Mashujaa na Waoga

"Kuwaogopa wanadamu huleta mtego." — Mithali 29:25.

Usiku wa leo nina fungu refu, kwa kweli mafungu matatu. Fungu la Maandiko ndilo sehemu bora ya mahubiri. Mahubiri yakiwa bora kuliko fungu lake, basi ni mahubiri duni. Mahubiri mazuri si kitu kingine ila ufafanuzi wa fungu. Fungu la kwanza mtalipata katika Mithali 29:25: "Kuwaogopa wanadamu huleta mtego." Maoni yenu juu ya uvuvio wa Biblia yawe yo yote, mnajua kwamba mstari huu ni kweli kabisa, hata iweje. Mara ngapi tumeliona neno hilo la Neno la Mungu likitimia! Ni wanaume na wanawake wangapi katika London usiku huu ambao wamenaswa na hofu ya wanadamu, wakaangamizwa kwa wakati huu na kwa milele! Kwa mfano, ni vijana wangapi wamekuja London wakiwa safi, wasio na hatia, wanyofu, wenye kiasi, wakikusudia kuishi maisha ya utulivu, ya uaminifu na ya bidii katika mji huu mkubwa. Kijana kama huyo alijua kitu juu ya hatari za ulevi, naye alikuwa na hekima ya kutougusa; anakuja London akikusudia kuwa kile ambacho kila mwanamume na kila mwanamke anapaswa kuwa, mtu asiyenywa kileo kabisa. Usiku mmoja kijana huyu anaalikwa kwenye chakula cha jioni, na yule bwana aliyeketi kichwani mwa meza anamsihi anywe glasi ya divai. Lakini kijana huyu anakataa; anasema, "Mimi sinywi kamwe." Yule bwana anamcheka, watu wengine mezani wanamtania, wengine wanasema kwamba anamtukana mwenyeji wao, bwana au bibi wa nyumba, kwa kutokunywa kwa afya yao, na hofu ya wanadamu inamtia katika mtego. Anakunywa glasi yake ya kwanza ya divai, nayo inamwongoza kwenye nyingine, na nyingine, na nyingine tena, na usiku huu yeye ni mlevi katika mitaa ya London, kwa sababu ya hofu ya wanadamu; sifa yake njema imekwenda, uanaume wake umekwenda, nguvu za akili zimekwenda, uwezo wa kufanya kazi umekwenda, kila kitu kimekwenda; hofu ya wanadamu imekuwa maangamizi yake ya kitambo na ya milele. Ni vijana wangapi wanakuja katika mji huu mkubwa wa London, vijana waaminifu, ambao hawajawahi kucheza kamari maishani mwao! Mmoja wao hucheza karata mara moja moja kwa urafiki tu; lakini usiku mmoja, baada ya kazi, yuko pamoja na marafiki wachache nao wanacheza karata kama kawaida, na mmoja wa kundi lile anapendekeza waweke dau kidogo, kiasi kidogo tu, ili mchezo unoge. Kijana anasita, lakini wanamwambia, "Huhitaji kucheza kamari, ni peni tatu au peni sita tu, upande wo wote; hatuchezi kwa dau kubwa." Anasema, "Mimi sichezi kamari kamwe; naamini ni udanganyifu." Lakini wanamcheka, wanamtania, na kumwambia angefaa kwenda Shule ya Jumapili; naye hawezi kustahimili dhihaka zao, anaweka sarafu yake ya kwanza ya peni tatu katika mchezo wa karata. Tamaa kali ya mcheza kamari, ambayo ni tamaa inayoteketeza kuliko ile ya kileo, na yenye kuangamiza zaidi, inamtawala; anamwibia mwajiri wake, na leo yuko gerezani, kwa sababu hofu ya wanadamu ilimwongoza kucheza kamari, ikamwangamiza kabisa.

Ni wasichana wangapi wamekuja hapa kutoka mashambani, wasichana wenye adabu, wasio na hatia, lakini wasio na misingi thabiti ya Kikristo! Msichana kama huyo anaishi katika chumba duni sana cha kupanga; na akitafuta furaha kidogo na mwanga kidogo katika maisha yake ya kuchosha, huenda mara kwa mara kwenye jumba la maigizo, huenda kwenye dansi na kwenye mikusanyiko. Anapagawa kabisa na dansi, na usiku mmoja, kijana mmoja mwenye kupendeza na kuvutia sana, ambaye amefahamiana naye huko dansini, anamdokezea jambo kwa ujanja, jambo ambalo haelewi sawasawa, lakini ambalo adabu yake inalichukia, naye analikataa kwa hasira. Lakini kijana yule anamcheka. "Kumbe," anasema, "huelewi. Sikusudii ubaya wo wote; ni jambo la kawaida kabisa." Na msichana yule amejifunza kuruhusu mazoea ambayo hakuna msichana mwenye adabu angejiruhusu-kwa maana ukumbi wa dansi huruhusu mazoea ambayo watu wenye heshima hawayaruhusu mahali po pote nje ya ukumbi huo. Ni hatua ya kwanza ya maisha yaliyoharibika, na msichana yule usiku huu ni mtu aliyetupwa katika mitaa ya London. Hofu ya wanadamu imeleta mtego ambao umemwangamiza.

