Siri ya Utauwa

Na bila shaka siri ya utauwa ni kuu; Mungu alidhihirishwa katika mwili, akajulikana kuwa na haki katika Roho, akaonekana na malaika, akahubiriwa katika Mataifa, akaaminiwa katika ulimwengu, akachukuliwa juu katika utukufu.

Asubuhi tuliona jinsi Mtume Paulo alivyomwonya Timotheo aenende vema katika huduma yake; akimwonyesha ni heshima gani Mungu aliyomkweza nayo, kwa kuwa alimweka kuisimamia nyumba yake. Alimwonyesha pia kwamba huduma yenyewe ni ya heshima; kwa sababu kanisa huishikilia kweli ya Mungu katika ulimwengu huu, na kwamba hakuna kitu cha thamani zaidi, wala kinachostahili kutafutwa zaidi, kuliko kumjua Mungu, na kumwabudu na kumtumikia, na kuwa na hakika ya kweli yake, ili kwa hiyo tupate wokovu. Haya yote yamehifadhiwa salama kwa ajili yetu: na hivyo, hazina kubwa namna hii imekabidhiwa katika uangalizi wetu kwa njia ya kanisa; kama yasemavyo maneno ya Mtume Paulo. Kweli hii inastahili kabisa kuthaminiwa zaidi kuliko inavyothaminiwa.

Ni jambo la siri jinsi gani hili, na la ajabu kama nini; kwamba Mungu alidhihirishwa katika mwili, akawa mwanadamu! Je, halipiti ufahamu wetu kiasi kwamba tunapoambiwa habari zake, tunashangaa? Lakini hata hivyo, tunao ushahidi kamili na wa kutosha, kwamba Yesu Kristo, aliyefanywa mwanadamu na kuwa chini ya mauti, ndiye pia Mungu wa kweli, aliyeuumba ulimwengu, na aishiye milele. Juu ya hili, uweza wake wa mbinguni hutushuhudia. Tena, tunao ushahidi mwingine: yaani, alihubiriwa katika Mataifa, waliokuwa hapo kwanza wamefukuzwa mbali na ufalme wa Mungu: na kwamba imani imeenea katika ulimwengu wote, ambayo wakati ule ilikuwa imefungiwa kati ya Wayahudi; na tena kwamba Kristo Yesu aliinuliwa juu, akaingia katika utukufu, naye ameketi mkono wa kuume wa Mungu Baba.

Wanadamu wakiyadharau mambo haya, kutoshukuru kwao kutahukumiwa: kwa maana hata malaika wenyewe kwa njia hii wamepata kujua jambo ambalo hapo kwanza hawakulijua. Kwa maana ilimpendeza Mungu kuwaficha njia ya ukombozi wetu, ili wema wake upate kuwa wa ajabu zaidi kwa viumbe vyote: hivyo tunaona maana ya Mtume Paulo. Analiita kanisa la Mungu mlinzi wa kweli yake: anaonyesha pia kwamba kweli hii ni hazina ambayo imetupasa kuithamini sana. Na kwa nini hivyo? tuyaangalie yaliyomo katika Injili; Mungu alijinyenyekeza kwa namna hii, hata akautwaa mwili wetu; hata sisi tumekuwa ndugu zake. Yeye ni Bwana wa utukufu, kwa nini basi ajinyenyekeze hivyo, hata kuunganishwa nasi, na kutwaa namna ya mtumwa, hata kuteseka chini ya laana iliyotupasa sisi? Mtume Paulo anayajumlisha mambo yote yale ambayo Yesu Kristo aliyapokea katika nafsi yake; yaani, kwamba alikuwa chini ya udhaifu wetu wote, isipokuwa dhambi peke yake.

Ni kweli kwamba hamna waa ndani yake, bali usafi wote na ukamilifu. Lakini ndivyo ilivyo, kwamba alikuwa dhaifu kama sisi tulivyo, ili apate kutuhurumia na kuusaidia unyonge wetu; kama ilivyoelezwa katika waraka kwa Waebrania, sura 4:15. Yeye asiyekuwa na dhambi aliteswa adhabu iliyotupasa sisi; naye alikuwa, kana kwamba, amelaaniwa na Mungu Baba, alipojitoa mwenyewe kuwa dhabihu; ili kwa njia yake sisi tupate kubarikiwa; na kwamba neema yake iliyokuwa imefichwa kwetu, ipate kumiminwa juu yetu. Tunapoyatafakari mambo haya, je, hatuna sababu ya kushangaa? Je, tunatafakari Mungu ni wa namna gani?

