kuliko vyote, uthibitisho na ushuhuda ulio mkuu kuliko yote wa upendo wa Mungu. Kutofautiana na kuungana kwa hali hizi mbili zilizo mbali mno, ambazo kwa pamoja ndizo Nafsi ya Kristo, Mungu-mtu, Mpatanishi, ni, kwa hukumu na maneno ya Mtume, siri ya utauwa iliyo kuu (1 Timotheo 3:16) , nguzo na msingi wa kweli. Sitarudia yale ambayo tayari nimeyasema juu ya jambo hili katika hotuba ya tano. Ndiyo kweli kuu iliyo kiini cha ufunuo, ambayo, kama jua, hutawanya nuru juu ya mfumo mzima, ambao hakuna sehemu yake iwezayo kueleweka sawasawa bila hiyo. Hivyo Bwana wa wote alijinyenyekeza, akatokea katika namna ya mtumwa, kwa ajili ya wenye dhambi.

II.

Kutukuzwa kwake. Uweza wa kifalme utakuwa begani mwake. Katika hali yetu ya kibinadamu aliteswa, na katika hali hiyo hiyo anatawala. Alipokwisha kuushinda ukali, uchungu wa mauti, aliuchukua ufalme wa utukufu kuwa wake mwenyewe, na kuufungua kwa wote wanaomwamini. Sasa twaweza kusema, Yeye atawalaye mbinguni na duniani, na ambaye vitu vyote vinamtii, ndiye yule Mtoto aliyezaliwa, yule Mwana aliyetolewa kwa ajili yetu. Baadhi ya maandiko yatakayofuata yatatuongoza, hapo baadaye, kutafakari moja kwa moja zaidi utukufu wa utawala wa Mkombozi katika falme za maongozi ya Mungu na za neema. Kwa hiyo kwa sasa nitaeleza tu kwamba kutukuzwa kwa Mkombozi kunadokeza heshima na usalama wa watu walioungana naye kwa imani. Wao, kwa upande mmoja, wanayo heshima iliyo yao hasa, ambayo malaika hawawezi kuishiriki. Rafiki yao aliye bora kuliko wote, mwenye uhusiano nao katika hali ile ile ya kibinadamu, ameketi juu ya kiti cha enzi cha utukufu. Kwa kuwa yeye yu upande wao, ni nani awezaye kuwa juu yao? Ni nini wasichoweza kukitazamia, ikiwa Yeye aliyewapenda hata akawakomboa kwa damu yake mwenyewe amekabidhiwa mamlaka yote, mbinguni na duniani pia! Kwa maana,

III.

Majina na sifa anazopewa hapa hayaelezi tu jinsi alivyo yeye mwenyewe, bali pia jinsi alivyojifunga kuwa kwao.

(1.)

Jina lake ataitwa Ajabu. Mahali pengine neno hilo limetafsiriwa Siri (Waamuzi 13:8) . Ni kweli kwake kwa maana zote mbili. Yeye ni wa Ajabu katika nafsi yake, utii wake, na mateso yake; katika neema yake, utawala wake, na utukufu wake. Kwa kadiri tunavyolielewa jina lake, yaani ufunuo ambao kwa huo, kama kwa jina, yeye hujulikana, twaweza, tena imetupasa, kuamini, kustaajabu, na kuabudu. Lakini ujuzi wetu una mipaka kiasi gani, na upungufu kiasi gani! Jina lake ni Siri. Ni nani awezaye kumvumbua kwa kumtafuta? (Ayubu 11:7) Ukuu wake haupimiki, hekima yake haitafutikani, utimilifu wake haumaliziki , uweza wake hauna mipaka Hakuna amjuaye Mwana ila Baba! Lakini wanao ujuzi wa kweli juu yake , wale wanaomtumaini , wanaompenda , na kumtumikia Na machoni pao yeye ni wa Ajabu! Mtume anaeleza hisia za mioyo yao, asemapo, Naam, bila shaka, nayahesabu mambo yote kuwa hasara na mavi kwa ajili ya uzuri usio na kiasi wa kumjua Kristo Yesu BWANA

(2.)

