Tunda

Kila Tawi Ndani Yangu Lisilozaa Huliondoa—Yohana 15:2

Tunda.—Hili ndilo neno kuu linalofuata tulilo nalo: Mzabibu, Mkulima, tawi, tunda. Bwana wetu ana la kutuambia gani kuhusu tunda? Ni hili tu—kwamba tunda ndilo kusudi pekee la tawi, na kwamba kama halizai tunda, Mkulima hulitoa. Mzabibu ni utukufu wa Mkulima; tawi ni utukufu wa mzabibu; tunda ni utukufu wa tawi; kama tawi halitoi tunda, halina utukufu wala thamani; ni chukizo na kizuizi; Mkulima hulitoa. Sababu pekee ya kuwepo kwa tawi, alama pekee ya kuwa tawi la kweli la Mzabibu wa mbinguni, sharti pekee la kuruhusiwa na Mkulima wa Kimungu kushiriki uhai ulio wa Mzabibu—ni kuzaa tunda.

Nalo tunda ni nini? Ni kitu ambacho tawi huzaa, si kwa ajili yake mwenyewe, bali kwa ajili ya mwenyewe wake; kitu ambacho ni cha kuchumwa na kuchukuliwa mbali. Kweli tawi hupokea kutoka kwa utomvu wa mzabibu kwa ajili ya uhai wake mwenyewe, ambao kwao hunenepa na kuwa imara zaidi. Lakini ugavi huu wa kujiendeleza kwake mwenyewe uko chini kabisa ya kutimiza kusudi la kuwepo kwake—kuzaa tunda. Ni kwa sababu Wakristo hawaielewi wala kuikubali kweli hii, hata hushindwa hivyo katika jitihada na maombi yao ya kuishi maisha ya tawi. Mara nyingi huyatamani kwa bidii nyingi; husoma na kutafakari na kuomba, na bado hushindwa, wakishangaa kwa nini? Sababu ni rahisi sana: hawajui kwamba kuzaa tunda ndilo jambo pekee walilookolewa kwa ajili yake. Kama vile Kristo alivyokuwa Mzabibu wa kweli kwa kusudi moja tu, wewe pia umefanywa tawi, kwa kusudi moja tu la kuzaa tunda kwa ajili ya wokovu wa watu. Mzabibu na tawi vyote viko chini ya sheria isiyobadilika ya kuzaa tunda kama sababu pekee ya kuwepo kwao. Kristo na mwaminio, Mzabibu wa mbinguni na tawi, vyote vina nafasi yao ulimwenguni kwa kusudi moja tu, kuupeleka upendo wa Mungu wa kuokoa kwa watu. Kwa hiyo neno hili zito: Kila tawi lisilozaa tunda, huliondoa.

Na tuwe waangalifu hasa juu ya kosa moja kubwa. Wakristo wengi hufikiri wokovu wao wenyewe ndio jambo la kwanza; maisha yao ya kidunia na kufanikiwa kwao, pamoja na kuwatunza jamaa zao, jambo la pili; na wakati na hamu ile inayobaki ndiyo yaweza kutolewa kwa kuzaa tunda, kwa kuokoa watu. Si ajabu kwamba mara nyingi wakati au hamu kidogo mno huweza kupatikana. La, Mkristo, kusudi pekee ambalo umefanywa kwalo kiungo cha Mwili wa Kristo ni ili Kichwa kiwe nawe kutekeleza kazi yake ya kuokoa. Kusudi pekee alilokuwa nalo Mungu katika kukufanya wewe tawi ni ili Kristo kwa kupitia kwako alete uzima kwa watu. Wokovu wako binafsi, biashara yako na kuwahangaikia jamaa yako, viko chini kabisa ya jambo hili. Lengo lako la kwanza maishani, lengo lako la kwanza kila siku, lipaswe kuwa kujua jinsi Kristo apendavyo kutimiza kusudi lake ndani yako.

Na tuanze kufikiri kama Mungu afikirivyo. Na tukubali mafundisho ya Kristo na kuyaitikia. Kusudi pekee la mimi kuwa tawi, alama pekee ya mimi kuwa tawi la kweli, sharti pekee la kukaa kwangu na kukua nikawa imara, ni kwamba nizae tunda la Mzabibu wa mbinguni ili watu wanaokufa wale na waishi. Na jambo lile ambalo naweza kuwa na uhakika kamili kabisa nalo ni kwamba, nikiwa na Kristo kama Mzabibu wangu, na Baba kama Mkulima wangu, naweza kweli kuwa tawi lizaalo tunda.

Baba yetu, wewe waja ukitafuta tunda. Tufundishe, twakuomba, tutambue jinsi hili lilivyo kweli kusudi pekee la kuwepo kwetu, na la muungano wetu na Kristo. Lifanye kuwa shauku pekee ya mioyo yetu kuwa matawi, yaliyojaa Roho wa Mzabibu, hata tuzae tunda kwa wingi.