Kwa Ajili ya Mafundisho

Siku ya Tano. KUMNGOJEA MUNGU: Kwa Ajili ya Mafundisho.

'Ee Bwana, unijulishe njia zako; unifundishe mapito yako.

Unifundishe mapito yako.

Uniongoze katika kweli yako, unifundishe;

Maana Wewe ndiwe Mungu wa wokovu wangu;

Nakungoja Wewe mchana kutwa.'— Zaburi 25:4, 5.

'NILISEMA habari za jeshi lililokuwa karibu kuingia katika nchi ya adui, likijibu swali kuhusu sababu ya kukawia: 'Tunangojea mahitaji.' Jibu lingeweza pia kuwa: 'Tunangojea mafundisho,' au, 'Tunangojea amri.' Kama barua rasmi ya mwisho isingalikuwa imepokelewa, yenye amri za mwisho za amiri jeshi mkuu, jeshi lisingethubutu kusonga mbele. Vivyo hivyo katika maisha ya Kikristo: kama ulivyo mkubwa uhitaji wa kungojea mahitaji, ndivyo ulivyo ule wa kungojea mafundisho.'

Tazama jinsi jambo hili linavyojidhihirisha kwa uzuri katika Zaburi 25. Mwandishi aliijua na kuipenda sana sheria ya Mungu, akaitafakari sheria hiyo mchana na usiku. Lakini alijua ya kuwa hiyo haikutosha. Alijua kwamba ili kuifahamu kweli kwa usahihi wa kiroho, na ili kuitumia yeye binafsi kwa usahihi katika hali zake za pekee, alihitaji mafundisho ya moja kwa moja kutoka kwa Mungu.

Zaburi hii imekuwa ikipendwa sana nyakati zote, kwa sababu ya jinsi inavyorudia-rudia kuueleza uhitaji unaohisiwa wa mafundisho ya Mungu, na tumaini la kitoto kwamba mafundisho hayo yatatolewa. Ijifunze zaburi hii hata moyo wako ujazwe na mawazo haya mawili—uhitaji kamili, na uhakika kamili wa uongozi wa Mungu. Kisha angalia jinsi maneno yake yanavyohusiana kabisa na jambo hili asemapo, ‘Nakungoja Wewe mchana kutwa.' Kungojea uongozi, kungojea mafundisho, mchana kutwa, ni sehemu yenye baraka nyingi ya kumngojea Mungu.

Baba aliye mbinguni anamjali sana mtoto wake, na anatamani sana maisha yake yawe katika mapenzi yake na pendo lake katika kila hatua, hata yu radhi kuushika uongozi wake mikononi mwake mwenyewe kabisa. Anajua vema kwamba hatuwezi kutenda lililo takatifu kweli na la kimbingu, isipokuwa yeye mwenyewe alitende ndani yetu, hata anakusudia madai yake yenyewe yawe ahadi za yale atakayoyatenda, katika kutulinda na kutuongoza mchana kutwa. Si katika shida za pekee na nyakati za fadhaa tu, bali katika mwenendo wa kawaida wa maisha ya kila siku, twaweza kumtegemea atufundishe njia yake, na kutuonyesha mapito yake.

Nasi twahitaji nini ili kuupokea uongozi huu? Jambo moja: kungojea mafundisho, kumngojea Mungu. 'Nakungoja Wewe mchana kutwa.' Katika nyakati zetu za maombi twapaswa kuueleza wazi uhitaji wetu tunaouhisi, na imani yetu katika msaada wake. Twapaswa kutambua kwa dhahiri kutokujua kwetu ni ipi njia ya Mungu, na uhitaji wa nuru ya Mungu kuangaza ndani yetu, ikiwa njia yetu itakuwa kama ya jua, ing'aayo zaidi na zaidi hata mchana mkamilifu. Nasi twapaswa kungoja kimya mbele za Mungu katika maombi, hata ule uhakika wa ndani wenye utulivu utujaze: Utatolewa—'wenye upole atawaongoza katika njia.'

'Nakungoja Wewe mchana kutwa.' Kule kujisalimisha kwa namna ya pekee kwa uongozi wa Mungu katika nyakati zetu za maombi hakuna budi kusitawisha, na kufuatwa na, mazoea ya kutazama juu 'mchana kutwa.' Kama vile ilivyo rahisi, kwa mtu mwenye macho, kutembea mchana kutwa katika mwanga wa jua, ndivyo inavyoweza kuwa rahisi na kupendeza kwa nafsi iliyozoea kumngojea Mungu, kutembea mchana kutwa katika kuifurahia nuru na uongozi wa Mungu. Kinachohitajiwa ili kutusaidia kufikia maisha ya namna hii ni jambo moja tu: kumjua Mungu kweli na kumwamini kuwa ndiye chanzo pekee cha hekima na wema, aliye tayari sikuzote, na kutamani sana kuwa kwetu yote tuwezayo kuyahitaji—naam! hili ndilo jambo moja tunalolihitaji. Laiti tungemwona Mungu wetu katika pendo lake, laiti tungeamini kwamba anangoja ili atufadhili, kwamba anangoja awe uhai wetu na kutenda yote ndani yetu,—jinsi gani kumngojea Mungu huku kungekuwa furaha yetu kuu, itikio la asili linalobubujika la mioyo yetu kwa pendo lake kuu na utukufu wake!

'Ee nafsi yangu, umngojee Mungu peke yake!'