Jina lake jingine ni Mshauri. Mashauri makuu ya ukombozi, ambamo kila jambo lihusulo utukufu wa Mungu na wokovu wa wenye dhambi lilipangwa, yaliwekwa pamoja naye, na ndani yake, kabla ya kuwekwa misingi ya ulimwengu. Naye ndiye Mshauri wetu, au Mwombezi wetu kwa Baba, anayetutetea, na kuyashughulikia mambo yetu yote katika haki kamilifu, na kwa mafanikio yasiyokosea; hata hakuna shauri liwezalo kushindwa ambalo yeye amependa kulishughulikia. Kwake pia imetupasa kumwendea (wala hatutamwendea bure) kwa ajili ya hekima na uongozi, katika yote yahusuyo wajibu wetu, na heshima ya ukiri wetu katika maisha haya ya sasa; katika shida zetu zote, hatari, na masumbufu, imetupasa kumtazama yeye kwa ajili ya uongozi na msaada. Huku ndiko kuhekimishwa hata kupata wokovu . Siri yake iko kwa wale wanaotaka shauri lake, hata ingawa ulimwengu unaweza kuwaona kuwa dhaifu na wajinga kama watoto wachanga (naye huwafundisha kujiona hivyo wao wenyewe) wanao ujuzi wenye kuchangamsha na wa vitendo juu ya mambo mengi yaliyo ya maana, ambayo yamefichwa kabisa kwa wale walio wenye hekima na busara machoni pao wenyewe.

(3.)

Yeye ndiye Mungu mwenye nguvu. Ingawa katika huduma ya Mpatanishi anatenda katika nafasi ya mtumishi, ukamilifu wake na sifa zake ni za Kimungu kweli kweli. Ni Mungu mwenye nguvu peke yake angeweza kufanya maandalizi yanayoweza kutosheleza madai ya sheria takatifu tuliyoivunja; ni Mungu mwenye nguvu peke yake angeweza kuwa Mchungaji afaaye kuwaongoza mamilioni ya viumbe dhaifu, wasio na msaada, hata utukufuni; kupitia shida nyingi, hatari, na adui wanaokabiliana nao katika safari yao. Ongeza juu ya hayo, kwamba heshima, utegemezi, na utii ambao Mchungaji huyu mkuu anaudai kutoka kwa kondoo wake ni kamili na ya juu kuliko yote; nao wangekuwa na hatia ya kuabudu sanamu, kama wasingejua kwamba yeye ni Mungu mwenye nguvu. Ingawa Wakristo wa kweli, waliotiwa nuru na kufundishwa na Roho Mtakatifu, wanaweza kutofautiana, na kwa kweli hutofautiana, katika maoni yao na maelezo yao ya baadhi ya kweli zilizofunuliwa, naona kwamba wote ni lazima wakubaliane juu ya jambo hili. Si tu kwamba ni lazima lijulikane kuwa ndio msingi pekee ulio imara wa tumaini la mwenye dhambi, bali linahusu moja kwa moja Yule anayestahili ibada ya Kimungu. Kwa maana ikiwa Mkombozi hana ukamilifu wa Uungu usioshirikishwa na kiumbe yeyote, basi Agano Jipya, kwa maana yake iliyo wazi zaidi na ya moja kwa moja, lingeweza kushtakiwa, si tu kwa kuikubalia ibada ya sanamu, bali kwa kuifundisha na kuiamuru waziwazi.

(4.)

Zaidi ya hayo, ataitwa Baba wa milele. Yeye haoni haya kuwaita ndugu (Waebrania 2:11) , kwa kuwa alijishusha kuitwaa hali yao ya kibinadamu. Lakini wao pia wanaitwa watoto wake. Wanazaliwa katika jamaa yake kwa nguvu ya Neno lake mwenyewe na Roho wake. Kutoka kwake wanapata uzima wao wa kiroho, na kupokea tangu mwanzo hata mwisho kutoka katika utimilifu wake. Naye ni Baba wa milele. Baba zetu wa kimwili wako chini ya mauti; lakini uhusiano wake nao unadumu bila kutikisika, na kwa hiyo hawawezi kuachwa bila msaada; naye yu hivyo, sawasawa, kwa wote. Wanaishi duniani, na kuondolewa humo, katika mfuatano mrefu wa vizazi; lakini yeye ni Baba wa nyakati za milele, yeye yule, jana na leo na hata milele. Vizazi vyote vitamwita heri. Kwa hiyo Mtume anatufundisha kumhusisha yeye na lile neno tukufu la Mtunga-zaburi, Wewe, BWANA , hapo mwanzo uliweka misingi ya nchi, na mbingu ni kazi ya mikono yako (Zaburi 102:25-27) Hizo zitaharibika, bali wewe unadumu; na hizo zitachakaa kama nguo; na kama mavazi utazikunja, nazo zitabadilika; bali wewe u yeye yule, na miaka yako haitakoma (Waebrania 1:10-12)

