Ufunguo wa Dhahabu wa Maombi

"Niite, nami nitakujibu, na kukuonyesha mambo makubwa, magumu usiyoyajua." Yeremia 33:3.

BAADHI ya vitabu vyenye elimu kuu kupita vyote ulimwenguni vinanukia mafuta ya taa ya usiku wa manane. Lakini vitabu na maneno ya watu yaliyo ya kiroho zaidi na yenye faraja zaidi huwa kwa kawaida na harufu ya unyevunyevu wa gerezani. Ningeweza kutaja mifano mingi—Pilgrim wa John Bunyan yatosha badala ya mia nyingine. Na andiko hili letu jema, lililofunikwa na ukungu na baridi ya gereza alimolala Yeremia, lina hata hivyo mwangaza na uzuri ambao huenda lisingekuwa nao kamwe, kama lisingalikuja kuwa neno la kumtia moyo mfungwa wa Bwana aliyefungwa katika ua wa gereza.

Watu wa Mungu siku zote, katika hali yao mbaya kupita zote, wamemwona Mungu wao katika wema wake mkuu kupita wote. Yeye ni mwema nyakati zote, lakini huonekana kuwa katika wema wake mkuu wakati wao walipo katika hali yao mbaya kupita kawaida. "Uliwezaje kustahimili kifungo chako kirefu vizuri hivyo?" mtu mmoja alimwuliza Landgrave wa Hesse, aliyekuwa amefungwa kwa sababu ya kushikamana kwake na misingi ya Matengenezo ya Kanisa. Akajibu, "Faraja za Mungu za wafia-dini zilikuwa pamoja nami."

Bila shaka iko faraja iliyo ya ndani zaidi, na yenye nguvu kuliko nyingine yoyote, ambayo Mungu huwawekea wale ambao, wakiwa mashahidi wake waaminifu, hupaswa kustahimili dhiki kuu mno kutokana na uadui wa wanadamu. Kuna mapambazuko matukufu kwa ajili ya kanda ya baridi kali. Na nyota hung'aa katika anga za kaskazini kwa fahari isiyo ya kawaida. Rutherford alikuwa na msemo wake wa ajabu, kwamba alipotupwa katika vyumba vya chini vya dhiki, alikumbuka ya kuwa yule Mfalme mkuu huweka divai yake humo siku zote, naye alianza mara kuzitafuta chupa za divai na kunywa katika "divai iliyokaa juu ya urojo wake, iliyochujwa sana."

Wale wazamiao katika bahari ya dhiki huzoa lulu adimu. Mwajua, enyi wenzangu katika dhiki, kwamba ndivyo ilivyo. Ninyi ambao mifupa yenu imekaribia kutokeza ngozini kwa kulala muda mrefu juu ya kitanda cha taabu. Ninyi mlioona mali zenu za duniani zikichukuliwa mbali nanyi, mkabaki karibu na ufukara. Ninyi mliokwenda kaburini mara hizi saba, hata mkaogopa ya kuwa rafiki yenu wa mwisho wa duniani atachukuliwa na Mauti isiyo na huruma. Ninyi nyote mmethibitisha ya kuwa Yeye ni Mungu mwaminifu, na kwamba kama dhiki zenu zinavyozidi, vivyo hivyo faraja zenu nazo huzidi kwa njia ya Kristo Yesu!

Ombi langu, katika kulitwaa andiko hili asubuhi hii, ni kwamba wafungwa wengine wa Bwana wapate kusemewa mioyoni mwao ahadi yake ya furaha! Kwamba ninyi mliofungwa, msioweza kutoka kwa sababu ya uzito wa roho uliopo sasa, mpate kumsikia akisema, kama kwa mnong'ono mwororo masikioni mwenu na mioyoni mwenu, "Niite, nami nitakujibu, na kukuonyesha mambo makubwa, magumu usiyoyajua."

Andiko hili hujigawanya lenyewe kwa asili katika sehemu tatu za waziwazi za Kweli ya Mungu. Juu ya hizo na tuseme kama tuwezeshwavyo na Mungu Roho Mtakatifu. Kwanza, maombi yameamriwa—"Niite." Pili, jibu limeahidiwa—"Nami nitakujibu." Tatu, imani imetiwa moyo—"Na kukuonyesha mambo makubwa, magumu usiyoyajua."

I. Kichwa cha kwanza ni MAOMBI YAMEAMRIWA. Hatushauriwi tu wala kupendekezewa kuomba, bali twaamriwa kuomba. Huku ni kujishusha kukuu. Hospitali yajengwa—huonekana yatosha kwamba wagonjwa wapewe ruhusa ya kuingia bure waitafutapo. Lakini hakuna amri ya baraza itolewayo kwamba mtu lazima aingie malangoni mwake. Jiko la kugawa mchuzi laandaliwa vema katika kilindi cha majira ya baridi. Tangazo latolewa kwamba walio maskini waweza kupokea chakula wakiomba. Lakini hakuna mtu awazaye kupitisha Sheria ya Bunge kuwalazimisha maskini kuja kungoja mlangoni ili kuipokea sadaka hiyo.

Huonekana yatosha kuitoa bila kutoa amri ya aina yoyote kwamba watu lazima waipokee. Lakini hivyo ndivyo ulivyo ajabu upumbavu wa mwanadamu, kwa upande mmoja, umfanyao kuhitaji amri ili ajihurumie nafsi yake mwenyewe! Na ndivyo kulivyo kwa ajabu kujishusha kwa Mungu wetu mwenye neema kwa upande mwingine—kwamba hutoa amri ya upendo, ambayo pasipo hiyo hakuna mtu aliyezaliwa na Adamu ambaye angeshiriki karamu ya Injili, bali angekufa njaa kuliko kuja! Katika jambo la maombi ndivyo ilivyo vivyo hivyo. Watu wa Mungu wenyewe wahitaji amri ya kuomba, ama sivyo wasingeipokea.

Kwa nini hivi? Kwa sababu, Rafiki wapendwa, twapatwa mara nyingi na vipindi vya kuipenda dunia, ikiwa kweli hiyo siyo hali yetu ya kawaida. Hatusahau kula—hatusahau kuyafungua madirisha ya duka—hatusahau kuwa na bidii katika biashara—hatusahau kwenda vitandani mwetu kupumzika—lakini mara nyingi twasahau kushindana na Mungu katika maombi, na kutumia, kama itupasavyo kutumia, vipindi virefu katika ushirika mtakatifu pamoja na Baba yetu na Mungu wetu. Kwa wengi wanaokiri imani, daftari la hesabu ni kubwa mno hata huwezi kulisogeza! Na Biblia, iwakilishayo ibada yao, ni ndogo mno hata ungeweza karibu kuitia mfukoni mwa kizibao chako.

