Kwa Ajili ya Kuja kwa Mwanawe

Siku ya Ishirini na Nane. KUMNGOJEA MUNGU: Kwa Ajili ya Kuja kwa Mwanawe.

'Nanyi iweni kama watu wanaomngojea Bwana wao.'—Luka 12:36.

'Hata kufunuliwa kwake Bwana wetu Yesu Kristo, ambako kwa majira yake atakudhihirisha yeye aliye Mwenye heri, Mwenye uweza peke yake, Mfalme wa wafalme, na Bwana wa mabwana.'—1 Timotheo 6:14,15.

'Mlimgeukia Mungu, mkaziacha sanamu, ili kumtumikia Mungu aliye hai na wa kweli, na kumngojea Mwanawe kutoka mbinguni.'—1 Wathesalonike 1:9, 10.

KUMNGOJEA Mungu aliye mbinguni, na kumngojea Mwanawe kutoka mbinguni — haya mawili Mungu ameyaunganisha, wala mwanadamu asiyatenganishe. Kumngojea Mungu ili tupate uwepo wake na nguvu zake katika maisha ya kila siku ndiko maandalizi pekee ya kweli ya kumngojea Kristo kwa unyenyekevu na utakatifu wa kweli. Nako kumngojea Kristo ajaye kutoka mbinguni ili atuchukue mbinguni ndiko kutakakofanya kumngojea kwetu Mungu kuwe na sauti yake halisi ya matumaini na furaha. Baba, ambaye kwa majira yake atamfunua Mwanawe kutoka mbinguni, ndiye yule Mungu ambaye, tunapomngojea, hutuandaa kwa ajili ya kufunuliwa kwa Mwanawe. Maisha ya sasa na utukufu ujao vimeunganika visivyoweza kutenganishwa, katika Mungu na ndani yetu.

Wakati mwingine iko hatari ya kuyatenganisha haya mawili. Siku zote ni rahisi zaidi kujishughulisha na dini ya wakati uliopita au ya wakati ujao kuliko kuwa mwaminifu katika dini ya leo. Tunapotazama yale Mungu aliyoyatenda zamani, au atakayoyatenda siku zijazo, twaweza kulikwepa dai la binafsi la wajibu wa sasa na la kujitiisha sasa chini ya kazi yake. Kumngojea Mungu hakuna budi siku zote kutuongoza kumngojea Kristo kama ukamilisho mtukufu wa kazi yake; nako kumngojea Kristo hakuna budi siku zote kutukumbusha wajibu wa kumngojea Mungu, kuwa ndio uthibitisho wetu pekee kwamba kumngojea kwetu Kristo ni katika roho na kweli. Iko hatari kubwa ya sisi kujishughulisha na mambo yajayo zaidi kuliko na yeye ajaye; nako kuchunguza mambo yatakayotukia kunatoa nafasi kubwa mno kwa mawazo na akili na werevu wa kibinadamu, hata hakuna kitu kingine ila kumngojea Mungu kwa unyenyekevu wa kina kiwezacho kutuokoa tusidhanie kwamba shauku na furaha ya uchunguzi wa kiakili ndio upendo wa kweli kwake yeye na kwa kufunuliwa kwake. Ninyi nyote msemao mnangojea kuja kwa Kristo, hakikisheni kwamba mnamngojea Mungu sasa. Nanyi nyote mtafutao kumngojea Mungu sasa ili amfunue Mwanawe ndani yenu, angalieni mfanye hivyo kama watu wanaongojea kufunuliwa kwa Mwanawe kutoka mbinguni. Tumaini la kufunuliwa kule kwa utukufu litawatia nguvu katika kumngojea Mungu kwa ajili ya yale atakayoyatenda ndani yenu sasa: upendo ule ule wenye uweza wote utakaoufunua utukufu ule unatenda kazi ndani yenu hata sasa, ili kuwafanya tayari kwa ajili yake.