Fungu langu linalofuata liko katika Yohana 12:42 na 43: "Walakini hata katika wakuu, wengi walimwamini; ila kwa sababu ya Mafarisayo hawakumkiri, wasije wakatengwa na sinagogi. Kwa maana walipenda utukufu wa wanadamu kuliko utukufu wa Mungu." Basi hayo yaliandikwa juu ya Yerusalemu katika siku za Kristo, lakini yanasikika kana kwamba yaliandikwa juu ya London leo. Ni wanaume wangapi walioko London, watu mashuhuri, sawasawa na wale wakuu wa Yerusalemu, ambao wanamwamini Yesu Kristo mioyoni mwao, lakini hawamkiri kwa vinywa vyao kwa kuogopa watu watasema nini juu yao, kwa maana wanapenda utukufu wa wanadamu kuliko utukufu wa Mungu. Huo ni woga wa kimaadili. Kuna mamia na maelfu na makumi ya maelfu ya wanaume na wanawake walio na hakika kamili kama mimi nilivyo kwamba Yesu Kristo ni Mwana wa Mungu, na hata hivyo wanajizuia wasimkiri Kristo waziwazi, hadharani, kwa sababu ya woga wa kimaadili.

Sasa geukieni fungu la tatu, katika 2 Wakorintho 12:10. Ni picha tofauti kabisa. Katika mafungu mawili ya kwanza tuna picha ya mwoga wa kimaadili; sasa tunaifikia picha tukufu ya shujaa wa kimaadili: "Kwa sababu hiyo napendezwa na udhaifu, na ufidhuli, na misiba, na adha, na shida, kwa ajili ya Kristo!" Aa, hiyo ni picha inayostahili kutazamwa! Mtu aliyetukanwa kwa ajili ya jina la Mungu, aliyeteswa kwa sababu ya uaminifu wake kwa kweli, lakini ingawa walimrundikia kila namna ya aibu, aliinua uso wake wenye tabasamu akasema, "Napendezwa na aibu." Paulo alishuka Listra, na kwa sababu ya uaminifu wake kwa kweli na kuitetea kweli waziwazi bila kuficha, walimpiga kwa mawe, baada ya kuwa karibu wamwabudu; wakamkokota nje ya mji. Wanafunzi wake walisimama kumzunguka wakidhani amekufa. Lakini baada ya kitambo aliinuka tena, akarudi Listra. Kisha akaenda Derbe. Baadhi ya ndugu Wakristo wenye tahadhari huko Derbe, wakikumbuka yaliyotukia Listra, bila shaka walisema: "Sasa, Paulo, ni vizuri kuwa mwaminifu na kumwamini Yesu Kristo, lakini lazima uwe na busara zaidi kidogo. Haifai kupambana hivyo moja kwa moja na chuki za watu. Sasa, Paulo, usiseme waziwazi hivyo hapa, la sivyo watakutendea huko Derbe sawasawa na walivyokutendea Listra. Sasa, Paulo, uwe na busara zaidi kidogo, ulegeze msimamo kidogo tu." Na yule mtu wa ajabu aliinua uso akasema, "Napendezwa na udhaifu na shida kwa ajili ya Kristo." Wanaume na wanawake, mnachohitaji London kuliko kitu kingine cho chote ni wanaume wachache kama Paulo, na wanawake wachache wenye roho ile ile, wanaume na wanawake watakaosimama upande wa Kristo na upande wa ufalme wa Mungu bila kulegeza msimamo, bila kujali inamuumiza nani au watu wanasema nini. Basi somo langu usiku huu, lililotokana na mafungu haya matatu, ni "Mashujaa na Waoga."

