Kwa Ajili ya Watakatifu Wote

Siku ya Sita. KUMNGOJEA MUNGU: Kwa Ajili ya Watakatifu Wote.

'Wasiaibike wote wakungojao Wewe.'— Zaburi 25:3

SASA basi, katika tafakari yetu ya leo, kila mmoja wetu na ajisahau mwenyewe, ili kulifikiri kundi kubwa la watakatifu wa Mungu ulimwenguni kote, ambao wote wanamngojea Mungu pamoja nasi. Na sisi sote tuungane katika ombi hili la bidii kwa ajili ya kila mmoja wetu, 'Wasiaibike wote wakungojao Wewe.'

Fikiri kwa kitambo kidogo juu ya umati wa wangojeaji wanaolihitaji ombi hilo; ni wangapi walio wagonjwa, waliochoka na walio peke yao, ambao kwao ni kana kwamba maombi yao hayajibiwi, na ambao mara nyingine huanza kuogopa ya kwamba tumaini lao litaaibishwa. Kisha, ni watumishi wangapi wa Mungu, wachungaji au wamisionari, walimu au watenda kazi wa majina mbalimbali, ambao matumaini yao katika kazi zao yamekatishwa, na ambao kutamani kwao nguvu na baraka bado hakujatoshelezwa. Tena, ni wangapi waliosikia habari za maisha ya raha na amani kamilifu, ya nuru na ushirika udumuo, ya nguvu na ushindi, wasioweza kuiona njia yake. Kwa hawa wote, jambo ni moja tu: hawajajifunza bado siri ya kumngojea Mungu kikamilifu. Wanahitaji tu, kama sisi sote tunavyohitaji, uhakika ulio hai ya kwamba kumngojea Mungu hakuwezi kamwe kuwa bure. Tuwakumbuke wote walio katika hatari ya kuzimia au kuchoka, na sote tuungane katika kilio hiki, 'Wasiaibike wote wakungojao Wewe'!

Ikiwa maombezi haya kwa ajili ya wote wamngojeao Mungu yatakuwa sehemu ya kumngojea kwetu Mungu kwa ajili yetu wenyewe, tutasaidiana kuchukuliana mizigo yetu, na hivyo kuitimiza sheria ya Kristo.

Ndani ya kumngojea kwetu Mungu utaingia ule moyo wa kutokuwa na ubinafsi na wa upendo, ambao ndio njia ya baraka iliyo kuu kuliko zote, na ya ushirika ulio kamili zaidi na Mungu. Kuwapenda ndugu na kumpenda Mungu ni mambo yasiyoweza kutenganishwa. Katika Mungu, upendo kwa Mwanawe na kwetu sisi ni mmoja: 'Ili pendo lile ulilonipenda mimi liwe ndani yao.' Katika Kristo, upendo wa Baba kwake, na upendo wake kwetu sisi, ni mmoja: 'Kama vile Baba alivyonipenda mimi, ndivyo mimi nilivyowapenda ninyi.' Ndani yetu sisi, anataka upendo wake kwetu uwe wetu kwa ndugu: 'Kama nilivyowapenda ninyi, nanyi mpendane vivyo hivyo.' Upendo wote wa Mungu, na wa Kristo, umefungamana kabisa na kuwapenda ndugu. Nasi twawezaje, siku kwa siku, kuuthibitisha na kuukuza upendo huu isipokuwa kwa kuombeana kila siku? Kristo hakutafuta kuufurahia upendo wa Baba kwa ajili yake mwenyewe; aliupitisha wote kwetu sisi. Kila kumtafuta Mungu na upendo wake kwa kweli kwa ajili yetu wenyewe, kutafungamana kabisa na kuwakumbuka na kuwapenda ndugu zetu katika kuwaombea.

'Wasiaibike wote wakungojao Wewe.' Mara mbili katika zaburi hii Daudi anena juu ya kumngojea kwake Mungu kwa ajili yake mwenyewe; hapa anawafikiri wote wamngojao. Ukurasa huu na uwafikishie ujumbe watu wote wa Mungu waliojaribiwa na kuchoka, ya kwamba wako wengi wanaowaombea kuliko wajuavyo. Nao uwaamshe wao na sisi pia, katika kungojea kwetu, tukusudie mara kwa mara kujisahau wenyewe, na kuipanua mioyo yetu, na kumwambia Baba, 'Hao wote wanakungojea Wewe, nawe huwapa chakula chao kwa wakati wake.' Nao utie ndani yetu sote moyo mpya wa ushujaa—maana ni nani asiyekuwa mara nyingine karibu kuzimia na kuchoka? 'Wasiaibike wote wakungojao Wewe' ni ahadi iliyo ndani ya ombi, 'Wakungojao Wewe hawataaibika'! Kutoka kwa mashahidi wengi mno kilio kinamjia kila mtu anayehitaji msaada huo, ndugu, dada, wewe uliyejaribiwa, 'Umngoje Bwana; uwe na moyo wa ushujaa, naye atautia nguvu moyo wako; nasema, umngoje Bwana. Muwe na moyo wa ushujaa, naye atayatia nguvu mioyo yenu, ninyi nyote mnaomngojea Bwana.'

Baba Mbarikiwa! twakuomba kwa unyenyekevu, Wasiaibike wote wakungojao Wewe; la, hata mmoja. Wengine wamechoka, na wakati wa kungojea waona ni mrefu. Wengine ni dhaifu, hawajui sana jinsi ya kungojea. Na wengine wamefungwa sana katika jitihada za maombi yao na kazi zao, hata wanadhani hawawezi kupata nafasi ya kungojea daima. Baba! tufundishe sisi sote jinsi ya kungojea. Tufundishe kukumbukana, na kuombeana. Tufundishe kukufikiri Wewe, Mungu wa wangojeaji wote. Baba! wasiaibike wote wakungojao Wewe. Kwa ajili ya Yesu. Amina.

'Ee nafsi yangu, umngojee Mungu peke yake!'