Tawi

Kila tawi ndani yangu lisilozaa huliondoa—Yohana 15:2

Hapa tunalo mojawapo ya maneno makuu ya mfano huu—tawi. Mzabibu wahitaji matawi: pasipo matawi hauwezi kufanya lo lote, hauwezi kuzaa tunda lo lote. Kama vile ilivyo muhimu kujua juu ya Mzabibu, na Mkulima, ndivyo ilivyo muhimu kutambua tawi ni nini. Kabla hatujasikiliza yale Kristo aliyo nayo ya kusema juu yake, na tuchukue kwanza kabisa maana ya tawi ni nini, na linalotufundisha juu ya maisha yetu ndani ya Kristo. Tawi ni kipande tu cha mti, kilichotolewa na mzabibu kwa kusudi hilo moja la kuutumikia katika kuzaa tunda lake. Ni la asili ile ile ya mzabibu, na lina uhai mmoja na roho moja nao. Fikiri tu kwa kitambo juu ya mafunzo yanayodokezwa na hili.

Liko funzo la kujitoa kabisa. Tawi lina shabaha moja tu ambayo kwa hiyo lipo, kusudi moja ambalo kwalo limejitoa kabisa. Nalo ni, kuzaa tunda ambalo mzabibu unataka kulizaa. Na vivyo hivyo mwamini ana sababu moja tu ya kuwa kwake tawi—sababu moja tu ya kuwapo kwake duniani —kwamba Mzabibu wa mbinguni apate kupitia kwake kuzaa tunda lake. Heri nafsi ijuayo hili, iliyolikubali, na isemayo, Nimekombolewa nami naishi kwa ajili ya jambo moja—kama vile tawi la asili lilivyokuwapo kwa ajili ya kuzaa tunda peke yake, mimi pia; kama vile Mzabibu wa mbinguni ulivyoko kwa ajili ya kuzaa tunda, mimi pia. Kama nilivyopandwa na Mungu ndani ya Kristo, nimejitoa kabisa kuzaa tunda ambalo Mzabibu unataka kulizaa.

Liko funzo la kufanana kikamilifu. Tawi ni sawasawa kabisa na mzabibu kwa kila upande—asili ile ile, uhai ule ule, mahali pale pale, kazi ile ile. Katika haya yote ni kitu kimoja kisichoweza kutengwa. Na vivyo hivyo mwamini yampasa kujua kwamba ni mshiriki wa asili ya Kimungu, na ana asili na roho ya Kristo hasa ndani yake, na kwamba wito wake mmoja ni kujitoa kwa kufanana kikamilifu na Kristo. Tawi ni mfano kamili wa mzabibu; tofauti pekee ni kwamba, mmoja ni mkubwa na wenye nguvu, na chanzo cha nguvu, mwingine ni mdogo na dhaifu, ukihitaji na kupokea nguvu sikuzote. Vivyo hivyo mwamini yu, na yampasa kuwa, mfano kamili wa Kristo.

Liko funzo la kutegemea kabisa. Mzabibu una akiba zake za uhai na utomvu na nguvu, si kwa ajili yake wenyewe, bali kwa ajili ya matawi. Matawi ni, na yana, kile tu ambacho mzabibu huutoa na kukikirimu. Mwamini ameitwa, nayo ni baraka yake iliyo kuu kuingia katika maisha ya kutegemea Kristo kabisa na bila kukoma. Mchana na usiku, kila dakika, Kristo atafanya kazi ndani yake yote ayahitajiyo.

Na kisha funzo la tumaini lisilo na shaka. Tawi halina hangaiko; mzabibu hutoa yote; lina budi tu kujitoa na kupokea. Ni kuiona kweli hii kunakoongoza kwenye pumziko la imani lililo na baraka, siri ya kweli ya kukua na nguvu: “Nayaweza mambo yote katika yeye anitiaye nguvu.”

Maisha gani yangetujia kama tungekubali tu kuwa matawi! Mpendwa mwana wa Mungu, jifunze funzo hili. Una jambo moja tu la kufanya: Uwe tawi tu—si zaidi, si pungufu! Uwe tawi tu; Kristo atakuwa Mzabibu utoao yote. Na Mkulima, Mungu mwenye nguvu, aliyeufanya Mzabibu kuwa kile ulivyo, kwa hakika atalifanya tawi kuwa kile linalopaswa kuwa.

Bwana Yesu, nakuomba, unifunulie siri ya mbinguni ya tawi, katika muungano wake ulio hai na Mzabibu, katika haki yake juu ya utimilifu wake wote. Na utoshelevu wako wa yote, ukiyashika na kuyajaza matawi yako, uniongoze kwenye pumziko la imani lijualo kwamba wewe wafanya yote.