Mwivi Anayekufa

Soma Luka 23:39-43

Nitachukua kama andiko langu mtu aliyekuwa wa mwisho kuokolewa kabla Kristo hajaenda mbinguni, au kabla hajafa msalabani, na hadithi ya wongofu wake yapaswa kumpa tumaini kila mtu. Katika Biblia tunao ushuhuda wa wongofu wa watu wa kila tabaka. Hakuna tabaka hata moja lililoachwa. Yupo tajiri kupita wote na maskini kupita wote; mkuu kupita wote na mdogo kupita wote; watu wa kila tabaka, na wanawake wa kila tabaka.

Kuna watu wengi mno siku hizi wanaonena dhidi ya wongofu wa ghafula, hata nadhani jambo lililo bora kabisa tuwezalo kufanya ni kuona Maandiko yasemavyo juu yake—kuona Mungu huchukua muda gani kumwongoa nafsi. Kama nikisoma Biblia yangu kwa usahihi, watu elfu nane waliongolewa katika siku mbili. Hiyo ilikuwa idadi njema katika muda mfupi, sivyo? Bado hatujafikia hapo; laiti tungefikia. Lakini nina hakika, kama tu kanisa la Mungu lingeamka, tungeona kitu kama hicho.

KAMWE SI KUCHELEWA MNO.

Basi, mtu huyu hakuwa mwivi tu, bali pia mtukanaji wa Mungu, akiwa hasa kizingitini pa umilele, mtu mpotovu na aliyeachwa kabisa. Mathayo atueleza: “Nao wale wevi wawili wakamtukana vivyo hivyo.” Ungedhani wangekuwa wakifanya jambo bora kuliko hilo, wakiwa karibu hivyo na mauti na kaburi; na kwamba mawazo yao yangefanywa kuwa ya dhati sana mbele ya mauti tu, bali baada ya mauti hukumu. Badala yake, walikuwa wakimtukana Kristo, na kumshutumu masaa machache kabla ya mauti yao. Basi, sidhani mwivi huyu angeweza kuzama zaidi, hata azame jehanamu. Ijapokuwa alikuwa mbali hivyo, Yesu alimpata. Mathayo na Marko wote wawili watueleza kwamba wevi hawa wawili walimtukana. Yohana hasemi lo lote juu ya kutukana kwao; kwa kweli, hatuelezi juu ya mmoja wao kuongolewa. Mara ya kwanza tunayoipata ni katika Luka 23:40, ambapo twamkuta akimwambia yule mwivi mwenzake, “Je, wewe humchi Mungu?” Sulemani, yule mwenye hekima, asema, “Mwanzo wa hekima ni kumcha Mungu.” Basi, hapo tunao mwanzo wa hekima katika mwivi huyu. Alianza kumcha Mungu. Natumaini watakuwako mamia katika jengo hili watakaomcha yeye; kwa maana huo ndio mwanzo wa kweli wa hekima.

KUTIWA HATIANI KWA DHAMBI.

Basi, jambo lililofuata, mtu huyu alitiwa hatiani. Hakuna mtu awezaye kuongolewa hata kwanza atiwe hatiani kwa dhambi. Mwivi huyu alitiwa hatiani. Na nini kilichomtia hatiani? Hakusikia mahubiri yo yote kutoka kwa Kristo. Wakati huo watawala walikuwa wakimdhihaki. Wakuu wa nchi yake mwenyewe walikuwa wamemhukumu kuwa na hatia ya kufuru, na wamemhukumu afe kifo cha msalaba. Wakuu wa ufalme walikuwako pale wakitikisa vichwa vyao na kumdhihaki. Basi ni nini kilichomtia hatiani mwivi huyu maskini? Hakuwa ameona Kristo akifanya miujiza yo yote; hakuwa amesikia maneno ya ajabu yakidondoka midomoni mwake; hakuona taji ing'aayo juu ya paji lake la uso. Ni kweli, iliandikwa juu ya msalaba wake, “Yesu, Mfalme wa Wayahudi”; lakini ufalme wake ulikuwa wapi? Hakuona kitu cho chote cha Wayahudi kumpa heshima. Wayahudi walikuwa wakimwua. Hapakuwa na fimbo ya enzi mkononi mwake. Ni kweli, alikuwa ametiwa taji muda mfupi kabla, lakini ni kwa miiba tu, na hata katikati ya yote hayo mwivi huyu maskini alitiwa hatiani baada ya hofu kumshukia.