(5.)

Mwisho, ataitwa Mfalme wa amani , ambaye ni haki yake ya kifalme kuwaambia watu wake amani (Zaburi 85:8) Wala hakuna amani istahiliyo jina hilo, isipokuwa ile anayoitoa yeye. Andiko linatangaza waziwazi, Hakuna amani kwa wabaya (Isaya 57:21) Kwa jina lolote tutakaloita ile hali ya kujiona salama bila kufikiri na ya kutohisi, ambamo wanadamu kwa kawaida huishi, wakiwa hawamjui Mungu wala wao wenyewe, hatuwezi kukubali kwamba hiyo ni amani. Ni matokeo ya upofu na ugumu wa moyo; haiwezi kustahimili kutafakariwa wala kuchunguzwa. Je, inaweza kusemwa kwamba wanayo amani, hata kama hawajali kwa namna ya kuangamiza mambo yajayo, wale ambao sasa wako chini ya utawala wa tamaa na hamu zisizotulia, zisizoshibishwa, na zinazopingana? Lakini Ufalme wa MASIHI ni Ufalme wa Amani, na ndani yake, raia zake wenye heri wanafurahia amani ipitayo akili zote (Wafilipi 4:7) , ambayo ulimwengu hauwezi kuitoa wala kuiondoa. Amefanya amani kwa damu ya msalaba wake (Wakolosai 1:20) , kwa ajili ya wote wanaomjia Mungu kwa njia yake. Mpaka wawe katika taabu na dhiki; mpaka waonje uchungu, na kuogopa matokeo ya dhambi zao, na kuona kwamba haiwezekani kujisaidia wenyewe, hawatamwendea; lakini kila wanapomtafuta, wakiwa wamechoka hivyo na kulemewa na mizigo, yeye husikia maombi yao. Nia zao, kwa muda, ni kama bahari katika dhoruba, wanasumbuliwa na hatia, hofu, na majaribu; lakini anapolifunua jina lake kuu, na neema yake isiyo na mipaka, mioyoni mwao, na kusema, Nyamaza, utulie (Marko 4:39) , kunakuwa shwari kuu. Wakiisha kuhesabiwa haki kwa imani, wana amani kwa Mungu, kwa njia ya Bwana wetu Yesu Kristo. Huwapa amani pia katika ulimwengu unaobadilika na wenye taabu; kwa kuwaalika, na kuwawezesha kumtwika yeye fadhaa zao zote, na kuyaweka mambo yao yote mikononi mwake, kwa uhakika ambao Neno lake huwapa, kwamba yeye huwajali, na atayashughulikia na kuyaongoza mambo yote kwa faida yao. Kwa kadiri imani yao inavyozifanya ahadi zake kuwa halisi kwao, wanaona utulivu na kuridhika. Wakijua kwamba nywele za vichwa vyao zimehesabiwa, kwamba mateso yao, sawasawa na faraja zao, ni ishara za upendo wake, kwamba atawapa nguvu kulingana na siku zao, kwamba atakuwa kiongozi wao na mlinzi wao hata kufa ; hawatikisiki sana na tukio lolote, wala hawasumbuliwi na wasiwasi, kwa sababu mioyo yao ni imara (Zaburi 112:7) , ikimtumaini Bwana.