Hatuwezi kwa njia yo yote kuufikia ukuu wake, ambao ndani yake vimo vitu vyote; ambao hata malaika huuabudu.

Kuna nini ndani yetu? Tukimtazama Mungu, kisha tukajilinganisha naye, ole! je, tutaukaribia utukufu huu ulio juu kupita mbingu? La, je, tunaweza hata kuwa na ujuzi nao kidogo? Kwa maana hamna ndani yetu ila uozo tu; hamna ila dhambi na mauti. Basi na aje Mungu aliye hai, chemchemi ya uzima, utukufu wa milele, na uweza usio na mpaka; tena si kutukaribia tu sisi na taabu zetu, na unyonge wetu, na udhaifu wetu, na shimo hili lisilo na mwisho la uovu wote ulio ndani ya wanadamu; ukuu wa Mungu usikaribie tu hili, bali uunganishwe nalo, na kufanywa kitu kimoja nalo, katika nafsi ya Bwana wetu Yesu Kristo! Yesu Kristo ni nani? Mungu na mwanadamu! Lakini Mungu na mwanadamu kwa namna gani? kuna tofauti gani kati ya Mungu na mwanadamu?

Twajua kwamba katika asili yetu hamna kitu kabisa ila unyonge na taabu; hamna ila shimo lisilo na mwisho la uvundo na uchafu; na bado katika nafsi ya Bwana wetu Yesu Kristo, tunauona utukufu wa Mungu aabudiwaye na malaika, na pia udhaifu wa mwanadamu; na kwamba yeye ni Mungu na mwanadamu. Je, hili si jambo la siri na lililofichwa, linalostahili kuelezwa kwa maneno, tena linalotosha kuinyakua mioyo yetu! Hata malaika wenyewe wasingeweza kamwe kulifikiri, kama Mtume Paulo anavyoeleza hapa. Kwa kuwa ilimpendeza Roho Mtakatifu kuudhihirisha wema wa Mungu, na kutuonyesha jinsi tunavyopaswa kuuthamini kama kito cha thamani kuu, basi na tujihadhari upande wetu tusiwe watu wasio na shukrani, wenye akili zilizofungwa hata tusikubali kuuonja, ikiwa hatuwezi kuufahamu kikamilifu na kwa ukamilifu wote.

Yatutosha kuwa na ujuzi kidogo wa jambo hili; kila mmoja apaswa kuridhika na nuru aliyopewa, tukikumbuka udhaifu wa, akili yetu; na kuitazamia siku ile ambayo yale tunayoyaona sasa kwa sehemu, yatafunuliwa kwetu kwa ukamilifu wote. Lakini hata hivyo, imetupasa kuzielekeza akili zetu na juhudi zetu upande huu. Kwa nini Mtume Paulo analiita jambo hili siri ya imani, kwamba Yesu Kristo, aliye Mungu wa milele, alidhihirishwa katika mwili? Ni kana kwamba angesema, tunapokusanywa kwa Mungu, na kufanywa mwili mmoja na Bwana Yesu Kristo, tutaliona lengo tulilofanyiwa; yaani, kwamba tupate kujua ya kuwa Mungu ameungana na kufanywa kitu kimoja nasi katika nafsi ya Mwanawe.

Basi, imetupasa kuhitimisha kwamba hakuna mtu awezaye kuwa Mkristo, asipoijua siri hii ambayo Mtume Paulo anaisema. Kama sasa tungewachunguza, na kuwauliza wanaume na wanawake kama wanajua maana ya maneno haya, kwamba Mungu alidhihirishwa katika mwili, ni vigumu mmoja kati ya kumi kutoa jibu zuri kama lile ambalo lingetazamiwa kutoka kwa mtoto. Lakini hatupaswi kushangaa jambo hili; kwa maana twaona uzembe na dharau iliyoko katika sehemu kubwa ya wanadamu. Kila siku katika mahubiri yetu tunaonyesha na kufundisha kwamba Mungu aliitwaa asili yetu: lakini watu huyasikiaje? Ni nani anayejisumbua sana kusoma Maandiko? Ni wachache mno wanaoyashughulikia mambo haya; kila mtu ameshughulika na mambo yake mwenyewe.

