Pumziko

Miaka kadhaa iliyopita, bwana mmoja alinijia akaniuliza ni ipi niliyoiona kuwa ahadi ya thamani kuliko zote alizoziacha Kristo. Nilitumia muda kuzitafakari, lakini nikaacha. Niligundua kwamba sikuweza kulijibu swali hilo. Ni kama mtu mwenye jamaa kubwa ya watoto; hawezi kusema ni yupi ampendaye kuliko wote; anawapenda wote. Lakini kama si ile bora kuliko zote, hii ni mojawapo ya ahadi tamu kuliko zote: “Njoni kwangu, ninyi nyote msumbukao na wenye kubeba mizigo, nami nitawapumzisha. Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu. Kwa maana nira yangu ni laini, na mzigo wangu ni mwepesi.”

Wako watu wengi wanaodhani kwamba ahadi hazitatimizwa. Ziko nyingine unazoziona zikitimia, hata usiweze kujizuia kuamini ya kuwa ni za kweli. Basi kumbuka kwamba si ahadi zote zinazotolewa pasipo masharti. Nyingine hutolewa pamoja na masharti, na nyingine pasipo masharti. Kwa mfano, imeandikwa, “Kama ningaliuangalia uovu moyoni mwangu, Bwana asingenisikia.” Basi haina maana niombe wakati ninapouhifadhi dhambi fulani ninayoijua. Hatanisikia, sembuse kunijibu. Bwana asema katika Zaburi ya themanini na nne, “Hatawanyima kitu chema hao waendao kwa unyofu.” Kama sitembei kwa unyofu, sina haki katika ahadi hiyo. Tena, baadhi ya ahadi zilitolewa kwa watu au mataifa fulani. Kwa mfano, Mungu alisema kwamba angeuzidisha uzao wa Ibrahimu kama nyota za mbinguni: lakini hiyo si ahadi kwako wala kwangu. Baadhi ya ahadi zilitolewa kwa Wayahudi, wala hazihusu watu wa Mataifa.

Kisha ziko ahadi zisizo na masharti. Aliwaahidi Adamu na Hawa kwamba ulimwengu ungepata Mwokozi, wala hapakuwa na nguvu duniani wala kuzimu iliyoweza kumzuia Kristo asije kwa wakati uliowekwa. Kristo alipouacha ulimwengu, alisema kwamba angetuletea Roho Mtakatifu. Alikuwa ameondoka siku kumi tu, naye Roho Mtakatifu akaja. Hivyo waweza kupitia Maandiko yote, nawe utaona kwamba baadhi ya ahadi zina masharti, na baadhi hazina; nasi tusipoyatimiza masharti, hatuwezi kutazamia zitimizwe.

Naamini kwamba hili litakuwa ni jaribio la kila mwanamume na mwanamke juu ya uso wa dunia; naamini kila mmoja atalazimika kushuhudia jioni ya maisha yake, kwamba kama ameyatimiza masharti, Bwana amelitimiza neno lake barabara. Yoshua, yule shujaa wa zamani wa Kiebrania, ni mfano. Baada ya kumjaribu Mungu miaka arobaini katika matanuru ya matofali ya Misri, miaka arobaini jangwani, na miaka thelathini katika Nchi ya Ahadi, ushuhuda wake alipokuwa akifa ulikuwa: “Hakuna neno hata moja lililopungua katika mambo yote mema aliyoyaahidi Bwana.” Naamini ni rahisi zaidi kuiinua bahari kuliko kuivunja mojawapo ya ahadi za Mungu. Basi tufikapo kwenye ahadi kama hii iliyo mbele yetu sasa, nataka mkumbuke kwamba haina upungufu wo wote. “Njoni kwangu, ninyi nyote msumbukao na wenye kubeba mizigo, nami nitawapumzisha.”

Labda utasema: “Natumaini Bwana Moody hataihubiri andiko hili la zamani.” Ndiyo: nitalihubiri. Nichukuapo albamu ya picha, hainivutii kama picha zote ni mpya; lakini nikiona uso ninaoujua, husimama papo hapo. Ndivyo ilivyo kwa maandiko haya ya zamani yanayojulikana sana. Yamekwisha kuikata kiu yetu hapo awali, lakini maji bado yanabubujika—hatuwezi kuyanywa yakakauka.

