Maombi Yashindayo

Nami nikawaweka mwende mkazae matunda, na matunda yenu yapate kudumu; ili kwamba lo lote mmwombalo Baba kwa jina langu awapeni—Yohana 15:16

Katika mstari wa kwanza wa mfano wetu, Kristo alijifunua mwenyewe kuwa Mzabibu wa kweli, na Baba kuwa Mkulima, naye akajitakia yeye mwenyewe na Baba nafasi moyoni. Hapa, katika mstari wa mwisho, akusanya pamoja mafundisho yake yote juu yake mwenyewe na juu ya Baba katika lile kusudi la namna mbili alilowachagulia. Kwa habari yake mwenyewe, Mzabibu, kusudi lilikuwa, kwamba wazae matunda. Kwa habari ya Baba, lilikuwa, kwamba lo lote watakaloliomba kwa jina lake, litafanywa na Baba mbinguni. Kama vile tunda lilivyo uthibitisho mkuu wa uhusiano wa kweli na Kristo, ndivyo maombi yalivyo uthibitisho wa uhusiano wetu na Baba. Kukaa kuzaao matunda ndani ya Mwana, na maombi yashindayo kwa Baba, ndio mambo mawili makuu katika maisha ya kweli ya Kikristo.

Ili kwamba lo lote mmwombalo Baba kwa jina langu awapeni.—Haya ndiyo maneno ya mwisho ya mfano wa Mzabibu. Siri nzima ya Mzabibu na matawi yake huelekea kwenye ile siri nyingine—kwamba lo lote tuombalo kwa jina lake, Baba hutupa! Tazama hapa sababu ya upungufu wa maombi, na ya upungufu wa nguvu katika maombi. Ni kwa sababu twaishi kidogo mno maisha ya kweli ya tawi, kwa sababu twajipoteza kidogo mno ndani ya Mzabibu, tukikaa ndani yake kabisa, ndiyo maana twahisi kusukumwa kidogo mno kwenye maombi mengi, tukiwa na uhakika mdogo mno kwamba tutasikiwa, na hivyo hatujui jinsi ya kutumia jina lake kama ufunguo wa ghala ya Mungu. Mzabibu uliopandwa duniani umefika juu hata mbinguni; ni nafsi ile tu ikaayo ndani yake kwa ukamilifu na kwa nguvu, iwezayo kufika mbinguni kwa nguvu ya kushinda sana. Imani yetu katika mafundisho na kweli ya mfano huu, katika kweli na uhai wa Mzabibu, sharti ijithibitishe kwa nguvu katika maombi. Maisha ya kukaa na ya utii, ya upendo na furaha, ya kusafishwa na kuzaa matunda, hakika yataleta nguvu ya maombi yashindayo.

Lo lote mtakaloliomba—Ahadi hii walipewa wanafunzi waliokuwa tayari kujitoa wenyewe, kwa mfano wa Mzabibu wa kweli, kwa ajili ya wenzao. Ahadi hii ndiyo iliyokuwa riziki yao yote kwa kazi yao; waliipokea kama ilivyo, waliiamini, waliitumia, nao wakaiona kuwa ni kweli. Na tujitoe wenyewe, kama matawi ya Mzabibu wa kweli, na kwa mfano wake, kwa kazi ya kuwaokoa watu, ya kuzaa matunda kwa utukufu wa Mungu, nasi tutaona uharaka mpya na nguvu ya kuomba na kudai ile “lo lote mtakaloliomba.” Tutaamka na kuutambua wajibu wetu wa ajabu wa kuwa na, katika ahadi kama hii, funguo za ghala za Mfalme tulizopewa, nasi hatutapumzika hata tupokee mkate na baraka kwa ajili ya wanaopotea.

“Mimi niliwachagua ninyi, mpate kuzaa matunda, na matunda yenu yapate kudumu; ili kwamba lo lote mmwombalo Baba kwa jina langu awapeni.” Ee mwanafunzi mpendwa, tafuta zaidi ya yote kuwa mtu wa maombi. Hapa ndipo utumizi ulio wa juu kuliko yote wa upendeleo wako kama tawi la Mzabibu; hapa ndipo uthibitisho kamili wa kufanywa kwako upya katika mfano wa Mungu na wa Mwanawe; hapa ndipo nguvu yako ya kuonyesha jinsi wewe, kama Kristo, uishivyo si kwa ajili yako mwenyewe, bali kwa ajili ya wengine; hapa waingia mbinguni upate kupokea vipawa kwa ajili ya watu; hapa kukaa kwako ndani ya Kristo kumeleta kukaa kwake ndani yako, ili akutumie kama mfereji na chombo cha neema yake. Nguvu ya kuzaa matunda kwa ajili ya watu imetiwa taji kwa nguvu ya kushinda mbele za Mungu.

“Mimi ni mzabibu, na Baba yangu ndiye Mkulima.” Kazi ya Kristo ndani yako ni kukuleta hivyo kwa Baba hata Neno lake litimizwe ndani yako: “Siku ile mtaomba kwa jina langu; wala siwaambii ya kwamba mimi nitawaomba Baba kwa ajili yenu; kwa maana Baba mwenyewe awapenda ninyi.” Nguvu ya kumfikia Baba moja kwa moja kwa ajili ya watu, uhuru wa kuombea ukidai na kupokea baraka kwa ajili yao kwa imani, ndio utumizi ulio wa juu kuliko yote wa muungano wetu na Kristo. Wote wapendao kuwa matawi kwa kweli na kwa ukamilifu na wajitoe wenyewe kwa kazi ya kuombea. Ndiyo kazi kuu pekee ya Kristo Mzabibu mbinguni, chanzo cha nguvu kwa kazi yake yote. Ifanye kuwa kazi yako kuu pekee kama tawi: itakuwa nguvu ya kazi yako yote.

Kwa jina langu. Naam, Bwana, kwa jina lako, jina jipya ulilojipa mwenyewe hapa, Mzabibu wa kweli. Kama tawi, nikikaa ndani yako kwa kujitoa kote, kwa kutegemea kamili, kwa kufuatana kikamili, kwa kuzaa matunda kudumuko, naja kwa Baba, ndani yako, naye atanipa nikiombalo. Ee, maisha yangu na yawe ya kuombea kusikokoma na kushindako! Amina!