Ikiwa kuna siku moja katika juma iliyotengwa kwa mafundisho ya dini, baada ya kutumia siku sita katika shughuli zao wenyewe, wao huelekea kuitumia siku ile iliyotengwa kwa ibada katika michezo na anasa; wengine huzurura mashambani, wengine huenda vilabuni kunywa pombe: na bila shaka wakati huu wapo wengi mahali pale nilipopataja mwisho, kama walivyo wengi waliokusanyika hapa kwa jina la Mungu. Kwa hiyo, tunapoona wengi hivi wakilikwepa na kulikimbia fundisho hili, je, tunaweza kushangaa kwamba upo ujinga wa kinyama namna hii, hata hatuyajui mambo ya msingi ya Ukristo? Tunaelekea kuliona kama lugha ngeni, watu wanapotuambia kwamba Mungu alidhihirishwa katika mwili.

Lakini neno hili haliwezi kufutwa katika daftari la Mungu. Hatuna imani, ikiwa hatujui kwamba Bwana wetu Yesu Kristo ameunganishwa nasi, ili tupate kuwa viungo vyake. Yaonekana kwamba Mungu angetaka kutuamsha tuifikiri siri hii, kwa kuwa tumelala na kusinzia hivi. Twaona jinsi ibilisi anavyowachochea wachochezi hawa wa zamani wa magomvi kuukana ubinadamu wa Yesu Kristo, na Uungu wake: na mara nyingine kuzichanganya zote mbili; ili tusitambue asili mbili tofauti ndani yake: au vinginevyo kutufanya tuamini kwamba yeye si mwanadamu yule aliyezitimiza ahadi zilizo katika torati; na kwa hiyo hakushuka kutoka katika ukoo wa Ibrahimu na Daudi.

Je, ni kweli kwamba makosa na uzushi ule uliokuwako katika kanisa la Kristo hapo mwanzo, unatangazwa siku hizi? Na tuyaangalie vema maneno ambayo Mtume Paulo anayatumia hapa: Mungu alidhihirishwa katika mwili. Anapomwita Yesu Kristo Mungu, anaikubali asili hii aliyokuwa nayo kabla ulimwengu haujaumbwa. Ni kweli, yuko Mungu mmoja tu, lakini katika kiini hiki kimoja imetupasa kumfahamu Baba, na hekima isiyoweza kutengwa naye, na uweza wa milele, uliokuwako siku zote, na utakaokuwa ndani yake milele.

Basi, Yesu Kristo alikuwa Mungu wa kweli! kwa kuwa alikuwa hekima ya Mungu kabla ulimwengu haujaumbwa, na kabla ya milele. Imesemwa, alidhihirishwa katika mwili. Kwa neno mwili, Mtume Paulo anatufahamisha kwamba alikuwa mwanadamu wa kweli, akaitwaa asili yetu. Kwa neno alidhihirishwa, anaonyesha kwamba ndani yake mlikuwa na asili mbili. Lakini hatupaswi kudhani kwamba yuko Yesu Kristo mmoja aliye Mungu, na Yesu Kristo mwingine aliye mwanadamu! bali imetupasa kumjua yeye peke yake kama Mungu na mwanadamu. Na tuzipambanue hivyo asili mbili zilizo ndani yake, ili tupate kujua kwamba Mwana wa Mungu ni ndugu yetu.

Mungu huuacha uzushi wa zamani, uliolisumbua kanisa nyakati zilizopita, ufanye ghasia tena siku zetu, ili kutuamsha tuwe na bidii. Ibilisi huzunguka akitaka kuiharibu kanuni hii ya imani yetu, akijua kwamba ndiyo nguzo kuu na tegemeo la wokovu wetu.