Saa nyingi kwa ajili ya dunia! Dakika chache kwa ajili ya Kristo! Dunia yapata sehemu yetu iliyo bora, na chumba chetu cha maombi masazo ya wakati wetu. Twazitoa nguvu zetu na uchangamfu wetu kwa njia za mali ya dunia, na uchovu wetu kwa njia za Mungu. Kwa hiyo ndipo twahitaji kuamriwa kulitimiza tendo lile lile ambalo lingepasa kuwa ndilo furaha yetu kuu, kama lilivyo pendeleo letu lililo juu kupita yote—kukutana na Mungu wetu! "Niite," asema, kwa maana ajua ya kuwa tu wepesi kusahau kumwita Mungu.

"Una nini, Ewe ulalaye usingizi? Amka, umwite Mungu wako," ni onyo tulihitajilo sisi kama alivyolihitaji Yona katika tufani. Yeye afahamu jinsi mioyo yetu ilivyo mizito, wakati mwingine, tuwapo chini ya fahamu ya dhambi. Shetani hutuambia, "Kwa nini uombe? Wawezaje kutumaini kushinda? Wasema bure, 'Nitaondoka, nitakwenda kwa baba yangu,' kwa maana hustahili kuwa mmoja wa watumishi wake wa mshahara! Wawezaje kuuona uso wa Mfalme baada ya kumfanyia hiana? Utathubutuje kuikaribia madhabahu, wakati wewe mwenyewe umeitia unajisi, na wakati dhabihu ambayo ungeileta huko ni maskini na najisi?"

Enyi Ndugu wapendwa, ni vema kwetu kwamba twaamriwa kuomba, ama sivyo nyakati za uzito wa moyo tungeliyaacha! Mungu akiniamuru, nisivyostahili kama nilivyo, nitatambaa hata pa kuwekea miguu pa Neema ya Mungu. Na kwa kuwa asema, "Ombeni bila kukoma," ijapokuwa maneno yangu yanipungukia, na moyo wangu wenyewe watanga-tanga, hata hivyo nitayagugumiza matakwa ya nafsi yangu yenye njaa na kusema, "Ee Mungu, walau unifundishe kuomba, unisaidie kushinda kwako."

Je, hatuamriwi kuomba, pia, kwa sababu ya kutokuamini kwetu kwa mara nyingi? Kutokuamini kunong'ona, "Kuna faida gani ukimtafuta Bwana katika jambo fulani na fulani? Shauri hili liko nje kabisa ya orodha ya mambo yale ambayo Mungu ameingilia kati na kwa hiyo, (asema Ibilisi), kama ungalikuwa katika hali nyingine yoyote ungaliweza kuutegemea mkono wa Mungu wenye nguvu. Lakini hapa maombi yako hayatakufaa. Ama ni jambo dogo mno, ama lahusiana mno na mambo ya dunia hii, ama ni jambo ambalo umefanya dhambi nyingi mno ndani yake, ama ni jambo lililo juu mno, gumu mno, na lenye matatizo mengi mno—huna haki ya kulipeleka hilo mbele za Mungu!" Ndivyo adokezavyo yule Mwovu mchafu wa Jehanamu.

Kwa hiyo limesimama limeandikwa kuwa agizo la kila siku lifaalo kila hali ambayo Mkristo aweza kutiwa ndani yake, "Niite." "Niite. Je, u mgonjwa? Wataka kuponywa? Nililie mimi, kwa maana mimi ndimi Tabibu Mkuu. Je, mambo ya riziki yakusumbua? Waogopa ya kuwa hutaweza kujipatia vitu vya halali mbele ya macho ya wanadamu? Niite! Je, watoto wako wakuchukiza? Waona kile kilicho kikali kuliko jino la nyoka—mtoto asiye na shukrani? Niite! Je, huzuni zako ni ndogo, lakini zaumiza, kama ncha ndogo na michomo ya miiba? Niite! Je, mzigo wako ni mzito kana kwamba utauvunja mgongo wako chini ya uzito wake? Niite! Umtwike Bwana mzigo wako, naye atakutegemeza! Hatamwacha kamwe mwenye haki aondoshwe."

Bondeni—mlimani—juu ya mwamba usio na kitu—katika bahari ya chumvi! Ukiwa umezama chini ya mawimbi, na baadaye kuinuliwa juu ya kilele cha mawimbi—katika tanuru wakati makaa yanapowaka—malangoni mwa mauti wakati mataya ya Jehanamu yatakapo kujifunga juu yako—usikome, kwa maana ile amri ya milele yakuambia daima, "Niite." Maombi yangali yana uwezo, nayo hayana budi kushinda kwa Mungu ili kukuletea wokovu wako. Hizi ni baadhi ya sababu kwa nini pendeleo la dua latajwa pia katika Maandiko Matakatifu kuwa ni wajibu—ziko nyingi zaidi—lakini hizi zitatosha asubuhi hii.

Haitupasi kuiacha sehemu yetu ya kwanza kabla hatujatoa neno jingine. Yatupasa kufurahi sana ya kuwa Mungu ametupa amri hii katika Neno lake, ili iwe imara na ya kudumu. Waweza kuyafungua mafungu hamsini ambamo agizo lilo hilo latamkwa. Sisomi mara nyingi katika Maandiko, "Usiue." "Usitamani." Torati imetolewa mara mbili, lakini nasoma mara nyingi maagizo ya Injili, kwa maana kama Torati imetolewa mara mbili, Injili imetolewa hata saba mara sabini. Kwa kila agizo nisiloweza kulishika kwa sababu ya kuwa dhaifu kwa njia ya mwili, naona maagizo elfu ambayo ni matamu na ya kupendeza kwangu kuyashika, kwa sababu ya nguvu za Roho Mtakatifu akaaye ndani ya watoto wa Mungu!

Na amri hii ya kuomba yasisitizwa tena na tena. Huenda likawa zoezi lifaalo kwa baadhi yenu kutafuta ni mara ngapi katika Maandiko mwaambiwa kuomba. Mtastaajabu kuona ni mara ngapi maneno kama haya yametolewa—"Uniite siku ya taabu, nami nitakuokoa." "Enyi watu, ifunueni mioyo yenu mbele zake."

