Kwa Saburi

Siku ya Kumi na Moja. KUMNGOJEA MUNGU: Kwa Saburi.

'Ustarehe katika Bwana, ukamngojee kwa saburi.

Wale wamngojao Bwana, hao watairithi nchi.'—Zaburi 37:7,9.

'KWA saburi yenu mtazimiliki nafsi zenu.' 'Mnahitaji saburi.' 'Saburi na iwe na kazi kamilifu, mpate kuwa wakamilifu na watimilifu.' Maneno kama haya ya Roho Mtakatifu yanatuonyesha jinsi saburi ilivyo jambo muhimu katika maisha na tabia ya Kikristo. Wala hakuna mahali pazuri zaidi pa kuikuza na kuidhihirisha kuliko katika kumngojea Mungu. Hapo ndipo tunapogundua jinsi tulivyo wepesi wa kukosa saburi, na maana ya kukosa kwetu saburi. Nyakati nyingine twakiri kwamba tunawakosea saburi watu na mazingira yanayotuzuia, au twajikosea saburi sisi wenyewe kwa ajili ya maendeleo yetu ya polepole katika maisha ya Kikristo. Tukijitia kweli kumngojea Mungu, tutaona ya kuwa ni Yeye tunayemkosea saburi, kwa sababu hafanyi mara moja, wala upesi kama tupendavyo, yale tuyatakayo. Ni katika kumngojea Mungu ndipo macho yetu yanapofumbuliwa ili tuyaamini mapenzi yake yenye hekima na enzi kuu, na kuona kwamba kadiri tunavyojisalimisha kwayo kabisa, mapema zaidi na kikamilifu zaidi, ndivyo baraka yake iwezavyo kutujia kwa hakika zaidi.

'Si kwa yule atakaye, wala si kwa yule apigaye mbio, bali ni kwa Mungu arehemuye.' Hatuna uwezo wa kuyaongeza wala kuyatia nguvu maisha yetu ya kiroho, kama vile hatukuwa na uwezo wa kuyaanzisha. Sisi 'tulizaliwa, si kwa mapenzi ya mwili, wala kwa mapenzi ya mtu, bali kwa mapenzi ya Mungu.' Vivyo hivyo, kutaka kwetu na kupiga mbio kwetu, shauku yetu na juhudi yetu, havifai kitu; yote ni 'kwa Mungu arehemuye.' Mazoezi yote ya maisha ya kiroho, kusoma kwetu na kuomba kwetu, kutaka kwetu na kutenda kwetu, yana thamani yake kubwa sana. Lakini hayawezi kufika mbali zaidi ya hili: kutuonyesha njia na kutuandaa katika unyenyekevu ili tumtazame na kumtegemea Mungu mwenyewe peke yake, na kwa saburi kuungojea wakati wake mwema na rehema zake. Kungojea huko kunakusudiwa kutufundisha kwamba twamtegemea Mungu kabisa katika kutenda kwake kwa nguvu, na kutufanya kwa saburi kamilifu tujiweke mikononi mwake. Wamngojao Bwana watairithi nchi; ile nchi ya ahadi pamoja na baraka zake. Warithi hawana budi kungoja; nao wanaweza kungoja bila hasara.

'Ustarehe katika Bwana, ukamngojee kwa saburi.' Pambizoni, badala ya 'Ustarehe katika Bwana,' pametolewa 'Umnyamalie Bwana,' au, katika tafsiri ya Kiingereza iitwayo Revised Version, 'Utulie mbele za Bwana.' Kustarehe katika Bwana, katika mapenzi yake, ahadi yake, uaminifu wake, na upendo wake, ndiko kuifanyako saburi kuwa nyepesi. Na kustarehe ndani yake si kitu kingine ila kumnyamalia, kutulia mbele zake. Ni kuziacha fikira zetu na matakwa yetu, hofu zetu na matumaini yetu, vitulizwe na kunyamazishwa katika ile amani kuu ya Mungu ipitayo akili zote. Amani hiyo huilinda mioyo yetu na nia zetu tunapokuwa na wasiwasi kwa ajili ya jambo lo lote, kwa sababu tumemjulisha haja zetu. Kustarehe, kunyamaza, kutulia, na kungojea kwa saburi, vyote hupata nguvu na furaha yake katika Mungu mwenyewe.

Ulazima wa saburi, na busara yake, na baraka yake, vitafunuliwa kwa nafsi ingojeayo. Saburi yetu itaonekana kuwa yalingana na saburi ya Mungu. Yeye hutamani kwa shauku kuu kutubariki kikamilifu, zaidi ya vile sisi wenyewe tuwezavyo kutamani. Lakini, kama vile mkulima avumiliaye kwa saburi nyingi hata matunda yaive, ndivyo Mungu ajishushavyo kwa ajili ya upole wetu wa kwenda polepole, akatuchukulia kwa uvumilivu mwingi. Na tulikumbuke hili, tukangoje kwa saburi: kwa kila ahadi na kila jibu la maombi neno hili ni kweli: 'Mimi, Bwana, nitalihimiza kwa wakati wake.'

'Ustarehe katika Bwana, ukamngojee kwa saburi.' Naam, umngojee Yeye. Usitafute msaada tu, wala kipawa ukihitajicho tu; mtafute Yeye mwenyewe; umngojee Yeye. Mpe Mungu utukufu wake kwa kustarehe ndani yake, kwa kumtumaini kikamilifu, kwa kumngojea kwa saburi. Saburi hii humpa heshima kuu; humwachia Yeye, akiwa Mungu aketiye katika kiti cha enzi, aifanye kazi yake; hujitoa nafsi kabisa mikononi mwake. Humwacha Mungu kuwa Mungu. Kama kungoja kwako ni kwa ajili ya haja fulani maalum, ngoja kwa saburi. Kama kungoja kwako ni zaidi mazoezi ya maisha ya kiroho, kutafuta kumjua Mungu zaidi na kuwa naye zaidi, ngoja kwa saburi. Ikiwa ni katika vipindi vifupi maalum vya kungoja, au ni mazoea ya nafsi ya daima; ustarehe katika Bwana, utulie mbele za Bwana, ukangoje kwa saburi. ‘Wamngojao Bwana watairithi nchi.'

'Ee nafsi yangu, umngojee Mungu peke yake!'