Ikiwa hatuna ujuzi huu anaousema Mtume Paulo, tutakuwaje? Sisi sote ni watoto wa Adamu; na kwa hiyo tumelaaniwa: tumo katika shimo lisilo na mwisho la mauti. Hamna ndani yetu ila mauti na hukumu, mpaka tujue kwamba Mungu alishuka kuja kututafuta na kutuokoa. Mpaka tufundishwe hivyo, sisi ni dhaifu na wenye taabu. Kwa hiyo, ibilisi alijitahidi kwa kila uwezo wake kuufuta ujuzi huu, kuuharibu, na kuuchanganya na uongo, ili apate kuubatilisha kabisa. Tunapoona ukuu wa namna hii ndani ya Mungu, tunawezaje kuthubutu kumkaribia, kwa kuwa tumejaa taabu! Imetupasa kukimbilia kiungo hiki kinachounganisha ukuu wa Mungu na hali ya asili ya mwanadamu pamoja.

Tufanye tuwezavyo, hatutakuwa na tumaini lo lote kamwe, wala hatutaweza kuushika ukarimu na wema wa Mungu, kumrudia, na kumwita, mpaka tuujue ukuu wa Mungu ulio ndani ya Yesu Kristo; na pia udhaifu wa asili ya mwanadamu, aliyoipokea kutoka kwetu. Tumetupwa nje kabisa ya ufalme wa mbinguni, mlango umefungwa mbele yetu, hata hatuwezi kuingia humo. Ibilisi ametumia ujanja wake wote kulipotosha fundisho hili; kwa kuwa wokovu wetu umejengwa juu yake. Kwa hiyo imetupasa kuthibitishwa na kutiwa nguvu zaidi sana ndani yake; ili tusitikisike kamwe, bali tusimame imara katika imani, iliyomo katika Injili.

Kwanza kabisa tunalo jambo hili la kuangalia, kwamba hatutamjua kamwe Yesu Kristo kuwa Mwokozi wetu, mpaka tujue kwamba alikuwa Mungu tangu milele. Lile lililoandikwa juu yake na nabii Yeremia, sharti litimizwe; sura 9:24. “Yeye ajisifuye na ajisifu kwa sababu hii, ya kuwa ananifahamu na kunijua mimi, ya kuwa mimi ndimi Bwana.”Mtume Paulo anaonyesha kwamba neno hili sharti lihusishwe na nafsi ya Bwana wetu Yesu Kristo: na kwa hiyo anatangaza kwamba hakuhesabu kitu fundisho lo lote wala elimu yo yote, ila kumjua Yesu Kristo tu.

Tena, inawezekanaje sisi kuwa na uzima wetu ndani yake, asipokuwa yeye Mungu wetu, na sisi tukategemezwa na kuhifadhiwa kwa uweza wake? Tunawezaje kumtumaini? kwa maana imeandikwa, Yeremia 17:5. “Amelaaniwa mtu amtegemeaye mwanadamu, na kuufanya mwili kuwa mkono wake.”Tena, tunawezaje kuhifadhiwa na mauti isipokuwa kwa uweza wa Mungu usio na mpaka? Hata kama Maandiko yasingetoa ushuhuda wo wote juu ya Uungu wa Kristo Yesu, haiwezekani kwetu kumjua kuwa Mwokozi wetu, isipokuwa tukubali kwamba yeye anao ukuu wote wa Mungu; isipokuwa tumkiri kuwa Mungu wa kweli; kwa sababu yeye ndiye hekima ya Baba ambayo kwa hiyo ulimwengu uliumbwa, ukahifadhiwa, na kudumishwa. Kwa hiyo na tuwe na uthabiti kamili katika jambo hili, kila tunaposema habari za Yesu Kristo, tuyainue mawazo yetu juu, na kuuabudu ukuu huu aliokuwa nao tangu milele, na kiini hiki kisicho na mpaka alichokuwa nacho kabla hajajivika ubinadamu.

