Kuteuliwa

Si ninyi mlionichagua mimi, bali ni mimi niliyewachagua ninyi; nami nikawaweka mwende mkazae matunda—Yohana 15:16

Tawi halimchagui mzabibu, wala haliamui juu ya mzabibu upi litakaoota. Mzabibu ndio uzaao tawi, kama upendavyo na pale upendapo. Vivyo hivyo Kristo asema: “Si ninyi mlionichagua mimi, bali ni mimi niliyewachagua ninyi.” Lakini wengine watasema: je, si huu ndio tofauti kati ya tawi katika ulimwengu wa asili na katika ulimwengu wa kiroho, kwamba mwanadamu ana mapenzi na uwezo wa kuchagua, na kwamba ni kwa sababu yeye ameamua kumpokea Kristo, ameamua kumchagua yeye kuwa Bwana, ndiyo maana sasa amekuwa tawi? Jambo hili bila shaka ni kweli. Walakini ni nusu ya kweli tu. Somo la Mzabibu, na mafundisho ya Bwana wetu, huelekeza kwenye ile nusu nyingine, iliyo na kina zaidi, ile upande wa Kimungu wa kuwa kwetu ndani ya Kristo. Kama yeye asingelituchagua, tusingelimchagua yeye kamwe. Kumchagua kwetu yeye kulikuwa ni tokeo la yeye kutuchagua sisi, na kutushika. Kwa asili ya mambo yenyewe, ni haki yake mwenyewe kama Mzabibu kulichagua na kuliumba tawi lake mwenyewe. Yote tuliyo, twadaiwa kwa “kule kuteuliwa kwa neema.” Kama twataka kumjua Kristo kama Mzabibu wa kweli, chanzo pekee na nguvu ya uhai wa tawi, na sisi wenyewe kama matawi katika kumtegemea kwetu kuliko kamili, kwa heri kuu, na kwa usalama mkuu, na tunywe sana kweli hii ya heri: “Si ninyi mlionichagua mimi, bali ni mimi niliyewachagua ninyi.”

Na ni kwa shabaha gani Kristo asema haya? Ili wapate kujua ni nini kusudi lile alilowachagulia, na wapate kuona, katika imani yao juu ya kuteuliwa kwao naye, uhakika wa kuutimiza mwisho wao. Katika Maandiko yote hii ndiyo shabaha kuu ya mafundisho ya kuteuliwa. “Waliochaguliwa tangu asili wafananishwe na mfano wa Mwana wake” (kuwa matawi katika mfano na sura ya Mzabibu). “Alituchagua ili tuwe watakatifu.” “Aliwachagua tangu mwanzo mpate wokovu, katika kutakaswa na Roho.” “Wateule katika kutakaswa na Roho hata mkatii.” Wengine wamelitumia vibaya fundisho la kuteuliwa, na wengine, kwa kuogopa kutumiwa kwake vibaya, wamelikataa, kwa sababu wamelipuuza fundisho hili. Wamejishughulisha na chanzo chake kilichofichwa katika umilele, na siri zisizochunguzika za mashauri ya Mungu, badala ya kukubali ufunuo wa kusudi lake katika wakati, na baraka zile alizoziletea maisha yetu ya Kikristo.

Fikiri tu ni zipi baraka hizi. Katika mstari wetu Kristo hufunua kusudi lake la namna mbili katika kutuchagua tuwe matawi yake: kwamba tupate kuzaa matunda duniani, na kuwa na nguvu katika maombi mbinguni. Ni tumaini kubwa jinsi gani litokanalo na wazo hili la kwamba ametuchagua kwa kusudi hili, kwamba hatakosa kutuwezesha ili tukalitimize kusudi lake! Ni uhakika ulioje kwamba twaweza kuzaa matunda yatakayodumu, na kuomba hata tupokee! Ni mwito wa daima ulioje kwenye unyenyekevu na sifa iliyo na kina kikuu, kwenye kutegemea na kutumaini kuliko kamili kabisa! Yeye asingelituchagua kwa jambo tusilolifaa, wala kwa jambo asingaliweza kutuwezesha kulifaa. Ametuchagua; huu ndio uthibitisho, atatenda yote ndani yetu.

Na tusikilize kwa kimya cha nafsi Mzabibu wetu mtakatifu akisema na kila mmoja wetu: “Hukunichagua mimi!” Nasi na tuseme, “Naam, Bwana, lakini mimi nilikuchagua wewe! Amina, Bwana!” Mwombe akuonyeshe maana ya jambo hili. Ndani yake, Mzabibu wa kweli, uhai wako kama tawi una chanzo chake cha Kimungu, usalama wake wa milele, na nguvu ya kulitimiza kusudi lake. Kutoka kwake ambaye kwa mapenzi yake ya upendo wamdai yote, waweza kutumaini yote. Ndani yake—katika kusudi lake, nguvu yake, na uaminifu wake—katika upendo wake nami nikae.

Mimi nilikuchagua. Bwana, nifundishe maana ya jambo hili—ya kwamba umeuweka moyo wako juu yangu, na umenichagua nizae matunda yatakayodumu, na niombe maombi yatakayoshinda. Katika kusudi lako hili la milele nafsi yangu yataka kujipumzisha na kusema: “Kile alichonichagulia nitakuwa, naweza kuwa, nami nitakuwa.”