Katika Nyakati za Giza

Siku ya Kumi na Saba. KUMNGOJEA MUNGU: Katika Nyakati za Giza.

'Nami nitamngojea Bwana, anayeificha nyumba ya Yakobo uso wake; nami nitamtazamia.'—Isaya 8:17.

HAPA tunamwona mtumishi wa Mungu akimngojea Mungu, si kwa ajili yake mwenyewe, bali kwa ajili ya watu wake, ambao Mungu alikuwa amewaficha uso wake. Jambo hili latuonyesha jinsi kumngojea kwetu Mungu, ingawa huanza na mahitaji yetu wenyewe, na shauku ya kwamba atujifunulie nafsi yake, au tupate majibu ya maombi yetu binafsi, hakupaswi, tena hakuruhusiwi, kuishia hapo. Yaweza kuwa sisi twatembea katika nuru kamili ya uso wa Mungu, na hali Mungu bado anawaficha uso wake watu wake wanaotuzunguka; mbali na sisi kuridhika kwa kudhani kwamba hiyo si kitu ila adhabu ya haki ya dhambi yao, au matokeo ya uzembe wao, twaitwa kwa mioyo ya huruma kuifikiri hali yao ya kusikitisha, na kumngojea Mungu kwa ajili yao. Fursa ya kumngojea Mungu ni fursa iletayo wajibu mkubwa. Kama vile Kristo, alipoingia mbele za Mungu, mara alivyoitumia nafasi yake ya upendeleo na heshima akiwa mwombezi, vivyo hivyo na sisi, si chini ya hapo, ikiwa kweli twajua maana ya kuingia ndani na kumngojea Mungu, hatuna budi kuutumia uwezo huo wa kumkaribia kwa ajili ya ndugu zetu wasiojaliwa kama sisi. 'Nitamngojea Bwana, anayeificha nyumba ya Yakobo uso wake.'

Wewe huabudu pamoja na kusanyiko fulani. Yamkini humo hamna uhai wa kiroho wala furaha uitamaniyo, si katika mahubiri wala katika ushirika. Wewe ni wa Kanisa fulani, lenye makusanyiko yake mengi. Mna wingi wa upotovu au wa moyo wa kidunia, wa kutafuta hekima na ustaarabu wa kibinadamu, wa kutumainia taratibu na desturi za ibada, hata hushangai kwamba Mungu huuficha uso wake mahali pengi, na kwamba nguvu ya kuwaongoa watu au ya kuwajenga kweli ni ndogo sana. Tena yako matawi ya kazi ya Kikristo unayohusika nayo—shule ya Jumapili, jumba la Injili, chama cha vijana, kazi ya misheni ng'ambo—ambamo udhaifu wa utendaji wa Roho waonekana kuonyesha kwamba Mungu anauficha uso wake. Nawe wadhani, tena, kwamba waijua sababu yake. Mna kuwatumainia wanadamu na fedha kupita kiasi; mna wingi wa taratibu za nje tu na wa kujifurahisha nafsi; imani na maombi ni haba; upendo na unyenyekevu ni haba; roho ya Yesu aliyesulibiwa ni haba mno. Wakati mwingine wajisikia kana kwamba mambo hayana tumaini tena; hakuna kitakachosaidia.

Amini kwamba Mungu aweza kusaidia, naye atasaidia. Roho ya yule nabii na iingie ndani yako, uyachukue maneno yake, ukajitie kumngojea Mungu kwa ajili ya watoto wake waliopotoka. Badala ya sauti ya hukumu au ya lawama, ya kufa moyo au ya kukata tamaa, utambue wito wako wa kumngojea Mungu. Wengine wakikosa kuufanya, wewe jitoe kwa huo maradufu. Kadiri giza lilivyo nene, ndivyo ulivyo mkubwa zaidi uhitaji wa kumwomba yule Mkombozi wa pekee. Kadiri kujitumainia nafsi kulivyozidi kukuzunguka, kule kusikojua ya kuwa ni maskini na mnyonge na kipofu, ndivyo ulivyo wa haraka zaidi wito juu yako wewe ukiriye kuuona uovu huo na kuwa na nafasi ya kumkaribia yeye awezaye peke yake kusaidia, uwe mahali pako, ukimngojea Mungu. Kila unapojaribiwa kunung'unika, au kuugua, sema tena na tena upya: 'Nitamngojea Bwana, anayeificha nyumba ya Yakobo uso wake.'

Kuna duara kubwa zaidi bado—Kanisa la Kikristo ulimwenguni kote. Fikiri juu ya makanisa ya Kigiriki, ya Kikatoliki ya Rumi, na ya Kiprotestanti, na hali ya mamilioni ya watu walio wake. Au fikiri juu ya makanisa ya Kiprotestanti tu, yenye Biblia iliyo wazi na imani zake za kweli. Jinsi ulivyo mwingi ukiri wa jina tu na wa taratibu za nje! jinsi ulivyo mwingi utawala wa mwili na wa mwanadamu ndani ya hekalu lenyewe la Mungu! Na ni uthibitisho mwingi kama nini ya kwamba Mungu kweli huuficha uso wake!

Watu waonao hayo na kuyaombolezea wafanyeje basi? Jambo la kwanza la kufanywa ni hili: 'Nitamngojea Bwana, anayeificha nyumba ya Yakobo uso wake.' Na tumngojee Mungu, tukiziungama kwa unyenyekevu dhambi za watu wake. Tutenge muda, tumngojee katika kazi hiyo. Na tumngojee Mungu katika maombezi ya huruma na upendo kwa ajili ya watakatifu wote, ndugu zetu wapendwa, hata maisha yao au mafundisho yao yaonekane kuwa na makosa kiasi gani. Na tumngojee Mungu kwa imani na taraja, hata atuonyeshe ya kuwa atasikia. Na tumngojee Mungu, tukijitoa wenyewe kwake kwa utoaji sahili, na kwa maombi ya bidii kwamba atutume kwa ndugu zetu. Na tumngojee Mungu, wala tusimpe raha hata aifanye Sayuni kuwa furaha duniani. Naam, na tustarehe katika Bwana, tumngojee kwa saburi yeye ambaye sasa anawaficha uso wake wengi wa watoto wake. Na kwa habari ya kuinuliwa kwa nuru ya uso wake tunakokutamani kwa ajili ya watu wake wote, na tuseme, 'Namngojea Bwana, nafsi yangu yamngojea, na tumaini langu ni katika neno lake. Nafsi yangu inamngojea Bwana, kuliko walinzi waingojao asubuhi, walinzi waingojao asubuhi.'

'Ee nafsi yangu, umngojee Mungu peke yake!'