"Mtafuteni Bwana maadamu apatikana. Mwiteni maadamu yu karibu." "Ombeni, nanyi mtapewa. Tafuteni, nanyi mtaona. Bisheni, nanyi mtafunguliwa." "Kesheni na kuomba, msije mkaingia majaribuni." "Ombeni bila kukoma." "Kikaribieni kiti cha Neema kwa ujasiri." "Mkaribieni Mungu, naye atawakaribia ninyi." "Dumuni katika maombi."

Sina haja ya kuongeza mifano ambapo nisingeweza kamwe kuimaliza. Nachagua miwili mitatu kutoka katika mfuko huu mkubwa wa lulu. Njoo, Mkristo, hukupasi kamwe kuuliza kama una haki ya kuomba—hukupasi kamwe kusema, "Je, naweza kuruhusiwa kuingia mbele za uso wake?" Ukiwa na amri nyingi hivi, (na amri za Mungu zote ni ahadi na zote ni uwezesho), waweza kukikaribia kiti cha Neema kwa ujasiri, kwa njia ile mpya na iliyo hai kupitia pazia lililopasuka. Lakini ziko nyakati ambazo Mungu hawaamuru watu wake kuomba katika Biblia tu—huwaamuru pia kuomba moja kwa moja kwa misukumo ya Roho wake Mtakatifu.

Ninyi mnaoujua uzima wa ndani mwanifahamu mara moja. Mwahisi ghafla, labda katikati ya shughuli, wazo lisukumalo kwamba lazima mjitenge ili kuomba. Yamkini kwanza hamlitilii maanani sana mwelekeo huo, lakini waja tena na tena na tena—"Jitenge ukaombe!" Naona ya kuwa katika jambo la maombi mimi mwenyewe nafanana sana na gurudumu la maji liendalo vizuri wakati maji yapo tele, lakini lizungukalo kwa nguvu ndogo sana wakati kijito kinapopungua kina. Au, kama merikebu irukayo juu ya mawimbi ikitandaza matanga yake yote wakati upepo uifaapo, lakini ipasayo kugeuka huku na huku kwa taabu nyingi wakati upepo wa kufaa u mdogo tu.

Basi naona ya kuwa kila wakati Bwana wetu akupapo mwelekeo wa pekee wa kuomba, yakupasa kuiongeza bidii yako mara mbili. Yakupasa siku zote kuomba wala kutokuchoka—lakini akupapo shauku ya pekee ya maombi, ukajiona una wepesi na furaha ya pekee ndani yake, unayo, zaidi ya ile amri ifungayo daima, amri nyingine ipasayo kukusukuma kutii kwa uchangamfu. Nyakati kama hizo nadhani twaweza kusimama mahali pa Daudi, ambaye Bwana alimwambia, "Utakaposikia sauti ya mwendo katika vilele vya miforsadi, ndipo ujitahidi."

Huenda ule mwendo katika vilele vya miforsadi ulikuwa ni hatua za malaika wakiharakisha kumsaidia Daudi, na ndipo Daudi alipopaswa kuwapiga Wafilisti. Na rehema za Mungu zijapo, hatua zake ni tamaa zetu za kuomba. Na tamaa zetu za kuomba zapaswa kuwa mara moja ishara ya kuwa wakati uliokusudiwa wa kuihurumia Sayuni umekuja. Panda kwa wingi sasa, kwa maana waweza kupanda kwa matumaini! Lima kwa furaha sasa, kwa maana mavuno yako ni hakika! Shindana sasa, Yakobo, kwa maana u karibu kufanywa mkuu ushindaye, na jina lako litaitwa Israeli! Sasa ndio wakati wako, enyi wafanya biashara wa kiroho! Soko li juu, fanyeni biashara nyingi—faida yenu itakuwa kubwa. Angalia kuitumia vema ile saa ya dhahabu, na kuyavuna mavuno yako wakati jua ling'aapo.

Tunapofurahia kujiliwa kutoka juu yatupasa kudumu katika maombi kwa namna ya pekee. Na kama wajibu mwingine usiosonga sana ukiachiwa nafasi ya kwanza kwa kitambo, haitakuwa vibaya, wala hatutapata hasara—kwa maana Mungu atuambiapo kwa namna ya pekee tuombe kwa maonyo ya Roho wake, ndipo tupasapo kujitahidi katika maombi.

II. Basi na tukitwae kichwa cha pili—JIBU LIMEAHIDIWA. Haitupasi kulivumilia hata dakika moja lile wazo baya na la kuhuzunisha kwamba Mungu hatajibu maombi! Asili yake, kama ilivyodhihirishwa katika Kristo Yesu, yalidai jibu. Amejifunua katika Injili kuwa Mungu wa upendo, aliyejaa neema na kweli. Awezaje basi kukataa kuwasaidia viumbe vyake wale wamtafutao uso wake na fadhili zake kwa unyenyekevu, katika njia yake mwenyewe aliyoiweka? Wakati baraza la wazee la Athene lilipoona vema siku moja kukutana pamoja nje wazi, walipokuwa wameketi katika mashauri yao, shomoro mmoja, akifukuzwa na mwewe, aliruka kuelekea barazani.

Akiwa amesongwa sana na yule ndege mkali, alitafuta kimbilio kifuani mwa mmoja wa wale wazee wa baraza. Yeye, akiwa mtu wa asili ya ukali na ukosefu wa adabu, alimtoa yule ndege kifuani mwake, akamtupa chini, akamwua. Ndipo baraza lote likainuka kwa ghasia, na pasipo sauti moja ya kupinga, likamhukumu afe, kwa kuwa hastahili kiti katika baraza pamoja nao, wala kuitwa Mwathene, ikiwa hakumpa msaada kiumbe aliyemtumaini. Je, twaweza kudhani ya kuwa Mungu wa Mbinguni, ambaye Asili yake ni upendo, angeweza kumrarua kutoka kifuani mwake yule hua maskini apapatikaye, amkimbiaye yule tai wa Haki hata kifuani mwa Rehema zake?

Je, atatupa mwaliko wa kuutafuta uso wake, na sisi, kama ajuavyo, kwa hofu nyingi za woga, hata hivyo tukijipa moyo wa kutosha kukimbilia kifuani mwake—je, ndipo atakuwa dhalimu na asiye na neema kiasi cha kusahau kukisikia kilio chetu na kutujibu? Tusimdhanie hivyo vibaya Mungu wa Mbinguni! Tukumbuke tena Sifa yake kuu vilevile kama Asili yake. Namaanisha ile Sifa aliyojipatia mwenyewe kwa matendo yake ya Neema yaliyopita. Fikirini, Ndugu zangu, ule udhihirisho mmoja mkuu wa ukarimu—kama ningetaja elfu nisingeweza kutoa mfano bora zaidi wa Sifa ya Mungu kuliko tendo lile moja—"Yeye asiyemwachilia Mwana wake mwenyewe, bali alimtoa kwa ajili yetu sisi sote." Wala si neno langu la kukisia tu, bali ni mkataa uliovuviwa wa Mtume—"Atakosaje kutukirimia na mambo yote pamoja naye?"

