Kwa Ajili ya Nuru Yake Moyoni

Siku ya Kumi na Sita. KUMNGOJEA MUNGU: Kwa Ajili ya Nuru Yake Moyoni.

'Namngojea Bwana, nafsi yangu inangoja,

Na neno lake ninalitumainia.

Nafsi yangu inamngojea Bwana

kuliko wale waingojao asubuhi:

Kuliko wale waingojao asubuhi.'— Zaburi 130:5, 6.

KWA shauku kuu namna gani nuru ya asubuhi hungojewa mara nyingi. Na mabaharia walio katika chombo kilichovunjika; na msafiri aliyeingiliwa na giza katika nchi ya hatari; na jeshi lililojikuta limezungukwa na adui. Nuru ya asubuhi itaonyesha ni tumaini gani la kuokoka liwezalo kuwapo. Asubuhi yaweza kuleta uhai na uhuru. Vivyo hivyo watakatifu wa Mungu walio gizani wameitamani nuru ya uso wake, kuliko walinzi waingojao asubuhi. Wamesema, 'Kuliko walinzi waingojao asubuhi, nafsi yangu inamngojea Bwana.' Je, sisi nasi twaweza kusema hivyo? Kumngojea kwetu Mungu hakuwezi kuwa na kusudi kuu zaidi kuliko hili tu: kwamba nuru yake ituangazie, na iangaze ndani yetu, na kupitia kwetu, mchana kutwa.

Mungu ni Nuru. Mungu ni Jua. Paulo asema: 'Mungu ameangaza mioyoni mwetu ili kutupa nuru.' Nuru gani? 'Nuru ya utukufu wa Mungu, katika uso wa Yesu Kristo.' Kama vile jua liangazavyo nuru yake nzuri, itiayo uhai, juu ya dunia yetu na ndani yake, ndivyo Mungu aangazavyo mioyoni mwetu nuru ya utukufu wake, ya upendo wake, katika Kristo Mwanawe. Moyo wetu umekusudiwa kuwa na nuru hiyo ikiujaza na kuufurahisha mchana kutwa. Nao waweza kuwa nayo, kwa sababu Mungu ndiye jua letu, na imeandikwa, 'Jua lako halitashuka tena kamwe.' Upendo wa Mungu hutuangazia bila kukoma.

Lakini je, kweli twaweza kuifurahia mchana kutwa? Twaweza. Na jinsi gani? Asili na itupe jibu. Miti ile mizuri na maua, pamoja na majani haya yote mabichi, hufanya nini ili jua liendelee kuiangazia? Haifanyi kitu; hujiota tu juani, lifikapo. Jua liko mamilioni ya maili mbali, lakini juu ya umbali huo wote hupeleka nuru yake na furaha yake; na ua dogo kabisa liinualo kichwa chake kidogo juu hukutana na wingi ule ule wa nuru na baraka ufurikao mandhari pana kupita zote. Hatuna haja ya kujisumbukia nuru tuihitajiyo kwa kazi ya siku yetu; jua ndilo lijishughulishalo, nalo huandaa na kuangaza nuru kutuzunguka mchana kutwa. Sisi twaitegemea tu, na kuipokea, na kuifurahia.

Tofauti pekee kati ya asili na neema ni hii: kwamba lile ambalo miti na maua hulifanya pasipo kujua, yanapoinywa baraka ya nuru, kwetu sisi linapaswa kuwa ni kukubali kwa hiari na kwa upendo. Imani, imani sahili katika neno la Mungu na upendo wake, ndiyo iwe kufumbuliwa kwa macho, kufunguliwa kwa moyo, ili kupokea na kuufurahia utukufu usioneneka wa neema yake. Na kama vile miti, siku kwa siku na mwezi kwa mwezi, isimamavyo na kukua katika uzuri na kuzaa matunda, ikikaribisha tu mwanga wowote ambao jua laweza kuutoa, ndivyo ilivyo kwamba kazi iliyo kuu kabisa ya maisha yetu ya Kikristo ni kukaa tu katika nuru ya Mungu, na kuiacha nuru hiyo, na kumwacha yeye, atujaze uhai na mng'aro uletwao nayo.

Nawe ukiuliza: lakini je, yawezekana kweli kwamba, kwa jinsi ile ile ya asili na ya moyo wote niutambuavyo na kuufurahia uzuri wa asubuhi angavu ya jua, naweza kuifurahia nuru ya Mungu mchana kutwa? Yawezekana, kweli kweli. Nikiwa mezani pangu pa chakula cha asubuhi natazama nje bonde zuri, lenye miti na mashamba ya mizabibu na milima. Katika miezi yetu ya machipuko na ya mapukutiko nuru ya asubuhi ni ya kupendeza mno, na karibu bila kukusudia twasema: Uzuri ulioje! Ndipo laja swali: Je, ni nuru ya jua peke yake iletayo uzuri na furaha ya namna hii daima? Na je, hakuna njia iliyowekwa ili nuru ya Mungu nayo iwe vivyo hivyo chemchemi isiyokoma ya furaha na shangwe? Ipo, kweli, kama tu nafsi itakuwa kimya na kumngojea yeye, itamwacha tu Mungu aangaze.

Ee nafsi mpendwa! jifunze kumngojea Bwana, kuliko walinzi waingojao asubuhi. Yote yaliyo ndani yako yaweza kuwa giza tupu; je, hiyo siyo sababu iliyo bora kabisa ya kuingojea nuru ya Mungu? Mianzo ya kwanza ya nuru yaweza kutosha tu kulifunua giza, na kukunyenyekeza kwa uchungu kwa ajili ya dhambi. Je, huwezi kuitumainia nuru kwamba italifukuza giza? Amini kwamba itafanya hivyo. Inama tu, hata sasa, kwa utulivu mbele za Mungu, umngojee akuangazie ndani yako. Sema, kwa imani ya unyenyekevu: Mungu ni nuru, ing'aayo na iliyo nzuri kupita nuru ya jua bila kipimo. Mungu ni nuru. Baba, nuru ya milele, isiyokaribika, isiyofahamika. Mwana, nuru iliyokusanywa, na kuvikwa mwili, na kudhihirishwa. Roho, nuru iingiayo na kukaa na kung'aa mioyoni mwetu. Mungu ni nuru, naye yuko hapa akiangaza moyo wangu. Nimekuwa nikijishughulisha mno na vibatari vya mawazo yangu na juhudi zangu, hata sijapata kamwe kufungua madirisha ili nuru yake iingie. Kutokuamini kumeizuia nje. Nainama kwa imani: nuru ya Mungu inaangaza ndani ya moyo wangu. Mungu yule ambaye Paulo aliandika habari zake, 'Mungu ameangaza ndani ya moyo wetu,' ndiye Mungu wangu. Ningefikiri nini juu ya jua lisiloweza kuangaza? nitafikiri nini juu ya Mungu asiyeangaza? La, Mungu huangaza! Mungu ni nuru! Nitatwaa muda, niwe kimya tu, na kupumzika katika nuru ya Mungu. Macho yangu ni dhaifu, na madirisha si safi, lakini nitamngojea Bwana. Nuru inaangaza kweli, nuru itaangaza ndani yangu, na kunifanya nijae nuru. Nami nitajifunza kutembea mchana kutwa katika nuru na furaha ya Mungu. Nafsi yangu inamngojea Bwana, kuliko walinzi waingojao asubuhi.

'Ee nafsi yangu, umngojee Mungu peke yake!'