NGUVU YA UPENDO.

Ni nini kilichomtia hatiani? Nitasema kile ninachodhani kilichomtia hatiani, ingawa singeweza kukifundisha kwa uthabiti wa fundisho, lakini nadhani ilikuwa sala ya Mwokozi. Bwana Yesu alipopaza sauti kutoka vilindi vya nafsi yake, “Baba, uwasamehe,” hisia ya hatia iliingia moyoni mwake kwa mwako. Ni lazima alisema, “Kwani, huyu ni zaidi ya mwanadamu; ana roho tofauti kabisa na yangu. Mimi nisingeweza kumwomba Mungu awasamehe. Ningeteremsha moto kutoka mbinguni uwateketeze, nami ningemwomba Mungu awapige upofu kama Eliya alivyofanya, nami ningewafagia kutoka mlima huu kama ningekuwa na uwezo.” Ndivyo ni lazima alivyowaza aliposikia ile sauti ichomayo ikipaa juu, “Baba, uwasamehe, kwa kuwa hawajui watendalo.” Ee, ulikuwa ni upendo uliouvunja moyo wake. Siku hizo, walipomsulubisha mtu, walikuwa na desturi ya kumpiga mijeledi. Mtu huyu maskini alikuwa amechukuliwa mahakamani, akahukumiwa na kutiwa hatiani na hakimu; lakini hilo halikuuvunja moyo wake. Alikuwa ametolewa nje na kupigwa mijeledi; lakini hilo halikuuvunja moyo wake. Na sasa walikuwa wamemgongomea msalabani; lakini hata hilo halikuuvunja moyo wake. Yuko pale akimtukana Mungu wake. Lakini alipomwona yule Mwokozi mwenye upendo, alipata mwonjo wa upendo wake, na mwonjo huo mmoja ukauvunja moyo wake.

Nilisikia habari za kijana mmoja aliyekuwa mgumu wa moyo sana. Baba yake alimpenda kama alivyoupenda uhai wake mwenyewe. Alikuwa amejaribu kila alichoweza ili kumrudisha yule mwana mpotevu. Baba yake alipokuwa akifa, walimtuma aitwe; lakini alikataa kuja. Lakini baada ya kifo cha baba yake, alirudi nyumbani kuhudhuria mazishi; lakini hakuna chozi lililoanguka machoni pake. Alimfuata baba yule mpaka mahali pake pa mapumziko, wala hakudondosha chozi juu ya kaburi lake. Lakini walipofika nyumbani, na wosia ukasomwa, wakaona baba yule hakuwa amemsahau mwanawe mpotevu, bali alikuwa amemkumbuka kwa wema katika wosia wake; na uthibitisho huo wa upendo wa baba ndio uliouvunja moyo wake. Na hivyo nadhani ni lazima ilivyokuwa kwa mwivi yule aliposikia Mwokozi akilia, “Baba, uwasamehe; kwa kuwa hawajui watendalo”; ukamchoma kama mshale hata ndani ya moyo wake, naye akatiwa hatiani.

KUUNGAMA HUFUATA KUTIWA HATIANI.

Basi, jambo lililofuata katika mtu huyu, aliungama dhambi yake. Amwambia yule mwivi mwenzake, “Sisi tunaadhibiwa kwa haki; tunastahili.” Sijapata kumjua mtu aliyeokolewa hata kwanza ajihesabu kuwa mwenye dhambi. Kaini hakuungama dhambi yake kamwe. Yuda hakuungama dhambi yake kwa Mungu kamwe, ijapokuwa alienda akaiungama kwa mwanadamu.