Ikiwa Bwana hakukataa kuisikiliza sauti yangu nilipokuwa mwenye dhambi mwenye hatia na adui, awezaje kutokujali kilio changu sasa, nikiwa nimehesabiwa haki na kuokolewa? Imekuwaje aliisikia sauti ya taabu yangu wakati moyo wangu haukuijua wala haukutaka kutafuta msaada, ikiwa baada ya hayo yote hatanisikia sasa nikiwa mtoto wake, rafiki yake? Majeraha ya Yesu yachuruzikayo damu ni dhamana za hakika za maombi kujibiwa. George Herbert, katika lile shairi lake la ajabu, "The Bag," amsawiri Mwokozi akisema—

"Ikiwa una kitu cha kupeleka au kuandika (sina mfuko, lakini pana nafasi hapa) mpaka mikononi na machoni pa Baba yangu, (niamini) kitafika salama. Ya kwamba nitaliangalia ulipelekalo—tazama, waweza kukiweka karibu sana na moyo wangu. Au ikiwa baadaye rafiki yeyote atanitumia kwa njia hii, mlango utakuwa wazi daima; akipelekacho nitakiwasilisha, na zaidi kidogo, wala si kwa hasara yake."

Hakika wazo la George Herbert lilikuwa kwamba Upatanisho ulikuwa wenyewe dhamana ya kuwa maombi lazima yasikiwe—kwamba lile jeraha kuu lililofanywa karibu na moyo wa Mwokozi, lililoruhusu nuru kuingia hata vilindi vya moyo wa Uungu—lilikuwa ushahidi ya kuwa Yeye aketiye Mbinguni atakisikia kilio cha watu wake! Mwaisoma vibaya Kalvari mkidhani ya kuwa maombi hayafai kitu. Lakini, Wapendwa, tunayo ahadi ya Bwana mwenyewe juu ya jambo hili, naye ni Mungu asiyeweza kusema uongo—"Uniite siku ya taabu, nami nitakujibu." Je, hakusema, "Yoyote myaombayo katika sala, aminini ya kwamba mtayapata, nayo yatakuwa yenu"? Kwa kweli hatuwezi kuomba tusipoisadiki mafundisho haya—"kwa maana mtu amwendeaye Mungu lazima aamini ya kuwa yeye yuko, na ya kuwa huwapa thawabu wale wamtafutao kwa bidii."

Na kama tuna swali lolote kama maombi yetu yatasikiwa, twafanana na yule mwenye shaka— "kwa maana mwenye shaka ni kama wimbi la bahari lichukuliwalo na upepo na kutupwa huku na huku. Mtu kama huyo asidhani ya kuwa atapokea kitu kwa Bwana." Tena, si lazima, lakini yaweza kulitia nguvu neno hili tukiongeza ya kwamba uzoefu wetu wenyewe hutuongoza kusadiki ya kuwa Mungu atajibu maombi. Sipaswi kusema kwa ajili yenu, lakini naweza kusema kwa ajili yangu mwenyewe. Ikiwa kuna jambo lolote nilijualo, jambo lolote nililohakikishiwa pasipo shaka yoyote, ni kwamba pumzi ya maombi haitumiki bure kamwe. Ikiwa hakuna mtu mwingine hapa awezaye kulisema, mimi nathubutu kulisema, na najua naweza kulithibitisha.

Kuongoka kwangu mwenyewe ni matunda ya maombi—marefu, ya upendo, ya bidii, yasiyokoma. Wazazi waliniombea! Mungu alivisikia vilio vyao, na mimi hapa nipo kuihubiri Injili. Tangu hapo nimejitosa katika mambo mengine yaliyokuwa mbali kupita uwezo wangu, kama nilivyodhani. Lakini sikushindwa kamwe, kwa sababu nilijitupa juu ya Bwana. Mwajua ninyi kama Kanisa ya kuwa sikusita kuwaza mawazo makubwa juu ya tuwezayo kumfanyia Mungu. Nasi tumetimiza yote tuliyoyakusudia. Nimetafuta msaada wa Mungu na usaidizi wake katika kazi zangu nyingi za kila namna! Na ijapokuwa siwezi kusimulia hapa habari za maisha yangu ya siri katika kazi ya Mungu, lakini kama zingaliandikwa, zingalikuwa ushahidi wa kudumu ya kuwa yuko Mungu ajibuye maombi!

Ameyasikia maombi yangu, si mara moja moja, wala si mara moja au mbili, bali mara nyingi mno hata imekuwa desturi kwangu kuliweka shauri langu mbele za Mungu kwa hakika kamili ya kwamba lolote nimwombalo Mungu, atanipa. Sasa si, "labda," wala si jambo la kuwezekana tu—najua ya kuwa Bwana wangu hunijibu, wala sithubutu kutia shaka! Ungekuwa upumbavu kweli kama ningetia shaka. Kama nilivyo na hakika ya kuwa kiasi fulani cha nguvu ya mtambo wa kuinulia kitauinua mzigo, ndivyo nijuavyo ya kuwa kiasi fulani cha maombi kitapata kitu chochote kwa Mungu. Kama wingu la mvua liletavyo manyunyu, ndivyo maombi yaletavyo baraka. Kama majira ya kuchipua yatawanyavyo maua, ndivyo dua ihakikishavyo rehema. Katika kazi yote mna faida, lakini zaidi ya yote katika kazi ya maombezi—nina hakika ya jambo hili—kwa maana nimeyavuna.

Kama vile niwekavyo tumaini katika fedha ya malkia, wala sijashindwa bado kununua nikitakacho niitoapo fedha taslimu, ndivyo niwekavyo tumaini langu katika ahadi za Mungu, na nakusudia kufanya hivyo hata atakaponiambia hata mara moja tu ya kuwa ni sarafu bandia zisizofaa kufanyia biashara katika soko la Mbinguni. Lakini kwa nini niseme? Enyi Ndugu wapendwa, ninyi nyote mwajua ndani ya nafsi zenu wenyewe ya kuwa Mungu husikia maombi! Msipojua hilo, basi Ukristo wenu uko wapi? Dini yenu iko wapi? Itawapasa kujifunza mambo ya kwanza kabisa ya Kweli ya Mungu, kwa maana watakatifu wote, wadogo kwa wakubwa, wamelihesabu kuwa jambo la hakika ya kwamba yeye husikia maombi!