Ukiuchunguza moyo wa mwanadamu, utaona uhitaji, nao uhitaji huo ni pumziko. Kilio cha ulimwengu leo ni, “Pumziko laweza kupatikana wapi?” Kwa nini kumbi za maonyesho na sehemu za anasa zimejaa watu usiku? Ni siri gani ya matembezi ya Jumapili, ya vilabu vya ulevi na madanguro? Wengine hudhani watalipata katika anasa, wengine hudhani watalipata katika utajiri, na wengine katika elimu ya vitabu. Wanatafuta lakini hawapati pumziko.

Pumziko Laweza Kupatikana Wapi?

Kama ningetaka kumpata mtu aliye na pumziko, nisingeenda miongoni mwa matajiri wakubwa. Yule mtu tunayemsoma katika sura ya kumi na mbili ya Luka, alidhani angepata pumziko kwa kuzidisha mali yake, lakini alikatishwa tamaa. “Ee nafsi, starehe.” Nathubutu kusema kwamba hakuna mtu katika ulimwengu huu mpana aliyejaribu kupata pumziko kwa njia hiyo akalipata.

Fedha haziwezi kulinunua. Matajiri wengi wenye mamilioni wangetoa mamilioni kwa furaha kama wangeweza kulinunua kama wanunuavyo hisa na sehemu zao. Mungu ameifanya nafsi kuwa kubwa kidogo kupita ulimwengu huu. Uviringishe ulimwengu wote uingie ndani yake, bado kutakuwa na nafasi. Kuna wasiwasi katika kupata utajiri, na wasiwasi zaidi katika kuutunza.

Wala nisingeenda miongoni mwa wafuatao anasa. Wana furaha ya saa chache, lakini siku inayofuata kuna huzuni ya kutosha kuilinganisha. Waweza kukinywa kikombe cha anasa leo, lakini kikombe cha maumivu huja kesho.

Ili kupata pumziko, kamwe nisingeenda miongoni mwa wanasiasa, wala miongoni mwa wanaoitwa wakuu. Bunge ni mahali pa mwisho kabisa duniani ambapo ningeenda. Katika Baraza la Chini wanatamani kwenda katika Seneti; katika Seneti wanatamani kwenda katika Baraza la Mawaziri; kisha wanatamani kwenda Ikulu; wala pumziko halijapata kuonekana huko. Wala nisingeenda katika kumbi za elimu. “Kujifunza sana huuchosha mwili.” Nisingeenda miongoni mwa matajiri wa daraja la juu, wale wa “hadhi ya juu,” kwa maana daima wanaikimbiza mitindo. Je, hujaona nyuso zao zilizojaa masumbuko barabarani mwetu? Nao uso ni kioo cha nafsi. Hawana sura ya matumaini. Kuiabudu kwao anasa ni utumwa. Sulemani alijaribu anasa, akakuta masikitiko machungu, na tangu enzi hata enzi umekuja huo mlio mchungu, “Yote ni ubatili.”

Basi, hakuna pumziko katika dhambi. Waovu hawajui lo lote juu yake. Maandiko yatuambia kwamba waovu “ni kama bahari iliyochafuka isiyoweza kutulia.” Labda umepata kuwa baharini wakati wa shwari, maji yakiwa mangavu kama bilauri, ikaonekana kana kwamba bahari imetulia. Lakini ukiangalia utaona kwamba mawimbi yanaingia, na kwamba ile shwari ilikuwa juu ya uso tu. Mwanadamu, kama bahari, hana pumziko. Hajakuwa na pumziko tangu Adamu alipoanguka, wala hana pumziko mpaka atakaporudi kwa Mungu tena, na nuru ya Kristo iangaze moyoni mwake.

Pumziko haliwezi kupatikana katika ulimwengu, na ashukuriwe Mungu kwamba ulimwengu hauwezi kuliondoa katika moyo uaminio! Dhambi ndiyo chanzo cha ukosefu huu wote wa pumziko. Ndiyo iliyoleta taabu na juhudi na dhiki ulimwenguni.

Sasa kwa jambo lenye matumaini. Ningeenda kwa mafanikio kwa mtu ambaye ameisikia sauti tamu ya Yesu, naye ameuweka chini mzigo wake pale msalabani. Kuna pumziko, pumziko tamu. Maelfu wangeweza kuthibitisha ukweli huu wa baraka. Wangeweza kusema, na kwa kweli:

Naliisikia sauti ya Yesu ikisema,

“Njoo kwangu upate pumziko.