Sasa, nataka kusema kwamba sikuja hapa kuwasihi muungame dhambi zenu kwa mwanadamu ye yote, isipokuwa mmefanya dhambi fulani dhidi yake naye anajikwaa juu yake; ikiwa hivyo, nendeni mkaiungame hiyo bila shaka. Hatupaswi kuungama dhambi zetu kwa ye yote ila Mungu. Sina huruma nyingi na jamii ya watu wanaokimbilia daima kwa huyu na yule kuungama dhambi zao. Hakuna kuhani duniani awezaye kusamehe dhambi. Mimi nina kuhani mkuu aliye “kuhani hata milele kwa mfano wa Melkizedeki.” Mtu pekee tuliye na kumbukumbu lake katika Maandiko aliyeungama dhambi zake kwa mwanadamu alikuwa Yuda, naye alienda moja kwa moja akajinyonga.

IMANI KATIKA KRISTO.

Jambo lililofuata juu ya mwivi huyu lilikuwa imani yake katika Kristo Yesu. Twanena juu ya imani ya Ibrahimu na Musa; lakini mwivi huyu alikuwa na imani ya ajabu kuliko mtu ye yote aliyeandikwa. Alijishika kabisa kichwani mwa darasa, akiwapita wengi waliokuwa na imani ya ajabu. Hakusikia mahubiri, hakuona fimbo ya enzi mkononi mwa Kristo, wala taji juu ya paji lake, wala hakushuhudia kazi zo zote za ajabu, lakini alikuwa na imani ya kustaajabisha. Kwani, Mungu alitumia miaka ishirini na mitano kuisitawisha imani ya Ibrahimu. Mungu alikutana na Musa katika kile kijiti kiunguzacho, akapanda milimani na kusema naye; na Isaya alimwona Mungu ameinuliwa juu ya kiti chake cha enzi; lakini si hivyo kwa mwivi huyu. Walikuwako wengi waliokuwa wamekutana na Kristo na kuona mambo ya ajabu. Wanafunzi wake walikuwa wamemsikia akihutubu, na walikuwa wamemwona akifufua wafu, na hata hivyo walikuwa wamemwacha na kumtoroka. Lakini hapa katikati ya giza na huzuni mwivi huyu maskini alikuwa na imani kwake; kwa maana ingawa Wayahudi walikuwa wamemgongomea mikono na miguu yake msalabani, hawakuyagongomea macho yake, naye aliweza kumtazama. Hawakuugongomea moyo wake msalabani, na ni kwa moyo mtu huamini, kama tusomavyo katika Warumi, na kwa moyo wake aliamini. Hiyo ndiyo imani kwako.

HAKUONA HAYA KWA AJILI YA KRISTO.