Lakini, kumbukeni ya kwamba maombi sharti yatolewe siku zote kwa kujitiisha chini ya mapenzi ya Mungu. Tusemapo, "Mungu husikia maombi," hatumaanishi kwa hilo ya kuwa hutupa siku zote vile vile tuviombavyo halisi. Lakini twamaanisha hili—ya kuwa hutupa lililo bora kwetu. Na ya kuwa asipotupa ile rehema tuiombayo katika fedha, huikirimia kwetu katika dhahabu. Asipouondoa ule mwiba katika mwili, hata hivyo husema, "Neema yangu yakutosha," na hilo lafikia lilo hilo mwishoni. Lord Bolingbroke alimwambia Countess wa Huntingdon, "Siwezi kufahamu, Mheshimiwa, jinsi uwezavyo kuonyesha kwamba maombi ya bidii yapatana na kujitiisha chini ya mapenzi ya Mungu."

"Bwana wangu," akasema, "hilo si jambo gumu hata kidogo. Kama ningalikuwa mtumishi wa ikulu wa mfalme fulani mkarimu, naye akanipa ruhusa ya kumwomba fadhili yoyote nipendayo, ningehakikisha kuliweka hivi, 'Je, Mtukufu atajaliwa kunikirimia fadhili fulani na fulani—lakini papo hapo, nijapoitamani sana, kama itaipunguza kwa njia yoyote heshima ya Mtukufu, au kama katika hukumu ya Mtukufu ingeonekana bora nisiipate fadhili hii, nitaridhika kabisa kuikosa kama vile kuipokea.' Basi mwaona ningaliweza kutoa ombi kwa bidii, na hata hivyo kuliacha kwa unyenyekevu mikononi mwa mfalme."

Ndivyo ilivyo kwa Mungu. Hatutoi kamwe maombi bila kuliingiza fungu lile, ama katika roho ama kwa maneno, "Lakini, si kama nitakavyo mimi, bali utakavyo wewe. Si mapenzi yangu, bali yako yatendeke." Twaweza kuomba pasipo "kama wakati ule tu tulio na hakika kabisa ya kuwa mapenzi yetu ni lazima yawe mapenzi ya Mungu, kwa sababu mapenzi ya Mungu ni mapenzi yetu kikamilifu. Mshairi mmoja aliyesingiziwa sana amesema vema—"Mwanadamu, yaangalie maombi yako kuwa ni kusudi la upendo kwa nafsi yako. Iheshimu ile Riziki ya Mungu iliyokuongoza kwayo kuwa ni ishara ya nia njema ya Mungu. Ndivyo utakavyoomba vizuri, na maneno yako yatapata kibali. Tena, katika kuwaombea wengine, shukuru kwa ajili ya ujazo wa maombi yako. Kwa maana ukiwa tayari kuomba, Bwana yu tayari zaidi kukirimia. Chumvi huihifadhi bahari, na watakatifu huitegemeza dunia. Maombi yao ndiyo nguzo elfu zilishikiliazo hema la Maumbile.

"Amin, saa moja isiyo na maombi, kwa akili fulani ya duniani, ingekuwa laana katika kalenda ya wakati, doa la weusi wa giza. Yamkini ile siku ya kutisha ambayo ulimwengu lazima utatikisika na kuwa magofu, itakuwa siku isiyong'arishwa na maombi—je, ataiona imani duniani? Kwa maana uko utaratibu wa rehema, kama ulivyo wa hekima na uweza na njia. Wala hakuna baraka moja itolewayo pasipo kuombwa kutoka hazina ya wema—na moyo wa ukarimu wa Yule, ambaye kumtegemea ndiko heri, haunyimi kamwe kipawa, maadamu mtu wake aomba. Naam, omba utakalo, hata kufikia kiti cha pili cha enzi Mbinguni, ni lako, kwa yule aliyewekewa. Hakuna mpaka wa maombi—lakini ukiacha kuomba, tetemeka, ewe kiumbe uliyejifungia mwenyewe, kwa maana nguvu zako zimekatiliwa mbali kama za Samsoni—na saa ya hukumu yako imekuja."

III. Nafika kwenye neno letu la tatu, ambalo naona limejaa kutia moyo kwa wote wautumiao ustadi mtakatifu wa maombi—IMANI KUTIWA MOYO. "Nitakuonyesha mambo makubwa, magumu usiyoyajua." Na tuseme tu ya kwamba neno hili lilisemwa kwanza kwa Nabii aliyekuwa gerezani, na kwa hiyo lawahusu, kwanza, kila mwalimu na, kwa kweli, kwa kuwa kila mwalimu hana budi kuwa mwanafunzi, lina maana kwa kila ajifunzaye Kweli ya Mungu.

Njia iliyo bora ambayo kwayo nabii na mwalimu na mwanafunzi aweza kuzijua Kweli za Mungu zilizowekwa akiba—Kweli za Mungu zilizo juu zaidi na za siri zaidi—ni kumngojea Mungu katika maombi. Niliona kwa namna ya pekee jana, katika kukisoma Kitabu cha Nabii Danieli, jinsi Danieli alivyoijua ndoto ya Nebukadreza. Wale waaguzi, wachawi, wanajimu wa Wakaldayo walileta vitabu vyao vya ajabu na vyombo vyao vya sura ngeni, wakaanza kunong'ona maneno yao ya uganga na kila namna ya matamko ya siri, lakini wote walishindwa.

Danieli alifanya nini? Alijitia katika maombi, na kwa kujua ya kuwa maombi ya kundi la watu walioungana yana nguvu ya kushinda zaidi kuliko maombi ya mtu mmoja, twaona ya kuwa Danieli aliwaita ndugu zake, akawaomba waungane naye katika maombi ya bidii, ili Mungu apendezwe kwa rehema zake zisizo na kikomo kuifunua ile njozi. "Ndipo Danieli akaenda nyumbani kwake, akawajulisha jambo hilo Hanania, Mishaeli na Azaria, wenzake, ili waombe rehema kwa Mungu wa Mbinguni kwa habari ya siri hii, ili Danieli na wenzake wasiangamizwe pamoja na wenye hekima wengine wa Babeli."