Nataka kusema hapa hapa mwanzoni kwamba inahitaji ujasiri kuwa Mkristo, kuwa mfuasi halisi, wa kweli, asiyeficha imani yake, wa Yesu Kristo. Mimi na wewe tunaishi katika ulimwengu unaomchukia Mungu; tunaishi katika zama za kulegeza msimamo -zama ambazo watu wanaojidai kuwa Wakristo wanajaribu kuupendeza ulimwengu na kuliendesha Kanisa la Kristo hivi kwamba pasiwe na tofauti yo yote kati ya kanisa na ulimwengu. Basi katika ulimwengu unaomchukia Mungu kama huu, na katika zama za kulegeza msimamo kama hizi, inahitaji ujasiri kuwa askari kamili wa Yesu Kristo. Inahitaji ujasiri mkubwa kuliko ule walio nao wengi wenu. Watu wengi leo walio na ujasiri mkubwa, walio na ujasiri wa kutosha kuwa askari, ujasiri wa kutosha kwenda vitani, ujasiri wa kutosha kwenda mstari wa mbele, ujasiri wa kutosha kusimama katika mstari wa mapigano, na kusimama mbele ya moto mkali wa bunduki za adui, hawana ujasiri wa kutosha kurudi kambini usiku na kupiga magoti na kusali sala zao, na kustahimili dhihaka za askari wenzao. Inahitaji Ujasiri, ujasiri ulio bora kuliko wote, kuwa Mkristo kamili.

Lakini usiku huu nitawapa sababu tano kwa nini kila mwanamume na kila mwanamke anapaswa kumkiri Kristo hadharani mbele ya ulimwengu.

1. Kwanza kabisa, kwa sababu Yeye ni Bwana na Bwana Mkubwa mtukufu mno. Hakuna kitu cha kuonea haya katika Yesu Kristo. Kijana mmoja alisimama katika mkutano (alikuwa ameongoka karibuni), akajaribu kutoa ushuhuda mdogo kwa ajili ya Yesu Kristo. Lakini hakuwa na uzoefu wa kushuhudia hadharani, wala hakuweza kuongea vizuri sana; na alipokwisha kuketi, mzee mmoja alisimama akasema, "Kijana, unapaswa kujionea haya. Huwezi kuhubiri, wala hupaswi kujaribu; unapaswa kujionea haya." Ndipo yule kijana alisimama tena akasema: "Naam, najionea haya mimi mwenyewe, lakini simwonei haya Bwana wangu." Aa, shida ya baadhi yenu, mabwana, ni kwamba hamjionei haya ninyi wenyewe, ingawa mngepaswa, bali mnamwonea haya Bwana Yesu. Sijawahi kukutana na Mwingereza aliyemwonea haya Malkia Victoria. Ningemwonea haya mtu huyo kama ningekutana naye, kwa kuwa alikuwa malkia mtukufu mno. Sijawahi kukutana na Mwingereza anayemwonea haya Mfalme Edward. Lakini ijapokuwa Malkia Victoria alikuwa malkia mtukufu namna hiyo (na ingawa mimi ni raia wa Marekani naamini alikuwa malkia mtukufu kuliko wote waliowahi kutawala duniani), na ijapokuwa tunatazamia Mfalme Edward kuwa mfalme mtukufu namna hiyo, utukufu wa Malkia Victoria na utukufu wa Mfalme Edward unafifia na kuwa si kitu kabisa mbele ya utukufu wa Yesu Kristo. Ee, wanaume na wanawake, hakuna kitu cha kuonea haya katika Yesu Kristo. Ni jambo tukufu kuliko yote ambalo mtu aweza kusema, "Mimi ni mfuasi wa yule Mtu mkamilifu; mimi ni mfuasi wa Mwana wa Mungu; mimi ni mfuasi wa Yule aliye mtukufu pasipo kikomo, Yesu Kristo wa Nazareti."

2. Pili, kila mwanamume na kila mwanamke anapaswa kumkiri Bwana Yesu hadharani mbele ya ulimwengu kwa ajili ya mvuto wao. Kila mtu ana mvuto. Hakuna mtu katika London asiye na mvuto. Kila mmoja hapa ana mvuto, ama upande wa Yesu Kristo ama dhidi ya Yesu Kristo. Hakuna mwanamume wala mwanamke wala mtoto hapa usiku huu ambaye, kama angemkiri Yesu mbele ya ulimwengu kuwa Bwana wake, na kuishi kupatana na ukiri huo, asingekuwa na mvuto wa kumleta mtu mwingine kwa Kristo. Kwa upande mwingine, hakuna mwanamume, mwanamke, wala mtoto hapa usiku huu, ambaye kama hamkiri Kristo, hata aishi vizuri namna gani, hana mvuto dhidi ya Kristo; na kadiri anavyoishi vizuri zaidi ndivyo mvuto wake unavyokuwa dhidi ya Kristo zaidi, kwa maana watu wanamtazama na kusema, "Mtazame mtu yule; kwa kadiri ninavyoona anaishi vizuri sawasawa na hawa wanaojidai kuwa Wakristo, naye si Mkristo, hakiri imani katika Kristo; sioni haja ya kuwa Mkristo." Ee, kila mmoja wenu, ninyi wanaume ambao hammkiri Kristo waziwazi, kwa uthabiti, daima, mbele ya ulimwengu, mna mvuto dhidi ya Yesu Kristo.