Kisha jambo lililofuata ni kwamba, alimkiri Kristo katika kipindi kile cha giza. Kilikuwa kipindi chenye giza kuliko vyote katika safari ya Kristo hapa duniani. Kamwe hatutaona tena saa nyingine ya giza kama ile. Dhambi ya ulimwengu ilikuwa juu yake; mbingu zilikuwa zimefungwa dhidi yake—zimefungwa kwa ufunguo, kwa komeo, na kwa pingo. Sasa alikuwa akining'inia mtini akizichukua dhambi zetu; na imeandikwa, “Amelaaniwa kila mtu aangikwaye juu ya mti.” Na hata Mungu ilimbidi kuuficha uso wake asimtazame, kwa maana hakuweza kuitazama dhambi, na Kristo wakati huo alikuwa akiichukua dhambi ya ulimwengu wote. Naamini hicho ndicho Kristo alichokimaanisha katika bustani ya Gethsemane, alipoomba kwamba kikombe kile kimpite. Hata wakati huo alikuwa akiuona uso wa Baba yake, na alijua kwamba amebarikiwa naye, na mara kwa mara sauti ilikuja kutoka mbinguni, “Huyu ni Mwanangu mpendwa.” Lakini sasa alikuwa akichukua mahali petu mbele za Mungu kama mwenye dhambi, na Mungu ilimbidi kuuficha uso wake asimtazame. Naam, kulikuwa kukiuvunja moyo wa Mwokozi; na sasa, giza lipoingia juu ya uumbaji, na mwezi utakapogeuzwa kuwa damu, na jua liko karibu kuufunika uso wake kwa kuwa haliwezi kuutazama msiba ule wa kutisha, na Petro, mmoja wa wanafunzi wake mashuhuri, alikuwa amemkana kwa laana, na kuapa ya kwamba hakumjua kamwe, na Yuda, mmoja wa wanafunzi wake mwenyewe, alikuwa ametoka nje na kumwuza kwa vipande thelathini vya fedha, na wakuu wa taifa walikuwa wakimdhihaki, wakisema, “Aliokoa wengine; na ajiokoe mwenyewe, kama yeye ndiye Kristo”—katikati ya giza hili lote na huzuni, hutokea imani hii ya wazi ya mwivi, “Bwana, unikumbuke,” alimwita Bwana papo hapo; naye akamwambia yule mwivi mwenzake, “Mtu huyu hakutenda neno lo lote lisilofaa.” Ashukuriwe Mungu kwa ukiri huo. Hiyo ndiyo imani na ukiri kwako. Ukitaka kuokolewa, ni lazima uwe na imani katika Kristo, na uwe tayari kumkiri mbele ya watu wote.

“BWANA, UNIKUMBUKE.”

Tazama sala ya mwivi. Watu husema, “Ee, omba wokovu, nawe utaupata!” Naam, lakini kumbuka ni lazima uwe na imani katika Kristo kabla hujaweza kuomba. Alikuwa amepata imani katika Kristo, na sasa amwita “Bwana.” Ilikuwa sauti ya mwongofu mchanga, “Bwana, unikumbuke utakapoingia katika ufalme wako.” Haikuwa sala ndefu sana, bali ilikuwa sala iliyowaka moto, iliyotoka moja kwa moja moyoni mwake. Watu wengine hukuambia hawawezi kuomba pasipo kitabu cha sala. Lakini mwivi maskini hakuwa na kitabu cha sala; na kama kungekuwa na vitabu vyo vyote vya sala wakati huo, hapakuwa na mtu wa kumpa kimoja. Alitaka wokovu, alitaka tu kuokolewa, naye akalia kutoka moyoni mwake, “Bwana, unikumbuke!” na sala yenye ufasaha zaidi haijapata kusikiwa wala kuchapwa duniani. Lakini si hilo tu, alipata zaidi ya alichoomba, kwa maana aliomba tu akumbukwe. Sikuzote twapata zaidi ya tuombalo tunapomjia Bwana.

MTAZAMO WA MWISHO WA ULIMWENGU KWA KRISTO.

Sasa, mtu mkuu afapo, watu hutamani sana kupata maneno yake na matendo yake ya mwisho. Ni tamu kupata maneno ya mwisho ya Mwana wa Mungu. Mtazamo wa mwisho ulimwengu uliokuwa nao wa Kristo ulikuwa msalabani. Tangu wakati huo hawajapata kumwona. Hatuna kumbukumbu lo lote kwamba jicho lo lote lisilotahiriwa lilimwona Kristo baada ya kufufuka kwake kutoka kwa wafu. Mwonjo wa mwisho ulimwengu uliokuwa nao wa Kristo ulikuwa akimwokoa mwenye dhambi maskini alipokuwa akining'inia msalabani, akimwokoa kutoka kwenye taya za jehanamu hasa, na mkono wa Shetani. Kristo alimnyakua kutoka mkononi mwa ibilisi hasa, na kumwambia, “Leo hivi utakuwa pamoja nami peponi.” Simba wa kabila la Yuda alimshinda simba wa jehanamu, alipomnyakua yule mwivi anayekufa kama mwana-kondoo kutoka mkononi mwa Shetani. “Leo hivi utakuwa pamoja nami peponi.” Hiyo ndiyo injili tukufu. Huru mbali na sheria. Hakuna hukumu ya adhabu juu yao walio katika Kristo Yesu.

