Urafiki wa Kristo: Ushahidi Wake

Ninyi Mmekuwa Rafiki Zangu, Mkitenda Niwaamuruyo—Yohana 15:14

Bwana wetu amekwisha sema kile alichotoa kama uthibitisho wa urafiki wake: alitoa uhai wake kwa ajili yetu. Sasa anatuambia fungu letu litakalokuwa—kutenda yale anayotuamuru. Alitoa uhai wake ili kupatia upendo wake mahali mioyoni mwetu ili ututawale; itikio ambalo upendo wake unatuita nalo, na kutuwezesha kwalo, ni kwamba tutende ayatuamuruyo. Kadiri tuujuavyo upendo ule wa kufa, ndivyo tutakavyozitii amri zake kwa furaha. Kadiri tuzitiivyo amri, ndivyo tutakavyozidi kuujua upendo huo kwa ukamilifu. Kristo alikwisha sema: “Mkizishika amri zangu, mtakaa katika pendo langu.” Aona ni lazima kuirudia kweli hiyo tena: uthibitisho pekee wa imani yetu katika upendo wake, njia pekee ya kukaa ndani yake, alama pekee ya kuwa matawi ya kweli ni—kutenda yale anayotuamuru. Alianza kwa kujisalimisha kabisa kwa uhai wake kwa ajili yetu. Hawezi kutuomba kilicho kidogo kuliko hiki. Hiki peke yake ndio uhai katika urafiki wake.

Kweli hii, ya ulazima wa lazima wa utii, kutenda yote atuamuruyo Kristo, haina nafasi ile katika mafundisho yetu na maisha yetu ya Kikristo ambayo Kristo alikusudia iwe nayo. Tumeipa nafasi kubwa zaidi upendeleo kuliko wajibu. Hatukuuhesabu utii kamili kuwa sharti la uwanafunzi wa kweli. Wazo la siri kwamba haiwezekani kutenda yale atuamuruyo, na kwa hiyo haiwezi kutazamiwa kwetu, na hisia ya siri isiyofahamika kwamba kutenda dhambi ni jambo la lazima, mara nyingi vimeziibia amri na ahadi nguvu zake. Uhusiano wote na Kristo umekuwa na mawingu na kushushwa; kumngoja katika mafundisho yake, uwezo wa kuisikia na kuitii sauti yake, na kwa njia ya utii kuufurahia upendo na urafiki wake, vimedhoofishwa na kosa hilo la kutisha. Basi na tujaribu kurudi katika hali ile ya kweli, tuyachukue maneno ya Kristo kuwa ya kweli kihalisi kabisa, wala tusifanye kilicho kidogo zaidi kuwa sheria ya maisha yetu: “Ninyi mmekuwa rafiki zangu, mkitenda niwaamuruyo.” Hakika Bwana wetu haombi kilicho kidogo kuliko sisi kusema kwa moyo na kwa kweli: “Naam, Bwana, ulitendalo amri, hilo nitalitenda.”

Amri hizi zapaswa kutendwa kama uthibitisho wa urafiki. Uwezo wa kuzitenda wakaa kabisa katika uhusiano binafsi na Yesu. Kwa ajili ya rafiki ningeweza kutenda ambalo nisingelitenda kwa ajili ya mwingine. Urafiki wa Yesu ni wa mbinguni na wa ajabu hivi, hutujia kama nguvu ya upendo wa Kimungu ukiingia na kumiliki, ushirika usiokatika naye mwenyewe ni wa muhimu hivi kwao, hata unakusudia na kutia furaha na upendo vinavyoufanya utii kuwa furaha. Uhuru wa kudai urafiki wa Yesu, uwezo wa kuufurahia, neema ya kuudhihirisha katika heri yake yote—vyote hivi huja tunapotenda yale atuamuruyo.

Je, si jambo moja tu tunalolihitaji, kwamba tumwombe Bwana wetu ajidhihirishe kwetu katika upendo ule wa kufa ambao kwao alijithibitisha kuwa rafiki yetu, kisha tusikilize asemapo kwetu: “Ninyi mmekuwa rafiki zangu.” Tunapoona kile ambacho Rafiki yetu ametutendea, na jinsi ilivyo heri isiyoelezeka kuwa yeye atuita rafiki, kutenda amri zake kutakuwa tunda la asili la maisha yetu katika upendo wake. Hatutaogopa kusema: “Naam, Bwana, sisi tu rafiki zako, nasi twatenda yale utuamuruyo.”

Mkitenda. Naam, ni katika kutenda ndipo tunabarikiwa, ndipo tunakaa katika upendo wake, ndipo tunaufurahia urafiki wake. “Mkitenda niwaamuruyo!” Ee Bwana wangu, acha urafiki wako mtakatifu unilongoze katika upendo wa amri zako zote, na acha kutenda amri zako kunilongoze zaidi na zaidi ndani ya urafiki wako.