Kuzishika Njia Zake

Siku ya Kumi na Mbili. KUMNGOJEA MUNGU: Kuzishika Njia Zake.

'Umngoje Bwana, na kuishika njia yake,

Naye atakutukuza uirithi nchi.'—Zaburi 37:34.

TUKITAKA kumpata mtu tunayetamani kuonana naye, twauliza ni mahali gani na njia zipi ambako apatikana. Katika kumngojea Mungu, yatupasa kuwa waangalifu sana kuzishika njia zake; nje ya njia hizo hatuwezi kamwe kutazamia kumpata. 'Wewe wamlaki yeye afurahiaye na kutenda haki; wale wakukumbukao katika njia zako.' Twaweza kuwa na hakika kwamba Mungu hapatikani wakati wowote wala mahali popote isipokuwa katika njia zake. Na kwamba humo, kwa nafsi imtafutaye na kumngojea kwa saburi, yeye hupatikana sikuzote kwa hakika kabisa. 'Umngoje Bwana, na kuzishika njia zake, naye atakutukuza.'

Jinsi ulivyo wa karibu uhusiano kati ya sehemu mbili za agizo hili. 'Umngoje Bwana,'—hiyo yahusu ibada na hali ya moyo; 'na kuzishika njia zake,'—hiyo yahusu mwenendo na kazi. Maisha ya nje sharti yapatane na ya ndani; ya ndani sharti yawe chanzo na nguvu za ya nje. Ni Mungu wetu aliyezijulisha njia zake katika Neno lake kwa ajili ya mwenendo wetu, naye atualika tumtumaini kwa ajili ya neema na msaada wake mioyoni mwetu. Tusipozishika njia zake, kumngojea kwetu hakuwezi kutuletea baraka. Kujisalimisha kwa utii kamili kwa mapenzi yake yote, ndiyo siri ya kuingia kikamilifu katika baraka zote za ushirika wake.

Angalia jinsi jambo hili linavyojitokeza kwa nguvu katika zaburi hii. Yamtaja mtenda mabaya afanikiwaye katika njia yake, na kumwonya aaminiye asijisumbue. Tuwaonapo watu wanaotuzunguka wakifanikiwa na kufurahi huku wakiziacha njia za Mungu, na sisi wenyewe tumeachwa katika shida au mateso, tuko hatarini kwanza kusumbuka kwa ajili ya jambo lionekanalo geni hivyo, kisha polepole kushindwa na kutafuta mafanikio yetu katika njia yao. Zaburi hii yasema, 'Usijisumbue; umtumaini Bwana, ukatende mema. Ustarehe katika Bwana, ukamngojee kwa saburi; ukomeshe hasira, uiache ghadhabu. Ondoka katika ubaya, ukatende mema; Bwana hawaachi watakatifu wake. Wenye haki watairithi nchi. Sheria ya Mungu wake imo moyoni mwake; hatua zake hazitelezi kamwe.' Kisha yafuata—neno hilo latokea mara ya tatu katika zaburi hii—'Umngoje Bwana, na kuzishika njia zake.' Fanya lile Mungu akuagizalo; Mungu atafanya zaidi ya uwezavyo kumwomba.

Wala mtu yeyote asikubali kushindwa na hofu hii: Siwezi kuzishika njia zake; hilo ndilo linalotunyang'anya ujasiri wetu. Ni kweli kwamba bado huna nguvu za kuzishika njia zake zote. Lakini zishike kwa uangalifu zile ambazo tayari umepewa nguvu kwa ajili yake. Jisalimishe kwa hiari na kwa imani ili kuzishika njia zote za Mungu, katika nguvu itakayokuja kwa kumngojea. Mtolee Mungu utu wako wote pasipo kujizuia wala kuwa na shaka; yeye atajidhihirisha kuwa Mungu kwako, na kutenda ndani yako yale yapendezayo machoni pake kwa njia ya Yesu Kristo. Zishike njia zake, kama uzijuavyo katika Neno. Zishike njia zake, kama asili izifundishavyo, kwa kutenda sikuzote lile lionekanalo kuwa jema. Zishike njia zake, kama uongozi wa Mungu uzionyeshavyo. Zishike njia zake, kama Roho Mtakatifu adokezavyo. Usifikiri kumngojea Mungu huku ukisema huko radhi kwenda katika njia yake. Hata ujisikie dhaifu namna gani, uwe radhi tu, naye yeye aliyetenda kazi ndani yako kutaka, atatenda kazi kutimiza kwa uweza wake.

'Umngoje Bwana, na kuzishika njia zake.' Yaweza kuwa kwamba kujitambua upungufu na dhambi kwafanya fungu letu lionekane kama kizuizi kuliko msaada katika kumngojea Mungu. Lisiwe hivyo. Je, hatukusema zaidi ya mara moja kwamba mahali penyewe pa kuanzia na msingi wa kungojea huku ni kutokuwa na uwezo kabisa kabisa? Mbona basi usije na kila ubaya uujisikiao ndani yako, kila kumbukumbu la kutokuwa radhi, kutokukesha, kutokuwa mwaminifu, na yote yaletayo kujihukumu huko kusikokoma? Weka tumaini lako katika uweza wote wa Mungu, na katika kumngojea Mungu upate wokovu wako. Kushindwa kwako kumetokana na jambo moja tu: ulitafuta kushinda na kutii kwa nguvu zako mwenyewe. Njoo uiname mbele za Mungu hata ujifunze ya kuwa yeye ndiye Mungu aliye mwema peke yake, na peke yake awezaye kutenda jambo lolote jema. Amini kwamba ndani yako, na katika yote asili iwezayo kutenda, hamna nguvu ya kweli. Uridhike kupokea kutoka kwa Mungu kila dakika kutenda kazi kwa neema yake yenye nguvu na uzima wake ndani yako, na kumngojea Mungu kutakuwa kufanywa upya kwa nguvu zako, ili upige mbio katika njia zake usichoke, uende katika mapito yake wala usizimie kamwe. 'Umngoje Bwana, na kuzishika njia zake' litakuwa amri na ahadi kwa pamoja.

'Ee nafsi yangu, umngojee Mungu peke yake!'