'Lile tumaini lenye baraka na mafunuo ya utukufu wa Mungu wetu mkuu na Mwokozi wetu Yesu Kristo,' ni kimoja cha vifungo vikuu vya umoja alivyopewa Kanisa la Mungu katika vizazi vyote. 'Atakapokuja ili kutukuzwa katika watakatifu wake, na kustaajabiwa katika wote waliosadiki.' Ndipo sote tutakapokutana, na umoja wa mwili wa Kristo utaonekana katika utukufu wake wa kimungu. Papo ndipo patakapokuwa mahali pa kukutana, na ushindi, wa upendo wa kimungu. Yesu akiwapokea walio wake na kuwaleta mbele za Baba. Walio wake wakikutana naye na kuuabudu uso ule uliobarikiwa kwa upendo usio na maneno. Walio wake wakikutana wao kwa wao katika furaha kuu ya upendo wa Mungu mwenyewe. Basi na tungojee, tutamani, na tupende kufunuliwa kwa Bwana wetu, Bwana-arusi wetu wa Mbinguni. Upendo mwororo kwake yeye, na upendo mwororo sisi kwa sisi, ndiyo roho ya kweli, nayo peke yake, ya bibi-arusi.

Nachelea sana kwamba jambo hili husahauliwa wakati mwingine. Ndugu mmoja mpendwa huko Uholanzi alikuwa akisema juu ya taraja la imani kuwa ndiyo alama ya kweli ya bibi-arusi. Nikathubutu kutoa shaka. Bibi-arusi asiyestahili, anayekaribia kuolewa na mwana wa mfalme, aweza kuwa anafikiri tu juu ya cheo na utajiri atakaoupata. Taraja la imani laweza kuwa na nguvu, na upendo wa kweli ukakosekana kabisa. Lililo la maana ni upendo katika roho ya bibi-arusi. Si tunapojishughulisha sana na mafundisho ya unabii, bali ni tunapoambatana kwa karibu na Bwana wetu na ndugu zake katika unyenyekevu na upendo, ndipo tunapokuwa mahali pa bibi-arusi. Yesu anakataa kuupokea upendo wetu isipokuwa uwe ni upendo kwa wanafunzi wake. Kungojea kuja kwake maana yake ni kungojea udhihirisho ule mtukufu ujao wa umoja wa mwili, huku tukitafuta hapa kuudumisha umoja huo kwa unyenyekevu na upendo. Wale wapendao zaidi ndio walio tayari zaidi kwa kuja kwake. Upendo wa sisi kwa sisi ndio uhai na uzuri wa bibi-arusi wake, yaani Kanisa.

Nalo jambo hili litapatikanaje? Mtoto wa Mungu mpendwa! ukitaka kujifunza vema kumngojea Mwanawe kutoka mbinguni, ishi hata sasa ukimngojea Mungu aliye mbinguni. Kumbuka jinsi Yesu alivyoishi akimngojea Mungu daima. Hakuweza kufanya neno lo lote mwenyewe. Ni Mungu aliyemkamilisha Mwanawe kwa mateso, kisha akamtukuza. Ni Mungu peke yake awezaye kukupa yale maisha ya rohoni yaliyo ya kina ya mtu amngojeaye Mwanawe kweli kweli: mngojee Mungu kwa ajili yake. Kumngojea Kristo mwenyewe, lo! ni jambo tofauti kabisa na kungojea mambo yatakayoweza kutukia! Hilo la pili laweza kufanywa na Mkristo ye yote; lile la kwanza, Mungu hana budi kulitenda ndani yako kila siku kwa Roho wake Mtakatifu. Kwa hiyo ninyi nyote mmngojeao Mungu, mtazameni yeye ili mpate neema ya kumngojea Mwanawe kutoka mbinguni katika Roho atokaye mbinguni. Nanyi mnaotaka kumngojea Mwanawe, mngojeeni Mungu daima ili amfunue Kristo ndani yenu.

Kufunuliwa kwa Kristo ndani yetu, kama wapewavyo wale wamngojeao Mungu, ndiko maandalizi ya kweli ya kufunuliwa kwa Kristo kwa ukamilifu katika utukufu.

'Ee nafsi yangu, umngojee Mungu peke yake!'