Kristo alidhihirishwa katika mwili: maana yake, alifanyika mwanadamu; aliyefanana nasi katika mambo yote, isipokuwa dhambi peke yake: Waebrania 4:15. Anaposema, isipokuwa dhambi peke yake, anamaanisha kwamba Bwana wetu Yesu hakuwa na hatia wala waa. Lakini hata hivyo, hakukataa kuzibeba dhambi zetu; aliutwaa mzigo huu juu yake mwenyewe, ili sisi kwa neema yake tupate kutuliwa mzigo. Hatuwezi kumjua Yesu Kristo kuwa mpatanishi kati ya Mungu na mwanadamu, isipokuwa tumtazame kama mwanadamu. Mtume Paulo anapotaka kutupa ujasiri wa kumwita Mungu kwa jina la Bwana wetu Yesu Kristo, anamwita waziwazi mwanadamu.

Mtume Paulo asema, 1 Timotheo 2:5. “Mungu ni mmoja, na mpatanishi kati ya Mungu na wanadamu ni mmoja, mwanadamu Kristo Yesu.”Kwa kulitafakari hili, tunaweza kwa jina lake, na kwa njia yake, kumkaribia Mungu kwa ukaribu wa kirafiki, tukijua kwamba sisi ni ndugu zake, naye ni mwana wa Mungu. Kwa kuwa hamna ila dhambi katika wanadamu, imetupasa pia kuipata haki na uzima katika mwili wetu. Kwa hiyo ikiwa Kristo hakuwa ndugu yetu kweli, ikiwa hakufanywa mwanadamu kama sisi, tuko katika hali gani? Basi na tutafakari maisha yake na mateso yake.

Imesemwa, Waebrania 9:26. (akinena juu ya Kristo,) “sasa mara moja tu amedhihirishwa mwisho wa nyakati, azitangue dhambi kwa dhabihu ya nafsi yake.”Na kwa nini hivyo? Mtume Paulo anatuonyesha sababu katika Warumi 5:18. “Kama kwa kosa la mtu mmoja hukumu ilikuja juu ya watu wote ikawahukumu adhabu; vivyo hivyo kwa haki ya mtu mmoja kipawa cha bure kilikuja juu ya watu wote hata kuhesabiwa haki yenye uzima.”Tusipojua hili, kwamba dhambi iliyotendwa katika asili yetu ilirekebishwa katika asili ile ile, tuko katika hali gani? tunaweza kujiegemeza juu ya msingi gani? Kwa hiyo, kifo cha Bwana wetu Yesu Kristo kisingeweza kutufaidia hata chembe, kama asingalifanywa mwanadamu, kama sisi.

Tena, kama Yesu Kristo angekuwa Mungu tu, je, tungeweza kuwa na hakika yo yote au rehani katika ufufuo wake? kwamba sisi tutafufuka siku moja? Ni kweli kwamba Mwana wa Mungu alifufuka: tunaposikia ikisemwa kwamba Mwana wa Mungu alitwaa mwili kama wetu, akatoka katika ukoo wa Daudi, kwamba amefufuka, (kwa kuwa asili yetu yenyewe ni ya kuharibika,) naye ameinuliwa juu katika utukufu, katika nafsi ya Bwana wetu Yesu Kristo, “akatuketisha pamoja naye katika ulimwengu wa roho, katika Kristo Yesu.” Waefeso 2:6. Kwa hiyo, wale waliojitahidi kuibatilisha asili ya mwanadamu katika nafsi ya Mwana wa Mungu, wanastahili kuchukiwa zaidi. Kwa maana zamani ibilisi aliwainua watu fulani, waliotangaza kwamba Yesu Kristo alionekana katika umbo la mwanadamu, lakini hakuwa na asili halisi ya mwanadamu: kwa njia hiyo wakijitahidi kuifuta rehema ya Mungu kwetu, na kuiharibu kabisa imani yetu.

