Ili Ajifunue Mwenyewe

Siku ya Kumi na Nane. KUMNGOJEA MUNGU: Ili Ajifunue Mwenyewe.

'Na itasemwa katika siku hiyo, Tazama, huyu ndiye Mungu wetu; tumemngojea, naye atatuokoa: HUYU NDIYE BWANA; tumemngojea, tutashangilia na kuufurahia wokovu wake,'—Isaya 25:9.

KATIKA fungu hili tunayo mawazo mawili ya thamani.

La kwanza ni kwamba haya ni maneno ya watu wa Mungu waliokuwa wakimngojea kwa umoja; la pili ni kwamba tunda la kungoja kwao limekuwa hili, kwamba Mungu amejifunua kiasi kwamba waliweza kusema kwa furaha, Tazama, huyu ndiye Mungu wetu: huyu ndiye Bwana. Nguvu na baraka ya kumngojea Mungu kwa umoja ndilo jambo tunalohitaji kujifunza.

Angalia maneno yaliyorudiwa mara mbili, ‘Tumemngojea.' Katika wakati fulani wa taabu mioyo ya watu hao ilikuwa imevutwa pamoja, nao, wakiacha kila tumaini na msaada wa kibinadamu, kwa moyo mmoja walijiweka kumngojea Mungu wao. Je, hili silo jambo tunalolihitaji katika makanisa yetu, na mikutano yetu mikuu, na mikutano yetu ya maombi? Je, haja ya Kanisa na ya ulimwengu si kubwa kiasi cha kulidai jambo hilo? Je, hayamo ndani ya Kanisa la Kristo maovu ambayo hakuna hekima ya kibinadamu iwezayo kuyashinda? Je, hatuna ibada za desturi tupu na dini ya akili, dini ya mazoea na kuupenda ulimwengu, vinavyolinyang'anya Kanisa nguvu zake? Je, hatuna elimu na fedha na anasa vinavyohatarisha uhai wake wa kiroho? Je, nguvu za Kanisa hazipungukiwi kabisa kuweza kukabiliana na nguvu za ukafiri na uovu na taabu katika nchi za Kikristo na katika upagani? Na je, haimo katika ahadi ya Mungu, na katika nguvu ya Roho Mtakatifu, riziki iliyowekwa iwezayo kuitosheleza haja hiyo, na kulipa Kanisa uhakika wenye utulivu kwamba linafanya yote ambayo Mungu wake anayatarajia kwake? Na je, kumngojea Mungu kwa umoja ili atujaze Roho wake si dhahiri kwamba ndiyo baraka inayohitajiwa? Hatuwezi kulitilia shaka jambo hilo.

Kusudi la kumngojea Mungu kwa dhahiri zaidi katika mikutano yetu lingekuwa kwa kiasi kikubwa lilelile la ibada ya faragha. Lingemaanisha kusadiki kwa kina zaidi kwamba Mungu ndiye lazima atende, na kwamba atatenda yote; kuingia kwa unyenyekevu zaidi na kwa kudumu katika kule kutojiweza kwetu kabisa, na katika haja ya kumtegemea Yeye kikamilifu na bila kukoma; kutambua kwa uhai zaidi kwamba jambo la msingi ni kumpa Mungu mahali pake pa heshima na pa nguvu; kutazamia kwa uhakika kwamba wale wamngojao, Mungu atawapa, kwa Roho wake, siri ya kukubaliwa naye na ya uwepo wake, kisha, wakati ufaao, ufunuo wa nguvu zake ziokoazo. Lengo kuu lingekuwa kumleta kila mmoja katika kusanyiko la waombao na kuabudu chini ya hisia ya kina ya uwepo wa Mungu, hata watakapoagana kuwepo na utambuzi wa kuwa wamekutana na Mungu mwenyewe, wa kuwa wamemwachia kila haja yao, na wa kuwa sasa wanangoja kwa utulivu wakati Yeye anautimiza wokovu wake.

Ni jambo hili la kuonja ndilo linaloonyeshwa katika fungu letu. Utimilifu wa maneno haya waweza, nyakati nyingine, kuwa katika matendo ya kuingilia kati ya nguvu za Mungu yaliyo ya ajabu kiasi kwamba wote waweza kuungana katika kilio, 'Tazama, huyu ndiye Mungu wetu; huyu ndiye Bwana!' Yaweza vilevile kuwa kweli katika maisha ya rohoni, wakati watu wa Mungu, katika nyakati zao za kungoja, wanapoutambua uwepo wake kiasi kwamba, katika kicho kitakatifu, roho husema, 'Tazama, huyu ndiye Mungu wetu; huyu ndiye Bwana!' Hili, ole wetu, ndilo linalokosekana mno katika mikutano yetu ya ibada. Mhudumu mcha Mungu hana kazi iliyo ngumu zaidi, iliyo takatifu zaidi, wala iliyo na baraka zaidi, kuliko kuwaongoza watu wake kwenda kukutana na Mungu, na, kabla hajahubiri, kumleta kila mmoja aonane naye. 'Sasa tuko hapa mbele za Mungu' — maneno haya ya Kornelio yanaonyesha jinsi wasikilizaji wa Petro walivyoandaliwa kwa ajili ya kuja kwa Roho Mtakatifu. Kungoja mbele za Mungu, na kumngojea Mungu, na kumngojea Mungu, ndiyo sharti moja la Mungu kuudhihirisha uwepo wake.

Kikundi cha waaminio kilichokusanyika kwa kusudi hilo moja, wakisaidiana kwa vipindi vifupi vya kimya, ili kumngojea Mungu peke yake, wakiufungua moyo kupokea lolote ambalo Mungu aweza kuwa nalo, la mafunuo mapya ya uovu, la mapenzi yake, la milango mipya katika kazi au katika namna za kuifanya kazi, kingekuwa upesi na sababu ya kusema, ' Tazama, huyu ndiye Mungu wetu; tumemngojea, atatuokoa: huyu ndiye Bwana ; tumemngojea, tutafurahi na kushangilia katika wokovu wake.'

'Ee nafsi yangu, umngojee Mungu peke yake!'