Wakati mmoja, Horace Bushnell alipokuwa mkufunzi katika Chuo cha Yale, kulikuwa na uamsho mkubwa katika chuo kizima. Horace Bushnell alikuwa mkufunzi aliyependwa kuliko wote katika Yale, lakini hakuwa Mkristo. Na jambo hilo la kutokuwa Mkristo lilikuwa kikwazo njiani mwa wanafunzi wengi. Horace Bushnell alilijua, nalo lilimsumbua sana. Usiku mmoja alirudi nyumbani akiwa na wasiwasi mwingi. Kitu fulani kilimwambia, "Wewe umesimama njiani mwa kazi hii; kama ungekuwa Mkristo kuna vijana wengi wa Chuo cha Yale ambao wangemjia Kristo." "Lakini," alijisemea, "nawezaje kumjia Kristo? Siiamini Biblia, wala siamini kwamba Yesu Kristo ni Mwana wa Mungu. Siwezi kujifanya mnafiki, ili tu nisiwe kizuizi kwa wengine." Alikuwa na wasiwasi mwingi, akatembea huku na huku chumbani mwake akilitafakari. Mwishowe, sauti moja ilimwambia moyoni, "Horace Bushnell, hata hivyo, wewe unaamini nini?" "Basi, jambo moja ninaloamini ni kwamba kuna tofauti kamili kati ya haki na batili." "Vema, je, umesimama imara juu ya lile unaloliamini? Unazungumza juu ya usiyoyaamini; fikiri juu ya unayoyaamini. Je, umewahi kusimama imara upande wa haki, ili uifuate po pote itakapokupeleka, hata ikikupeleka juu ya Maporomoko ya Niagara?" Akasema, "La, sijawahi, lakini nitafanya hivyo." Akaomba, "Ee Mungu, kama yupo Mungu, nionyeshe kama Yesu Kristo ni Mwana wako, na ukinionyesha hilo naahidi kumpokea kuwa Mwokozi wangu na kumkiri mbele ya ulimwengu," na baada ya muda mfupi nuru ilipasuka ikaingia katika nafsi ya Horace Bushnell iliyokuwa gizani, naye akajitokeza upande wa Kristo, na karibu kila kijana katika Chuo cha Yale aliongoka.

Ee, marafiki, kama mnasema ninyi ni waagnostiki, kama mnasema ninyi ni wenye shaka, je, mmewahi kufanya jitihada ya kweli ya kutoka katika uagnostiki wenu? Kama hamjafanya hivyo, uagnostiki wenu si udhuru, hata kidogo. Aa, kama baadhi yenu, wanaume na wanawake wa London mlio na nafasi na vyeo mashuhuri, mngesimama usiku huu mahali mnapopaswa kusimama, upande wa kweli, makumi ya watu wengine wangemjia Kristo.

Bw. Charles G. Finney alipokuwa akihubiri huko Rochester, New York, katika miaka ya thelathini, wanasheria wengi sana walikuja kumsikiliza, na usiku mmoja, juu kabisa katika roshani, aliketi Jaji Mkuu wa Mahakama ya Rufani ya Jimbo la New York. Alipokuwa ameketi pale akisikiliza hoja nzito za Bw. Finney, Jaji Mkuu wa Mahakama ya Rufani ya Jimbo la New York alishawishika kwamba aliyohubiri Bw. Finney ni kweli. Ndipo swali likamjia, "Je, utajitokeza mbele kama wale wanaume na wanawake wengine wa kawaida kwenye 'kiti cha wenye wasiwasi?'" Kitu fulani ndani yake kilisema, "Haitafaa kamwe duniani. Wewe una cheo cha juu kabisa cha kisheria katika Jimbo la New York; wewe ni Jaji Mkuu wa Mahakama ya Rufani; haitafaa kamwe duniani wewe kushuka mbele, na kutafuta wokovu ukipiga magoti kwenye 'kiti cha wenye wasiwasi.'" Aliketi pale akitafakari kwa muda; kisha akajisemea, "Kwa nini isiwe hivyo? Nimeshawishika kwamba msimamo wa mtu yule ni kweli. Naujua wajibu wangu; kwa nini nisiutimize kama mtu mwingine ye yote?" Aliinuka kutoka mahali pake katika roshani, akashuka ngazi, akapanda ngazi za nyuma ya mahali Bw. Finney alipokuwa akihubiri, na Bw. Finney, katikati ya mahubiri yake, alihisi mtu akivuta pindo za koti lake. Aligeuka, na pale alisimama Jaji Mkuu wa Mahakama ya Rufani ya Jimbo la New York. Akauliza, "Kuna nini?" Jaji Mkuu akajibu, "Bw. Finney, ukiwaita watu waje kwenye 'kiti cha wenye wasiwasi,' nitakuja." Bw. Finney akasimamisha mahubiri yake akasema, "Jaji Mkuu wa Mahakama ya Rufani ya Jimbo la New York anasema kwamba nikiwaita wenye wasiwasi waje kwenye 'kiti cha wenye wasiwasi,' atakuja. Nawaita wenye wasiwasi sasa"; na Jaji Mkuu wa Mahakama ya Rufani alishuka akaketi kwenye "kiti cha wenye wasiwasi," na karibu kila mwanasheria na wakili katika Rochester aliongoka, na inasemekana watu 100,000 waliongoka katika miezi kumi na miwili katika eneo lile.