Zaidi ya hayo, huwafundisha (jambo ambalo laweza kujifunzwa kwake peke yake) jinsi ya kuitafuta na kuidumisha amani kati ya wanadamu. Upendo wake huishinda nguvu ya nafsi, na kuwafinyanga wawe na roho ya kuwapenda wanadamu na ya ukarimu, ambayo mara nyingi huleta matokeo kwamba wale wasiowapenda kwa sababu ya kushikamana kwao naye na maagizo yake, na ambao wangependa kuwasema vibaya, huona haya, na kunyamazishwa, kwa kudumu kwao katika kutenda mema. Hivyo amani yao huongezeka kama mto, unaotiririka kwa mkondo ulio na kina zaidi na mpana zaidi kadiri unavyoikaribia bahari. Kwa maana amani yao huwa na nguvu zaidi na isiyotikisika kabisa wakati wanapoikaribia mauti, na wakiwa karibu kuzikabidhi roho zao mikononi mwake. Huu ndio wakati ambapo, kama si kabla yake, amani ya uongo ya mtu wa kidunia itageuka kuwa hofu na fadhaa. Lakini umwangalie mtu mkamilifu, umtazame mtu mnyofu, kwa maana mwisho wa mtu huyo ni amani (Zaburi 37:37) . Lazima ikubaliwe kwamba wengi wa watu wake, kwa nguvu ya majaribu na kutokuamini kulikobaki, wakati mwingine huwa na hofu zisizo na raha kuhusu saa ya kufa; lakini wakati wa kuruhusiwa kwao kuondoka unapowadia kweli, ni mara chache tunawaona wakiuogopa wito huo.

Kuna nguvu iliyo lazima kuitegemeza nafsi mauti yanapokaribia, ambayo kwa kawaida huzuiliwa hadi wakati wa hitaji. Lakini hapo hutolewa [hutolewa kwa neema] . Wale ambao mara nyingi hufika kwenye vitanda vya waumini wanaokufa, wanaweza kutoa ushuhuda, kama mashahidi walioona kwa macho, juu ya uaminifu wa Bwana wao. Ni mara ngapi tumewaona wakishangilia kwa matazamio ya kutokufa! wenye furaha, licha ya maumivu na ugonjwa, kadiri tuwezavyo kuwazia kuwa inawezekana, wakiwa bado katika mwili, na wenye uhakika wa Mbinguni, kana kwamba tayari wamesimama mbele ya Kiti cha Enzi.

Hiyo ndiyo tabia ya MASIHI! Huyu ndiye Mungu tunayemwabudu; Rafiki yetu mwenyezi asiyebadilika! Ukuu wake na wema wake, utukufu wake na neema yake, vikijulikana mara moja, huufanya moyo usitangetange tena; na kuujaza kustaajabu, shukrani, na shauku. Kutoka hapo hutokea utii wa furaha usio na kizuizi kwa amri zake, na kujisalimisha kwa makusudi na kwa hiari kwa mapenzi yake matakatifu. Kwa maana watu wake hawamtumikii, wala hawajitoi kwake kwa kulazimishwa; au angalau, ni kulazimishwa kwa kupendeza tu kwa upendo, ambako huufanya wajibu wao kuwa furaha yao; na mzigo wao na huzuni yao ni kwamba hawawezi kumtumikia vizuri zaidi.

Na sote tuwe na nia hii. Sithubutu kutumaini kwamba ndivyo ilivyo kwetu sote kwa sasa. Lakini hii ndiyo siku ya neema yake. Kwa sababu hii alikuja ulimwenguni, ili apate kuivuta mioyo mingi kwake (Yohana 12:32) Na kwa kusudi hili anatujalia Injili yake, ambayo kwa hiyo bado anasema, Niangalieni mimi, mkaokoke (Isaya 45:22) ; Njooni kwangu, nami nitawapumzisha (Mathayo 11:28) . Kuonekana miongoni mwa wafuasi wake waaminifu, katika siku ile kuu atakapokuja kuuhukumu ulimwengu, ndilo jambo moja ambalo, kuliko mengine yote, linastahili kutushughulisha.

