Njia ya Wimbo Mpya

Siku ya Kumi na Nne. KUMNGOJEA MUNGU: Njia ya Wimbo Mpya.

'Nalimngoja Bwana kwa saburi, naye akaniinamia, akakisikia kilio changu. . . . Naye ametia wimbo mpya kinywani mwangu, ndio sifa kwa Mungu wetu.'—Zaburi 40:1-3.

NJOO usikilize ushuhuda wa mtu awezaye kusema kwa uzoefu juu ya matokeo ya hakika na yenye baraka ya kumngojea Mungu kwa saburi. Saburi ya kweli ni ngeni mno kwa asili yetu ya kujitumainia, ni ya lazima mno katika kumngojea kwetu Mungu, nayo ni sehemu ya msingi ya imani ya kweli, hata yatupasa kwa mara nyingine tena kutafakari yale ambayo neno hili linayo kutufundisha.

Neno saburi (kwa Kiingereza patience) limetokana na neno la Kilatini lenye maana ya kuteseka. Ladokeza wazo la kuwa chini ya mkazo wa nguvu fulani ambayo twataka kuwa huru mbali nayo. Kwanza tunajitiisha kinyume cha mapenzi yetu; uzoefu hutufundisha ya kwamba pale ambapo kushindana ni bure, kuvumilia kwa saburi ndiyo njia yetu ya hekima zaidi. Katika kumngojea Mungu ni jambo la maana isiyo na kipimo kwamba tusijitiishe kwa kulazimishwa tu, bali kwa sababu twakubali kwa upendo na furaha kuwa mikononi mwa Baba yetu mbarikiwa. Ndipo saburi huwa heri yetu ya juu kabisa na neema yetu ya juu kabisa. Humheshimu Mungu, na kumpa nafasi ya kutimiza mapenzi yake kwetu. Ndiyo namna ya juu kabisa ya kuidhihirisha imani yetu katika wema wake na uaminifu wake. Huiletea nafsi pumziko kamili katika uhakika wa kwamba Mungu anaiendeleza kazi yake. Ni ishara ya kukubali kwetu kikamilifu kwamba Mungu atutendee kwa njia na wakati aonao yeye kuwa bora. Saburi ya kweli ni kuyapoteza mapenzi yetu wenyewe ndani ya mapenzi yake makamilifu.

Saburi ya namna hii yahitajiwa kwa kumngojea Mungu kwa kweli na kwa ukamilifu. Saburi ya namna hii ni ukuaji na tunda la masomo yetu ya kwanza katika shule ya kungojea. Kwa wengi itaonekana ajabu jinsi ilivyo vigumu kumngojea Mungu kweli kweli. Ule utulivu mkuu wa nafsi mbele za Mungu, uzamao katika unyonge wake wenyewe na kumngojea yeye mwenyewe ajifunue; ule unyenyekevu wa kina uogopao kuyaacha mapenzi yake mwenyewe au nguvu zake mwenyewe kutenda lo lote isipokuwa kwa kadiri Mungu atendavyo kazi ndani yetu kutaka na kutenda; ule upole uridhikao kuwa si kitu wala kutokujua kitu isipokuwa kwa kadiri Mungu atoavyo nuru yake; kule kujisalimisha kabisa kwa mapenzi, kutakako tu kuwa chombo ambacho ndani yake mapenzi yake matakatifu yaweza kutenda na kufinyanga: mambo haya yote ya saburi kamilifu hayapatikani mara moja. Lakini yatakuja hatua kwa hatua, kadiri nafsi idumuvyo katika mahali pake, na kusema tena na tena: 'Kweli nafsi yangu inamngojea Mungu peke yake; wokovu wangu hutoka kwake: yeye peke yake ndiye mwamba wangu na wokovu wangu.'

Je, umepata kuona ni uthibitisho gani tulio nao ya kwamba saburi ni neema ambayo kwa ajili yake hutolewa neema ya pekee kabisa, katika maneno haya ya Paulo: 'Mkitiwa nguvu kwa uwezo wote, kwa kadiri ya nguvu ya utukufu wake, hata kupata kwa utimilifu wote'—nini? 'saburi na uvumilivu pamoja na furaha.' Naam, twahitaji kutiwa nguvu kwa uwezo wote wa Mungu, tena kwa kadiri ya kipimo cha nguvu ya utukufu wake, kama tutamngojea Mungu kwa saburi yote. Ni Mungu kujifunua ndani yetu kuwa uzima wetu na nguvu zetu, ndiko kutakakotuwezesha kwa saburi kamilifu kuyaachilia yote mikononi mwake. Ikiwa wako wanaoelekea kufa moyo kwa sababu hawana saburi ya namna hiyo, na wawe na moyo mkuu; ni katika mwendo wa kungojea kwetu dhaifu, kusikokamilika kabisa, ndipo Mungu mwenyewe kwa uweza wake wa siri hututia nguvu na kuifanyiza ndani yetu saburi ya watakatifu, saburi ya Kristo mwenyewe.

Sikiliza sauti ya mtu aliyejaribiwa sana: 'Nalimngoja Bwana kwa saburi, naye akaniinamia, akakisikia kilio changu.' Sikia aliyoyapitia: 'Alinipandisha kutoka shimo la uharibifu, kutoka matope ya utelezi; akaisimamisha miguu yangu mwambani, akaziimarisha hatua zangu. Naye ametia wimbo mpya kinywani mwangu, ndio sifa kwa Mungu wetu.' Kumngojea Mungu kwa saburi huleta thawabu nyingi; ukombozi ni wa hakika; Mungu mwenyewe atatia wimbo mpya kinywani mwako. Ee nafsi! usiwe na papara, ikiwa ni katika kazi ya maombi na ibada unapoona vigumu kungojea, au ni katika kukawia kwa habari za maombi maalum, au ni katika kutimizwa kwa shauku ya moyo wako ya kumwona Mungu mwenyewe akijifunua katika maisha ya rohoni yaliyo ya kina zaidi—usiogope, bali umtulie Bwana, umngojee kwa saburi. Na kama nyakati nyingine wajiona kana kwamba saburi si kipawa chako, basi kumbuka ya kuwa ni kipawa cha Mungu, ukalitwae ombi lile (2 Wathesalonike 3:5): 'Bwana na aielekeze mioyo yenu katika saburi ya Kristo.' Katika saburi ile ambayo kwayo wapaswa kumngojea Mungu, yeye mwenyewe atakuongoza.

'Ee nafsi yangu, umngojee Mungu peke yake!'