Katika Taraja Takatifu

Siku ya Ishirini na Sita. KUMNGOJEA MUNGU: Katika Taraja Takatifu.

'Kwa hiyo mimi nitamtazamia Bwana; nitamngojea Mungu wa wokovu wangu; Mungu wangu atanisikia.'—Mika 7:7.

JE, umepata kusoma kitabu kidogo kizuri kiitwacho Expectation Corner? Kama hujakisoma, kitafute; utakuta ndani yake mojawapo ya mahubiri bora kabisa juu ya fungu letu la leo. Kinasimulia habari za mfalme aliyewatengenezea mji baadhi ya raia zake maskini. Si mbali nao kulikuwa na ghala kubwa, ambamo walipatiwa kila kitu ambacho wangeweza kukihitaji, wakipeleka maombi yao tu. Lakini kwa sharti moja—kwamba wawe wakilitazamia jibu, ili wajumbe wa mfalme watakapokuja na zile zawadi walizozitamani, wakutwe siku zote wakingoja na kuwa tayari kuzipokea. Inasimuliwa habari yenye huzuni ya mtu mmoja aliyekata tamaa, ambaye hakutazamia kamwe kupata alichokiomba, kwa sababu alijiona hastahili. Siku moja alipelekwa katika ghala za mfalme, na huko, kwa mshangao wake, akaviona vifurushi vyote vilivyokuwa vimefungwa kwa ajili yake na kupelekwa, vikiwa na anwani yake. Palikuwa na vazi la sifa, na mafuta ya furaha, na dawa ya kupaka macho, na vingine vingi zaidi; vilikuwa vimefika mlangoni kwake, lakini mlango ulikutwa umefungwa; hakuwa akitazamia. Tangu siku ile akalielewa somo ambalo Mika anataka kutufundisha leo; 'Nitamtazamia Bwana; nitamngojea Mungu wa wokovu wangu; Mungu wangu atanisikia.'

Tumekwisha kusema zaidi ya mara moja: Kungojea jibu la maombi si ukamilifu wa kungoja, bali ni sehemu yake tu. Leo twataka kuipokea kweli hii yenye baraka: Ni sehemu, tena sehemu muhimu sana. Tunapokuwa na maombi maalum, ambayo kwa habari yake twamngojea Mungu, kungoja kwetu hakuna budi kuwa waziwazi katika uhakika huu thabiti: ‘Mungu wangu atanisikia.' Taraja takatifu lenye furaha ndilo kiini hasa cha kungoja kwa kweli. Na hilo si kwa habari ya yale maombi mengi ya namna mbalimbali ambayo kila aaminiye hulazimika kuyaleta tu, bali zaidi sana kwa habari ya lile ombi moja kuu ambalo lapasa kuwa jambo kuu ambalo kila moyo hujitafutia — kwamba Uzima wa Mungu ndani ya nafsi upate kutawala kikamilifu; kwamba Kristo aumbike ndani yetu kwa utimilifu; na kwamba tujazwe hata utimilifu wote wa Mungu. Hili ndilo Mungu aliloliahidi. Hili ndilo watu wa Mungu wasilolitafuta ipasavyo, mara nyingi kwa sababu hawaamini kuwa linawezekana. Hili ndilo tupasalo kulitafuta na kuthubutu kulitazamia, kwa sababu Mungu aweza, naye anangoja kulitenda ndani yetu.

Lakini Mungu mwenyewe ndiye atakayelitenda. Na kwa ajili hiyo kutenda kwetu sisi lazima kukome. Yatupasa kuona jinsi jambo hili lilivyo kabisa jambo la imani ya kazi ya uweza wa Mungu aliyemfufua Yesu katika wafu—kama vile ufufuo, ndivyo na ukamilishwaji wa uzima wa Mungu katika nafsi zetu utakavyokuwa kazi yake yeye mwenyewe moja kwa moja. Na kungoja hakuna budi kuwa, zaidi ya wakati wowote, kukaa mbele za Mungu katika utulivu wa nafsi, tukimtegemea yeye awafufuaye wafu, na kuyaita yale yasiyokuwako kana kwamba yamekuwako.

Angalia tu jinsi kutumiwa mara tatu kwa jina la Mungu katika fungu letu kunavyotuelekeza kwake yeye mwenyewe, kuwa ndiye peke yake ambaye taraja letu latoka kwake. 'Nitamtazamia Bwana; nitamngojea Mungu wa Wokovu wangu; Mungu Wangu atanisikia.' Kila kitu kilicho wokovu, kila kitu kilicho chema na kitakatifu, hakina budi kuwa kazi ya moja kwa moja ya uweza wa Mungu mwenyewe ndani yetu. Kwa kila dakika ya maisha yaliyo katika mapenzi ya Mungu, lazima pawepo kutenda kwa Mungu papo hapo. Na jambo moja nilipasalo kufanya ni hili: kumtazamia Bwana; kumngojea Mungu wa wokovu wangu; kuushika sana uhakika huu thabiti, 'Mungu wangu atanisikia.'

Mungu asema: 'Acheni, mjue ya kuwa mimi ni Mungu. '

Hakuna utulivu kama ule wa kaburini. Katika kaburi la Yesu, katika ushirika wa kifo chake, katika kufa kwa nafsi pamoja na mapenzi yake na hekima yake, nguvu zake na bidii yake, ndimo ilimo raha. Tunapoachana na nafsi, na roho yetu inapomtulia Mungu, Mungu atainuka na kujidhihirisha. 'Acheni, mjue,' ndipo mtakapojua 'ya kuwa mimi ni Mungu.' Hakuna utulivu kama ule utulivu autoao Yesu asemapo, 'Nyamaza, utulie.' Katika Kristo, katika kifo chake, na katika uzima wake, katika ukombozi wake mkamilifu, nafsi yaweza kutulia, na Mungu ataingia ndani, na kumiliki, na kuifanya kazi yake kamilifu.

'Ee nafsi yangu, umngojee Mungu peke yake!'