Mpendane

Hii Ndiyo Amri Yangu, Kwamba Mpendane—Yohana 15:12

Mungu ni upendo. Asili yake yote na ukamilifu wake ni upendo, kwani haishi kwa ajili yake mwenyewe, bali kutoa uhai na baraka. Katika upendo wake alimzaa Mwana, ili ampe vyote. Katika upendo wake aliwaumba viumbe, ili awafanye washiriki wa heri yake.

Kristo ni Mwana wa upendo wa Mungu, mchukuzi, mfunuzi, mtoaji wa upendo huo. Uhai wake na kifo chake vyote vilikuwa upendo. Upendo ndio uhai wake, nao ni uhai autoao. Yeye huishi ili kupenda tu, kuuishi uhai wake wa upendo ndani yetu, kujitoa mwenyewe kwa wote watakaompokea. Wazo la kwanza kabisa la mzabibu wa kweli ni upendo—kuishi ili tu kuutoa uhai wake kwa matawi.

Roho Mtakatifu ni Roho wa upendo. Hawezi kumtia Kristo ndani yetu bila kutia upendo wake. Wokovu si kitu kingine ila upendo ukishinda na kuingia ndani yetu; tunao wokovu kadiri tu tulivyo na upendo. Wokovu kamili ni upendo mkamilifu.

Si ajabu Kristo alisema: “Amri mpya nawapa”; “Amri yangu ndiyo hii”—ile amri moja ijumuishayo yote—“kwamba mpendane.” Tawi si moja na mzabibu tu, bali pia na matawi yake yote mengine; wanywa roho moja, wanaunda mwili mmoja, wanazaa tunda moja. Hakuna jambo lisilo la asili zaidi kuliko Wakristo kutopendana, kama vile Kristo alivyowapenda. Uhai walioupokea kutoka kwa Mzabibu wao wa mbinguni si kitu kingine ila upendo. Hili ndilo jambo moja aombalo kuliko yote. “Hivyo watu wote watatambua ya kuwa ninyi mmekuwa wanafunzi wangu...mpendane.” Kama vile aina ya pekee ya mzabibu itambulikanavyo kwa tunda liizaalo, ndivyo asili ya Mzabibu wa mbinguni itakavyohukumiwa kwa upendo wanafunzi wake walio nao kila mmoja kwa mwenzake.

Angalia uitii amri hii. Acha “itii na ukae” kwako kuonekane katika jambo hili. Wapende ndugu zako kama njia ya kukaa katika upendo wa Bwana wako. Acha nadhiri yako ya utii ianzie hapa. Mpendane. Acha mahusiano yako na Wakristo katika jamaa yako mwenyewe yawe upendo mtakatifu, mwororo, wa Kikristo. Acha mawazo yako juu ya Wakristo waliokuzunguka yawe, kabla ya yote, katika roho ya upendo wa Kristo. Acha maisha yako na mwenendo wako uwe dhabihu ya upendo—jitoe mwenyewe kuzifikiri dhambi zao au mahitaji yao, kuwaombea, kuwasaidia na kuwatumikia. Uwe katika kanisa lako au mzunguko wako kielelezo cha upendo wa Kristo. Uhai autuishio Kristo ndani yako ni upendo; acha maisha unayoishi kwayo yawe upendo mtupu.

Lakini, ewe mtu, waandika kana kwamba haya yote ni ya asili, na rahisi, na mepesi. Je, yawezekana kweli kuishi hivi na kupenda hivi? Jibu langu ni: Kristo anaamuru hivyo; sharti utii. Kristo amekusudia hivyo; sharti utii, la sivyo huwezi kukaa katika upendo wake.

Lakini nimejaribu nikashindwa. Sioni matumaini yoyote ya kuishi kama Kristo. Ah! ni kwa sababu umeshindwa kulipokea neno la kwanza la mfano huu—“Mimi ndimi mzabibu wa kweli: nakupa yote uyahitajiyo kama tawi, nakupa yote niliyo nayo mimi mwenyewe.” Nakusihi, acha hisia za kushindwa kwako kulikopita na udhaifu wako wa sasa vikusukume kwa Mzabibu. Yeye ni upendo mtupu. Hupenda kutoa. Hutoa upendo. Atakufundisha kupenda, kama vile alivyopenda yeye.

Mpendane. Bwana Yesu mpendwa, wewe ni upendo mtupu; uhai uliotupa ni upendo; amri yako mpya, na alama yako ya uwanafunzi ni, “Mpendane.” Naikubali shtaka hili: kwa upendo ule unaonipenda nao, nami nakupenda wewe, nitawapenda ndugu zangu.