Mabibi na mabwana, wapo baadhi yenu hapa usiku huu ambao, kama mngekuwa na ujasiri wa kusimamia imani yenu na kumjia Kristo, si kwa siri kama baadhi yenu mnavyotaka, bali mkatoka waziwazi na kuketi hapa mbele nitakapowaita kufanya hivyo, mngeutikisa London. Je, ninyi ni wanaume wa kutosha kufanya hivyo? Je, ninyi ni wanawake wa kutosha kufanya hivyo? Huenda mvuto wenu usiwe mkubwa kiasi hicho, lakini nyote mna mvuto. Je, mtautumia kwa ajili ya Yesu Kristo wakati utakapofika usiku huu?

3. Tatu, kila mtu anapaswa kumkiri Kristo hadharani mbele ya ulimwengu, kwa sababu ndiyo njia pekee ya kupata utimilifu wa baraka iliyomo ndani ya Yesu Kristo. Katika Mathayo 10:32, 33, kuna maneno ya Bwana Mkubwa mwenyewe: "Basi kila mtu atakayenikiri mbele ya watu, nami nitamkiri mbele za Baba yangu aliye mbinguni; bali mtu atakayenikana mbele ya watu, nami nitamkana mbele za Baba yangu aliye mbinguni." Ee, marafiki, fikirini jambo hilo-kuwa na Yesu Kristo akikukiri wewe mbele ya Mungu Baba aliye Mbinguni. Mvulana mdogo, mdogo kabisa, alisimama katika mkutano usiku mmoja, machozi yakimtiririka mashavuni—alikuwa mvulana mdogo wa Kiswidi mwenye nywele nyeupe—akasema, "Marafiki, nikimkiri Yesu hapa chini duniani, basi naye atanikiri mimi kule juu mbele ya Baba" akaketi. Hayo yalikuwa maneno bora kuliko yote yaliyosemwa usiku ule. Ee, kufikiri hivyo—kuwa na Bwana Yesu akilikiri jina lako mbele ya Baba aliye Mbinguni! Katika Vita vyetu vikuu vya Wenyewe kwa Wenyewe, jenerali mmoja wetu alipopata ushindi mkubwa, ilikuwa desturi kwa Mbunge wa wilaya yake kupendekeza azimio la shukrani kwake katika ukumbi wa Bunge la Marekani. Lilikuwa tamaa kuu kabisa ya majenerali kutajwa hivyo katika ukumbi wa Bunge. Nakumbuka yule shujaa mzee mashuhuri, Jenerali Howard, aliwahi kuniambia, "Torrey, kulikuwa na siku moja ya fahari katika maisha yangu, nayo ni siku ambapo azimio la shukrani lilitolewa kwangu katika ukumbi wa Bunge na Bunge zima kwa ajili ya msimamo wangu huko Gettysburg." Lakini kutajwa katika ukumbi wa Bunge lo lote hapa chini ni nini ukilinganisha na kutajwa katika baraza la Mbinguni na Bwana Yesu Mwenyewe? Na ninyi wanaume na wanawake mnaomkiri Kristo hapa chini katika Ukumbi wa Mildmay, Yesu Kristo atawakiri mbele za Mungu Mbinguni.