HURU! HURU!

Katika siku za Wilberforce, utumwa ulipokomeshwa, na iliposemwa kwamba hakuna mtumwa awezaye kuishi chini ya bendera ya Uingereza, kwa sababu sheria ilikuwa imepitishwa ikimtangaza kila mtu kuwa huru, habari zikawa zimeenea, na nahodha wa meli alipokuwa akienda kisiwa cha mbali katika himaya za utumwa, watu weusi walikuwa macho ili kupata habari na kuhakikisha kama ni kweli. Walikuwa na hamu ya kujua kama sheria imepitishwa kwamba wao ni huru kweli. Na nahodha alipokifikia kile kisiwa kidogo, wakawa wamesubiri pale ili kupata habari, na nahodha akaweka tarumbeta yake kinywani mwake, akapaza sauti kuvuka kisiwa, “Huru! Huru!” Na ile sauti ikachukuliwa na kuvumishwa kotekote kisiwani, “Huru! Huru!” Nao wakapiga kelele kwa furaha, kwa sababu hawakuwa watumwa tena. Nawaletea habari njema. Mwana wa Mungu atalinena neno, “Huru.” Aliyanena maneno hayo msalabani, na mwivi maskini akawa mtu huru, wala Shetani hakuweza kumshika.

Kisha fikiria tofauti! Asubuhi alitolewa nje mtu maskini aliyehukumiwa, akimlaani na kumtukana Mwana wa Mungu mwenyewe; jioni akiimba wimbo mpya wa ukombozi. Jioni ile namwona akiwa karibu na kiti cha enzi, akiimba wimbo mtamu wa Musa na wa Mwana-Kondoo. Asubuhi akilaani, jioni akiimba, “Utukufu kwa Mungu aliye juu mbinguni.” Je, halikuwa badiliko? Tofauti iliyoje! Ifikirie, Ee mwenye dhambi. Alihukumiwa asubuhi na mwanadamu, akatupwa nje kama aliye mchafu mno kwa dunia; jioni akawa mwema wa kutosha kwa mbingu; jioni akaoshwa katika damu ya Mwana-Kondoo, na Kristo tayari kumpokea katika ufalme wa mbinguni. Kristo hakuona haya kutembea chini ya sakafu ya bilauri ya mbinguni pamoja naye. Alisikia ile paza sauti msalabani Kristo alipolia, “Imekwisha!” Jinsi nafsi yake ilivyopaswa kutetemeka kwa furaha kwa paza sauti hiyo! Alisema, “Wokovu wangu umetimizwa sasa.” Aliuona mkuki ukichomwa katika ubavu ule na damu ikimwagika, nami naweza kuuona mng'ao juu ya uso wake ukimulikwa kwa utukufu. “Pasipo kumwaga damu hakuna ondoleo.” Kilikuwa kioja cha kusikitisha, lakini kitukufu.

JAMBO BORA KUFANYA.

Sasa, kijana, wataka akuokoe? Uko tayari kumkiri kuwa Bwana na Mwokozi wako, na kujishika upande wa Bwana, na kusema tangu saa hii, Nitamtumikia Bwana Yesu? Kama ndivyo, itakuwa usiku bora kabisa katika maisha yako mpaka wakati huu. Jambo bora uwezalo kufanya ni kujisalimisha kwa Kristo mara moja. Kila Mkristo wa kweli angekupa shauri hilo, na kama ningeweza kupaza sauti mpaka kiti cha enzi, na kumwuliza Mwokozi angependa ufanye nini, ningesikia sauti ikishuka kutoka mbinguni, ikisema, “Mwambie autafute wokovu.” Mwivi maskini alipoongolewa, yamkini ilikuwa mara ya kwanza kwake kuwahi kusikia habari za Bwana Yesu Kristo, au kualikwa. Lakini kwa hakika si hivyo kwako. Ni watu wangapi wanaoahirisha wokovu tena na tena, hata siku moja ikawa imechelewa mno! Kuna wengi mno wanaoishi katika wakati ujao. Ni afadhali uwe na hekima, na uingie katika ufalme wa Mungu sasa. Sala yako, kama ile ya mwivi maskini, na ipae kutoka moyoni mwako, “Bwana, unikumbuke,” nawe hutaomba bure.