Lala chini, wewe uliyechoka, lala chini,

Kichwa chako kifuani pangu.”

Nilimjia Yesu kama nilivyokuwa,

Nimechoka, nimedhoofika, na huzuni.

Nikaona kwake mahali pa kupumzika,

Naye amenifurahisha.

Katika maandishi yake yote, Mtakatifu Augustino hana lililo tamu kuliko hili: “Umetuumba kwa ajili yako mwenyewe, Ee Mungu, na moyo wetu hauna pumziko hata utakapopumzika ndani yako.”

Je, wajua kwamba kwa miaka elfu nne hakuna nabii wala kuhani wala baba wa ukoo aliyepata kusimama na kunena andiko kama hili? Ingekuwa kufuru kwa Musa kunena andiko kama hilo. Wadhani alikuwa na pumziko alipokuwa akimsihi Bwana amruhusu aingie katika Nchi ya Ahadi? Wadhani Eliya angeweza kunena andiko kama hili, alipokuwa chini ya mti wa mretemu, akiomba afe? Na huu ni mojawapo ya uthibitisho ulio imara kuliko yote kwamba Yesu Kristo hakuwa mwanadamu tu, bali Mungu. Alikuwa Mungu-Mtu, na hili ni tangazo la Mbinguni, “Njoni kwangu, nami nitawapumzisha”. Aliileta chini toka mbinguni pamoja naye.

Basi, kama andiko hili lisingekuwa la kweli, hudhani kwamba lingekwisha kugunduliwa hata sasa? Naliamini kama ninavyoamini kuwapo kwangu. Kwa nini? Kwa sababu silioni katika Kitabu tu, bali na katika uzoefu wangu mwenyewe. Yale maneno ya Kristo ya “nitafanya” hayajapata kuvunjwa, wala hayawezi kuvunjwa kamwe.

Namshukuru Mungu kwa neno “nitawapa” katika fungu hilo. Halithuii. Baadhi yetu ni maskini kiasi kwamba tusingeweza kulinunua kama lingekuwa la kuuzwa. Ashukuriwe Mungu, twaweza kulipata bure.

Napenda kuwa na andiko kama hili, kwa sababu latujumlisha sote. “Njoni kwangu, ninyi nyote msumbukao.” Hilo halimaanishi wateule wachache—wanawake wastaarabu na wanaume wenye elimu. Halimaanishi watu wema peke yao. Lawahusu mtakatifu na mwenye dhambi vile vile. Hospitali ni kwa ajili ya wagonjwa, si kwa ajili ya wenye afya. Wadhani Kristo angemfungia mtu ye yote mlango usoni pake, na kusema, “Sikumaanisha wote; nilimaanisha baadhi tu”? Kama huwezi kuja kama mtakatifu, njoo kama mwenye dhambi. Njoo tu!

Mwanamke mmoja aliniambia siku moja kwamba alikuwa na moyo mgumu kiasi kwamba hakuweza kuja.

“Vema,” nikasema, “mama yangu mwema, hakusema ninyi nyote wenye mioyo laini njoni. Mioyo myeusi, mioyo michafu, mioyo migumu, mioyo laini, mioyo yote na ije. Ni nani awezaye kuulainisha moyo wako mgumu ila Yeye mwenyewe?”

Kadiri moyo unavyokuwa mgumu, ndivyo unavyozidi kuhitaji kuja. Saa yangu ikisimama, siipeleki kwa duka la dawa wala kwa mfua chuma, bali kwa fundi wa saa, ili itengenezwe. Vivyo hivyo moyo ukiharibika, upeleke kwa mtunzaji wake, Kristo, ili urekebishwe. Kama waweza kuthibitisha kwamba wewe ni mwenye dhambi, unayo haki katika ahadi hiyo. Jipatie faida yote uwezayo kutoka kwake.

Basi, wako waumini wengi wanaodhani andiko hili lawahusu wenye dhambi peke yao; kumbe lawafaa wao pia. Twaona nini leo? Kanisa, watu wa Kikristo, wote wamelemewa na masumbuko na taabu. “Njoni kwangu, ninyi nyote msumbukao.” Nyote! Naamini hilo lamhusu na Mkristo ambaye moyo wake umelemewa na huzuni fulani kubwa. Bwana anataka uje.