Na kwa habari ya Yohana, aliyekuwa ndiye Danieli wa Agano Jipya, mwakumbuka aliona kitabu katika mkono wa kuume wake yeye aliyeketi juu ya Kiti cha Enzi—kitabu kilichotiwa muhuri saba, ambacho hakuna aliyeonekana kustahili kukifungua wala kukitazama. Yohana alifanya nini? Kitabu kilifunguliwa baadaye na yule Simba wa Kabila la Yuda aliyeshinda apate kukifungua kitabu. Lakini imeandikwa, kwanza, kabla kitabu hakijafunguliwa, "Nikalia sana." Naam, na machozi ya Yohana, yaliyokuwa maombi yake ya majimaji, yalikuwa, kwa upande wake, funguo takatifu ambazo kwazo kile kitabu kilichokunjwa kilifunguliwa.

Ndugu katika huduma, ninyi mlio walimu katika shule ya Jumapili, na ninyi nyote mlio wanafunzi katika chuo cha Kristo Yesu, nawasihi kumbukeni ya kwamba maombi ndiyo njia yenu bora ya kujifunza—kama Danieli mtaifahamu ndoto na tafsiri yake mtakapokuwa mmemtafuta Mungu. Na kama Yohana mtaiona mihuri saba ya Kweli ya Mungu ya thamani ikifunguliwa baada ya kulia sana. "Naam, ukiililia maarifa, na kupaza sauti yako kwa ajili ya ufahamu: ukiutafuta kama fedha, na kuutafuta sana kama hazina zilizositirika: ndipo utakapofahamu kumcha Bwana, na kupata kumjua Mungu."

Mawe hayavunjwi ila kwa matumizi ya bidii ya nyundo. Naye mvunja-mawe hupiga magoti mara nyingi. Tumia nyundo ya juhudi, na magoti ya maombi nayo yatumike pia, na hakuna fundisho gumu kama jiwe katika Ufunuo wa Mungu lililo la maana kwako kulifahamu, lisilovunjika vipande vipande chini ya matumizi ya maombi na imani. "Bene orasse est bene studuisse" ni neno la hekima la Luther lililotajwa mara nyingi mno hata hatuthubutu ila kulidokeza tu. "Kuomba vema ndiko kujifunza vema."

Waweza kujipenyezea njia katikati ya kitu chochote kwa nguvu ya mtambo wa maombi. Fikira na hoja zaweza kuwa kama kabari za chuma zifunguazo njia ya kuingia katika Kweli ya Mungu. Lakini maombi ndiyo mtambo ulifunguao kwa nguvu kasha la chuma la siri takatifu, ili tupate kuifikia hazina iliyofichwa humo kwa ajili yao wawezao kujipenyezea njia kuifikia. Ufalme wa Mbinguni ungali unapatikana kwa nguvu, nao wenye nguvu wauteka. Angalia ufanye kazi siku zote kwa kile chombo chenye uwezo cha maombi, wala hakuna kitakachoweza kusimama mbele yako.

Lakini hatupaswi kuishia hapo. Tumelitumia andiko kwa hali moja tu—nalo lafaa kwa hali mia. Twachagua nyingine. Mtakatifu aweza kutazamia kuvumbua uzoefu wa ndani zaidi, na kujua mengi zaidi ya uzima wa kiroho ulio juu zaidi, kwa kudumu sana katika maombi. Ziko tafsiri mbalimbali za andiko langu. Moja yalifasiri, "Nitakuonyesha mambo makubwa na yenye boma, usiyoyajua." Nyingine yasoma, "Mambo makubwa yaliyowekwa akiba, usiyoyajua." Basi maendeleo yote ya uzima wa kiroho si mepesi kuyafikia sawasawa. Ziko hali za kawaida za toba na imani na furaha na tumaini zifurahiwazo na jamaa yote—lakini uko ulimwengu wa juu wa shangwe, wa ushirika na wa umoja na Kristo ujulikanao moyoni—ulio mbali na kuwa makao ya kawaida ya Waaminio.

Waaminio wote humwona Kristo, lakini si Waaminio wote watiao vidole vyao katika alama za misumari, wala kuutia mkono wao ubavuni mwake. Hatuna lile pendeleo kuu la Yohana la kuegama kifuani pa Yesu, wala la Paulo la kunyakuliwa hata mbingu ya tatu. Katika safina ya wokovu twaona orofa ya chini, ya pili na ya tatu. Wote wamo safinani, lakini si wote walio katika orofa moja. Wakristo wengi, kwa habari ya mto wa uzoefu, wamefikiwa na maji hata vifundo vya miguu tu. Wengine wamepita katikati hata mto umefika magotini. Wachache huuona umefika kifuani. Na wachache—lo, jinsi walivyo wachache!—huuona kuwa mto wa kuogelea, ambao hawawezi kuufikia chini yake.

Ndugu zangu, ziko juu katika maarifa ya uzoefu ya mambo ya Mungu ambazo jicho la tai la werevu na fikira za kifalsafa halijapata kuziona kamwe. Na ziko njia za siri ambazo mwana-simba wa akili na hukumu hajajifunza bado kuzipita. Mungu peke yake aweza kutuchukua huko, lakini lile gari atupandishalo ndani yake, na wale farasi wa moto walikokotao gari lile, ni MAOMBI yashindayo. Maombi yashindayo yana ushindi kwa Mungu wa Rehema. "Kwa nguvu zake alikuwa na uwezo kwa Mungu: naam, alikuwa na uwezo juu ya yule malaika, akashinda: alilia, akamsihi: alimwona huko Betheli, na huko akasema nasi." Maombi yashindayo humchukua Mkristo hata Karmeli, na kumwezesha kuzifunika mbingu kwa mawingu ya baraka, na nchi kwa mafuriko ya rehema.

Maombi yashindayo humpandisha Mkristo juu hata Pisga, na kumwonyesha ule urithi uliowekwa akiba. Naam, tena humwinua hata Tabori na kumbadilisha sura, hata katika mfano wa Bwana wake, kama yeye alivyo, ndivyo tulivyo na sisi! Katika ulimwengu huu, ukitaka kufikia kitu kilicho juu zaidi ya uzoefu wa kawaida wa kutambaa chini, utazame ule Mwamba ulio juu kuliko wewe, ukatazame kwa jicho la imani kupitia madirisha ya maombi yasiyokoma. Basi ili kukua katika uzoefu, hapana budi kuwe na maombi mengi.

Hamna budi kunivumilia nikilitumia andiko hili kwa hali mbili tatu zaidi. Ni kweli hakika kwa mtu ateswaye katika majaribu—akimngojea Mungu katika maombi atapokea wokovu mkuu zaidi kuliko alivyopata kuota kamwe— "mambo makubwa, magumu usiyoyajua." Huu hapa ushuhuda wa Yeremia—"Ulikaribia siku ile niliyokuita: ukasema, Usiogope. Ee Bwana, umeyatetea mashauri ya nafsi yangu. Umeukomboa uhai wangu." Na wa Daudi ni uleule—"Katika shida yangu nalimwita Bwana: Bwana akanijibu, akaniweka panapo nafasi...Nitakushukuru: kwa maana umenisikia, nawe umekuwa wokovu wangu."

