Kwa Zaidi ya Tujuavyo

Siku ya Kumi na Tatu. KUMNGOJEA MUNGU: Kwa zaidi ya tujuavyo.

'Na sasa, Bwana, nangoja nini? Tumaini langu ni kwako. Uniokoe na makosa yangu yote.'—Zaburi 39:7, 8.

HUENDA ziko nyakati ambazo twajiona kana kwamba hatujui tunangojea nini. Ziko nyakati nyingine tunapodhani twajua, na hapo ingekuwa vema sana kwetu kutambua ya kuwa hatujui kuomba jinsi itupasavyo. Mungu aweza kutufanyia mambo ya ajabu mno kuliko yote tuyaombayo au tuyawazayo, nasi tumo hatarini mwa kumwekea mipaka, tunapoyafunga matamanio yetu na maombi yetu katika mawazo yetu wenyewe juu ya hayo. Ni jambo kubwa wakati mwingine kusema, kama isemavyo zaburi yetu: 'Na sasa, Bwana, nangoja nini?' Sijui sana, wala siwezi kusema; hili tu naweza kulisema—'Tumaini langu ni kwako.'

Jinsi gani tunavyokuona kumwekea Mungu mipaka katika habari ya Israeli! Musa alipowaahidia nyama jangwani, walitia shaka, wakisema, 'Je, Mungu aweza kuandaa meza jangwani? Aliupiga mwamba, maji yakatoka kwa wingi; je, aweza kutoa na mkate pia? Aweza kuwapatia watu wake nyama?' Kama wangaliulizwa ikiwa Mungu aweza kutoa vijito jangwani, wangalijibu, Ndiyo. Mungu alikwisha kulitenda: angeweza kulitenda tena. Lakini lilipokuja wazo la Mungu kutenda jambo jipya, walimwekea mipaka; taraja lao halikuweza kupaa kupita mambo waliyokwisha kuyapitia, wala kupita mawazo yao wenyewe juu ya yale yaliyowezekana. Vivyo hivyo nasi twaweza kuwa tunamwekea Mungu mipaka kwa fikira zetu juu ya yale aliyoyaahidi au awezayo kuyatenda. Basi na tujihadhari tusimwekee mipaka Mtakatifu wa Israeli hata katika maombi yetu yenyewe. Na tuamini ya kuwa kila ahadi ya Mungu tuishikayo ina maana ya kimungu, ipitayo mbali sana mawazo yetu juu yake. Na tuamini ya kuwa utimizo wake wa ahadi hizo waweza kuwa, katika uweza na wingi wa neema, kupita upeo wa mawazo yetu yote. Basi na tujizoeze kumngojea Mungu, si kwa ajili ya yale tudhaniyo twayahitaji tu, bali kwa ajili ya yote ambayo neema yake na uweza wake vi tayari kututendea.

Katika kila ombi la kweli mioyo miwili iko kazini. Mmoja ni moyo wako, wenye mawazo yake madogo, ya giza, ya kibinadamu juu ya yale uyahitajiyo na yale Mungu awezayo kutenda. Mwingine ni moyo mkuu wa Mungu, wenye makusudi yake ya baraka yasiyo na mipaka, ya kimungu. Waonaje? Ni upi kati ya mioyo hii miwili upasao kupewa nafasi iliyo kubwa zaidi katika kumkaribia kwako? Bila shaka, moyo wa Mungu: mambo yote hutegemea kuujua moyo huo na kushughulika nao. Lakini ni mara chache kama nini jambo hili hufanyika. Hili ndilo ambalo kumngojea Mungu kumekusudiwa kukufundisha. Wazia tu upendo wa ajabu wa Mungu na ukombozi wake, katika maana ambayo maneno haya hayana budi kuwa nayo kwake. Ungama jinsi unavyoelewa kidogo yale ambayo Mungu yu radhi kukutendea, na useme kila uombapo 'Na sasa, nangoja nini?' Moyo wangu hauwezi kusema. Moyo wa Mungu unajua, nao unangoja kutoa. 'Tumaini langu ni kwako.' Mngojee Mungu akutendee zaidi ya uwezavyo kuomba au kuwaza.

Litumie hili kwa ombi lifuatalo: 'Uniokoe na makosa yangu yote.' Umeomba uokolewe na hasira, au kiburi, au mapenzi ya nafsi yako. Ni kana kwamba ni bure. Je, haiwezekani kuwa umekuwa na mawazo yako mwenyewe juu ya njia au kadiri ya Mungu kulitenda hilo, na hujapata kamwe kumngojea Mungu wa utukufu, sawasawa na utajiri wa utukufu wake, akutendee yale yasiyoingia katika moyo wa mwanadamu kuyawaza? Jifunze kumwabudu Mungu kama Mungu atendaye maajabu, apendaye kuthibitisha ndani yako ya kuwa aweza kutenda jambo lipitalo asili, jambo la kimungu. Inama mbele zake, umngojee, hata nafsi yako itambue ya kuwa u mikononi mwa mtendaji wa kimungu, aliye mwenyezi. Ridhia kutokujua atakalolitenda wala jinsi atakavyolitenda; tazamia kwamba litakuwa jambo la kimungu kabisa, jambo la kungojewa kwa unyenyekevu wa kina, na kupokewa kwa uweza wake wa kimungu peke yake. Acha ile, 'Na sasa, Bwana, nangoja nini? Tumaini langu ni kwako' iwe roho ya kila shauku na ya kila ombi. Yeye atatenda kazi yake kwa wakati wake.

Ee nafsi mpendwa, katika kumngojea Mungu mara nyingi waweza kuwa karibu kuchoka, kwa sababu hujui sana la kutazamia. Nakusihi, uwe na moyo mkuu—kutokujua huku mara nyingi ni mojawapo ya ishara zilizo bora. Anakufundisha kuyaacha yote mikononi mwake, na kumngojea yeye peke yake. 'Umngoje Bwana! Uwe hodari, moyo wako na upige konde. Naam, umngoje Bwana.'

'Ee nafsi yangu, umngojee Mungu peke yake!'