Kuhesabiwa Haki kwa Neema

“Wanahesabiwa haki bure kwa neema yake, kwa njia ya ukombozi ulio katika Kristo Yesu.”—Warumi 3:24.

KILIMA cha faraja ni kilima cha Kalvari; nyumba ya kutuliza moyo imejengwa kwa mbao za msalaba; hekalu la vinywaji vya mbinguni vitiavyo nguvu limejengwa juu ya mwamba uliopasuka, uliopasuliwa na mkuki uliouchoma ubavu wake. Hakuna tukio lolote katika historia takatifu linaloifurahisha nafsi kama tukio la Kalvari.

“Je, si ajabu, kwamba saa ile ya giza kuu

Iliyowahi kupambazuka juu ya dunia yenye dhambi

Iguse moyo kwa nguvu iliyo laini zaidi

Kwa faraja, kuliko shangwe ya malaika?

Kwamba jicho la mwenye kuomboleza ligeukie msalaba,

Upesi kuliko pale ziwakapo nyota za Bethlehemu?”

Hakuna mahali popote ambapo nafsi hupata faraja kama ile ipatikanayo mahali pale pale ambapo taabu ilitawala, ambapo msiba ulishinda, ambapo uchungu ulifikia kilele chake. Pale neema imechimba chemchemi, ambayo daima hububujika maji safi kama bilauri, kila tone likiweza kupunguza misiba na maumivu makali ya wanadamu. Mmekuwa na nyakati zenu za huzuni, ndugu zangu na dada zangu katika Kristo Yesu; nanyi mtakiri kwamba haikuwa katika Mlima wa Mizeituni mlipopata faraja, wala si katika mlima Sinai, wala Tabori; bali Gethsemane, Gabatha, na Golgotha vimekuwa njia ya faraja kwenu. Mboga chungu za Gethsemane mara nyingi zimeuondoa uchungu wa maisha yenu; mjeledi wa Gabatha mara nyingi umeyachapa na kuyafukuza mahangaiko yenu, na kuugua kwa Kalvari kumefukuzia mbali kuugua kwingine kote.

Basi, asubuhi hii tunalo somo ambalo natumaini laweza kuwa njia ya kuwafariji watakatifu wa Mungu, kwa kuwa chanzo chake ni msalabani, na kutoka hapo hutiririka kama mto mkubwa wa baraka zisizokoma kwa waamini wote. Mnaona kwamba katika fungu letu tunayo, kwanza kabisa, ukombozi wa Kristo Yesu; pili, kuhesabiwa haki kwa wenye dhambi kunakotokana nao; na kisha tatu, namna ya kutolewa kwa kuhesabiwa haki huku, “bure kwa neema yake.”

I. Kwanza, basi, tunao UKOMBOZI ULIO KATIKA AU KWA NJIA YA KRISTO YESU.

Mfano wa ukombozi ni sahili sana, na umetumika mara nyingi sana katika Maandiko. Mfungwa anapotekwa, na kufanywa mtumwa na mamlaka fulani ya kishenzi, imekuwa desturi, kabla hajaweza kuachwa huru, kwamba fidia ilipwe. Basi sisi, kwa anguko la Adamu, tukiwa na mwelekeo wa kuwa na hatia, na, kwa kweli, tukiwa na hatia kimsingi, tulitolewa kwa hukumu ya Mungu isiyo na lawama tupatilizwe na sheria; tulitiwa mikononi mwa haki; haki ikatudai tuwe watumwa wake milele, isipokuwa tungeweza kulipa fidia, ambayo kwayo nafsi zetu zingeweza kukombolewa. Kwa kweli tulikuwa maskini kama makinda ya bundi, hatukuwa na kitu cha kujisaidia nacho. Tulikuwa, kama wimbo wetu unavyosema, “wadeni waliofilisika;” amri ya kunadi mali ilitolewa juu ya nyumba yetu; vyote tulivyokuwa navyo viliuzwa; tuliachwa uchi, maskini, na wenye mashaka, wala hatukuweza kwa njia yoyote kupata fidia; ndipo wakati ule ule Kristo alipoingia, akasimama kuwa mdhamini wetu, na, mahali pa waamini wote na badala yao, akalipa fidia, ili saa ile ile tupate kuokolewa kutoka katika laana ya sheria na kisasi cha Mungu, na kwenda zetu, safi, huru, tukiwa tumehesabiwa haki kwa damu yake.

Hebu nijaribu tu kuwaonyesheni baadhi ya sifa za ukombozi ulio katika Kristo Yesu. Mtakumbuka wingi wa wale aliowakomboa; si mimi peke yangu, wala si wewe peke yako, bali “umati ambao hakuna mtu awezaye kuuhesabu,” ambao utazidi nyota za mbinguni kwa hesabu, kama vile nyota zinavyozidi hesabu yote ya wanadamu. Kristo amejinunulia baadhi kutoka katika kila ufalme, na taifa, na lugha, chini ya mbingu; amewakomboa kutoka kati ya wanadamu baadhi ya kila cheo, tangu aliye juu kabisa hata aliye chini kabisa; baadhi ya kila rangi—weusi na weupe; baadhi ya kila hali katika jamii, walio bora kabisa na walio waovu kabisa. Kwa ajili ya baadhi ya kila aina Yesu Kristo amejitoa mwenyewe kuwa fidia ili wapate kukombolewa kwake.