Na tena—"Ndipo wakamlilia Bwana katika taabu zao, akawaokoa na shida zao. Akawaongoza kwa njia iliyonyoka, wapate kwenda mji wa kukaa." "Mume wangu amekufa," alisema yule mwanamke maskini, "na aliyenikopesha amekuja kuwatwaa wanangu wawili wawe watumwa." Alitumaini ya kuwa yamkini Eliya angesema, "Deni zako ni nini? Nitazilipa." Badala ya hayo, aliyaongeza mafuta yake hata imeandikwa, "Enenda, ukalipe deni yako, na"—lile "na" lilikuwa nini?—"ukaishi wewe na wanao kwa yaliyosalia." Hivyo mara nyingi itatokea ya kuwa Mungu hatawasaidia watu wake kupita mahali pa matope pa njia tu, ili wasimame tu ng'ambo ya pili ya lile shimo la matope—bali atawafikisha salama mbali sana katika safari.

Ule ulikuwa mwujiza wa ajabu, wakati katikati ya tufani, Yesu Kristo alikuja akitembea juu ya bahari! Wanafunzi walimpokea chomboni, wala si bahari tu ilitulia, bali imeandikwa, "Mara chombo kikaifikia nchi waliyokuwa wakiiendea." Hiyo ilikuwa rehema zaidi ya walichokiomba. Nawasikia wakati mwingine mkiomba na kutumia nukuu isiyokuwamo katika Biblia—"Yeye aweza kufanya mambo ya kuzidi kabisa kupita yote tuwezayo kuomba au hata kuwaza." Haikuandikwa hivyo katika Biblia. Sijui tuwezayo kuomba wala tuwezayo kuwaza. Bali imesemwa, "Yeye aweza kufanya mambo ya kuzidi kabisa kupita yote tuombayo au hata kuwaza."

Basi, Rafiki wapendwa, tuwapo katika jaribu kuu, na tuseme tu, "Sasa nimo gerezani. Kama Yeremia nitaomba kama alivyoomba yeye, kwa maana ninayo amri ya Mungu ya kufanya hivyo. Nami nitatazamia kama yeye, nikingoja ya kuwa atanionyesha rehema zilizowekwa akiba nisizozijua kabisa sasa." Hatawavusha watu wake vitani tu, akivifunika vichwa vyao ndani yake, bali atawatoa na bendera zikipepea, ili wagawanye nyara pamoja na wakuu, na kulidai fungu lao pamoja na wenye nguvu! Tazamia mambo makubwa kwa Mungu atoaye ahadi kubwa kama hizi!

Tena, hapa pana kutiwa moyo kwa mtenda kazi. Wengi wenu mnafanya jambo fulani kwa ajili ya Kristo. Nina furaha kuweza kusema hivi, nikijua ya kuwa siwasifu kwa uongo. Rafiki zangu wapendwa, mngojeni Mungu sana katika maombi, nanyi mnayo ahadi ya kuwa atawafanyia mambo makubwa zaidi kuliko myajuayo. Hatujui ni kiasi gani cha uwezo wa kufaa kilichomo ndani yetu. Ule mfupa wa taya ya punda ulalao pale juu ya nchi—waweza kufanya nini? Hakuna ajuaye uwezalo kufanya. Waingia mikononi mwa Samsoni—hauwezi kufanya nini? Hakuna ajuaye usiloweza kufanya sasa, kwa kuwa Samsoni ndiye aushikaye! Nawe, Rafiki, mara nyingi umejidhania kuwa duni kama ule mfupa, ukasema, "Naweza kufanya nini?" Naam, lakini Kristo, kwa Roho wake, akushikapo—huwezi kufanya nini?

Kweli waweza kuyatwaa maneno ya Paulo na kusema, "Nayaweza mambo yote katika Kristo anitiaye nguvu." Lakini usiyategemee maombi pasipo juhudi. Katika shule fulani palikuwa na msichana mmoja aliyemjua Bwana. Alikuwa mtoto mwenye neema, mnyofu wa moyo, mwenye kutumaini. Kama kawaida, Neema ya Mungu ilijidhihirisha ndani ya mtoto kulingana na hali ya mtoto. Masomo yake yalisomwa vizuri siku zote kuliko ya wote darasani. Msichana mwingine akamwuliza, "Imekuwaje masomo yako husomwa vizuri hivyo siku zote?" "Namwomba Mungu anisaidie," akasema, "kujifunza somo langu." "Haya," akawaza yule mwingine, "basi nami nitafanya vivyo hivyo." Asubuhi iliyofuata aliposimama darasani hakujua neno lolote. Na alipokuwa katika aibu alimlalamikia yule mwingine, "Nalimwomba Mungu anisaidie kujifunza somo langu, wala sijui lolote katika somo hilo. Maombi yana faida gani?"

"Lakini je, uliketi ukajaribu kujifunza?" "La, hasha," akasema, "sikukitazama kitabu kamwe." "Aa, basi," akasema yule mwingine, "mimi nalimwomba Mungu anisaidie kujifunza somo langu—lakini ndipo nikaketi kujifunza kwa bidii, nikadumu hata nikalijua vizuri, nami nalijifunza kwa urahisi, kwa sababu haja yangu ya bidii, niliyokuwa nimemweleza Mungu, ilikuwa, nisaidie kuwa na juhudi katika kujitahidi kuutimiza wajibu wangu." Ndivyo ilivyo kwa wengine wajao kwenye Mikutano ya Maombi na kuomba, kisha huikunja mikono yao na kwenda zao wakitumaini ya kuwa kazi ya Mungu itaendelea. Kama yule mwanamke Mwafrika aliyeimba, "Ruka uenee, Ewe Injili yenye nguvu," lakini asitie senti moja sahanini—hata rafiki yake akamgusa, akasema, "Lakini itawezaje kuruka usipoipa mabawa ya kurukia?"