Kristo Mchukua Mizigo.

Pamesemwa mahali pengine, “Huku mkimtwika yeye fadhaa zenu zote, kwa maana yeye hujishughulisha na mambo yenu.” Tungekuwa na Kanisa lenye ushindi kama tungeweza kuwafanya watu wa Kikristo kulitambua hilo. Lakini hawajapata kuligundua. Wanakubali kwamba Kristo ni mchukua dhambi, lakini hawatambui kwamba yeye ni mchukua mizigo pia. “Hakika yeye alichukua masikitiko yetu, na kujitwika huzuni zetu.” Ni pendeleo la kila mtoto wa Mungu kutembea katika mwanga wa jua usio na mawingu.

Watu wengine hurudi nyuma katika yaliyopita na kuyafukua masumbuko yote waliyopata kuwa nayo, kisha huyatazama yajayo na kutazamia kwamba watakuwa na taabu zaidi, nao huenda wakiyumbayumba na kupepesuka maisha yao yote. Hukupa kitetemo cha baridi kila wakukutanapo. Hujitwika sauti ya kununa, na kukueleza jinsi “walivyopata wakati mgumu.” Naamini huyahifadhi kama maiti, na kuitoa maiti iliyohanikizwa kila ipatikanapo nafasi. Bwana asema, “Nitwike mimi fadhaa zenu zote. Nataka kubeba mizigo yenu na taabu zenu.” Tunachokitaka ni Kanisa lenye furaha, wala hatutaugeuza ulimwengu mpaka tuwe nalo. Twataka kuiondoa duniani hii dini ya Kikristo yenye uso wa huzuni.

Wachukue watu hawa wenye mzigo fulani mkubwa, na uwaache waje katika mkutano. Kama utaweza kuvuta fikira zao katika uimbaji au mahubiri, watasema, “Loo, halikuwa jambo tukufu! Nilizisahau shida zangu zote.” Nao huutupa tu mzigo wao mwishoni mwa benchi. Lakini mara baraka itamkwapo, wanaunyakua tena ule mzigo. Wacheka, kumbe wewe mwenyewe wafanya vivyo hivyo. Mtwike yeye fadhaa yako.

Nyakati nyingine huingia katika chumba chao cha faragha na kufunga mlango wao, nao huchukuliwa na kuinuliwa kiasi kwamba huisahau taabu yao; lakini huiokota tena mara wanyanyukapo magotini. Iache huzuni yako sasa; mtwike yeye fadhaa yako yote. Kama huwezi kumjia Kristo kama mtakatifu, njoo kama mwenye dhambi. Lakini kama wewe ni mtakatifu mwenye taabu au shida fulani, mletee yeye. Mtakatifu na mwenye dhambi, njoni! Anawataka nyote. Usimwache Shetani akudanganye ukaamini kwamba huwezi kuja kama ukitaka. Kristo asema, “Hamtaki kuja kwangu.” Pamoja na amri huja nguvu.

Mtu mmoja katika mojawapo ya mikutano yetu huko Ulaya alisema angependa kuja, lakini alikuwa amefungwa minyororo, hakuweza kuja.

Mskoti mmoja akamwambia, “We bwana, kwa nini usije na minyororo yako na yote?”

Akasema, “Sikuwahi kulifikiri hilo.”

Je, wewe ni mkorofi na mwenye hasira, nawe wafanya mambo yasiyopendeza nyumbani? Rafiki yangu, njoo kwa Kristo umwombe akusaidie. Dhambi iwe ni ipi, mletee yeye.

Kuja Kwamaanisha Nini?

Labda utasema, “Bwana Moody, ningependa ututambulishe maana ya kuja.” Nimeacha kujaribu kulifafanua. Siku zote hujihisi kama yule mhubiri aliyesema angeenda kuivuruga sura, badala ya kuifafanua.