Basi, kuhusu fidia hii, tunapaswa kuangalia kwamba ililipwa yote, na ililipwa yote kwa mara moja. Kristo alipowakomboa watu wake, alifanya hivyo kikamilifu; hakuacha deni hata moja lisilolipwa, wala hata senti moja walipe wao baadaye. Mungu alimdai Kristo malipo ya dhambi za watu wake wote; Kristo akajitokeza, na hadi senti ya mwisho akalipa kila walichodaiwa watu wake. Dhabihu ya Kalvari haikuwa malipo ya sehemu; haikuwa msamaha wa nusu, ilikuwa malipo kamili na makamilifu, nayo ilipata msamaha kamili na mkamilifu wa madeni yote ya waamini wote walioishi, wanaoishi, au watakaoishi, hata mwisho kabisa wa nyakati. Siku ile Kristo alipoangikwa msalabani, hakutuachia hata senti moja tulipe ili kumridhisha Mungu; hakuacha, tangu uzi hata ukanda wa kiatu, jambo lolote ambalo hakulitimiza. Madai yote ya sheria yalilipwa pale pale na Yehova Yesu, kuhani mkuu wa watu wake wote. Na jina lake libarikiwe, aliilipa yote kwa mara moja pia. Fidia ilikuwa ya thamani kupita kiasi, gharama iliyodaiwa kwa ajili ya nafsi zetu ilikuwa kubwa na tukufu mno, hata mtu angedhani isingekuwa ajabu kama Kristo angeilipa kwa awamu; sehemu moja sasa, na sehemu nyingine baadaye. Fidia za wafalme wakati mwingine zimelipwa sehemu mara moja, na sehemu nyingine kwa malipo ya baadaye, kwa muda wa miaka. Lakini sivyo Mwokozi wetu: mara moja tu kwa wakati wote alijitoa mwenyewe kuwa dhabihu; mara moja alihesabu gharama yote, akasema, “Imekwisha,” asiache chochote cha kufanya yeye, wala cha kutimiza sisi. Hakutoa malipo ya sehemu kidogo kidogo, kisha akatangaza kwamba atakuja tena kufa, au kwamba atateseka tena, au kwamba atatii tena; bali papo hapo, hadi senti ya mwisho, fidia ya watu wote ililipwa, na hati kamili ya malipo ikatolewa kwao, na Kristo akaigongomea hati hiyo msalabani mwake, akasema, “Imetimia, imetimia; nimeiondoa ile hati iliyoandikwa katika maagizo, nimeigongomea msalabani; ni nani atakayewahukumu watu wangu, au kuwashitaki kwa neno lolote? kwa maana nimeyafuta makosa yao kama wingu, na dhambi zao kama wingu zito!”

Na Kristo alipolipa fidia hii yote, tafadhali angalieni kwamba aliifanya yote yeye mwenyewe! Alikuwa makini sana juu ya jambo hilo. Simoni, Mkirene, angeweza kuubeba msalaba; lakini Simoni, Mkirene, hakuruhusiwa kugongomewa juu yake. Duara lile takatifu la Kalvari liliwekwa kwa ajili ya Kristo peke yake. Wevi wawili walikuwa pamoja naye pale; si watu wenye haki, mtu asije akasema kwamba kifo cha wale watu wawili wenye haki kilimsaidia Mwokozi. Wevi wawili walitundikwa pale pamoja naye, ili watu waone kwamba kulikuwa na ukuu katika taabu yake, na kwamba aliweza kuwasamehe watu na kuonyesha enzi yake kuu, hata alipokuwa akifa. Hapakuwa na watu wenye haki wa kuteseka; hakuna mwanafunzi aliyeshiriki kifo chake; Petro hakuburutwa pale kukatwa kichwa, Yohana hakugongomewa msalabani ubavuni pake; aliachwa pale peke yake. Anasema, “Nimelikanyaga shinikizo peke yangu; wala katika watu hapakuwa na mtu pamoja nami.” Deni lote lile la kutisha liliwekwa mabegani mwake; uzito wote wa dhambi za watu wake wote uliwekwa juu yake. Mara moja alionekana kuyumbayumba chini yake: “Baba, ikiwezekana.” Lakini tena akasimama wima: “Walakini, si mapenzi yangu, bali yako yatendeke.” Adhabu yote ya watu wake ilichujwa ikawa kikombe kimoja; hakuna mdomo wa mwanadamu ulioruhusiwa kukionja hata funda moja. Alipokitia midomoni mwake mwenyewe, kilikuwa kichungu mno, hata karibu akikatae—“Kikombe hiki kiniepuke.” Lakini upendo wake kwa watu wake ulikuwa na nguvu mno, hata akakitwaa kikombe kwa mikono yake yote miwili, na

“Kwa funda moja kuu la upendo

Akainywa hukumu hata ikakauka,”

kwa ajili ya watu wake wote. Aliinywa yote, alivumilia yote, aliteseka yote; hata sasa milele hakuna tena miali ya jehanamu kwa ajili yao, hakuna vyombo vya mateso; hawana misiba ya milele; Kristo ameteseka yote waliyopaswa kuteseka wao, nao lazima, nao hakika wataachwa huru. Kazi ilikamilishwa kabisa na yeye mwenyewe, bila msaidizi.

