Tunda Zaidi

Na Kila Tawi Lizaalo Hulisafisha, Ili Lizidi Kuzaa—Yohana 15:2

Wazo la tunda liko wazi mno machoni pake yeye aonaye mambo jinsi yalivyo, tunda ni kweli kabisa jambo lile pekee ambalo Mungu ameukaza moyo wake juu yake, hata Bwana wetu, baada ya kusema kwamba tawi lisilozaa tunda huondolewa, mara huongeza: na palipo na tunda, shauku pekee ya Mkulima ni tunda zaidi. Kama kipawa cha neema yake, kama ishara ya nguvu za kiroho, kama kudhihirisha utukufu wa Mungu na wa Kristo, kama njia pekee ya kutosheleza uhitaji wa ulimwengu, Mungu hutamani tunda zaidi, na huandaa kwa ajili yake.

Tunda Zaidi—Hili ni neno linalochunguza sana. Kama makanisa na kama watu binafsi, hakuna hatari inayotutisha kama kuridhika na nafsi. Roho ile ya siri ya Laodikia—tu matajiri, tumejitajirisha, wala hatuna haja ya kitu—yaweza kutawala pale isipohisiwa. Onyo lile la Kimungu—maskini, mnyonge, na mwenye mashaka—hupata itikio dogo pale linapohitajika zaidi.

Tusiridhike na wazo kwamba tunachukua sehemu sawa na wengine katika kazi inayofanyika, au kwamba watu wameridhika na jitihada zetu katika utumishi wa Kristo, au hata kutuonyesha kama mifano ya kuigwa. Shauku yetu pekee na iwe kujua kama tunazaa tunda lote ambalo Kristo yu tayari kulitoa kupitia kwetu tukiwa matawi yaliyo hai, katika muungano wa karibu na ulio hai pamoja naye mwenyewe, kama tunauridhisha moyo wa upendo wa Mkulima yule mkuu, Baba yetu aliye Mbinguni, katika shauku yake ya tunda zaidi.

Tunda Zaidi—Neno hili huja kwa mamlaka ya Kimungu ili kuchunguza na kuyajaribu maisha yetu: mwanafunzi wa kweli atajitoa kwa moyo wote kwenye nuru yake takatifu, naye atauliza kwa bidii ili Mungu mwenyewe amwonyeshe lipi linaloweza kupungua katika kiasi au katika tabia ya tunda alizalo. Basi na tuamini kwamba Neno lakusudiwa kutuongoza mbele kwenye uzoefu ulio kamili zaidi wa kusudi la Baba la upendo, wa utimilifu wa Kristo, na wa pendeleo la ajabu la kuzaa tunda tele katika wokovu wa watu.

Tunda Zaidi—Neno hili ni la kutia moyo mno. Na tulisikilize. Ni kwa tawi lile linalozaa tunda ndipo ujumbe huja: tunda zaidi. Mungu hadai hili kama Farao msimamizi wa kazi, au kama Musa mtoa-sheria, bila kutoa njia. Yeye huja kama Baba, atoaye kile aombacho, na kutenda kile aamuruo. Yeye huja kwetu tukiwa matawi yaliyo hai ya Mzabibu ulio hai, na hujitolea kutenda tunda zaidi ndani yetu, tukijitoa tu mikononi mwake. Je, hatutakubali dai hilo, kupokea toleo hilo, na kumtazamia yeye alitende ndani yetu?

“Ili lizidi kuzaa”: basi na tuamini kwamba kama vile mwenye mzabibu afanyavyo kila kitu ili kuzifanya zabibu kuwa nyingi na kubwa kadiri iwezekanavyo, ndivyo Mkulima wa Kimungu atakavyofanya yote yanayohitajika ili kutufanya tuzae tunda zaidi. Anachotaka tu ni sisi kuelekeza shauku ya moyo wetu juu yake, kujikabidhi kwa kazi yake na uangalizi wake, na kwa furaha kumtazamia yeye afanye kazi yake iliyo kamili ndani yetu. Mungu ameukaza moyo wake juu ya tunda zaidi; Kristo angoja kulitenda ndani yetu; na tumtazame juu kwa furaha Mkulima wetu wa Kimungu na Mzabibu wetu wa mbinguni, ili kuhakikisha tunazaa tunda zaidi.

Baba yetu uliye Mbinguni, wewe ndiwe Mkulima wa mbinguni. Na Kristo ni Mzabibu wa mbinguni. Nami ni tawi la mbinguni, mshiriki wa uhai wake wa mbinguni, ili nizae tunda lake la mbinguni. Baba, nguvu za uhai wake na zinijaze hivyo, hata nizidi kuzaa tunda sikuzote, kwa utukufu wa jina lako.