Kwa Moyo

Siku ya Tisa. KUMNGOJEA MUNGU: Kwa Moyo.

'Iweni hodari, na mioyo yenu ipate ushujaa,

Ninyi nyote mnaomngojea Bwana.'— Zaburi 31:24.

MANENO haya yanakaribia kufanana na yale ya tafakari yetu iliyopita. Lakini nayatumia tena kwa furaha ili kukazia somo linalohitajika sana kwa wote wanaotamani kujifunza kwa kweli na kwa ukamilifu maana ya kumngojea Mungu. Somo lenyewe ni hili: Ni kwa moyo tunapaswa kumngojea Mungu. 'Na mioyo yenu ipate ushujaa.' Kungojea kwetu kote kunategemea hali ya moyo. Kama ulivyo moyo wa mtu, ndivyo alivyo mbele za Mungu. Hatuwezi kusonga mbele zaidi wala kuingia ndani zaidi katika patakatifu pa uwepo wa Mungu ili kumngojea huko, kuliko vile moyo wetu ulivyoandaliwa kwa hilo na Roho Mtakatifu. Ujumbe ni huu: 'Na mioyo yenu ipate ushujaa, ninyi nyote mnaomngojea Bwana.'

Kweli hii yaonekana rahisi sana, hata wengine waweza kuuliza, Je, si wote wakubalio jambo hili? kuna haja gani ya kulisisitiza hivi kwa namna ya pekee? Ni kwa sababu Wakristo wengi sana hawana ufahamu wo wote wa tofauti kubwa iliyopo kati ya dini ya akili na dini ya moyo, na ile ya kwanza hukuzwa kwa bidii nyingi kuliko ile ya pili. Hawajui jinsi moyo ulivyo mkuu kuliko akili kupita kiasi. Ni humu ndimo inapopasa kutafutwa mojawapo ya sababu kuu za udhaifu wa maisha yetu ya Kikristo, na ni pale tu jambo hili lielewekapo ndipo kumngojea Mungu kutaleta baraka yake kamili.

Mithali 3:5 yaweza kusaidia kuifanya maana yangu iwe wazi. Ikinena juu ya maisha ya kumcha Mungu na ya kibali chake, yasema, 'Mtumaini Bwana kwa moyo wako wote, wala usizitegemee akili zako mwenyewe.' Katika dini yote inatupasa kuzitumia nguvu hizi mbili. Akili inapaswa kukusanya maarifa kutoka katika neno la Mungu, na kukiandaa chakula ambacho kwacho moyo pamoja na maisha ya ndani hulishwa. Lakini hapa ndipo inapoingia hatari ya kutisha, ya sisi kuzitegemea akili zetu wenyewe, na kuutumainia ufahamu wetu wa mambo ya Mungu. Watu hudhani kwamba wakijishughulisha na kweli, maisha ya kiroho yatatiwa nguvu kana kwamba ni jambo la kawaida tu. Lakini sivyo ilivyo hata kidogo. Ufahamu hushughulika na dhana na mifano ya mambo ya Mungu, lakini hauwezi kuyafikia maisha halisi ya nafsi. Ndiyo sababu ya ile amri, 'Mtumaini Bwana kwa moyo wako wote, wala usizitegemee akili zako mwenyewe.' Ni kwa moyo mtu huamini, na kuingia katika uhusiano na Mungu. Ni ndani ya moyo Mungu ameweka Roho wake, ili awe humo kwetu uwepo na nguvu ya Mungu itendayo kazi ndani yetu. Katika dini yetu yote ni moyo ndio unaopaswa kutumaini na kupenda na kuabudu na kutii. Akili yangu haina uwezo wo wote wa kuyaumba wala kuyadumisha maisha ya kiroho ndani yangu: moyo lazima umngojee Mungu ili yeye ayatende ndani yangu.

Katika jambo hili ni kama ilivyo katika maisha ya mwili. Akili yangu yaweza kuniambia nile na ninywe nini, na jinsi chakula kinavyonilisha. Lakini katika kula na kulishwa akili yangu haiwezi kufanya lo lote: mwili una viungo vyake kwa ajili ya kazi hiyo maalum. Vivyo hivyo, akili yaweza kuniambia neno la Mungu lasema nini, lakini haiwezi kufanya lo lote katika kuilisha nafsi kwa mkate wa uzima—hilo laweza kufanywa na moyo peke yake kwa imani yake na tumaini lake kwa Mungu. Mtu aweza kuwa anajifunza asili na matokeo ya chakula au ya usingizi; atakapo kula au kulala huyaweka kando mawazo yake na kujifunza kwake, akaitumia nguvu ya kula au ya kulala. Vivyo hivyo Mkristo ahitaji siku zote, akiisha kujifunza au kulisikia neno la Mungu, kuacha mawazo yake, asiweke tumaini lake ndani yake, na kuuamsha moyo wake ujifungue mbele za Mungu, na kutafuta ushirika ulio hai pamoja naye.

Hii basi ndiyo heri ya kumngojea Mungu, kwamba naukiri unyonge wa mawazo yangu yote na juhudi zangu zote, na kujiweka tuli ili kuuinamisha moyo wangu mbele zake katika kimya kitakatifu, na kumtumainia yeye kuifanya upya na kuitia nguvu kazi yake mwenyewe ndani yangu. Na hili ndilo hasa somo la fungu letu, 'Na mioyo yenu ipate ushujaa, ninyi nyote mnaomngojea Bwana.' Kumbuka tofauti iliyopo kati ya kujua kwa akili na kuamini kwa moyo. Jihadhari na jaribu la kuzitegemea akili zako, pamoja na mawazo yake yaliyo wazi na yenye nguvu. Hayo yakusaidia tu kujua kile ambacho moyo unapaswa kukipata kutoka kwa Mungu: yenyewe si kitu ila mifano na vivuli tu. 'Na mioyo yenu ipate ushujaa, ninyi nyote mnaomngojea Bwana.' Uweke moyo wako mbele zake kama ile sehemu ya ajabu ya asili yako ya kiroho ambayo ndani yake Mungu hujifunua, na ambayo kwayo waweza kumjua. Sitawisha tumaini kuu kabisa kwamba, ijapokuwa huwezi kuona ndani ya moyo wako, Mungu anatenda kazi humo kwa Roho wake Mtakatifu. Uuache moyo ungojee nyakati nyingine katika kimya na utulivu mkamilifu; katika vilindi vyake vilivyofichika Mungu atatenda kazi. Uwe na hakika ya jambo hili, nawe umngojee tu. Utie moyo wako wote, pamoja na utendaji wake wa siri, mikononi mwa Mungu daima. Yeye autaka moyo, naye auchukua, na kama Mungu hukaa ndani yake. 'Iweni hodari, na mioyo yenu ipate ushujaa, ninyi nyote mnaomngojea Bwana.’

'Ee nafsi yangu, umngojee Mungu peke yake!'