Na tena angalieni, ilikubaliwa. Kwa kweli, ilikuwa fidia nzuri mno. Ni nini kingeweza kulingana nayo? Nafsi yenye “huzuni nyingi hata kufa;” mwili uliorarurwa kwa mateso; kifo cha aina ya kinyama kupita zote; na uchungu wa namna ambayo ulimi hauwezi kuusema, wala hata akili ya mwanadamu haiwezi kuwaza kitisho chake. Ilikuwa gharama nzuri mno. Lakini semeni, je, ilikubaliwa? Zimewahi kuwepo gharama zilizolipwa wakati mwingine, au tuseme zilizotolewa, ambazo hazikukubaliwa kamwe na upande ule zilioutolewa, na kwa hiyo mtumwa hakuachwa huru. Lakini hii ilikubaliwa. Nitawaonyesha ushahidi. Kristo alipotangaza kwamba angelipa deni kwa ajili ya watu wake wote, Mungu alimtuma afisa amkamate kwa ajili yake; alimkamata katika bustani ya Gethsemane, na akimshika, akamburuta mpaka kizimbani kwa Pilato, mpaka kizimbani kwa Herode, na mpaka kiti cha hukumu cha Kayafa; malipo yote yalifanyika, na Kristo akawekwa kaburini. Alikuwa pale, amefungiwa katika kifungo cha aibu, hadi kukubaliwa kwake kungethibitishwa mbinguni. Alilala pale kaburini mwake sehemu ya siku tatu. Ilitangazwa kwamba uthibitisho ungekuwa huu: mdhamini angekwenda zake mara tu majukumu ya udhamini wake yatakapokuwa yametimizwa. Basi, akili zenu na zimwone Yesu aliyezikwa. Yumo kaburini. Ni kweli amelipa deni lote, lakini hati ya malipo bado haijatolewa; amelala katika kaburi lile jembamba. Amefungiwa ndani kwa muhuri juu ya jiwe kubwa mno, bado amelala kaburini mwake; bado kukubaliwa hakujatolewa na Mungu; malaika bado hawajashuka kutoka mbinguni kusema, “Jambo limetendeka, Mungu ameikubali dhabihu yako.” Sasa ndiyo saa ya hatari ya ulimwengu huu; unaning’inia ukitetemeka katika mizani. Je, Mungu ataikubali fidia, au hataikubali? Tutaona. Malaika anashuka kutoka mbinguni kwa mng’ao mwingi mno; analivingirisha jiwe; na yule mfungwa anatoka, bila pingu mikononi mwake, akiwa ameziacha sanda nyuma yake; huru, asiteseke tena kamwe, asife tena kamwe. Basi,

“Kama Yesu asingalilipa deni,

Asingaliwekwa huru kamwe.”

Kama Mungu asingaliikubali dhabihu yake, angekuwa kaburini mwake hata saa hii; asingalifufuka kamwe kutoka kaburini mwake. Lakini kufufuka kwake kulikuwa rehani ya Mungu kumkubali. Alisema, “Nimekuwa na dai juu yako hata saa hii; dai hilo sasa limelipwa; enenda zako.” Na mauti ikamwachilia mfungwa wake wa kifalme, jiwe likavingirishwa bustanini, na mshindi akatoka, akiteka mateka.

Na, zaidi ya hayo, Mungu alitoa uthibitisho wa pili wa kukubaliwa; kwa maana alimchukua Mwanawe pekee mzaliwa mpaka mbinguni, akamweka mkono wake wa kuume, juu sana kuliko falme zote na mamlaka yote; na kwa hilo alikusudia kumwambia, “Keti juu ya kiti cha enzi, kwa maana umelitenda tendo lile kuu; kazi zako zote na taabu zako zote zimekubaliwa kuwa fidia ya wanadamu.” Ee wapendwa wangu, fikirini jinsi ilivyopaswa kuwa tamasha kuu Kristo alipopaa katika utukufu; jinsi ilivyopaswa kuwa hati tukufu ya Baba yake kumkubali! Je, hamdhani mnaliona tukio lile duniani? Ni sahili sana. Wanafunzi wachache wamesimama juu ya kilima, na Kristo anapaa angani kwa mwendo wa polepole na wa taadhima, kana kwamba malaika aliiharakisha njia yake hatua kwa hatua kwa upole, kama ukungu au mvuke upandao kutoka ziwani kwenda mawinguni. Je, mnaweza kuwaza yanayotendeka kule juu? Je, mnaweza hata kwa kitambo kufikiri jinsi, yule mshindi mkuu alipoingia malango ya mbinguni, malaika walivyomlaki,

“Walileta gari lake kutoka juu,

Limchukue hadi kiti chake cha enzi;

Walipiga mbawa zao za ushindi, wakalia,

’Kazi tukufu imekwisha’”

Je, mnaweza kufikiri jinsi makofi yalivyokuwa makubwa alipoingia malango ya mbinguni? Je, mnaweza kuwaza jinsi walivyosongana wao kwa wao, ili kuona jinsi alivyokuja akishinda na mwekundu kutoka vitani? Je, mnamwona Ibrahimu, Isaka, Yakobo, na watakatifu wote waliokombolewa, wakija kumtazama Mwokozi na Bwana? Walikuwa wametamani kumwona, na sasa macho yao yanamtazama katika mwili na damu, mshindi juu ya mauti na jehanamu! Je, mnadhani mnamwona, jehanamu ikiwa imefungwa kwenye magurudumu ya gari lake, na mauti ikiburutwa kama mateka katika njia kuu za kifalme za mbinguni? Lo, ilikuwa tamasha iliyoje siku ile! Hakuna shujaa wa Kirumi aliyewahi kupata maandamano ya ushindi kama hayo; hakuna aliyewahi kuona tamasha tukufu namna hiyo. Fahari ya ulimwengu wote, enzi ya viumbe vyote, makerubi na maserafi na mamlaka yote yaliyoumbwa, yaliongeza utukufu wa maandamano; na Mungu mwenyewe, Yeye wa Milele, akavitia vyote taji, alipomkumbatia Mwanawe kifuani mwake, akasema, “Umefanya vyema, umefanya vyema; umeikamilisha kazi ile niliyokupa uifanye. Pumzika hapa milele, mkubaliwa wangu.” Lakini asingalipata kamwe ushindi huo, kama asingalilipa deni lote. Kama Baba yake asingaliikubali gharama ya fidia, mkombozi asingaliheshimiwa hivyo kamwe; lakini kwa sababu ilikubaliwa, kwa hiyo alishinda kwa namna hiyo. Hayo basi yatosha kuhusu fidia.

II. Na sasa, kwa msaada wa Roho wa Mungu, hebu nijielekeze kwenye MATOKEO YA FIDIA; yaani kuhesabiwa haki—“wanahesabiwa haki bure kwa neema yake, kwa njia ya ukombozi.”