Wengine wamedhani kwamba alileta mwili pamoja naye kutoka mbinguni; kana kwamba hakushiriki asili yetu. Jambo hili lilitangazwa na yule mzushi wa kuchukiza, (aliyeuawa hapa,) kwamba Yesu Kristo alikuwa na mwili tangu milele; ulioundwa kwa vitu vinne vya asili: kwamba Uungu wakati ule ulikuwa katika umbo linaloonekana, na kwamba kila mara malaika walipotokea, huo ulikuwa mwili wake. Ni wazimu ulioje kufanya ulozi wa namna hii, kumtengenezea Mwana wa Mungu mwili! Tutalifanya nini neno lile lisemalo, Waebrania 2:16, 17. “Hakutwaa juu yake asili ya malaika, bali aliutwaa uzao wa Ibrahimu. Kwa hiyo ilimpasa kufananishwa na ndugu zake katika mambo yote, ili awe kuhani mkuu mwenye rehema, mwaminifu, katika mambo yamhusuyo Mungu, ili afanye upatanisho kwa dhambi za watu.”Imesemwa, aliutwaa mwili wetu, akawa ndugu yetu. Naam, na kwamba alifanywa kama sisi, ili apate kutuhurumia, na kuusaidia udhaifu wetu. Alifanywa uzao wa Daudi, ili ajulikane kuwa mkombozi yule aliyeahidiwa? ambaye mababa walimtazamia tangu vizazi vyote. Na tukumbuke kwamba imeandikwa, Mwana wa Mungu alidhihirishwa katika mwili; yaani, alikuwa mwanadamu kweli kweli, akatufanya kuwa kitu kimoja naye; hata sasa tunaweza kumwita Mungu baba yetu. Na kwa nini hivyo? kwa sababu sisi ni wa mwili wa mwana wake wa pekee. Lakini sisi ni wa mwili wake jinsi gani? kwa sababu ilimpendeza kujiunga nasi, ili tupate kuwa washiriki wa kiini chake.

Kwa hili twaona kwamba si wazo tupu la kubahatisha, watu wanapotuambia kwamba Yesu Kristo alivaa mwili wetu: kwa maana huku ndiko tunakopaswa kufika, tukitaka kuwa na ujuzi wa kweli wa imani. Haiwezekani kwetu kumtumaini ipasavyo, tusipouelewa ubinadamu wake: imetupasa pia kuujua ukuu wake, kabla hatujaweza kumtumaini yeye kwa wokovu. Zaidi ya hayo imetupasa kujua kwamba Yesu Kristo ni Mungu na mwanadamu, na pia kwamba yeye ni nafsi moja tu.

Hapa tena ibilisi anajaribu kuyachochea makaa ya ugomvi, kwa kulipotosha au kulificha fundisho ambalo Mtume Paulo anatufundisha. Kwa maana wamekuwako wazushi, waliojitahidi kushikilia kwamba ukuu na Uungu wa Yesu Kristo, kiini chake cha mbinguni, uligeuzwa mara moja kuwa mwili na ubinadamu. Hivyo ndivyo walivyosema wengine, pamoja na makufuru mengine mengi yaliyolaaniwa, kwamba Yesu Kristo alifanywa mwanadamu. Ni nini kitakachofuata hapo? Mungu sharti aiache asili yake, na kiini chake cha kiroho sharti kigeuzwe kuwa mwili. Wanaendelea mbele zaidi, na kusema, Yesu Kristo si mwanadamu tena, bali mwili wake umekuwa Mungu.

Hawa ni walozi wa ajabu, wanaomfanyia Yesu Kristo asili mpya nyingi namna hii. Hivyo, ibilisi aliwainua waotaji ndoto wa namna hii, zamani, ili kuisumbua imani ya kanisa; nao sasa wamefufuliwa upya katika wakati wetu. Kwa hiyo, na tuyaangalie vema yale ambayo Mtume Paulo anatufundisha mahali hapa; kwa maana anatupa silaha njema, ili tupate kujilinda dhidi ya makosa ya namna hii. Tukitaka kumtazama Yesu Kristo jinsi alivyo kweli, na tuuone ndani yake utukufu huu wa mbinguni, aliokuwa nao tangu milele: kisha na tuje kwenye ubinadamu wake, ambao umekwisha kuelezwa hapo juu; ili tupate kuzipambanua asili zake mbili. Jambo hili ni la lazima, ili kuilisha imani yetu.