Maelezo yaliyo bora zaidi ni haya tu—njoo. Kadiri ujaribuvyo kulifafanua, ndivyo uchanganyikiwavyo zaidi. Miongoni mwa mambo ya kwanza mama humfundisha mtoto wake ni kutazama. Humpeleka mtoto mchanga dirishani, na kusema, “Tazama, mwanangu, baba anakuja!” Kisha humfundisha mtoto kuja. Humwegemeza kwenye kiti, na kusema, “Njoo!” na baada ya muda kile kidogo hukisukuma kiti kikielekea kwa mama. Huko ndiko kuja. Huhitaji kwenda chuo kikuu ili kujifunza jinsi gani. Huhitaji mhubiri ye yote akuambie ni nini. Sasa, je, utakuja kwa Kristo? Alisema, “Yeye ajaye kwangu mimi sitamtupa nje kamwe.”

Tunapokuwa na ahadi kama hii, na tuishike, wala tusiiache kamwe. Kristo hatudhihaki. Anataka tuje na dhambi zetu zote na kurudi kwetu nyuma, na kujitupa kifuani pake. Ni dhambi zetu azitakazo Mungu, si machozi yetu peke yake. Hayo peke yake hayafai kitu. Wala hatuwezi kuja kwa maazimio. Tendo ni la lazima. Ni mara ngapi kanisani tumesema, “Nitageuza ukurasa mpya,” lakini ukurasa wa Jumatatu ni mbaya kuliko ukurasa wa Jumamosi.

Njia ya kwenda mbinguni ni nyoofu kama kanuni, lakini ni njia ya msalaba. Usijaribu kuizunguka. Je, nikuambie ni nini ile “nira” inayotajwa katika andiko? Ni ule msalaba ambao Wakristo lazima wauchukue. Njia pekee ambayo kwayo waweza kupata pumziko katika ulimwengu huu wa giza ni kwa kuichukua nira ya Kristo. Sijui inaweza kujumuisha nini kwako, zaidi ya kuzichukua kazi zako za Kikristo, kumkiri Kristo na kutenda kama impasavyo mmoja wa wanafunzi wake. Labda inaweza kuwa ni kusimamisha madhabahu ya jamaa nyumbani; au kumwambia mume asiyemcha Mungu kwamba umeazimia kumtumikia Mungu; au kuwaambia wazazi wako kwamba wataka kuwa Mkristo. Ifuate mapenzi ya Mungu, na furaha na amani na pumziko vitakuja. Njia ya utii siku zote ni njia ya baraka.

Nilikuwa nikihubiri huko Chicago katika ukumbi uliojaa wanawake alasiri moja ya Jumapili, na baada ya mkutano kuisha mwanamke mmoja akanijia akasema anataka kuzungumza nami. Akasema angemkubali Kristo, na baada ya mazungumzo kadhaa akaenda nyumbani. Nilimtafuta kwa juma zima, lakini sikumwona mpaka alasiri ya Jumapili iliyofuata. Akaja akaketi mbele yangu kabisa, na uso wake ulikuwa na sura ya huzuni namna hiyo. Alionekana kana kwamba ameingia katika masikitiko, badala ya furaha, ya Bwana.

Baada ya mkutano kuisha nikamwendea nikamwuliza tatizo lilikuwa nini.

Akasema: “Loo, Bwana Moody, hili limekuwa juma la taabu kuliko yote katika maisha yangu.”

Nikamwuliza kama alikuwapo mtu ye yote aliyekorofishana naye asiyeweza kumsamehe.

Akasema: “Hapana, si kwa kadiri nijuavyo.”

“Vema, je, uliwaambia rafiki zako juu ya kumpata Mwokozi?”

“Hakika sikuwaambia, nimekuwa juma zima nikijaribu kuwaficha jambo hilo.”

“Vema,” nikasema, “hiyo ndiyo sababu huna amani.”

Alitaka kuutwaa taji, lakini hakuutaka msalaba. Rafiki zangu, ni lazima mpite kwa njia ya Kalvari. Kama utapata pumziko wakati wo wote, lazima ulipate chini ya msalaba.

“Kwani,” akasema, “kama ningerudi nyumbani na kumwambia mume wangu asiyeamini kwamba nimempata Kristo, sijui angefanya nini. Nadhani angenifukuza nje.”

“Vema,” nikasema, “toka nje.”

Akaenda zake, akiahidi kwamba angemwambia, akiwa na woga na uso uliopauka, lakini hakutaka juma jingine la taabu. Alikuwa amedhamiria kuwa na amani.