Basi, maana ya kuhesabiwa haki ni nini? Wanatheolojia watawachanganya, mkiwauliza. Lazima nijitahidi kadiri niwezavyo kulifanya jambo la kuhesabiwa haki kuwa wazi na sahili, hata kwa ufahamu wa mtoto. Hakuna kitu kama kuhesabiwa haki kiwezacho kupatikana duniani kwa wanadamu wenye kufa, isipokuwa kwa njia moja. Kuhesabiwa haki, mnajua, ni neno la mahakamani; hutumiwa daima kwa maana ya kisheria. Mfungwa huletwa kizimbani mbele ya haki ili ahukumiwe. Kuna njia moja tu ambayo mfungwa huyo aweza kuhesabiwa haki; yaani, lazima aonekane hana hatia; na akionekana hana hatia, basi amehesabiwa haki—yaani, imethibitishwa kwamba yeye ni mtu mwenye haki. Mkimwona mtu huyo ana hatia, hamwezi kumhesabia haki. Malkia aweza kumsamehe, lakini hawezi kumhesabia haki. Tendo lile halina haki, kama alikuwa na hatia juu yake; naye hawezi kuhesabiwa haki kwa sababu yake. Aweza kusamehewa; lakini hata ufalme wenyewe hauwezi kamwe kuisafisha tabia ya mtu huyo. Yeye ni mhalifu halisi baada ya kusamehewa kama alivyokuwa kabla. Hakuna njia yoyote kati ya wanadamu ya kumhesabia mtu haki juu ya shtaka lililoletwa dhidi yake, isipokuwa kwa kuthibitishwa kwamba hana hatia. Basi, ajabu ya maajabu ni kwamba tumethibitishwa kuwa na hatia, na bado tumehesabiwa haki: hukumu imetolewa dhidi yetu, kwamba tuna hatia; na bado, pamoja na hayo, tumehesabiwa haki. Je, mahakama yoyote ya duniani yaweza kufanya hivyo? La; ilibaki kwa fidia ya Kristo kutimiza jambo lisilowezekana kwa mahakama yoyote duniani. Sisi sote tuna hatia. Someni mstari wa 23, unaotangulia fungu letu mara moja—“ Kwa maana wote wamefanya dhambi, na kupungukiwa na utukufu wa Mungu.” Hapo hukumu ya hatia inatolewa, na bado mara moja baadaye inasemwa kwamba tunahesabiwa haki bure kwa neema yake.

Basi, niruhusuni nieleze njia ambayo Mungu humhesabia haki mwenye dhambi. Nitakisia jambo lisilowezekana. Mfungwa amehukumiwa, na kuhukumiwa kufa. Yeye ni mtu mwenye hatia; hawezi kuhesabiwa haki, kwa sababu ana hatia. Lakini sasa, tukisie kwa kitambo kwamba jambo kama hili lingeweza kutokea—kwamba mtu wa pili angeweza kuletwa, ambaye angeweza kujitwika hatia yote ya mtu yule, ambaye angeweza kubadilishana mahali na mtu yule, na kwa njia fulani ya siri, ambayo bila shaka haiwezekani kwa wanadamu, akawa mtu yule; au kujitwika tabia ya mtu yule; yeye, mtu mwenye haki, akimweka muasi mahali pake, na kumfanya muasi kuwa mtu mwenye haki. Hatuwezi kufanya hivyo katika mahakama zetu. Kama ningekwenda mbele ya hakimu, naye akakubali nifungwe gerezani mwaka mmoja, badala ya mtu fulani mnyonge aliyehukumiwa jana kifungo cha mwaka mmoja, nisingeweza kuichukua hatia yake. Ningeweza kuichukua adhabu yake, lakini si hatia yake. Basi, kile ambacho mwili na damu hawawezi kufanya, Yesu Kristo alikifanya kwa ukombozi wake. Hapa nimesimama mimi, mwenye dhambi. Najitaja mwenyewe kama mwakilishi wenu nyote. Nimehukumiwa kufa. Mungu asema, “Nitamhukumu mtu yule; lazima, nitafanya hivyo—nitamwadhibu.” Kristo anaingia, ananiweka kando, na kusimama mwenyewe mahali pangu. Utetezi unapodaiwa, Kristo asema, “Nina hatia;” anaitwaa hatia yangu kuwa hatia yake mwenyewe. Adhabu inapokaribia kutekelezwa, Kristo anajitokeza. “Niadhibu mimi,” asema; “nimemvika mtu yule haki yangu, nami nimejitwika dhambi za mtu yule. Baba, niadhibu mimi, na umhesabu mtu yule kana kwamba alikuwa mimi. Yeye na atawale mbinguni; mimi na niteseke taabu. Mimi na nichukue laana yake, naye na apokee baraka yangu.” Fundisho hili la ajabu la Kristo kubadilishana mahali na wenye dhambi maskini, ni fundisho la ufunuo, kwa maana lisingeweza kamwe kubuniwa na maumbile. Hebu, nisije nikawa nimekosea, nijieleze tena. Njia ambayo Mungu humwokoa mwenye dhambi si, kama wengine wasemavyo, kwa kuipita adhabu. La; adhabu imelipwa yote. Ni kumweka mtu mwingine mahali pa muasi. Muasi lazima afe; Mungu asema lazima afe. Kristo asema, “Nitakuwa badala ya muasi. Muasi atachukua mahali pangu; nami nitachukua pake.” Mungu anakubali. Hakuna mfalme wa duniani ambaye angekuwa na uwezo wa kukubali mabadilishano kama hayo. Lakini Mungu wa mbinguni alikuwa na haki ya kufanya apendavyo. Katika rehema yake isiyo na mipaka alikubali mpango huo. ” Mwana wa pendo langu,” alisema, “lazima usimame mahali pa mwenye dhambi; lazima uteseke yale aliyopaswa kuteseka yeye; lazima uhesabiwe kuwa na hatia, kama vile yeye alivyohesabiwa kuwa na hatia; na kisha nitamtazama mwenye dhambi kwa nuru nyingine. Nitamtazama kana kwamba ni Kristo; nitamkubali kana kwamba ni Mwanangu pekee mzaliwa, amejaa neema na kweli. Nitampa taji mbinguni, nami nitamkumbatia moyoni mwangu milele na milele.” Hivi ndivyo tunavyookolewa, “wanahesabiwa haki bure kwa neema yake, kwa njia ya ukombozi ulio katika Kristo Yesu.”