Zaidi ya hayo, Kristo anapokukiri mbele ya Baba ndipo utakapopata utimilifu wa baraka. Anapokukiri ndipo Mungu hutuma Roho wake Mtakatifu moyoni mwako. Nakumbuka usiku mmoja katika mikutano ya injili huko Atlanta, Georgia, mwishoni mwa mkutano, kijana mmoja wa umri wa miaka thelathini hadi thelathini na tano aliletwa kwangu. Mtu mmoja aliniambia, "Huyu ni mmoja wa mawakili mashuhuri wa Atlanta. Alichukua tuzo zote za ufasaha wa kuhutubu katika chuo kikuu chake. Ningependa umwongoze kwa Kristo." Nilisimama dakika chache nikizungumza naye, kisha nikamwambia, "Je, wewe si Mkristo?" Akasema, "La, bwana. Mimi ni mshiriki wa kanisa; kwa kweli, mimi ni msimamizi wa Shule ya Jumapili, lakini mimi si Mkristo." "Basi," nikasema, "kwa nini usiwe Mkristo?" Akasema, "Sina hisia yo yote." Nikasema, "Si suala la hisia. Je, unaamini kwamba wewe ni mwenye dhambi?" Akasema, "Najua kwamba ndimi." Nikasema, "Je, unaamini kwamba Yesu Kristo alikufa kwa ajili yako?" Akasema, "Najua kwamba alikufa." Nikasema, "Basi, je, utampokea kuwa Mwokozi wako mwenyewe usiku huu?" Akasema, "Je, naweza kufanya hivyo bila hisia?" Nikasema, "Hakika; si suala la hisia, bali la akili ya kawaida. Je, utampokea?" Akasema, "Nitampokea; kama naweza, nitampokea." Nikasema, "Na tuombe pamoja." Tukapiga magoti tukaomba, na tulipoinuka, akasema, "Sijisikii tofauti yo yote." Nikasema, "Sikudhani ungejisikia." "Lakini," akasema, "wengi wa watu hawa wanasema wana furaha kubwa mno." Nikasema, "Hujaenda mbali vya kutosha; lazima umkiri Bwana wako hadharani kabla furaha haijaja." Karibu kila mtu alikuwa ametoka katika ile Hema kubwa; lakini aliwaambia wale wachache waliobaki, "Marafiki, nimeamua usiku huu kuwa Mkristo; nimempokea Bwana Yesu Kristo kuwa Mwokozi wangu." na kwa maneno machache zaidi akasema, "Usiku mwema" akatoka. Asubuhi iliyofuata mfanyabiashara mmoja mashuhuri wa mji ule alinijia akasema, "Ungepaswa kuona nilichokiona jana usiku nilipotoka katika jengo hili. Nilikuwa nimetembea kidogo tu barabarani nilipomwona _____ ameegemea nguzo ya taa. Nilijua kwamba hanywi kileo; nilijua kwamba hakuwa amelewa. Nilimwendea nikamwuliza kulikuwa na nini na kwa nini alikuwa akipiga kelele. Akasema, 'Nina furaha kubwa mno, siwezi hata kusimama.'" Nilimwona siku ile, nikamweleza yale rafiki yangu aliyoniambia. Nikasema, "Bw. _______ alisema alikuona umeegemea nguzo ya taa ukipiga kelele, na alipokuuliza kulikuwa na nini, ulisema una furaha kubwa mno hata huwezi kusimama. Je, ndivyo ilivyokuwa?" Akasema, "Ilikuwa kweli kabisa kama ilivyo. Dakika kumi baada ya kukuacha jana usiku, furaha kubwa namna hiyo ilikuja juu ya nafsi yangu hata kwa kweli ilinibidi kuegemea nguzo ya taa na kupiga kelele kwa furaha."

Sijui kama itakuathiri namna hiyo hasa; mimi haikuniathiri hivyo kamwe; lakini nitakuhakikishia jambo moja -kwamba ukimpokea Yesu Kristo kwa moyo wako wote na kuyasalimisha maisha yako yote kwake, na chini ya utawala wake, na kumkiri hadharani mbele ya ulimwengu, Mungu atatuma Roho wake Mtakatifu moyoni mwako, akiujaza furaha ambayo hukuwahi kuijua hapo kwanza.

4. Nne, kila mwanamume na kila mwanamke anapaswa kumkiri Kristo, kwa sababu ndiyo njia pekee ya kuokolewa. Katika Warumi 10:9 na 10 twasoma: "Ukiungama kwa kinywa chako ya kuwa Yesu ni Bwana, na kuamini moyoni mwako ya kuwa Mungu alimfufua katika wafu, utaokoka. Kwa maana kwa moyo mtu huamini hata kupata haki, na kwa kinywa hukiri hata kupata wokovu." Watu huniambia katika baadhi ya mahali tunapokwenda, "Mimi siamini mambo haya ya kusimama na kukiri;" lakini sijali mnaamini nini; swali ni, "Mungu anasema nini?" Na Mungu anasema, "Kwa kinywa hukiri hata kupata wokovu." Kuna watu wengi sana watakaokuambia kwamba mwanamume au mwanamke akimwamini Kristo kwa siri moyoni mwake hana haja ya kusema lo lote juu ya jambo hilo, kwa maana Mungu huuona moyo. Kweli anauona moyo wako, na kama humkiri Kristo, anaona kwamba huna imani yo yote ya kweli. Unasema, "Je, mtu haokolewi kwa imani?" Naam, lakini kwa imani ya kweli, na imani ya kweli daima huongoza kwenye kukiri kwa kinywa. Twasoma katika mstari unaofuata wa sura hii hii, Warumi 10:11: "Kila amwaminiye hataona haya." Kama unaona haya kumkiri, humwamini. Imani isiyoongoza kwenye kukiri haitaongoza kamwe Mbinguni. Hakutakuwa na wajanja wanaojificha wala waoga Mbinguni. Yesu Kristo anasema katika Marko 8:38: "Mtu ye yote atakayenionea haya mimi na maneno yangu, Mwana wa Adamu naye atamwonea haya, atakapokuja katika utukufu wa Baba yake pamoja na malaika watakatifu."