Usiku uliofuata nilitoa hotuba kwa wanaume peke yao, na katika ukumbi walikuwako wanaume elfu nane na mwanamke mmoja peke yake. Nilipomaliza na kuingia katika mkutano wa wanaotafuta wokovu, nikamkuta mwanamke huyu pamoja na mume wake. Akanitambulisha kwake (alikuwa daktari, na mtu mwenye ushawishi mkubwa) akasema:

“Anataka kuwa Mkristo.”

Nikachukua Biblia yangu nikamweleza yote juu ya Kristo, naye akamkubali. Nikamwambia yule mwanamke baada ya yote kwisha:

“Mambo yaligeuka tofauti kabisa na ulivyotazamia, sivyo?”

“Ndiyo,” akajibu, “sijapata kuogopa hivyo maishani mwangu. Nilitazamia angefanya jambo la kutisha, lakini yamegeuka vyema namna hii.”

Aliifuata njia ya Mungu, akapata pumziko.

Nataka kuwaambia wasichana, labda mnaye baba au mama asiyemcha Mungu, ndugu mwenye shaka, anayeporomoka kwa sababu ya ulevi, na labda hakuna ye yote awezaye kuwafikia ila wewe. Ni mara ngapi msichana mcha Mungu, safi, ameipeleka nuru katika nyumba fulani yenye giza! Nyumba nyingi zingeweza kuangazwa kwa Injili laiti mama na binti wangelinena tu neno.

Mara ya mwisho Bwana Sankey na mimi tulipokuwa Edinburgh, palikuwa na baba, dada wawili na kaka mmoja, waliokuwa kila asubuhi wakichukua gazeti la asubuhi na kulichambua hubiri langu vipande vipande. Walichukizwa kufikiri kwamba watu wa Edinburgh wangechukuliwa na mahubiri ya namna hiyo. Siku moja mmoja wa wale dada alikuwa akipita kando ya ukumbi, akawaza angeingia aone ni watu wa daraja gani waendao huko. Ikatokea akaketi kando ya mwanamke mcha Mungu, aliyemwambia:

“Natumaini unavutiwa na kazi hii.”

Akatikisa kichwa chake akasema: “Hakika sivutiwi. Nimechukizwa na kila kitu nilichokiona na kukisikia.”

“Vema,” akasema yule mwanamke, “labda umekuja na chuki ya awali.”

“Ndiyo, na mkutano huu haujaiondoa hata chembe, bali umeizidisha zaidi.”

“Mimi nimepata mema mengi sana kutoka kwao.”

“Hakuna kitu hapa kwa ajili yangu. Sioni jinsi mtu mwenye akili awezavyo kuvutiwa.”

Kwa kifupi, alimfanya yule mwanamke aahidi kurudi. Mkutano ulipovunjika, kiasi kidogo tu cha ile chuki kilikuwa kimeondoka. Aliahidi kurudi tena siku iliyofuata, kisha akahudhuria mikutano mingine mitatu au minne, akavutiwa sana. Hakuwaambia jamaa yake lo lote, mpaka hatimaye mzigo ukawa mzito mno, akawaambia. Wakamcheka, wakamfanya kuwa shabaha ya dhihaka yao.

Siku moja wale dada wawili walikuwa pamoja, na yule mwingine akasema: “Sasa umepata nini katika mikutano ile ambacho hukuwa nacho hapo awali?”

“Nina amani ambayo sikuwahi kuijua kabla. Nina amani na Mungu, na nafsi yangu, na ulimwengu wote.” Je, umepata kuwa na vita vyako vidogo na jirani zako, katika jamaa yako mwenyewe? Naye akasema: “Nina kujizuia. Wajua, dada yangu, kama ungalisema nusu ya maneno makali kabla sijaokoka kama uliyoyasema tangu hapo, ningalikasirika na kukujibu, lakini ukikumbuka sawasawa, sijakujibu hata mara moja tangu niokoke.”

Yule dada akasema: “Hakika unacho kitu ambacho mimi sina.” Yule mwingine akamwambia kwamba kilikuwa ni chake pia, akamleta yule dada mikutanoni, ambako akapata amani.