Tukiutafuta uzima ndani ya Yesu Kristo, imetupasa kuelewa kwamba anao Uungu wote ndani yake; kwa maana imeandikwa, Zaburi 36:9. “Maana kwako wewe iko chemchemi ya uzima, katika nuru yako tutaona nuru.”Tukitaka kutegemezwa dhidi ya ibilisi, na kuyapinga majaribu ya adui zetu, imetupasa kujua kwamba Yesu Kristo ni Mungu. Kwa ufupi, tukitaka kuweka tumaini letu lote na matumaini yetu kwake, imetupasa kujua kwamba yeye anao uweza wote; ambao asingeweza kuwa nao, kama asingekuwa Mungu. Ni nani aliye na uweza wote? Ni yeye aliyekuwa mnyonge na dhaifu; mwana wa bikira Mariamu; yeye aliyekuwa chini ya mauti; yeye aliyezibeba dhambi zetu: yeye ndiye aliye chemchemi ya uzima.

Tuna macho mawili kichwani, kila moja likifanya kazi yake: lakini tunapokitazama kitu kwa makini, uoni wetu, ulio wa kutengana wenyewe, huunganika pamoja, ukawa mmoja; nao hushughulika kabisa kukitazama kile kilichowekwa mbele yetu: vivyo hivyo zimo asili mbili tofauti ndani ya Yesu Kristo. Je, kuna kitu cho chote duniani kilicho tofauti zaidi kuliko mwili na roho ya mwanadamu? Roho yake ni roho isiyoonekana, isiyoweza kuonekana wala kuguswa; isiyo na tamaa yo yote ya kimwili. Mwili ni bonge la kuharibika, lililo chini ya uozo; kitu kinachoonekana kinachoweza kuguswa: mwili una tabia zake, zilizo tofauti kabisa na zile za roho. Na hivyo tunauliza, mwanadamu ni nini? Kiumbe, kilichoumbwa kwa mwili na roho.

Ikiwa Mungu alitumia ufundi wa namna hii ndani yetu, alipotuumba kwa asili mbili tofauti, kwa nini tuone ajabu, kwamba alitenda muujiza mkubwa zaidi sana ndani ya Yesu Kristo? Mtume Paulo anatumia maneno haya, alidhihirishwa, ili tupate kuupambanua Uungu wake na ubinadamu wake; ili tumpokee, kama Mungu aliyedhihirishwa katika mwili; yaani, yeye aliye Mungu kweli, na bado amejifanya kuwa kitu kimoja nasi: kwa hiyo sisi tu watoto wa Mungu; yeye akiwa ndiye kuhesabiwa haki kwetu, tumeokolewa kutoka katika mzigo wa dhambi zetu. Kwa kuwa ametutakasa kutoka katika taabu yetu yote, tunao utajiri mkamilifu ndani yake; kwa ufupi, kwa kuwa alijitia chini ya mauti, sasa tuna hakika ya uzima.

Mtume Paulo anaongeza, “akajulikana kuwa na haki katika Roho.”Neno hili, kujulikana kuwa na haki, mara nyingi hutumika katika Maandiko kwa maana ya kukubaliwa. Inaposemwa, alijulikana kuwa na haki, si kwamba alifanyika mwenye haki, si kwamba aliachiliwa na wanadamu, kana kwamba wao walikuwa waamuzi wake, naye alilazimika kuwapa hesabu; la, la; hakuna jambo kama hilo; bali ni pale anapopewa utukufu anaoustahili, nasi tunamkiri kuwa vile alivyo kweli kweli. Inasemwa kwamba Injili huhesabiwa haki watu wanapoipokea kwa utii, na kwa imani kujitia chini ya fundisho ambalo Mungu hufundisha; vivyo hivyo mahali hapa, inasemwa, Yesu Kristo alijulikana kuwa na haki katika roho.

