Hoja katika Maombi

Siku ya Saba. KUMNGOJEA MUNGU: Hoja katika Maombi.

'Ukamilifu na unyofu unihifadhi; kwa maana nakungoja Wewe.'— Zaburi 25:21

KWA mara ya tatu katika zaburi hii twakutana na neno ngojea. Kama awali katika mstari wa 5, ‘Nakungoja Wewe mchana kutwa,’ ndivyo hapa pia mwombaji aaminiye anamsihi Mungu akumbuke kwamba anamngojea, akitazamia jibu. Ni jambo kubwa kwa nafsi si kumngojea Mungu tu, bali kujazwa na utambuzi kiasi kwamba roho yake yote na msimamo wake wote ni wa mtu angojaye, hata iweze, kwa tumaini la kitoto, kusema, Bwana! Wajua, nakungoja Wewe. Hoja hii itathibitika kuwa yenye nguvu katika maombi, ikizidi kutupa ujasiri wa kutazamia na kuidai ahadi, 'Wanaoningoja hawataaibika'!

Ombi ambalo hoja hii imetolewa pamoja nalo hapa ni ombi la maana kubwa katika maisha ya kiroho. Tukimkaribia Mungu, ni lazima iwe kwa moyo wa kweli. Lazima kuwepo ukamilifu kamili, yaani moyo mzima, katika kushughulika kwetu na Mungu. Kama tusomavyo katika Zaburi inayofuata (26:1, 11), 'Unihukumu, Ee Bwana, maana nimeenenda katika ukamilifu wangu,' 'Nami nitaenenda katika ukamilifu wangu,' lazima kuwepo unyofu kamili, yaani moyo mmoja, mbele za Mungu. Kama ilivyoandikwa, 'Haki yake ni kwa wanyofu wa moyo.' Nafsi sharti ijue kwamba hairuhusu neno lolote la dhambi, wala neno lolote la mashaka; ikiwa kweli itakutana na yeye Aliye Mtakatifu na kupokea baraka yake kamili, ni lazima iwe kwa moyo uliojitoa kabisa na kwa umoja kwa mapenzi yake. Roho yote ituongozayo katika kungojea huko lazima iwe, 'Ukamilifu na unyofu'—Waona kwamba natamani kuja kwako hivyo, wajua kwamba nakutazamia Wewe uufanyize ukamilifu huo ndani yangu kwa utimilifu;—basi na 'unihifadhi, kwa maana nakungoja Wewe.'

Na ikiwa, katika jaribio letu la kwanza la kuishi kwa kweli maisha ya kumngojea Mungu kikamilifu na daima, twaanza kugundua jinsi ukamilifu ule kamili ulivyopungua ndani yetu, hilo lenyewe litakuwa mojawapo ya baraka ambazo kungojea huko kulikusudiwa kuzitenda. Nafsi haiwezi kutafuta ushirika wa karibu na Mungu, wala kuufikia utambuzi wa kudumu wa kumngojea mchana kutwa, pasipo kujisalimisha kwa unyofu kamili na kwa ukamilifu kwa mapenzi yake yote.

'Kwa maana nakungoja Wewe': hoja hii yaweza kutumika si katika ombi la fungu letu tu, bali pamoja na kila ombi. Kuitumia mara nyingi kutakuwa baraka kubwa kwetu wenyewe. Basi na tuyachunguze maneno haya vizuri hata tuzijue maana zake zote. Ni lazima tuwe na uhakika ni nini tunachokingojea. Yaweza kuwa mambo mbalimbali kabisa. Yaweza kuwa ni kumngojea Mungu katika nyakati zetu za maombi ili achukue mahali pake kama Mungu, na kutenda ndani yetu utambuzi wa uwepo wake mtakatifu na ukaribu wake. Yaweza kuwa ni dua fulani maalum ambayo twatazamia jibu lake. Yaweza kuwa ni maisha yetu yote ya ndani, ambamo twamtazamia Mungu adhihirishe nguvu zake. Yaweza kuwa ni hali yote ya Kanisa lake na watakatifu wake, au sehemu fulani ya kazi yake, ambayo kwa ajili yake macho yetu daima humwelekea. Ni vema nyakati nyingine tujihesabie hasa ni mambo gani tuyangojeayo, na tusemapo waziwazi juu ya kila mojawapo, 'Nakungoja Wewe,' tutatiwa ujasiri wa kulidai jibu, 'Kwa maana nakungoja Wewe.'

Ni lazima pia tuwe na uhakika, ni nani tunayemngojea. Si sanamu, yaani mungu ambaye tumejifanyia mfano wake kwa dhana zetu za jinsi alivyo. La, bali Mungu aliye hai, jinsi alivyo kweli katika utukufu wake mkuu, utakatifu wake usio na mipaka, uweza wake, hekima yake, na wema wake, katika upendo wake na ukaribu wake. Ni uwepo wa bwana apendwaye au aogopwaye ndio uamshao usikivu wote wa mtumishi amngojeaye. Ni uwepo wa Mungu, jinsi awezavyo katika Kristo kwa Roho wake Mtakatifu kujidhihirisha, na kuiweka nafsi chini ya funiko lake na uvuli wake, ndio utakaoiamsha na kuitia nguvu roho ya kweli ya kungojea. Na tutulie, tungoje na kuabudu, hata tujue jinsi alivyo karibu, kisha tuseme, 'Nakungoja Wewe.'

Kisha, na iwe wazi kabisa pia, kwamba tunangojea. Jambo hilo na liwe sehemu ya utambuzi wetu kiasi kwamba usemi huu ujitokeze wenyewe, 'Wewe ninakungoja mchana kutwa; mimi nakungoja Wewe.' Hilo kwa hakika litamaanisha dhabihu na kujitenga, nafsi iliyojitoa kabisa kwa Mungu kama yote yake, furaha yake ya pekee. Kumngojea Mungu huku bado hakujatambuliwa kikamilifu kuwa ndio Ukristo pekee wa kweli. Na hata hivyo, ikiwa ni kweli kwamba Mungu peke yake ndiye wema na furaha na upendo; ikiwa ni kweli kwamba heri yetu iliyo kuu ni kuwa na Mungu kwa kadiri tuwezavyo; ikiwa ni kweli kwamba Kristo ametukomboa kabisa kwa ajili ya Mungu, na kuyafanya maisha ya kukaa daima katika uwepo wake yawezekane, basi hakuna kitu kilicho pungufu kipasacho kuturidhisha, ila kuipumua daima hewa hii ya baraka, 'Nakungoja Wewe.'

'Ee nafsi yangu, umngojee Mungu peke yake!'