Na sasa, hebu niendelee zaidi kueleza baadhi ya sifa za kuhesabiwa haki huku. Mara tu mwenye dhambi anayetubu anapohesabiwa haki, kumbukeni, amehesabiwa haki kwa dhambi zake zote. Hapa amesimama mtu mwenye hatia tupu. Mara anapomwamini Kristo, msamaha wake anaupokea papo hapo, na dhambi zake si zake tena; zimetupwa katika vilindi vya bahari. Ziliwekwa mabegani mwa Kristo, nazo zimetoweka. Mtu huyo anasimama kama mtu asiye na hatia machoni pa Mungu, amekubaliwa katika huyo Mpendwa. “Nini!” mwasema, “je, unamaanisha hivyo kihalisi?” Ndiyo, namaanisha hivyo, Hilo ndilo fundisho la kuhesabiwa haki kwa imani. Mtu anakoma kuonwa na haki ya Mungu kuwa kiumbe mwenye hatia; mara anapomwamini Kristo hatia yake yote inaondolewa. Lakini naenda hatua moja zaidi. Mara mtu anapomwamini Kristo, anakoma kuwa na hatia katika makadirio ya Mungu; lakini zaidi ya hayo, anakuwa mwenye haki, anakuwa mwenye kustahili; kwa maana, wakati ule ule Kristo anapozitwaa dhambi zake yeye huitwaa haki ya Kristo; hata, Mungu anapomtazama mwenye dhambi ambaye saa moja tu iliyopita alikuwa amekufa katika dhambi, anamtazama kwa upendo na mapenzi mengi kama alivyowahi kumtazama Mwanawe. Yeye mwenyewe amesema—“Kama vile Baba alivyonipenda mimi, nami nilivyowapenda ninyi.” Anatupenda kama vile Baba yake alivyompenda yeye. Je, mnaweza kuamini fundisho kama hilo? Je, halipiti fikira zote? Basi, ni fundisho la Roho Mtakatifu; fundisho ambalo kwalo lazima tutumaini kuokolewa. Je, naweza kumfafanulia mtu yeyote ambaye hajatiwa nuru wazo hili vizuri zaidi? Nitampa mfano tuliopewa katika manabii—mfano wa Yoshua kuhani mkuu. Yoshua anaingia, amevaa mavazi machafu; mavazi hayo machafu yakiwakilisha dhambi zake. Mvueni mavazi machafu; huo ni msamaha. Mvikeni kilemba kichwani; mvikeni mavazi ya kifalme; mfanyeni tajiri na mzuri; huko ndiko kuhesabiwa haki. Lakini mavazi haya yanatoka wapi? na yale matambara yanakwenda wapi? Basi, matambara aliyokuwa amevaa Yoshua yanakwenda kwa Kristo, na mavazi aliyovikwa Yoshua ni mavazi aliyoyavaa Kristo. Mwenye dhambi na Kristo wanafanya kama walivyofanya Yonathani na Daudi. Yonathani alimvika Daudi mavazi yake, Daudi akampa Yonathani mavazi yake; vivyo hivyo Kristo anazitwaa dhambi zetu, nasi tunaitwaa haki ya Kristo; na ni kwa kubadilishana huku kutukufu kwa mahali ndipo wenye dhambi wanapoachwa huru na kuhesabiwa haki kwa neema yake.

“Lakini,” asema mmoja, “hakuna anayehesabiwa haki namna hiyo, mpaka afe.” Niaminini, anahesabiwa.

“Mara mwenye dhambi aaminipo,

Na kumtumaini Mungu wake aliyesulubiwa,

Msamaha wake anaupokea papo hapo;

Wokovu kamili, kwa damu yake.”

Kama kijana yule pale ameamini kweli katika Kristo asubuhi hii, akitambua kwa uzoefu wa kiroho yale niliyojaribu kuyaeleza, amehesabiwa haki machoni pa Mungu sasa kama atakavyokuwa atakaposimama mbele ya kiti cha enzi. Roho zilizotukuzwa huko juu hazikubaliki zaidi kwa Mungu kuliko mtu maskini hapa chini, ambaye mara moja amehesabiwa haki kwa neema. Ni kuoshwa kukamilifu, ni msamaha mkamilifu, kuhesabiwa haki kukamilifu; tumekubaliwa kikamilifu, bure, na kabisa, kwa njia ya Kristo Bwana wetu. Neno moja tu zaidi hapa, na kisha nitaliacha jambo hili la kuhesabiwa haki. Wale ambao mara moja wamehesabiwa haki, wamehesabiwa haki bila kurudi nyuma. Mara tu mwenye dhambi anapochukua mahali pa Kristo, na Kristo anapochukua mahali pa mwenye dhambi, hakuna hofu ya mabadilishano ya pili. Kama Kristo amelipa deni mara moja, deni limelipwa, wala halitadaiwa tena kamwe; kama umesamehewa, umesamehewa mara moja kwa milele. Mungu hampi mtu msamaha wa bure kwa sahihi yake mwenyewe ya kifalme, na kisha baadaye akaufuta na kumwadhibu mtu huyo: hilo na liwe mbali na Mungu kufanya hivyo. Anasema, “Nimemwadhibu Kristo; wewe waweza kwenda huru.” Na baada ya hayo, twaweza “kufurahi katika tumaini la utukufu wa Mungu,” kwamba “tukiisha kuhesabiwa haki kwa imani, tuna amani kwa Mungu, kwa njia ya Bwana wetu Yesu Kristo.” Na sasa namsikia mmoja akilia, “Hilo ni fundisho la ajabu.” Basi, wengine wanaweza kudhani hivyo; lakini hebu niwaambie, ni fundisho linalokiriwa na makanisa yote ya Kiprotestanti, ingawa huenda hawalihubiri. Ni fundisho la Kanisa la Uingereza, ni fundisho la Luther, ni fundisho la kanisa la Kipresbiteri; kwa kukiri ni fundisho la makanisa yote ya Kikristo; na kama linasikika geni masikioni mwenu, ni kwa sababu masikio yenu yamefarakana nalo, wala si kwa sababu fundisho lenyewe ni geni. Ni fundisho la maandiko matakatifu, kwamba hakuna awezaye kuwahukumu wale ambao Mungu huwahesabia haki, na kwamba hakuna awezaye kuwashitaki wale ambao Kristo amewafia; kwa maana wako huru kabisa mbali na dhambi. Hivyo, kama asemavyo mmoja wa manabii, Mungu haoni dhambi katika Yakobo wala uovu katika Israeli. Wakati ule ule wanapoamini, dhambi zao zikiwa zimehesabiwa kwa Kristo, zinakoma kuwa zao, na haki ya Kristo inahesabiwa kwao na kuwa yao, hata wanakubaliwa.

