Matunda Yadumuyo

Ni mimi niliyewachagua ninyi; nami nikawaweka mwende mkazae matunda, na matunda yenu yapate kudumu—Yohana 15:16

Kuna matunda mengine yasiyoweza kukaa. Aina moja ya pea au tofaa sharti itumike mara moja; aina nyingine yaweza kuhifadhiwa hata mwaka ujao. Vivyo hivyo katika kazi ya Kikristo kuna matunda mengine yasiyodumu. Yaweza kuwako mengi yapendezayo na kujenga, na bado hakuna alama ya kudumu iliyowekwa juu ya nguvu ya ulimwengu au hali ya Kanisa. Kwa upande mwingine, iko kazi iachayo alama yake kwa vizazi vingi au kwa milele. Ndani yake nguvu ya Mungu hujidhihirisha kwa kudumu. Ni yale matunda ambayo Paulo huyanena aelezapo namna mbili za huduma: “Neno langu na kuhubiri kwangu hakukuwa kwa maneno ya hekima yenye kushawishi, bali kwa dalili za Roho na za nguvu; ili imani yenu isiwe katika hekima ya wanadamu, bali katika nguvu za Mungu.” Kadiri ya wingi wa mwanadamu na hekima yake na nguvu yake, ndivyo upungufu wa uthabiti; kadiri ya wingi wa Roho wa Mungu, ndivyo wingi wa imani isimamayo katika nguvu ya Mungu.

Tunda hufunua tabia ya mti litokalo. Ni nini siri ya kuzaa matunda yadumuyo? Jibu ni rahisi. Ni kadiri uhai wetu ukaavyo ndani ya Kristo, kadiri tukaavyo ndani yake, ndipo matunda tuyazaayo yatadumu. Kadiri tunavyoruhusu yote yatokanayo na mapenzi na juhudi za kibinadamu yakatwe na kusafishwa na Mkulima wa Kimungu, kadiri nafsi zetu zinavyojiondoa kwa nguvu zaidi kutoka mambo ya nje ili Mungu apate kutenda kazi ndani yetu kwa Roho wake; yaani, kadiri tunavyokaa ndani ya Kristo kwa ukamilifu zaidi, ndivyo matunda yetu yatakavyozidi kudumu.

Ni wazo la heri jinsi gani! Alikuchagua wewe, na akakuweka uzae matunda, na matunda yako yapate kudumu. Hakukusudia kamwe tawi mojawapo lake lizae matunda yasiyodumu. Kadiri niingiavyo ndani zaidi katika kusudi la neema hii yake iteuayo, ndivyo utakavyozidi kuwa imara uhakika wangu kwamba naweza kuzaa matunda yaendayo hata uzima wa milele, kwa nafsi yangu na kwa wengine. Kadiri niingiavyo ndani zaidi katika kusudi hili la upendo wake uteuao, ndivyo nitakavyozidi kutambua kiungo kilicho kati ya kusudi litokalo tangu milele, na tunda liendalo hata milele: kule kukaa ndani yake. Kusudi ni lake, yeye atalitimiza; tunda ni lake, yeye atalizaa; kule kukaa ni kwake, yeye atakudumisha.

Kila mtu ajidaiye kuwa mtenda kazi wa Kikristo na asimame kidogo. Ajiulize kama unaacha alama yako ya milele juu ya wale wanaokuzunguka. Si kuhubiri kwako wala kufundisha kwako, si nguvu ya mapenzi yako wala uwezo wako wa kushawishi, ndio utakaohakikisha haya. Yote yategemea kuwa na maisha yako yaliyojaa Mungu na nguvu yake. Na hilo tena lategemea kuishi kwako maisha ya kweli yaliyo kama ya tawi ya kukaa ndani—ushirika wa karibu sana na usiokatika pamoja na Kristo. Ni lile tawi, likaalo ndani yake, lizaalo matunda mengi, matunda yatakayodumu.

Ee Bwana mwenye heri, nakuomba, ifunulie nafsi yangu ya kwamba umenichagua nizae matunda mengi. Hili na liwe tumaini langu, ya kwamba kusudi lako laweza kutimizwa—wewe ulinichagua. Hili na liwe nguvu yangu ya kuacha vitu vyote na kujitoa kwako. Wewe mwenyewe utakikamilisha ulichokianza. Nivute hivyo nipate kukaa ndani ya upendo na uhakika wa kusudi lile la milele, ili nguvu ya umilele inimiliki, na matunda niyazaayo yapate kudumu.

Ili mpate kuzaa matunda. Ee Mzabibu wangu wa mbinguni, yaanza kunizukia nafsini mwangu ya kwamba tunda, matunda zaidi—matunda mengi—matunda yadumuyo ndilo jambo pekee ulilo nalo la kunipa mimi, na jambo pekee ambalo mimi kama tawi ninalo la kukupa wewe! Mimi hapa. Ee Bwana mwenye heri, litimize kusudi lako ndani yangu; nijalie kuzaa matunda mengi, matunda yadumuyo, kwa utukufu wako.