Basi isikieni sauti yake leo. Labda mnatambua umuhimu wa kubadilika moyo na maisha, wakati fulani ujao, ili mpate kufa salama. Badiliko kama hilo ni la lazima vilevile, ikiwa mnataka kuishi kwa raha. Maadamu hamjawa tayari kufa, hamwezi kufurahia maisha kwa kweli. Ingekuwa rahisi kuthibitisha kwa urefu kwamba kuahirisha ni hatari kubwa. Hata tukikubali kwamba, kwa kadiri ya hisia zako za sasa, kweli unajiona umeazimia kumtafuta Bwana wakati fulani ujao, je, unafikiri ni mambo mangapi yasiyo ya hakika unayoyategemea? Je, una hakika kwamba hutakatiliwa mbali ghafla, kwa pigo lisilotazamiwa wala kufikiriwa; au kupatwa na homa, ambayo inaweza upesi kukuleta katika hali ya kuweweseka au kupoteza fahamu, na kuifanya toba uliyoikusudia isiwezekane? naam, katika hali yoyote ile haitawezekana, isipokuwa Mungu apende kuigusa nia yako kwa Roho wake mwema. Ukimhuzunisha Roho huyu sasa, kwa kuzipinga kazi zake, una sababu gani ya kutazamia kwamba atarudi wakati huo? Je, hatuoni mifano mingi ya kile ambacho mshairi, kwa usahihi mkubwa, anakiita, ^* kifo cha ghafla cha polepole? Ni watu wangapi, wakiwa wanadhoofika chini ya nguvu ya ugonjwa usiotibika, hujifurahisha kwa tumaini la kupona hadi pumzi ya mwisho; na ingawa marafiki zao wanasoma kifo nyusoni mwao kwa wiki au miezi, licha ya maonyo hayo yanayorudiwa na kudumu muda mrefu, wanakufa ghafla, kwa kadiri ya matazamio yao wenyewe, kana kwamba wameuawa na umeme. Tetemeka, usije mwisho wako ukawa hivyo, ikiwa unamchezea Mungu, anayekuita sasa, kwa Injili yake, umtafute leo, maadamu iitwapo leo.

^* “The Complaint - or Night Thoughts on Life, Death, and Immortality” cha Edward Young (1856)

Lakini ningependa kuwaongoza mfikiri juu ya kukawia kwenu, si tu kama jambo la hatari, bali kama jambo lisilo na busara. Kwa nini mnaogopa kuwa na furaha mapema mno? Mna wazo geni na gumu namna gani juu ya Mungu, ikiwa mnadhani mnaweza kupata furaha zaidi katika kuishi kwa kufuata mapenzi yenu wenyewe kuliko katika kuzitii amri zake! Je, ulimwengu unaweza kuwapa amani na kuridhika kama vile nilivyojaribu kueleza? Je, mnadhani kwamba kusadiki kwa kweli kwamba Mungu ni Rafiki yenu, na kwamba Mbinguni patakuwa nyumbani kwenu, kutaharibu ladha ya furaha zenu za duniani, au kuyafanya maisha yenu yakose raha? Ni jambo gani gumu ambalo Bwana anataka kwenu, hata mkawa wazito hivyo kulitii? Hata tukiweka kando, kwa muda, kufikiri juu ya hali ijayo, na hukumu ya mwisho, bado hata kwa mtazamo wa maisha haya mngepata faida kubwa, kama roho zenu na mwenendo wenu vingeongozwa na Injili. Ni taabu zivunjazo moyo kiasi gani, hasara, magomvi, maumivu ya mwili, na majuto ya dhamiri, ambayo baadhi yenu mngeyaepuka, kama mngeliamini na kulitii Neno la Mungu! Ni dhiki gani ambazo tamaa zenu za ukaidi zinaweza upesi kuwatumbukiza, ikiwa mnathubutu kuendelea katika dhambi zenu! Njia ya wakosaji ni ngumu: jambo hili halitangazwi tu katika Maandiko, bali linathibitishwa na historia na mambo tunayoyaona kila siku.

Basi, waacheni wajinga, mkaishi. Na wakati mlango wa rehema bado uko wazi mbele yenu, mwombeni Yeye awezaye kuwabariki, kweli kweli, kwa kuwaokoa na hatia, na nguvu ya maovu yenu. Msije, mkikaripiwa mara nyingi , na kuendelea kuishupaza mioyo yenu, mkavunjika ghafula, wala msipate dawa (Mithali 29:1)