Kama Nilivyowapenda Ninyi

Hii Ndiyo Amri Yangu, Kwamba Mpendane, Kama Nilivyowapenda Ninyi—Yohana 15:12

Hii ni mara ya pili Bwana wetu atumiapo usemi huu—Kama Nilivyo Mimi. Mara ya kwanza ulihusu uhusiano wake na Baba, akizishika amri zake, na kukaa katika upendo wake. Vivyo hivyo nasi tunapaswa kuzishika amri za Kristo, na kukaa katika upendo wake. Mara ya pili anena juu ya uhusiano wake nasi kama kanuni ya upendo wetu kwa ndugu zetu: “Mpendane, kama nilivyowapenda ninyi.” Katika kila hali tabia yake na mwenendo wake ndio unaopaswa kuwa sheria kwa wetu. Tena ni ile kweli tuliyoisisitiza zaidi ya mara moja—mfano ulio kamili kati ya Mzabibu na tawi.

Kama Nilivyo Mimi—Lakini je, si jambo la bure kudhani kwamba twaweza kuzishika amri zake, na kuwapenda ndugu, kama vile yeye alivyozishika za Baba yake, na kama alivyotupenda sisi? Je, jaribio hilo halina budi kuishia katika kushindwa na kukata tamaa? Bila shaka, kama tukitafuta kuitimiza amri hiyo kwa nguvu zetu, au bila kuielewa kikamilifu kweli ya Mzabibu na matawi yake. Lakini tukielewa kwamba “kama nilivyo mimi” ndilo somo moja kuu la mfano huu, ndiyo lugha ile ile ya daima ya Mzabibu kwa tawi, tutaona kwamba si swali la kile tuhisicho kwamba twaweza kutimiza, bali la kile Kristo awezacho kutenda ndani yetu. Amri hizi tukufu na takatifu—“Tii, kama nilivyo mimi! Penda, kama nilivyo mimi!”—zimekusudiwa tu kutuleta katika ufahamu wa kutokuwa na uwezo wetu, na kwa njia hiyo kutuamsha tuone uhitaji na uzuri na utoshelevu wa kile kilichoandaliwa kwa ajili yetu ndani ya Mzabibu. Tutaanza kumsikia Mzabibu akinena kila dakika na tawi: “Kama nilivyo mimi. Kama nilivyo mimi: uhai wangu ni uhai wako; nawe una fungu katika utimilifu wangu wote; Roho aliye ndani yako, na tunda litokalo kwako, ni sawasawa kabisa na kilicho ndani yangu. Usiogope, bali acha imani yako ishike kila ‘Kama nilivyo mimi’ kama uhakikisho wa Mungu ya kwamba kwa sababu naishi ndani yako, waweza na unaweza kuishi kama mimi.”

Lakini kwa nini, kama huu ndio maana ya mfano huu, kama huu ndio uhai tawi liwezao kuuishi, ni wachache wanaoutambua? Ni kwa sababu hawaijui siri ya mbinguni ya Mzabibu. Wanajua mengi juu ya mfano huu na mafunzo yake mazuri. Lakini siri ile ya kiroho iliyofichika ya Mzabibu katika uweza wake wote wa Kimungu na ukaribu wake, akiwachukua na kuwatosheleza mchana kutwa—hii hawaijui, kwa sababu hawakumngoja Roho wa Mungu awafunulie.

Mpendane, kama nilivyowapenda ninyi—“Ninyi, kama nilivyo mimi.” Tuanzeje kama kweli tutaijifunza siri hii? Kwa kuungama kwamba twahitaji kuletwa katika hali mpya kabisa ya maisha, kwa sababu hatujampata kumjua Kristo kama Mzabibu katika ukamilifu wa uwezo wake wa kuhuisha na kubadili. Kwa kujisalimisha ili tusafishwe kutoka katika yote yaliyo ya nafsi, na kutengwa na yote yaliyo katika ulimwengu, ili tuishi tu na kwa ukamilifu kama Kristo alivyoishi kwa utukufu wa Baba. Kisha kwa imani ya kwamba “kama nilivyo mimi” ni kweli kabisa kile Kristo aliye tayari kukifanya kuwa cha kweli, uhai ule hasa Mzabibu utakaoudumisha katika tawi litegemealo yeye kabisa.

Kama Nilivyo Mimi. Daima ni hivyo, ee Bwana wangu mbarikiwa, kama Mzabibu, ndivyo tawi—uhai mmoja, roho moja, utii mmoja, furaha moja, upendo mmoja.

Bwana Yesu, katika imani ya kwamba wewe ndiwe Mzabibu wangu, nami ni tawi lako, naikubali amri yako kama ahadi, na naichukua “kama nilivyo mimi” yako kama ufunuo rahisi wa kile utendacho ndani yangu. Naam, Bwana, kama ulivyopenda wewe, nami nitapenda.