Urafiki wa Kristo: Ukaribu Wake

Siwaiti tena watumwa; kwa maana mtumwa hajui atendalo bwana wake; lakini ninyi nimewaita rafiki, kwa kuwa yote niliyoyasikia kwa Baba yangu nimewajulisha—Yohana 15:15

Uthibitisho ulio mkuu kuliko yote wa urafiki wa kweli, na chanzo kimojawapo kikuu cha heri yake, ni ule ukaribu usiozuia kitu chochote, unaomruhusu rafiki kushiriki siri zetu za ndani kabisa. Ni jambo la heri kuwa mtumishi wa Kristo; wale aliowakomboa hufurahi kujiita watumwa wake. Mara nyingi Kristo alikuwa amewanena wanafunzi kuwa watumishi wake. Katika upendo wake mkuu Bwana wetu sasa asema: “Siwaiti tena watumwa”; pamoja na kuja kwake Roho Mtakatifu enzi mpya ilikuwa itaanzishwe. “Mtumwa hajui atendalo bwana wake”—yeye hana budi kutii bila kushauriwa wala kuingizwa katika siri ya mipango yote ya bwana wake. “Lakini ninyi nimewaita rafiki, kwa kuwa yote niliyoyasikia kwa Baba yangu nimewajulisha.” Rafiki za Kristo hushiriki pamoja naye siri zote ambazo Baba amemkabidhi.

Na tufikiri maana ya jambo hili. Kristo alipozungumza juu ya kuzishika amri za Baba yake, hakumaanisha yale tu yaliyoandikwa katika Maandiko Matakatifu, bali zile amri za pekee alizopewa siku kwa siku, na saa kwa saa. Ni juu ya hizo aliposema: “Baba ampenda Mwana, naye humwonyesha yote ayafanyayo mwenyewe; naye atamwonyesha kazi kubwa kuliko hizi.” Yote aliyoyafanya Kristo yalikuwa kazi ya Mungu. Mungu alimwonyesha Kristo, hata akayatimiza mapenzi na kusudi la Baba, si kwa upofu na bila ufahamu, kama afanyavyo mwanadamu mara nyingi, bali kwa ufahamu kamili na kibali. Kama yeye aliyesimama katika shauri la Mungu, aliijua mipango ya Mungu.

Na hii ndiyo sasa heri ya kuwa rafiki za Kristo, kwamba sisi, kama watumishi, hatuyatendi mapenzi yake bila ufahamu mwingi wa kiroho juu ya maana na shabaha yake, bali twaingizwa, kama duara la ndani, katika kuyajua baadhi ya mawazo ya Mungu yaliyo ya siri zaidi. Tangu siku ile ya Pentekoste na kuendelea, kwa Roho Mtakatifu, Kristo angewaongoza wanafunzi wake katika kuzifahamu kiroho siri za ufalme, ambazo mpaka wakati huo alikuwa amezinena kwa mifano tu.

Urafiki hufurahia ushirika. Rafiki hufanya shauri pamoja. Rafiki huthubutu kukabidhiana yale ambayo kwa vyovyote hawangependa wengine wayajue. Ni nini kimpacho Mkristo njia ya kuufikia ukaribu huu mtakatifu pamoja na Yesu? Kimpacho uwezo wa kiroho wa kupokea yale mawasiliano ambayo Kristo huwa nayo ya kuwaeleza juu ya yale Baba aliyomwonyesha? “Ninyi mmekuwa rafiki zangu, mkitenda niwaamuruyo.” Ni utii wa upendo uisafishao nafsi. Jambo hilo halihusu amri za Neno peke yake, bali pia ule utumizi wa heri wa Neno katika maisha yetu ya kila siku, ambao hakuna awezaye kuutoa ila Bwana wetu mwenyewe. Lakini kadiri haya yanavyongojewa kwa kutegemea na kwa unyenyekevu, na kutiiwa kwa uaminifu, nafsi hupata kufaa kwa ushirika ulio wa karibu zaidi na zaidi, na maisha ya kila siku yaweza kuwa uzoefu wa daima: “Nimewaita rafiki; kwa kuwa yote niliyoyasikia kwa Baba yangu nimewajulisha.”

Nimewaita rafiki. Ni heshima isiyoelezeka jinsi gani! Ni upendeleo wa mbinguni jinsi gani! Ee Mwokozi, linene neno hilo kwa nguvu ndani ya nafsi yangu: “Nimekuita rafiki yangu, niliyekupenda, niliyekutumaini, ambaye nakujulisha yote yapitayo kati ya Baba yangu na mimi.”