Kwa Ajili ya Mahitaji

Siku ya Nne. KUMNGOJEA MUNGU: Kwa Ajili ya Mahitaji.

'Bwana huwategemeza wote waangukao,

Naye huwainua wote walioinama chini.

Macho ya wote yanakungojea Wewe;

Nawe huwapa chakula chao wakati wake.'

—Zaburi 145:14, 15.

ZABURI ya 104 ni Zaburi ya Uumbaji, na maneno, 'Hao wote wanakungojea Wewe,' yalitumika kuhusu viumbe vya wanyama. Hapa tunayo Zaburi ya Ufalme, na maneno 'Macho ya wote yanakungojea Wewe' yaonekana kuelekeza hasa kwenye mahitaji ya watakatifu wa Mungu, ya wote waangukao na wa wale walioinama chini. Kile ambacho ulimwengu na viumbe vya wanyama hukifanya pasipo kujua, watu wa Mungu wanapaswa kukifanya kwa akili na kwa hiari. Mwanadamu anapaswa kuwa mfasiri wa Maumbile. Anapaswa kuthibitisha ya kuwa hakuna jambo bora zaidi wala lenye baraka zaidi katika kuutumia uhuru wetu wa kuchagua kuliko kuutumia katika kumngojea Mungu.

Jeshi likiwa limetumwa kuingia katika nchi ya adui, na habari zikapokelewa kwamba halisongi mbele, swali huulizwa mara moja, ni nini huenda ikawa sababu ya kukawia. Mara nyingi jibu litakuwa: 'Linangojea mahitaji.' Akiba zote za chakula au mavazi au silaha hazijafika; bila hizo jeshi halithubutu kuendelea. Ndivyo ilivyo pia katika maisha ya Kikristo: siku kwa siku, katika kila hatua, twahitaji mahitaji yetu kutoka juu. Wala hakuna jambo la lazima zaidi kuliko kusitawisha roho ile ya kumtegemea Mungu na ya kumtumainia Yeye, roho ikataayo kuendelea mbele bila kupewa neema na nguvu zinazohitajika.

Likiulizwa swali, kwamba je, jambo hili ni tofauti na tufanyalo tunapoomba, jibu ni kwamba, kwaweza kuwapo maombi mengi pamoja na kumngojea Mungu kudogo sana. Katika kuomba mara nyingi twajishughulisha na nafsi zetu, na mahitaji yetu wenyewe, na juhudi zetu wenyewe za kuyawasilisha. Katika kumngojea Mungu, wazo la kwanza ni juu ya Mungu yule tumngojeaye. Twaingia mbele zake, na kuona kwamba twahitaji kunyamaza tu, ili Yeye, kama Mungu, apate kutufunika kwa uwepo wake mwenyewe. Mungu hutamani kujifunua, na kutujaza nafsi yake mwenyewe. Kumngojea Mungu humpa nafasi ya kuja kwetu kwa njia yake mwenyewe na kwa uweza wake wa kiungu.

Hasa wakati wa maombi ndipo tupaswapo kujibidiisha kusitawisha roho hii.

Kabla ya kuomba, inama kimya mbele za Mungu, ili tu kukumbuka na kutambua Yeye ni nani, jinsi alivyo karibu, jinsi awezavyo na atakavyosaidia kwa hakika. Tulia tu mbele zake, ukamwache Roho wake Mtakatifu aamshe na kuchochea ndani ya nafsi yako ule moyo wa kitoto wa kumtegemea kabisa na wa kutazamia kwa ujasiri. Umngojee Mungu kama Aliye Hai, kama Mungu aliye hai, akuonaye, na ambaye anatamani tu kukujaza wokovu wake. Umngojee Mungu hata ujue ya kuwa umeonana naye; ndipo maombi yatakuwa tofauti kabisa.

Nawe unapoomba, pawepo na vipindi vya kimya, utulivu wa nafsi wenye kicho, ambamo wajisalimisha kwa Mungu, ikiwa yumkini analo jambo lo lote apendalo kukufundisha au kulitenda ndani yako. Kumngojea kutakuwa sehemu yenye baraka kuu zaidi ya maombi, na baraka ipatikanayo hivyo itakuwa ya thamani maradufu, kwa kuwa ni tunda la ushirika huo pamoja na yeye Aliye Mtakatifu. Mungu ameagiza hivyo, kwa kupatana na asili yake takatifu, na yetu pia, kwamba kumngojea kuwe ndiyo heshima tumpayo. Na tumletee huduma hiyo kwa furaha na kwa uaminifu; naye ataithawabisha kwa wingi.

'Macho ya wote yanakungojea Wewe, nawe huwapa chakula chao wakati wake.' Nafsi mpendwa, Mungu huwaruzuku katika Maumbile viumbe alivyoviumba: si zaidi sana atakavyowaruzuku katika Neema wale aliowakomboa. Jifunze kusema juu ya kila uhitaji, na kila kushindwa, na kila upungufu wa neema ihitajikayo: Nimemngojea Mungu kidogo mno, la sivyo angalinipa kwa wakati wake yote niliyoyahitaji. Kisha sema pia—

'Ee nafsi yangu, umngojee Mungu peke yake!'