5. Tena, kila mwanamume na kila mwanamke anapaswa kumkiri Kristo kwa ajili ya adabu ya kawaida tu na kwa ajili ya kujiheshimu. Mimi na wewe tunaposimama kufikiri yale ambayo Kristo ametutendea; jinsi alivyoiacha Mbingu pamoja na utukufu wake wote akashuka duniani pamoja na aibu yake yote; jinsi alivyopigwa mijeledi na kuvikwa taji ya miiba; jinsi alivyobeba aibu na lawama; jinsi alivyotemewa mate na kupigwa makofi na kupigiliwa misumari msalabani kwa ajili yako na mimi; jinsi, ingawa alikuwa tajiri, alikuwa maskini kwa ajili yetu, ili sisi tupate kuwa matajiri kwa umaskini wake; jinsi, ingawa alikuwa yuna namna ya Mungu, hakuona kule kuwa sawa na Mungu kuwa ni kitu cha kushikamana nacho, bali alijinyenyekeza akatwaa namna ya mtumwa, akawa mtii hata mauti, naam, mauti ya msalaba; jinsi alijeruhiwa kwa makosa yetu, alichubuliwa kwa maovu yetu -basi, wanaume na wanawake, mkijua hayo, kama hamtamkiri Yesu Kristo kwa sababu ya hofu ya wanadamu, au hofu ya kupata hasara katika biashara, au hofu ya kupoteza hadhi katika jamii, basi wewe ni mwoga, mtu dhalili, asiye na shukrani wa namna iliyo duni kabisa na nyeusi kabisa. Huwezi kulikwepa; unajua kwamba ni kweli ya Mungu. Siwezi kuona jinsi mwanamume au mwanamke ye yote mwenye akili awezavyo kukumbuka yale ambayo Yesu amemtendea, kisha asimkiri, na bado akaendelea kujiheshimu.

Tuna mambo kadhaa tunayoyaonea fahari huko Marekani, na mambo kadhaa tunayoyaonea haya. Mojawapo ya mambo tunayoyaonea fahari huko Marekani ni hili, kwamba wavulana na wasichana wote huko Marekani wanaweza kupata elimu ya chuo kikuu; kwamba mwana wa mkulima na wa kibarua wa kutwa na wa mfua nguo anaweza kupata elimu ya chuo kikuu sawasawa na mtoto wa milionea. Mvulana au msichana ye yote anayestahili kuelimishwa anaweza kupita katika ngazi zote za elimu huko Marekani. Tangu nimekuwa Chicago, mjukuu wa mtu aliyekuwa akitufanyia kazi nyumbani kama mtunza bustani wetu, nilipokuwa mvulana, amekuwa meya wa jiji la Chicago; na mwana wa mwanamke aliyekuwa akipika jikoni kwetu ameshika cheo kingine cha juu katika jiji hilo. Nafurahia jambo hilo; ni mojawapo ya mambo yanayonifanya nifurahi kuwa Mmarekani. Huko North Carolina, mojawapo ya majimbo maskini zaidi -maskini kwa fedha, lakini tajiri kwa watu-kulikuwa na mkulima mmoja aliyekuwa na mvulana mwerevu. Alikuwa na shamba duni, lakini alisema, "Mvulana wangu atapata nafasi nzuri sawasawa na mwana wa milionea;" na yule mkulima maskini alifanya kazi na kubana matumizi hadi akaweza kumpeleka mvulana yule katika chuo kikuu cha jimbo. Mvulana alifanya vizuri, na barua zake nyumbani zilifurahisha mioyo ya baba yake na mama yake, nao waliona wamelipwa vema kwa kujinyima kwao kote. Lakini baada ya muda moyo wa baba ulianza kuona upweke, akamwambia mkewe, "Mama, siwezi kuvumilia tena; lazima tu nimwone kijana." Ilikuwa safari ndefu kutoka shambani hadi chuo kikuu, naye alipakia gari lake la kukokotwa akaanza safari yake ndefu, na alipokaribia mji alijisemea: "Basi, kijana atashangaa kweli! Hajui kwamba ninakuja. Je, hatafurahi kumwona baba yake mzee?" Aliwachapa farasi wake wazee akaharakisha, akaingia mjini. Alikuwa akipanda kilima kuelekea chuoni, na alipokuwa akienda, ni nani aliyemwona akishuka ila mvulana wake pamoja na wenzake wachangamfu wa chuoni. Mzee alikuwa akienda polepole, kwa maana ilikuwa ni kupanda kilima, lakini alipomwona kijana aliruka chini akamkimbilia akasema, "Ee, kijana wangu, mwanangu!" Mwana aliona haya juu ya baba yake mzee maskini, akajinyoosha akasema, "Lazima kuna kosa, bwana; wewe si baba yangu. Sikujui." Nimeambiwa -sijui kwa hakika kama ni kweli-lakini nimeambiwa kwamba yule baba aligeuka akiwa na moyo uliovunjika akarudi nyumbani kufa. Naweza kuamini hivyo kabisa. Ingevunja moyo wo wote kama mvulana wangu angenitendea hivyo.