III. Na sasa nahitimisha kwa hoja ya tatu, ambayo juu yake nitakuwa mfupi, na natumaini mwenye bidii sana: NAMNA YA KUTOLEWA KWA KUHESABIWA HAKI HUKU. John Bunyan angesema kwamba wapo wengine ambao midomo yao inatokwa na mate kwa kukitamani kipawa hiki kikuu cha kuhesabiwa haki. Je, hawapo wengine hapa wanaosema, “Laiti ningehesabiwa haki! Lakini, bwana, je, naweza kuhesabiwa haki? Nimekuwa mlevi, nimekuwa mwapizaji, nimekuwa kila kitu kilicho kiovu. Je, naweza kuhesabiwa haki? Je, Kristo atazitwaa dhambi zangu nyeusi, nami nitayatwaa mavazi yake meupe? Ndiyo, nafsi maskini, kama unatamani hivyo; kama Mungu amekufanya uwe radhi, kama unaziungama dhambi zako, Kristo yu radhi kuyatwaa matambara yako, na kukupa haki yake, iwe yako milele. “Vema, lakini inapatikanaje?” asema mmoja “je, lazima niwe mtu mtakatifu kwa miaka mingi, na kisha niipate?” Sikilizeni! “Bure kwa neema yake;” “bure,” kwa sababu hakuna gharama ya kulipwa kwa ajili yake; “Kwa neema yake,” kwa sababu haitokani na kustahili kwetu. “Lakini, Ee bwana, nimekuwa nikiomba, nami sidhani Mungu atanisamehe, isipokuwa nifanye jambo fulani la kustahili.” Nakuambia, ndugu yangu, ukileta chochote cha kustahili kwako, hutakipata kamwe. Mungu hutoa kuhesabiwa haki kwake bure; ukileta chochote cha kukilipia, atakitupa usoni mwako, wala hatakupa kuhesabiwa haki kwake. Hukitoa bure. Mzee Rowland Hill alikwenda siku moja kuhubiri gulioni; aliwaona wachuuzi wakiuza bidhaa zao kwa mnada; basi Rowland akasema, “Nami nitafanya mnada pia, kuuza divai na maziwa, bila fedha na bila thamani. Rafiki zangu wale pale,” alisema “wanapata shida kubwa kuwapandisha ninyi hadi bei yao; shida yangu ni kuwashusha ninyi hadi bei yangu.” Ndivyo ilivyo kwa wanadamu. Kama ningeweza kuhubiri kuhesabiwa haki kunakonunuliwa nanyi kwa sarafu ya dhahabu kila mmoja, ni nani angetoka mahali hapa bila kuhesabiwa haki? Kama ningeweza kuwahubiria kuhesabiwa haki kwa kutembea maili mia moja, je, hatungekuwa mahujaji kesho asubuhi, kila mmoja wetu? Kama ningehubiri kuhesabiwa haki kunakotokana na kuchapwa viboko na mateso, ni wachache sana hapa ambao wasingejichapa wenyewe, tena kwa ukali pia. Lakini inapokuwa ni bure, bure, bure, watu wanageuka na kwenda zao. “Nini! je, nitaipata bila kitu chochote, bila kufanya lolote?” Ndiyo, ndugu yangu, utaipata bila kitu, la sivyo hutaipata kabisa; ni “bure.” “Lakini je, siwezi kwenda kwa Kristo, na kudai kiasi fulani cha rehema yake, na kusema, Bwana, unihesabie haki kwa sababu mimi si mbaya kama wengine?” Haitafaa, ndugu yangu, kwa sababu ni “kwa neema yake.” “Lakini je, siwezi kuwa na tumaini fulani, kwa sababu naenda kanisani mara mbili kwa siku?” La, ndugu yangu; ni “kwa neema yake.” “Lakini je, siwezi kutoa hoja hii, kwamba nakusudia kuwa bora zaidi?” La, ndugu yangu; ni “kwa neema yake.” Mnamtukana Mungu kwa kuleta sarafu zenu bandia kulipia hazina zake. Lo! jinsi wanadamu walivyo na mawazo duni juu ya thamani ya injili ya Kristo, kama wanadhani wanaweza kuinunua! Mungu hataki senti zenu zenye kutu za kununulia mbingu. Mtu mmoja tajiri, alipokuwa akifa, alikuwa na wazo kwamba angeweza kununua mahali mbinguni kwa kujenga safu ya nyumba za maskini. Mtu mmoja mwema alisimama kando ya kitanda chake, akasema, “Ni kiasi gani unakusudia kuacha?” “Pauni elfu ishirini.” Akasema “Hizo zisingetosha kununua nafasi ya mguu wako kusimama mbinguni; kwa maana njia kuu za huko zimetengenezwa kwa dhahabu, na kwa hiyo dhahabu yako ingekuwa na thamani gani, ingehesabiwa kuwa si kitu, wakati njia kuu zenyewe zimetandikwa kwayo?” La, rafiki zangu, hatuwezi kununua mbingu kwa dhahabu wala kwa matendo mema, wala kwa maombi, wala kwa kitu chochote duniani. Lakini basi inapatikanaje? Basi, inapatikana kwa kuomba tu. Wote kati yetu wanaojijua kuwa wenye dhambi wanaweza kumpata Kristo kwa kumwomba. Je, unajua kwamba unamhitaji Kristo? Waweza kumpata Kristo! “Ye yote atakaye, na aje ayatwae maji ya uzima bure.” Lakini ukishikamana na mawazo yako mwenyewe, na kusema, “La, bwana, nakusudia kufanya mambo mengi mema, na kisha nitamwamini Kristo.”—Ndugu yangu, utahukumiwa ukishikilia madanganyo kama hayo. Nakuonya kwa dhati. Huwezi kuokolewa hivyo. “Vema, lakini je, hatupaswi kufanya matendo mema?” Hakika mnapaswa; lakini hampaswi kuyatumainia. Lazima mmtumaini Kristo kabisa, na kisha mfanye matendo mema baadaye. “Lakini,” asema mmoja, “nadhani kama ningefanya matendo mema machache, yangekuwa pendekezo dogo nitakapokuja.” Hayangekuwa, ndugu yangu; yasingekuwa pendekezo hata kidogo. Mwombaji na aje nyumbani kwako amevaa glavu nyeupe za ngozi laini, na kusema kwamba yuko katika hali mbaya sana, na anahitaji msaada; je, glavu hizo nyeupe zingempendekeza kwa ukarimu wako? Je, kofia nzuri mpya aliyoinunua asubuhi hii ingempendekeza kwa ukarimu wako? “La,” ungesema, “wewe ni mdanganyifu mnyonge; huhitaji kitu chochote, wala hutapata kitu chochote pia! Toka hapa!”