Hatupaswi kuridhika kwa kuutazama uwepo wa kimwili wa Yesu Kristo, uliokuwa ukionekana, bali imetupasa kutazama juu zaidi. Mtume Yohana asema, sura 1. Mungu alifanyika mwili; au neno la Mungu, ambalo ni sawa. Neno la Mungu, aliyekuwa Mungu kabla ya kuumbwa kwa ulimwengu, alifanyika mwili; yaani, aliunganishwa na asili yetu: hata mwana wa bikira Mariamu, ni Mungu; naam, Mungu wa milele! Uweza wake usio na mpaka ulidhihirishwa pale; ambao ni ushahidi wa hakika kwamba yeye ndiye Mungu wa kweli! Mtume Paulo asema, Warumi 1. Yesu Kristo Bwana wetu alizaliwa kwa uzao wa Daudi; anaongeza pia, alitangazwa kuwa Mwana wa Mungu.

Haitutoshi kumtazama kwa macho yetu ya asili; kwa maana kwa njia hiyo, tusingepanda juu kupita mwanadamu: lakini tunapoona kwamba kwa miujiza na matendo makuu, anajionyesha kuwa Mwana wa Mungu, huo ni muhuri na ushahidi, kwamba katika kujinyenyekeza hakuuacha ukuu wake wa mbinguni! Kwa hiyo, tunaweza kumjia kama ndugu yetu: na wakati huo huo kumwabudu kama Mungu wa milele; ambaye kwa yeye tuliumbwa, na kwa yeye tunahifadhiwa.

Kama si hili, tusingekuwa na kanisa; kama si hili, tusingekuwa na dini; kama si hili, tusingekuwa na wokovu. Ingekuwa afadhali kwetu kuwa wanyama wasio na akili, wasio na fahamu wala ufahamu, kuliko kukosa ujuzi huu: yaani, kwamba Yesu alikuja na kuuunganisha Uungu wake na asili yetu; iliyokuwa duni na yenye taabu namna ile. Mtume Paulo anatangaza kwamba hili ni siri; ili tusilikaribie kwa kiburi na majivuno, kama wafanyavyo wengi watakao kuonekana wenye hekima; jambo hili limesababisha uzushi mwingi kuchipuka. Na kweli, kiburi siku zote kimekuwa mama wa uzushi.

Tunapolisikia neno hili, siri, na tukumbuke mambo mawili; kwanza, kwamba tujifunze kuzitiisha akili zetu, wala tusijidanganye kwamba tunao ujuzi na uwezo wa kutosha kulifahamu jambo kubwa namna hii. Pili, na tujifunze kupanda juu kupita nafsi zetu, na kuustahi ukuu ule unaopita ufahamu wetu. Hatupaswi kuwa wavivu wala wenye kusinzia; bali tulitafakari fundisho hili, na kujitahidi kufundishwa ndani yake. Tukiisha kupata ujuzi kidogo juu yake, imetupasa kujitahidi kufaidika nao, siku zote za maisha yetu.

Tunapoupata ujuzi huu, kwamba Mwana wa Mungu ameunganishwa nasi, imetupasa kuyaelekeza macho yetu kwenye kile kilichodhihirishwa kwa utukufu mkuu ndani yake, yaani, uweza na nguvu za Roho Mtakatifu. Basi, Yesu Kristo hakuonekana tu kama mwanadamu, bali alionyesha kweli kwamba yeye ni Mungu Mwenyezi! kwa kuwa utimilifu wote wa Uungu ulikaa ndani yake. Tukishalijua hili, tunaweza kutambua vema kwamba si bure Mtume Paulo anasema, hazina zote za hekima zimesitirika ndani ya Bwana wetu Yesu Kristo.

Tukiisha kuzishika ahadi za mpatanishi huyu, tutajua urefu na kina, na upana na kimo, naam, na kila kitu kilicho cha lazima kwa wokovu wetu: ili tupate kuiegemeza imani yetu juu yake, kama juu ya Mungu wa pekee wa kweli; na pia kumtazama kama ndugu yetu; ambaye hakutukaribia tu, bali amejiunga na kujiambatanisha nasi kwa namna ambayo amekuwa wa kiini kile kile. Tukiisha kufika hapa, na tujue kwamba tumefikia ukamilifu wa hekima, unaonenwa na Mtume Paulo mahali pengine; ili tupate kufurahi kwa ukamilifu katika wema wa Mungu; kwa maana imempendeza kutuangazia kwa mwangaza wa Injili yake, na kutuvuta katika ufalme wake wa mbinguni.