Wako wengi waonekanao kuwa hodari sana katika maombi, wa ajabu katika dua! Lakini humtaka Mungu ayafanye yale wawezayo kuyafanya wenyewe, na kwa hiyo Mungu hawafanyii lolote kabisa. "Nitamwacha ngamia wangu bila kumfunga," alisema Mwarabu mmoja siku moja kwa Mahomet, "nitegemee riziki ya Mungu." "Mfunge," akasema Mahomet, "kisha utegemee riziki ya Mungu." Vivyo hivyo ninyi msemao, "Nitaomba na kuliachia Kanisa langu, au darasa langu, au kazi yangu kwa wema wa Mungu," afadhali msikie sauti ya Uzoefu na Hekima isemayo, "Fanya yako yote. Fanya kazi kana kwamba yote yategemea taabu yako—kana kwamba jitihada yako mwenyewe italeta wokovu wako. Na ukiisha kufanya yote, jitupe juu yake yeye ambaye pasipo yeye ni bure kuamka mapema, na kukesha hata usiku, na kula mkate wa mashaka. Naye akikufanikisha, mpe yeye sifa."

Sitawakalisha dakika nyingi zaidi, lakini nataka kuonyesha ya kuwa ahadi hii yapasa kuwafaa kwa kuwafariji wale walio waombezi kwa ajili ya wengine. Ninyi mnaomwita Mungu awaokoe watoto wenu, awabariki jirani zenu, awakumbuke waume zenu au wake zenu kwa rehema, mwaweza kupata faraja kwa neno hili! "Nitakuonyesha mambo makubwa, magumu usiyoyajua." Mhudumu mmoja mashuhuri wa karne iliyopita, mmoja Bwana Bailey, alikuwa mtoto wa mama mtauwa. Mama huyu alikuwa karibu ameacha kumwombea mumewe, aliyekuwa mtu wa namna isiyomcha Mungu kabisa, na mtesi mkali.

Yule mama alimwombea mwanawe, na alipokuwa angali na umri wa miaka kumi na mmoja au kumi na miwili, rehema ya milele ilikutana naye. Mtoto huyo alifundishwa kwa utamu sana katika mambo ya ufalme wa Mungu, hata mama yake akamwomba—na kwa kitambo fulani alifanya hivyo siku zote—kuyaongoza maombi ya jamaa nyumbani. Asubuhi na jioni mtoto huyu mdogo aliifungua Biblia. Na ijapokuwa baba hakukubali kusimama kwa ajili ya maombi ya jamaa, lakini siku moja alikuwa na hamu kidogo ya kujua, "mtoto huyu atalifanyaje jambo hilo," basi akasimama upande wa pili wa mlango, na Mungu akalibariki ombi la mtoto wake mwenyewe, asiyetimiza miaka kumi na mitatu, kwa kuongoka kwake!

Alisema yule mama, "Ningaliweza kweli kulisoma andiko langu kwa macho yachuruzikayo machozi na kusema, 'Naam, Bwana, umenionyesha mambo makubwa, magumu nisiyoyajua! Hukumwokoa mwanangu tu, bali kwa njia ya mwanangu umemleta mume wangu kwenye Kweli." Hamwezi kubahatisha jinsi Mungu atakavyowabariki sana! Nendeni tu mkasimame mlangoni pake—hamwezi kujua kilichowekwa akiba kwa ajili yenu. Msipoomba kabisa, hamtapata kitu. Lakini mkiomba, aweza si kuwapa tu, kama ilivyo, mifupa na nyama zilizosalia, bali aweza kumwambia mtumishi mezani pake, "Itwae ile nyama nzuri, ukamwandalie yule maskini."

Ruthu alikwenda kuokota masazo. Alitazamia kupata masuke machache mazuri—lakini Boazi akasema, "Mwacheni aokote hata kati ya miganda, wala msimkemee." Tena akamwambia, "Wakati wa chakula njoo hapa, ule mkate, na kulichovya tonge lako katika siki." Alipata mume mahali alipotazamia kupata konzi ya shayiri tu. Vivyo hivyo katika kuwaombea wengine, Mungu aweza kutupa rehema nyingi hata tutashangazwa nazo, kwa kuwa tulitazamia kidogo tu. Sikieni yaliyosemwa juu ya Ayubu, mkajifunze somo lake, "Naye Bwana akasema, Mtumishi wangu Ayubu atawaombea: kwa maana yeye nitamkubali: nisiwatende kwa kadiri ya upumbavu wenu, kwa kuwa hamkusema habari zangu yaliyo sawa, kama mtumishi wangu Ayubu...Naye Bwana akaugeuza uteka wa Ayubu, alipowaombea rafiki zake: Bwana akampa Ayubu mara mbili kuliko yote aliyokuwa nayo kwanza."

Basi, neno hili la kumalizia. Baadhi yenu ni watafutaji wa kuongoka kwenu wenyewe. Mungu amewaamsha kuomba kwa uzito juu ya roho zenu wenyewe. Hamridhiki kwenda Jehanamu. Mwataka Mbingu. Mwataka kuoshwa katika ile damu ya thamani—mwataka uzima wa milele. Rafiki wapendwa, nawasihi litwaeni andiko hili—Mungu mwenyewe awaambia ninyi—"Niite, nami nitakujibu, na kukuonyesha mambo makubwa, magumu usiyoyajua." Mtwaeni Mungu kwa Neno lake mara moja. Nendeni nyumbani—ingia katika chumba chako, ukaufunge mlango wako, ukamjaribu!

Kijana mwanamume, nasema, Mjaribu Bwana! Kijana mwanamke, mthibitishe—uone kama yeye ni wa kweli au sivyo! Ikiwa Mungu ni wa kweli, huwezi kutafuta rehema mikononi mwake kwa njia ya Yesu Kristo ukapata jibu la kukataliwa. Ni lazima—kwa maana ahadi yake na Sifa yake mwenyewe zamfunga kwa hilo—akufungulie mlango wa Rehema wewe ubishaye kwa moyo wako wote! Mungu na awasaidie, mkimwamini Kristo Yesu, kumlilia Mungu kwa sauti, na jibu lake la amani tayari li njiani kuja kuwalaki! Mtamsikia akisema, "Dhambi zako, zilizo nyingi, zimesamehewa zote." Bwana awabariki kwa ajili ya pendo lake. Amina.

[TANBIHI—Katika hubiri iliyotangulia, tulipokuwa tukilikemea kosa la "kutokuungama dhambi kwa Waaminio," tuliwahesabia isivyo haki Plymouth Brethren uzushi huo mbaya. Tumekwisha kujua tangu hapo ya kuwa wale watu tuliowagusia walikuwa wamefukuzwa katika jamaa hiyo, na kwa hiyo twataka kuiondolea jamii hiyo hatia ya kosa wasilo nalo. Twasikitika kwa kulileta shtaka hili, kwa maana ni mbali na nia yetu kumsema mtu yeyote vibaya, lakini hatukuwa na habari za kufukuzwa kwa wale wenye hatia.]