Vazi bora kwa mwombaji ni matambara, na vazi bora ambalo mwenye dhambi aweza kumwendea Kristo nalo, ni kwenda jinsi alivyo, bila kitu chochote juu yake ila dhambi. “Lakini hapana;” mwasema, “lazima niwe bora kidogo, na kisha nadhani Kristo ataniokoa!” Huwezi kuwa bora zaidi, jaribu kwa muda wowote upendao. Na zaidi ya hayo —kwa kutumia kitendawili—kama ungekuwa bora zaidi, ungekuwa mbaya zaidi; kwa maana kadiri ulivyo mbaya zaidi, ndivyo ilivyo bora zaidi kuja kwa Kristo. Kama wewe si mtakatifu kabisa njoo kwa Kristo; kama unaisikia dhambi yako, na kuikana, njoo kwa Kristo; ingawa umekuwa nafsi iliyoharibika na kupotea kuliko wote, njoo kwa Kristo; kama unajiona huna kitu chochote juu yako kiwezacho kukupendekeza, njoo kwa Kristo.

“Jitose kwake, jitose kabisa;

Tumaini jingine lisiingilie.”

Sisemi hivi ili kumhimiza mtu yeyote aendelee katika dhambi. Hasha! Ukiendelea katika dhambi, hupaswi kuja kwa Kristo; huwezi; dhambi zako zitakuzuia. Huwezi kufungwa minyororo kwenye kasia yako ya jahazi—kasia ya dhambi zako—na bado ukaja kwa Kristo, na kuwa mtu huru. La, ndugu yangu, ni toba; ni kuiacha dhambi mara moja. Lakini angalia, si kwa toba, wala si kwa kuiacha dhambi yako, kutakuokoa. Ni Kristo, Kristo, Kristo—Kristo peke yake.