Kama Martha na Mariamu, walikuwa na kaka, lakini alikuwa mwanachama wa Chuo Kikuu cha Edinburgh. Yeye kuokoka? Yeye kwenda kwenye mikutano hii? Yaweza kufaa kwa wanawake, lakini si kwake. Usiku mmoja walirudi nyumbani wakamwambia kwamba rafiki yake mwenyewe, mwanachama wa Chuo Kikuu, alikuwa amesimama na kumkiri Kristo, na alipoketi, ndugu yake akasimama akakiri; na vivyo hivyo kwa yule wa tatu.

Kijana yule aliposikia hayo, akasema: “Je, wataka kuniambia kwamba ameokoka?”

“Ndiyo.”

“Vema,” akasema, “lazima kuna kitu ndani yake.”

Akavaa kofia yake, na koti lake, akaenda kumwona rafiki yake Black. Black akamleta mikutanoni, naye akaokoka.

Tulisafiri hadi Glasgow, na hatukuwa tumekaa huko majuma sita habari ilipofika kwamba kijana yule alikuwa amepigwa na maradhi na kufa. Alipokuwa akifa alimwita baba yake kitandani pake akasema:

“Je, halikuwa jambo jema kwamba dada zangu walikwenda mikutano ile? Je, hutakutana nami mbinguni, baba?”

“Ndiyo, mwanangu, nafurahi sana kwamba wewe ni Mkristo; hiyo ndiyo faraja pekee niliyo nayo katika kukupoteza. Nitakuwa Mkristo, nami nitakutana nawe tena.”

Nasimulia haya ili kumtia moyo dada fulani aende nyumbani na kuupeleka ujumbe wa wokovu. Yaweza kuwa kwamba ndugu yako ataondolewa katika miezi michache. Rafiki zangu wapendwa, je, hatuishi katika siku za uzito? Je, si wakati wetu wa kuwaingiza rafiki zetu katika Ufalme wa Mungu? Njoo, mke, je, hutamwambia mume wako? Njoo, dada, je, hutamwambia ndugu yako? Je, hutauchukua msalaba wako sasa? Baraka ya Mungu itakaa juu ya nafsi yako kama utataka.

Nilikuwa Wales mara moja, na mwanamke mmoja akaniambia hadithi hii ndogo: Rafiki yake Mwingereza, mama, alikuwa na mtoto aliyekuwa mgonjwa. Mwanzoni walidhani hakuna hatari, hata siku moja daktari akaingia akasema kwamba dalili zilikuwa mbaya sana. Akamtoa mama nje ya chumba, akamwambia kwamba mtoto hangeweza kuishi. Ikaja kama radi. Baada ya daktari kuondoka mama akaingia katika chumba mtoto alimolala akaanza kusema na mtoto na kujaribu kuiondoa fikira yake.

“Kipenzi changu, je, wajua kwamba karibu utaisikia muziki wa mbinguni? Utasikia wimbo mtamu kuliko wo wote uliopata kuusikia duniani. Utawasikia wakiimba wimbo wa Musa na wa Mwana-Kondoo. Wewe wapenda sana muziki. Je, hautakuwa mtamu, kipenzi changu?”

Naye yule mtoto mdogo aliyechoka, mgonjwa, akageuza kichwa chake, akasema, “Loo mama, nimechoka sana na mgonjwa sana hata nadhani ingenizidishia ugonjwa kuusikia muziki huo wote.”

“Vema,” mama akasema, “karibu utamwona Yesu, utawaona maserafi na makerubi na barabara zote zilizosakafiwa kwa dhahabu”; naye akaendelea kuionyesha mbingu kama ilivyoelezwa katika Ufunuo.

Yule mtoto mdogo aliyechoka akageuza tena kichwa chake, akasema, “Loo mama, nimechoka sana hata nadhani ingenizidishia ugonjwa kuona vitu vile vyote vizuri!”

Hatimaye mama akamchukua mtoto mikononi mwake, akambana kwenye moyo wake wenye upendo. Naye yule mgonjwa mdogo akanong’ona:

“Loo mama, hicho ndicho nitakacho. Laiti Yesu angenichukua tu mikononi mwake na kuniacha nipumzike!”

Rafiki mpendwa, je, hujachoka na kuchokwa na dhambi? Je, hujachoka na machafuko ya maisha? Waweza kupata pumziko kifuani pa Mwana wa Mungu.