Wanaume na wanawake, mnasemaje juu ya mvulana kama huyo? Mimi nasema alistahili kuchapwa kwa mjeledi wa farasi. Nasema alikuwa mtu mbaya asiye na shukrani. Lakini nataka kusema kwamba hakuwa asiye na shukrani kwa ubaya namna hiyo kama ninyi wanaume na wanawake katika ukumbi huu usiku huu, mnaojua kwamba Yesu Kristo aliimwaga nafsi yake hata kufa juu ya Msalaba wa Kalvari, nanyi ni wanyonge na wa kudharauliwa na waoga kiasi kwamba hamtasimama na kumkiri.

Sitaishia na hadithi hiyo. Ni ya giza mno. Nitawasimulia hadithi nyingine -na ashukuriwe Mungu ni ya kweli-kutoka nchi yetu ya nyumbani. Mwanamke mmoja maskini katika mojawapo ya miji yetu, aliyelazimika kufanya kazi ili kujikimu, kwa maana alikuwa mjane -alifua nguo za watu, nadhani-alikuwa na mvulana, naye alikuwa mvulana mwerevu, akawa mtu mwerevu. Nadhani baadhi yenu mmemsikia. Alimpeleka mvulana wake shuleni. Alipita katika shule zote, akafanya vizuri, akamaliza akiwa juu kabisa katika darasa lake, akawa ndiye mtoa hotuba ya kuaga ya darasa lake, nafasi ya juu kabisa, akapata nishani ya dhahabu kwa ubora wa pekee katika masomo. Siku ambayo alipaswa kuhitimu alimwambia mama yake: "Unajua, mama, leo ninahitimu." Akasema, "Ndiyo, najua." "Basi, jiandae," akasema, "ni wakati wa kwenda kanisani"- mahali sherehe ya kuhitimu ilipopaswa kufanyika. "Ee, mwanangu, siwezi kwenda kule," akasema; "sina kitu cho chote kinachofaa kuvaa. Kumbe, watu wote wa hadhi kubwa kabisa mjini watakuwa pale. Ungeniona haya kama ningekwenda." "Nikuonee haya, mama?" akasema; "kamwe! Kila nilicho nacho duniani nimekipata kwa sababu yako. Tena, mama, siwezi kuhitimu usipokwenda; na sitahitimu!" Naye akamsaidia mama yake kujiandaa, akamfunga ile shali yake kuukuu iliyofifia kwa pini, akaifanya ionekane vizuri kadiri iwezekanavyo, akamvika kofia yake kuukuu ya kawaida, akamshika mkono, akatembea katika barabara kuu pamoja na mama yake mzee wa kawaida mkononi hadi kanisani. Walipofika pale alimpeleka katika njia ya katikati, akamketisha kati ya watu wa hadhi kubwa kabisa mjini. Wakati ulipowadia, alikwenda mbele kutoa hotuba yake ya kuaga na kupokea nishani ya dhahabu huku wenzake wakishangilia; na alipokwisha kuipokea alishuka moja kwa moja hadi mahali mama yake alipoketi, akaibana kwa pini kwenye shali yake kuukuu iliyofifia, akasema, "Mama, hii ni yako; umeistahili."

Huyo ni mvulana anayestahili kuwa naye. Basi, mabibi na mabwana, nataka kuuliza swali: Je, mnakusudia usiku huu kuwa kama yule mtu mwovu, mhuni, asiye na shukrani, aliyemwonea haya baba yake mzee na kuuvunja moyo wake, na kumwonea haya yule Kristo mtukufu aliyekufa kwa ajili yenu; au mtakuwa kama yule mvulana mwingine, na, mkijua kwamba mnamdai Yesu Kristo kila kitu, mtasimama na kumkiri usiku huu, na kuzibana heshima zenu zote mahali zinapostahili, juu ya Yesu Kristo!