Lakini najua mtakwenda zenu, wengi wenu, na kujaribu kujenga mnara wenu wenyewe wa Babeli, ili kufika mbinguni. Baadhi yenu mtaanza kazi kwa njia moja, na wengine kwa nyingine. Mtaifuata njia ya taratibu za ibada: mtaweka msingi wa jengo kwa ubatizo wa watoto wachanga, mjenge kipaimara juu yake, na meza ya Bwana. “Nitakwenda mbinguni,” mwasema; “Je, mimi siishiki Ijumaa Kuu na Siku ya Krismasi? Mimi ni mtu bora kuliko wale wanaojitenga na Kanisa rasmi. Mimi ni mtu wa ajabu kupita kiasi. Je, mimi siombi sala nyingi kuliko mtu yeyote?” Mtakaa muda mrefu mkipanda gurudumu lile la kukanyaga, kabla hamjapanda juu hata inchi moja. Hiyo si njia ya kufika kwenye nyota. Mmoja asema, “Nitakwenda kujifunza Biblia, na kuamini mafundisho sahihi; nami sina shaka kwamba kwa kuamini mafundisho sahihi nitaokolewa.” Hakika hutaokolewa! Huwezi kuokolewa kwa kuamini mafundisho sahihi zaidi ya unavyoweza kuokolewa kwa kutenda matendo sahihi. “Haya,” asema mwingine, “hilo nalipenda; nitakwenda kumwamini Kristo, na kuishi nipendavyo.” Hakika hutaishi hivyo! Kwa maana ukimwamini Kristo hatakuacha uishi kama mwili wako upendavyo; kwa Roho wake atakulazimisha kuzifisha shauku zake na tamaa zake. Akikupa neema ya kukufanya uamini, atakupa neema ya kuishi maisha matakatifu baadaye. Akikupa imani, anakupa matendo mema baadaye. Huwezi kumwamini Kristo, isipokuwa uache kila kosa, na kuazimia kumtumikia kwa kusudi kamili la moyo. Nadhani hatimaye namsikia mwenye dhambi akisema, “Je, huo ndio mlango pekee? Na je, naweza kuthubutu kupita ndani yake? Basi nitapita. Lakini sikuelewi vizuri; mimi ni kama yule maskini Tiff, katika kitabu kile cha ajabu ‘Dred.’ Wanazungumza sana juu ya mlango, lakini siwezi kuuona mlango; wanazungumza sana juu ya njia, lakini siwezi kuiona njia. Kwa maana kama maskini Tiff angeweza kuiona njia, angewapeleka watoto hawa kwa njia hiyo. Wanazungumza juu ya kupigana, lakini simwoni mtu yeyote wa kupigana naye, la sivyo ningepigana.” Basi, hebu nilieleze. Naona katika Biblia, “Ni neno la kuaminiwa, tena lastahili kukubalika kabisa, ya kwamba Kristo Yesu alikuja ulimwenguni awaokoe wenye dhambi.” Una nini cha kufanya, ila kuliamini hili na kumtumaini yeye? Hutavunjika moyo kamwe kwa imani kama hiyo. Hebu niwape tena mfano ambao nimeutoa mara mamia, lakini siwezi kupata mwingine mzuri kama huu, kwa hiyo lazima niutoe tena. Imani ni kitu kama hiki. Kuna hadithi inayosimuliwa juu ya nahodha wa manowari, ambaye mwanawe—kijana mdogo—alipenda sana kupanda kamba za merikebu; na wakati mmoja, akimfukuza tumbili, alipanda mlingoti, hata mwishowe akafika juu ya kofia ya mlingoti mkuu. Basi, kofia ya mlingoti mkuu, kama mnavyojua, ni kama meza kubwa ya mviringo iliyowekwa juu ya mlingoti, hivyo kwamba kijana alipokuwa juu yake kulikuwa na nafasi ya kutosha kwake; lakini tatizo lilikuwa—kwa kutumia maelezo bora niwezayo—kwamba hakuweza kuufikia mlingoti uliokuwa chini ya meza ile; hakuwa mrefu wa kutosha kushuka kutoka juu ya kofia hiyo, kuufikia mlingoti, na hivyo kushuka. Alikuwa pale juu ya kofia ya mlingoti mkuu; alifaulu kupanda pale, kwa njia moja au nyingine, lakini kushuka hakuweza kamwe. Baba yake aliona hilo, akatazama juu kwa hofu kuu; afanye nini? Baada ya dakika chache mwanawe angeanguka, na kupondeka vipande vipande! Alikuwa ameishikilia kofia ya mlingoti mkuu kwa nguvu zake zote, lakini baada ya muda mfupi angeanguka juu ya sitaha, na hapo angekuwa maiti iliyopondwa. Nahodha aliagiza aletewe tarumbeta ya kusemea; akaitia mdomoni, akapiga kelele, “Kijana, merikebu itakapoinama tena, jitupe baharini.” Kwa kweli, hiyo ndiyo iliyokuwa njia yake pekee ya kuokoka; angeweza kuokotwa kutoka baharini, lakini asingeweza kuokolewa kama angeanguka juu ya sitaha. Kijana maskini alitazama chini baharini; ilikuwa mbali sana; hakuweza kustahimili wazo la kujitupa katika mkondo ule uliokuwa ukinguruma chini yake; alidhani unaonekana wenye hasira na wa hatari. Angewezaje kujitupa ndani yake? Basi akaishikilia kofia ya mlingoti mkuu kwa nguvu zake zote, ingawa hapakuwa na shaka kwamba punde angeachia na kuangamia. Baba aliagiza aletewe bunduki, na akiielekeza juu kwake, akasema, “Kijana, merikebu itakapoinama tena, jitupe baharini, la sivyo nitakupiga risasi!” Alijua baba yake angetimiza neno lake; merikebu ikainama upande mmoja, kijana akaanguka chubwi baharini, na mikono yenye nguvu ikanyooshwa kumfuata; mabaharia wakamwokoa, na kumleta juu ya sitaha. Basi, sisi, kama yule kijana, tumo katika hali ya hatari isiyo ya kawaida, kwa asili, ambayo wewe wala mimi hatuwezi kwa njia yoyote kuiepuka kwa nguvu zetu wenyewe. Kwa bahati mbaya, tunayo matendo mema kadhaa yetu wenyewe, kama ile kofia ya mlingoti mkuu, nasi tunayashikilia kwa upendo mno, hata hatutaki kamwe kuyaacha. Kristo anajua kwamba tusipoyaacha, tutapondeka vipande vipande mwishoni, kwa maana tumaini lile lililooza lazima litatuangamiza. Kwa hiyo anasema, “Mwenye dhambi, liache tumaini lako mwenyewe, ujitupe katika bahari ya upendo wangu.” Tunatazama chini, na kusema, “Je, naweza kuokolewa kwa kumtumaini Mungu? Anaonekana kana kwamba amenikasirikia, nami siwezi kumtumaini.” Lo, je, kilio cha upole cha rehema hakitakushawishi?—“Aaminiye ataokoka.” Je, lazima silaha ya maangamizi ikuelekezwe moja kwa moja? Je, lazima usikie tishio la kutisha—“Asiyeamini atahukumiwa?” Ni hivyo kwako sasa kama ilivyokuwa kwa yule kijana—hali yako yenyewe ni ya hatari iliyo karibu, na kuupuuza kwako ushauri wa Baba ni jambo la kutisha zaidi, linaifanya hatari iwe ya hatari zaidi. Lazima ufanye hivyo, la sivyo utaangamia! Achia mshiko wako! Hiyo ndiyo imani, mwenye dhambi maskini anapoachia mshiko wake, anaanguka chini, na hivyo anaokolewa; na kitu kile kile kinachoonekana kana kwamba kingemwangamiza, ndicho njia ya kuokolewa kwake. Lo! mwaminini Kristo, enyi wenye dhambi maskini; mwaminini Kristo. Ninyi mnaoijua hatia yenu na taabu yenu njooni, mjitupe juu yake; njooni, mmtumaini Bwana wangu, na kama aishivyo, yeye ambaye mbele zake nimesimama, hamtamtumaini bure kamwe; bali mtajikuta mmesamehewa, na kwenda zenu mkishangilia katika Kristo Yesu.