Hodari na Moyo wa Ushujaa

Siku ya Nane. KUMNGOJEA MUNGU: Hodari na Moyo wa Ushujaa.

'Umngoje Bwana: uwe hodari,

Na upige moyo konde:

Naam, umngoje Bwana.'— Zaburi 27:14

MTUNGA zaburi alikuwa amesema punde tu, 'Ningalizimia, kama nisingaliamini ya kwamba nitauona wema wa Bwana katika nchi ya walio hai.' Kama isingalikuwa imani yake kwa Mungu, moyo wake ungalizimia. Lakini katika hakika thabiti ya kumtumaini Mungu ambayo imani huileta, anajihimiza mwenyewe, na kutuhimiza na sisi, kukumbuka jambo moja zaidi ya yote,—kumngojea Mungu. 'Umngoje Bwana: uwe hodari, upige moyo konde: naam, umngoje Bwana.' Mojawapo ya mahitaji makuu katika kumngojea kwetu Mungu, mojawapo ya siri za ndani kabisa za heri yake na baraka yake, ni kusadiki kwa utulivu na kwa uhakika kwamba si bure; ni ujasiri wa kuamini kwamba Mungu atasikia na kusaidia; kwamba tunamngojea Mungu ambaye hawezi kamwe kuwaangusha watu wake.

'Uwe hodari na moyo wa ushujaa.' Maneno haya hupatikana mara nyingi yakiambatana na kazi fulani kubwa na ngumu, mbele ya taraja la kupigana na nguvu za adui hodari, na upungufu kamili wa nguvu zote za kibinadamu. Je, kumngojea Mungu ni kazi ngumu kiasi hicho, hata kwa ajili ya hiyo pia maneno kama haya yahitajika, 'Uwe hodari, upige moyo konde'? Naam, hakika. Ukombozi, ambao mara nyingi hutulazimu kuungojea, ni kutoka kwa adui ambao mbele yao hatuna uwezo wo wote. Baraka tunazoziomba kwa bidii ni za kiroho, zisizoonekana kabisa; ni mambo yasiyowezekana kwa wanadamu; ni hali halisi za mbinguni, zipitazo maumbile, za Kimungu. Nafsi zetu hazijazoea sana kuwa na ushirika na Mungu, naye Mungu tunayemngojea mara nyingi huonekana kama ajifichaye. Sisi tunaopaswa kungoja mara nyingi twajaribiwa kuogopa kwamba hatungoji ipasavyo, kwamba imani yetu ni dhaifu mno, kwamba shauku yetu si nyofu wala si yenye bidii kama ipasavyo, kwamba kujisalimisha kwetu hakujakamilika. Moyo wetu waweza kweli kuzimia na kulegea. Katikati ya sababu hizi zote za hofu au shaka, jinsi ilivyo heri kuisikia sauti ya Mungu, ‘Umngoje Bwana! Uwe hodari, upige moyo konde! Naam, umngoje Bwana! Kisiwepo kitu mbinguni wala duniani wala kuzimu—kisiwepo kitu cho chote kitakachokuzuia kumngojea Mungu wako katika uhakika kamili kwamba haiwezi kuwa bure.

Basi somo moja ambalo fungu letu hutufundisha ni hili, kwamba tunapojiweka kumngojea Mungu, yatupasa kuazimia mapema kwamba itakuwa kwa taraja lenye uhakika kabisa kwamba Mungu atakutana nasi na kutubariki. Yatupasa kukata shauri juu ya hili, kwamba hakuna jambo lililopata kuwa hakika namna hii, kama vile kwamba kumngojea Mungu kutatuletea baraka zisizosimulika na zisizotazamiwa. Tumezoea sana kumpima Mungu na kazi yake ndani yetu kwa tunavyojisikia, hata yaelekea sana kwamba tutakapoanza kujizoeza zaidi katika kumngojea, tutavunjika moyo, kwa sababu hatupati baraka yo yote ya pekee kutokana na jambo hilo. Ujumbe huu unatujia, 'Zaidi ya yote, umngojeapo Mungu, fanya hivyo katika roho ya matumaini yaliyojaa tele. Ni Mungu, katika utukufu wake, katika uweza wake, katika upendo wake, anayetamani kukubariki, ndiye unayemngojea.'

Ukisema unaogopa kujidanganya kwa tumaini la bure, kwa sababu huoni wala kujisikia katika hali yako ya sasa dhamana yo yote ya matarajio hayo ya pekee, jibu langu ni hili: ni Mungu, aliye dhamana ya kukufanya utazamie mambo makuu. Ee, jifunze somo hili. Hutakwenda kujingojea nafsi yako mwenyewe ili kuona unavyojisikia na ni mabadiliko gani yanayokujia. Utakwenda KUMNGOJEA MUNGU, ili kujua kwanza, YEYE ALIVYO, na ndipo, baada ya hayo, atakayoyafanya. Wajibu wote na heri yote ya kumngojea Mungu ina mzizi wake katika hili, kwamba yeye ni Mwenye heri namna hii, aliyejaa hata kufurika wema na uweza na uzima na furaha, hata sisi, hata tuwe taabani namna gani, hatuwezi kukaribiana naye kwa muda wo wote, pasipo uzima huo na uweza huo kuanza kwa siri, kimya kimya, kuingia ndani yetu na kutubariki. Mungu ni Upendo! Hiyo ndiyo dhamana ya pekee, itoshayo kabisa, ya taraja lako. Upendo hautafuti mambo yake mwenyewe: upendo wa Mungu ni furaha yake ya kujitolea mwenyewe pamoja na heri yake kwa watoto wake. Njoo, na hata ujisikie dhaifu namna gani, ngoja tu mbele zake. Kama vile mgonjwa dhaifu, mnyonge, aletwavyo nje kwenye jua ili joto lake limpenye mwilini, njoo na yote yaliyo giza na baridi ndani yako kwenye jua la upendo wa Mungu ulio mtakatifu na wenye uweza wote, uketi na kungoja hapo, ukiwa na wazo hili moja: Niko hapa, kwenye jua la upendo wake. Kama vile jua lifanyavyo kazi yake katika yule dhaifu anayeitafuta miali yake, Mungu atafanya kazi yake ndani yako. Ee, mtumaini kwa utimilifu. 'Umngoje Bwana! Uwe hodari, upige moyo konde! Naam, umngoje Bwana'!

'Ee nafsi yangu, umngojee Mungu peke yake!'