WONGOFU KWA WAKATI MUAFAKA.

Mchungaji mmoja huko Edinburgh asimulia hadithi ya wongofu wa kijana mmoja aliyekuwa akifanya kazi katika mojawapo ya maeneo ya migodi. Mkutano katika mojawapo ya makanisa ulipokwisha jioni fulani, alimwona amesimama karibu na nguzo kanisani, wengine wote wakiwa wametoka, isipokuwa wawili au watatu, nao wakamwuliza mtu huyu kama hakuwa akienda nyumbani. Akasema, “Nimekusudia moyoni mwangu kwamba sitaliacha kanisa hili hata niwe Mkristo”; hivyo wakasita wakazungumza na kuomba pamoja naye. Lilikuwa jambo bora kabisa aliloweza kufanya. Ningependa kila mtu hapa afanye jambo lilo hilo. Kusudieni mioyoni mwenu kwamba hamtaondoka hata mwe mmemaliza habari ya nafsi zenu kwa ajili ya umilele. Basi, siku iliyofuata, kijana huyu alipokuwa akifanya kazi mgodini, makaa ya mawe yakamwangukia, na kabla ya kufa, alikuwa na nguvu za kutosha tu kuwaambia wenzake, “Ni jambo jema kwamba nililimaliza usiku wa jana—jambo jema sana.” Kijana, nitakuachia wewe ulijibu swali, Je, halikuwa jambo jema kwamba alilimaliza usiku ule?

Kijana mmoja, aliyekuwa jeshini wakati wa vita vya wenyewe kwa wenyewe, aliniambia kwamba aliposikia kwamba nduguye, ambaye hawakuwa wametengana naye kamwe, alikuwa amejiunga na kikosi fulani, alienda mara moja akaandika jina lake chini ya lile la nduguye. Walikula pamoja, wakaandamana pamoja, na kupigana bega kwa bega. Mwishowe nduguye alipigwa na risasi ya Minie, akaanguka amejeruhiwa vibaya kando yake. Aliona wazi mno kwamba ni lazima afe, na vita vilipokuwa vikiendelea, na hakuweza kufanya lo lote ili kumwokoa, aliweka mkoba wa nduguye chini ya kichwa chake, akamstarehesha kadiri alivyoweza, na akiinama juu yake, akambusu, akamwaga kwa heri, akamwacha afe. Alipokuwa akiondoka, nduguye akasema, “Charlie, rudi, uniache nikubusu mdomoni.” “Nilipoinama juu yake,” akasema yule askari kijana aliyeniambia hadithi hii, “alinibusu mdomoni, na kusema, ‘Peleka hilo nyumbani kwa mama, umwambie kwamba nilikufa nikimwombea’; nami nilipomgeukia niende zangu, ningeweza kumsikia akisema, ‘Huu ni utukufu,’ na alipokuwa amelala akigaagaa katika damu yake, nami nilipostaajabu maana yake, nilimwuliza utukufu ni nini. Akasema, ‘Charlie, ni tukufu kufa hali ukitazama juu—namwona Kristo mbinguni.’”

KUFA HALI UKITAZAMA JUU.

Kama unataka kufa hali ukitazama juu na kumwona Kristo, utafute ufalme wa Mungu. Yamkini hutawahi kusikia wito huu tena. Usiondoke mahali hapa bila kukusudia moyoni mwako kuimaliza mara moja swali hili zito la umilele.