Urafiki wa Kristo: Chanzo Chake

Hakuna Aliye na Upendo Mwingi Kuliko Huu, wa Mtu Kuutoa Uhai Wake kwa ajili ya Rafiki Zake—Yohana 15:13

Katika mistari mitatu ifuatayo Bwana wetu anena juu ya uhusiano wake na wanafunzi wake kwa sura mpya—ule wa urafiki. Anatuelekeza kwenye upendo ambao ndani yake, kwa upande wake, urafiki huo una chanzo chake (mstari 13); kwenye utii kwa upande wetu ambao kwa huo hudumishwa (mstari 14); kisha kwenye urafiki mtakatifu ambao huutuongoza (mstari 15).

Uhusiano wetu na Kristo ni wa upendo. Alipokuwa akinena juu ya hili awali, alituonyesha upendo wake ulivyokuwa katika utukufu wake wa mbinguni; upendo ule ule ambao Baba alimpenda nao. Hapa twauona katika udhihirisho wake wa duniani—kuutoa uhai wake kwa ajili yetu. “Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake.” Kristo hutamani kweli kweli tujue kwamba shina la siri na nguvu ya yote aliyo nayo na ayatendayo kwa ajili yetu kama Mzabibu ni upendo. Tunapojifunza kuamini hili, tutahisi kwamba hapa pana jambo ambalo si tu twahitaji kulifikiri na kulijua, bali ni nguvu iliyo hai, uhai wa Kimungu tuhitajio kuupokea ndani yetu. Kristo na upendo wake haviwezi kutengwa; ni kitu kimoja. Mungu ni upendo, na Kristo ni upendo. Mungu na Kristo na upendo wa Kimungu vyaweza kujulikana tu kwa kuwa navyo, kwa uhai wao na uweza wao ukitenda kazi ndani yetu. “Uzima wa milele ndio huu, wakujue wewe”; hakuna kumjua Mungu ila kwa kuwa na uhai; uhai utendao kazi ndani yetu peke yake ndio utoao maarifa. Na vivyo hivyo upendo; kama tutaujua, ni lazima tunywe katika mto wake ulio hai, ni lazima umwagwe ndani yetu na Roho Mtakatifu.

“Hakuna aliye na upendo mwingi kuliko huu, wa mtu kuutoa uhai wake kwa ajili ya rafiki zake.” Uhai ndicho kitu cha thamani kuliko vyote alivyo navyo mtu; uhai ndio yote alivyo; uhai ndiye yeye mwenyewe. Hiki ndicho kipimo cha juu kuliko vyote cha upendo: mtu autoapo uhai wake, hazuii kitu, hutoa vyote alivyo navyo na alivyo. Ni jambo hili Bwana wetu Yesu atakalo kutufanya tulielewe kuhusu siri yake ya Mzabibu; pamoja na vyote alivyo navyo amejiweka mikononi mwetu. Anataka tumhesabu kuwa wetu hasa; anataka kuwa milki yetu kamili, ili nasi tuwe milki yake kamili. Alitoa uhai wake kwa ajili yetu katika mauti si kama tendo lipitalo tu, ambalo lilipokamilika basi liliisha; la, bali kama kujifanya wetu milele. Uhai kwa uhai; alitoa uhai wake kwa ajili yetu ili tuumiliki, ili nasi tuutoe uhai wetu kwa ajili yake ili aumiliki. Hili ndilo lifundishwalo na mfano wa Mzabibu na tawi, katika kuunganika kwao kwa ajabu, katika muungano wao ulio kamili.

Ni tunapojua kidogo cha jambo hili, si kwa akili au kwa mawazo, bali ndani sana ya moyo na maisha, ndipo tutaanza kuona yapaswayo kuwa maisha yetu kama matawi ya Mzabibu wa mbinguni. Alijitoa mwenyewe kwa mauti; alijipoteza mwenyewe, ili sisi tupate uhai ndani yake. Huyu ndiye mzabibu wa kweli, aishiye ili tu kuishi ndani yetu. Hiki ndicho chanzo na shina la urafiki ule mtakatifu ambao Kristo hutuita kuuingia.

Kubwa ni siri ya utauwa! Na tuungame ujinga wetu na kutokuamini kwetu. Tuache kuutegemea ufahamu wetu wenyewe na juhudi zetu wenyewe za kuimiliki. Tumngoje Roho Mtakatifu akaaye ndani yetu atuifunulie. Tuutumainie upendo wake usio na mwisho, uliotoa uhai wake kwa ajili yetu, kwamba utamiliki na kufurahi katika kutufanya kuwa wake kabisa.

Uhai wake kwa ajili ya rafiki zake. Jinsi yalivyo ya ajabu mafunzo ya Mzabibu, ukitoa uhai wake hasa kwa matawi yake! Naye Yesu alitoa uhai wake kwa ajili ya rafiki zake. Nao upendo huo hujitoa kwao na ndani yao. Ee Mzabibu wangu wa mbinguni, unifundishe jinsi unavyotamani kwa moyo wote kuishi ndani yangu!