Kwa Ajili ya Shauri Lake

Siku ya Kumi na Tano. KUMNGOJEA MUNGU: Kwa Ajili ya Shauri Lake.

'Walizisahau kazi zake upesi: hawakulingoja shauri lake.'—Zaburi 106:13.

HAYA yamesemwa juu ya dhambi ya watu wa Mungu jangwani. Mungu alikuwa amewakomboa kwa njia ya ajabu, naye alikuwa tayari vivyo hivyo, kwa ajabu, kuwaruzuku katika kila hitaji lao. Lakini wakati wa uhitaji ulipofika, 'hawakulingoja shauri lake.' Hawakufikiri kwamba Mungu Mwenyezi ndiye aliyekuwa Kiongozi wao na Mtoaji wa riziki yao; hawakuuliza mipango yake ilikuwa nini. Walifikiri tu mawazo ya mioyo yao wenyewe, wakamjaribu Mungu na kumkasirisha kwa kutokuamini kwao. 'Hawakulingoja shauri lake.'

Jinsi gani hii imekuwa dhambi ya watu wa Mungu katika vizazi vyote! Katika nchi ya Kanaani, siku za Yoshua, kushindwa mara tatu tu ndiko tunakokusoma, nako kote kulitokana na dhambi hii moja. Katika kupanda kupigana na Ai, katika kufanya agano na Wagibeoni, katika kukaa raha bila kupanda kuimiliki nchi yote, hawakulingoja shauri lake. Na hivyo hata muumini aliyeendelea sana yumo hatarini kutokana na jaribu hili lililo jepesi kujificha kuliko yote—kulichukua neno la Mungu na kulifikiria kwa mawazo yake mwenyewe, bila kungojea shauri lake. Basi na tulipokee onyo hili, tuone Israeli anatufundisha nini. Na tuliangalie kwa namna ya pekee, si kama hatari inayomkabili mtu mmoja mmoja tu, bali kama hatari ambayo watu wa Mungu, katika umoja wao kama jamii, wanapaswa kujilinda nayo.

Uhusiano wetu wote na Mungu umejengwa katika jambo hili, kwamba mapenzi yake yafanyike ndani yetu na kwa njia yetu kama yafanyikavyo mbinguni. Ameahidi kutujulisha mapenzi yake kwa Roho wake, yeye aliye Kiongozi aongozaye katika kweli yote. Na mahali petu ni kuwa wenye kungojea shauri lake, kuwa ndilo pekee liongozalo mawazo yetu na matendo yetu. Katika ibada zetu za kanisa, katika mikutano yetu ya maombi, katika makusanyiko yetu, katika mikusanyiko yetu yote kama wasimamizi, au wakurugenzi, au kamati, au wasaidizi katika sehemu yo yote ya kazi ya Mungu, lengo letu la kwanza lapaswa kuwa sikuzote kutafuta kuijua nia ya Mungu. Mungu hutenda sikuzote kwa kadiri ya shauri la mapenzi yake; kadiri shauri hilo la mapenzi yake litafutwavyo na kuonekana na kuheshimiwa, ndivyo Mungu atakavyoifanya kazi yake kwa ajili yetu na kwa njia yetu kwa hakika zaidi na kwa nguvu zaidi.

Hatari kubwa katika makusanyiko hayo yote ni kwamba, katika kujiona tunayo Biblia yetu, na uzoefu wetu wa zamani wa kuongozwa na Mungu, na imani yetu iliyo sahihi, na nia yetu ya kweli ya kufanya mapenzi ya Mungu, tunavitumainia vitu hivyo, wala hatutambui kwamba katika kila hatua twahitaji, na twaweza kupata, uongozi wa mbinguni. Yaweza kuwako sehemu za mapenzi ya Mungu, matumizi ya neno la Mungu, uzoefu wa kuwapo kwake karibu na wa kuongoza kwake, madhihirisho ya nguvu za Roho wake, ambayo hatujui lo lote bado. Mungu aweza kuwa radhi, la, Mungu yu radhi kuwafunulia hayo wale wenye roho zilizokaza nia kumwachia yeye afanye yake kabisa, nao wako radhi kungojea kwa saburi hata atakapoyajulisha. Tunapokusanyika pamoja tukimsifu Mungu kwa yote aliyoyafanya na kufundisha na kutoa, huenda wakati huo huo tunamwekea mipaka kwa kutotazamia mambo makubwa zaidi. Ilikuwa baada ya Mungu kutoa maji kutoka mwambani ndipo hawakumtumaini kwa mkate. Ilikuwa baada ya Mungu kuutia Yeriko mikononi mwake ndipo Yoshua alipodhani kwamba ushindi juu ya Ai u hakika; sasa alijua Mungu aweza kufanya nini, asingoje shauri kutoka kwa Mungu. Na hivyo, tunapodhani kwamba twaijua na kuitumaini nguvu ya Mungu kwa yale tuwezayo kuyatazamia, huenda tunamzuia kwa kutompa muda, na kwa kutojizoeza kwa dhati tabia ya kungojea shauri lake.

Mchungaji hana wajibu ulio mzito zaidi kuliko kuwafundisha watu kumngojea Mungu. Kwa nini ilikuwa kwamba katika nyumba ya Kornelio, 'Petro aliponena maneno haya, Roho Mtakatifu aliwashukia wote waliomsikia'? Walikuwa wamesema, 'Sisi tupo hapa mbele za Mungu ili kusikia yote uliyoamriwa na Mungu.' Twaweza kukusanyika ili kutoa na kusikiliza mafafanuzi yenye bidii kabisa ya kweli ya Mungu, tukapata faida ndogo ya kiroho, kama hakuna kungojea shauri la Mungu. Katika makusanyiko yetu yote twahitaji kumwamini Roho Mtakatifu kuwa ndiye Kiongozi na Mwalimu wa watakatifu wa Mungu wangojapo kuongozwa naye katika mambo ambayo Mungu ameyaandaa, ambayo moyo hauwezi kuyawaza.

Utulivu zaidi wa roho ili kutambua kuwapo kwa Mungu; kujitambua zaidi kwamba hatuijui mipango mikuu ya Mungu yaweza kuwa nini; imani zaidi katika uhakika wa kwamba Mungu anayo mambo makubwa zaidi ya kutuonyesha; shauku zaidi kwamba yeye mwenyewe adhihirishwe katika utukufu mpya: hizi ndizo zinazopaswa kuwa alama za makusanyiko ya watakatifu wa Mungu, kama wanataka kuepuka lawama hii, 'Hawakulingoja shauri lake.'

'Ee nafsi yangu, umngojee Mungu peke yake!'