Msalaba Ni Kitu cha Kimapinduzi

Msalaba wa Kristo ndicho kitu cha kimapinduzi kuliko vyote kuwahi kutokea kati ya wanadamu.

Msalaba wa nyakati za Warumi haukujua maafikiano; haukuwahi kulegeza msimamo. Ulishinda hoja zake zote kwa kumwua mpinzani wake na kumnyamazisha milele. Haukumhurumia Kristo, bali ulimwua kama wale wengine wote. Alikuwa hai walipomtundika juu ya msalaba ule, na alikuwa amekufa kabisa walipomshusha saa sita baadaye. Huo ndio msalaba ulivyokuwa mara ya kwanza ulipotokea katika historia ya Kikristo.

Baada ya Kristo kufufuka katika wafu, mitume walitoka kwenda kuuhubiri ujumbe wake, na walichohubiri kilikuwa msalaba. Na kila walikokwenda katika ulimwengu mpana waliubeba msalaba, na nguvu ile ile ya kimapinduzi ikaenda pamoja nao. Ujumbe mkali wa msalaba ulimgeuza Sauli wa Tarso, ukambadilisha kutoka mtesi wa Wakristo kuwa mwamini mpole na mtume wa imani. Nguvu yake iliwabadilisha watu waovu wakawa wema. Ulivunja utumwa wa muda mrefu wa upagani, ukabadilisha kabisa mtazamo mzima wa kimaadili na wa kifikra wa ulimwengu wa Magharibi.

Haya yote ulifanya, na uliendelea kufanya, maadamu uliruhusiwa kubaki kama ulivyokuwa hapo mwanzo, yaani msalaba. Nguvu yake iliondoka ulipogeuzwa kutoka kitu cha mauti kuwa kitu cha urembo. Wanadamu walipoufanya kuwa ishara tu, wakautundika shingoni mwao kama pambo, au wakachora umbo lake mbele ya nyuso zao kama alama ya uchawi ya kufukuza mabaya, ndipo ukawa, kwa hali yake bora, nembo dhaifu, na kwa hali yake mbaya, hirizi kamili. Hivyo ndivyo unavyoheshimiwa leo na mamilioni wasiojua kitu kabisa juu ya nguvu yake.

Msalaba hutimiza makusudi yake kwa kuuharibu mfumo mmoja uliokwisha kuwekwa, ule wa mhanga wake, na kuujenga mfumo mwingine, ule wake wenyewe. Hivyo daima hupata njia yake. Hushinda kwa kumshinda mpinzani wake na kumlazimisha kutii mapenzi yake. Daima hutawala. Kamwe haufanyi maafikiano, kamwe haujadiliani wala haushauriani, kamwe hauachi hata jambo moja kwa ajili ya amani. Haujali amani; hujali tu kukomesha upinzani wake haraka iwezekanavyo.

Akiyajua haya yote kikamilifu, Kristo alisema:

Luka 9:23 "Mtu ye yote akitaka kunifuata, na ajikane mwenyewe, ajitwike msalaba wake kila siku, anifuate."

Basi msalaba si tu unayakomesha maisha ya Kristo; unayakomesha pia maisha ya kwanza, maisha ya zamani, ya kila mmoja wa wafuasi wake wa kweli. Unauharibu mfumo wa zamani, mfumo wa Adamu, katika maisha ya mwamini, na kuukomesha. Kisha Mungu yule aliyemfufua Kristo katika wafu humfufua mwamini, na maisha mapya huanza.

Huu, wala si kitu pungufu ya huu, ndio Ukristo wa kweli, ingawa hatuwezi kujizuia kutambua jinsi wazo hili linavyotofautiana sana na lile linaloshikwa na wainjilisti wengi wa kawaida leo. Lakini hatuthubutu kulegeza msimamo wetu. Msalaba umesimama juu sana kupita maoni ya wanadamu, na mwishowe maoni yote lazima yaje kwenye msalaba huo ili yahukumiwe. Uongozi wa juujuu na wa kidunia ungeubadilisha msalaba ili kuwafurahisha hao watakatifu-wadogo waliopagawa na burudani, ambao watajifurahisha hata ndani ya patakatifu penyewe; lakini kufanya hivyo ni kujitafutia maafa ya kiroho na kuhatarisha ghadhabu ya Mwana-Kondoo aliyegeuka kuwa Simba.

Lazima tuchukue hatua juu ya msalaba, na tunaweza kufanya mambo mawili tu—kuukimbia au kufa juu yake. Na tukiwa wapumbavu kiasi cha kuukimbia, kwa tendo hilo tutaitupilia mbali imani ya baba zetu na kuufanya Ukristo kuwa kitu kingine kisicho Ukristo. Ndipo tutakapobaki na lugha tupu ya wokovu tu; nguvu itaondoka pale tutakapoondoka kwenye msalaba wa kweli.

Tukiwa na hekima tutafanya kile alichofanya Yesu: kuustahimili msalaba na kuidharau aibu yake kwa ajili ya furaha iliyowekwa mbele yetu. Kufanya hivyo ni kuukabidhi mfumo mzima wa maisha yetu ili uharibiwe na kujengwa upya katika nguvu ya uzima usio na mwisho. Nasi tutagundua kwamba jambo hili ni zaidi ya ushairi, zaidi ya nyimbo tamu na hisia za juu. Msalaba utakata mahali panapouma kuliko pote, bila kutuachilia sisi wala sifa zetu tulizozitunza kwa uangalifu mwingi. Utatushinda na kuyakomesha maisha yetu ya ubinafsi. Hapo tu ndipo tunaweza kuinuka katika ukamilifu wa uzima ili kuanzisha mfumo wa kuishi ulio mpya kabisa, huru, na uliojaa matendo mema.

Mtazamo uliobadilika juu ya msalaba tunaouona katika mafundisho ya kiorthodoksi ya kisasa hauthibitishi kwamba Mungu amebadilika, wala kwamba Kristo amelegeza dai lake kwamba tuubebe msalaba; bali una maana kwamba Ukristo wa sasa umehama mbali na viwango vya Agano Jipya. Kwa kweli tumehama mbali kiasi kwamba huenda isiwezekane kuurudisha msalaba mahali pake panapostahili katika theolojia na maisha ya Kanisa kwa kitu chochote pungufu ya matengenezo mapya.