Kwa Ajili ya Ukombozi

Siku ya Ishirini na Saba. KUMNGOJEA MUNGU: Kwa Ajili ya Ukombozi.

'Simeoni alikuwa mtu mwenye haki, mcha Mungu, akiingojea faraja ya Israeli, na Roho Mtakatifu alikuwa juu yake. Ana, nabii mke, . . . akanena habari zake kwa watu wote waliokuwa wakiungojea ukombozi katika Yerusalemu.'—Luka 2:25, 38.

HAPA tunaiona alama ya mwamini angojaye. Mwenye haki, mnyofu katika mwenendo wake wote; mcha Mungu, aliyejitoa kwa Mungu, akienenda daima kama mbele za uso wake; akiingojea faraja ya Israeli, akitazamia kutimizwa kwa ahadi za Mungu: na Roho Mtakatifu alikuwa juu yake. Katika kungojea huko kwa utauwa alikuwa ameandaliwa kwa ajili ya ile baraka. Wala Simeoni hakuwa peke yake. Ana alinena na wote waliokuwa wakiungojea ukombozi katika Yerusalemu. Hii ndiyo iliyokuwa alama moja, kati ya utaratibu wa dini ya nje na upendo wa dunia uliowazunguka, ya kikundi cha watauwa, wanaume kwa wanawake, katika Yerusalemu. Walikuwa wakimngojea Mungu; wakiutazamia ukombozi wake alioahidi.

Na sasa, kwa kuwa ile Faraja ya Israeli imekwisha kuja, na ukombozi umekwisha kutimizwa, je, bado tunahitaji kungojea? Naam, tunahitaji kweli kweli. Lakini je, kungojea kwetu sisi tunaoutazama nyuma kama uliokwisha kuja, hakutatofautiana sana na kule kwa wale walioutazamia mbele kama unaokuja? Kutatofautiana, hasa katika mambo mawili. Sasa tunamngojea Mungu katika nguvu kamili ya ukombozi: nasi tunaungojea ufunuo wake kamili.

Kungojea kwetu sasa kumo katika nguvu kamili ya ukombozi. Kristo alisema, 'Siku ile mtajua ya kuwa mmo ndani yangu. Kaeni ndani yangu.' Nyaraka zatufundisha kujitoa kwa Mungu 'kama tulio wafu kweli kwa dhambi, na walio hai kwa Mungu katika Kristo Yesu,' 'tuliobarikiwa kwa baraka zote za rohoni katika ulimwengu wa roho ndani ya Kristo Yesu.' Kumngojea kwetu Mungu sasa kwaweza kuwa katika utambuzi wa ajabu, unaofanywa na kudumishwa na Roho Mtakatifu ndani yetu, ya kwamba tumekubaliwa katika yule Mpendwa, ya kwamba pendo lile linalomkalia Yeye latukalia na sisi, ya kwamba tunaishi katika pendo hilo, katika ukaribu hasa na uwepo na macho ya Mungu. Watakatifu wa kale walisimama juu ya neno la Mungu, wakangojea, wakilitumainia neno hilo; nasi pia twalitegemea neno — lakini, lo! kwa mapendeleo makuu zaidi ajabu, kama tulio wamoja na Kristo Yesu. Katika kumngojea kwetu Mungu, huu na uwe ujasiri wetu: katika Kristo tunayo njia ya kumkaribia Baba; basi twaweza kuwa na hakika namna gani ya kwamba kungojea kwetu hakuwezi kuwa bure.

Kungojea kwetu kwatofautiana pia katika jambo hili: wao walingojea ukombozi uje, bali sisi twauona umekwisha kutimizwa, na sasa twangojea ufunuo wake ndani yetu. Kristo hakusema tu, Kaeni ndani yangu, bali pia nami ndani yenu. Nyaraka hazinenii habari zetu tu ndani ya Kristo, bali pia habari za Kristo ndani yetu, kuwa ndiyo siri iliyo kuu kabisa ya pendo likombolalo. Tunapoulinda mahali petu ndani ya Kristo siku kwa siku, Mungu hungojea kumfunua Kristo ndani yetu, kwa jinsi ambayo Yeye huumbika ndani yetu, hata nia yake na tabia yake na mfano wake vikapata umbo na uhalisi ndani yetu, hata kila mmoja aweze kusema kwa kweli, 'Kristo yu hai ndani yangu.'

Maisha yangu ndani ya Kristo huko juu mbinguni, na maisha ya Kristo ndani yangu huku chini duniani — haya mawili hukamilishana. Na kadiri kumngojea kwangu Mungu kunavyotiwa alama ya imani iliyo hai mimi ndani ya Kristo, ndivyo moyo unavyozidi kuonea kiu na kuudai ule ukweli wa KRISTO NDANI YANGU. Na kule kumngojea Mungu, kulikoanza kwa mahitaji maalum na maombi, kutazidi kuelekezwa, kwa habari ya maisha yetu binafsi, katika jambo hili moja: Bwana, uufunue ukombozi wako kwa ukamilifu ndani yangu; Kristo na aishi ndani yangu.

Kungojea kwetu kwatofautiana na kule kwa watakatifu wa kale katika mahali tunaposimama, na katika mataraja tuliyo nayo. Lakini katika kiini chake ni kule kule: kumngojea Mungu, ambaye kwake peke yake ndiko litokako taraja letu.

Jifunze somo moja kutoka kwa Simeoni na Ana. Jinsi ilivyokuwa haiwezekani kabisa kwao kufanya lo lote kuuelekea ule ukombozi mkuu — kuelekea kuzaliwa kwa Kristo au kufa kwake. Ilikuwa kazi ya Mungu. Hawakuweza kufanya neno ila kungojea tu. Je, sisi nasi tu wanyonge kabisa vivyo hivyo kwa habari ya kufunuliwa kwa Kristo ndani yetu? Naam, ni kweli. Mungu hakuufanyiza ukombozi mkuu ndani ya Kristo kwa jumla yake, kisha akatuachia sisi kuutumia kwa mambo yake madogo madogo.

Wazo la siri kwamba ndivyo ilivyo ndilo lililo kwenye kiini cha unyonge wetu wote. Kufunuliwa kwa Kristo ndani ya kila mwamini mmoja mmoja, na ndani ya kila mmoja ufunuo wa kila siku, hatua kwa hatua na dakika kwa dakika, ni kazi ya uweza wote wa Mungu sawasawa kabisa na kuzaliwa au kufufuka kwa Kristo. Hata kweli hii itakapoingia ndani yetu na kutujaza, nasi tukajiona kwamba twamtegemea Mungu kwa kila dakika ya maisha yetu katika kuufurahia ukombozi, kama vile wao walivyomtegemea katika kuungojea, kumngojea kwetu Mungu hakutaleta baraka yake kamili. Hisia ya unyonge kamili na wa kabisa, na ujasiri kwamba Mungu aweza na atafanya yote, — hizi ndizo zinazopasa kuwa alama za kungojea kwetu kama zilivyokuwa za kwao. Kama vile Mungu alivyojidhihirisha kwao kwa utukufu kuwa ndiye Mungu mwaminifu atendaye maajabu, ndivyo atakavyojidhihirisha kwetu pia.

'Ee nafsi yangu, umngojee Mungu peke yake!'