Furaha

Hayo nimewaambia, ili furaha yangu iwe ndani yenu, na furaha yenu itimizwe—Yohana 15:11

Kama mtu ye yote akiuliza swali, “Nawezaje kuwa Mkristo mwenye furaha?” jibu la Bwana wetu ni sahili sana: “Hayo,” juu ya Mzabibu na matawi, “nimewaambia, ili furaha yangu iwe ndani yenu, na furaha yenu itimizwe.” “Hamwezi kuwa na furaha yangu pasipo uzima wangu. Kaeni ndani yangu, nami nikae ndani yenu, na furaha yangu itakuwa ndani yenu.” Uzima wote ulio na afya ni kitu cha furaha na uzuri; ishini maisha ya tawi bila kugawanyika; mtakuwa na furaha yake kwa kipimo kilichojaa.

Kwa Wakristo wengi wazo la maisha ya kukaa kabisa ndani ya Kristo ni wazo la taabu na juhudi yenye maumivu. Hawawezi kuona ya kuwa taabu na juhudi hiyo huja tu, maadamu hatujitoi nafsi zetu bila kizuizi kwa uzima wa Kristo ndani yetu. Maneno ya kwanza kabisa ya mfano huo hayajafunuliwa kwao bado: “Mimi ni Mzabibu wa kweli; nachukua yote na kutunza yote; silitaki tawi lo lote ila lijitoe lote kwangu, na kuniacha nitende yote. Najifunga kulifanya na kulitunza tawi liwe yote lipasavyo kuwa.” Je, isingekuwa furaha isiyo na mwisho na isiyokoma kumwacha Mzabibu atende yote hivyo, na kujua ya kuwa si mwingine ila Mwana wa Mungu mbarikiwa katika pendo lake ndiye anayetuchukua kila dakika na kuyategemeza maisha yetu?

Ili furaha yangu iwe ndani yenu—Twapasa kuwa na furaha ya Kristo mwenyewe ndani yetu. Nayo furaha ya Kristo mwenyewe ni nini? Hakuna furaha kama upendo. Hakuna furaha ila upendo. Kristo alikuwa amekwisha kunena juu ya pendo la Baba na kukaa kwake mwenyewe ndani yake, na juu ya yeye kutupenda sisi kwa pendo lilo hilo. Furaha yake si kitu kingine ila furaha ya upendo, ya kupendwa na ya kupenda. Ilikuwa furaha ya kulipokea pendo la Baba yake na kukaa ndani yake, kisha furaha ya kulipitisha pendo hilo na kulimimina juu ya wenye dhambi. Ni furaha hii apendayo sisi tuishiriki: furaha ya kupendwa na Baba na naye; furaha ya sisi nasi kupenda na kuwaishia wale wanaotuzunguka. Hii ndiyo hasa furaha ya kuwa matawi kweli kweli: kukaa katika pendo lake, kisha kujitoa wenyewe kwa upendo ili kuzaa tunda kwa ajili ya wengine. Na tupokee uzima wake, kama autoavyo ndani yetu kama Mzabibu, furaha yake itakuwa yetu: furaha ya kukaa katika pendo lake, furaha ya kupenda kama yeye, ya kupenda kwa pendo lake.

Na furaha yenu itimizwe—Ili iwe kamili, ili mjazwe nayo. Ni jambo la kusikitisha kama nini kwamba twahitaji kukumbushwa hivyo ya kuwa kwa vile Mungu peke yake ndiye chemchemi ya furaha yote, “Mungu furaha yetu iliyo kuu,” njia pekee ya kuwa na furaha kamili ni kuwa na Mungu kwa wingi, kuwa na mapenzi yake na ushirika wake kwa wingi, kadiri iwezekanavyo! Dini imekusudiwa kuwa katika maisha ya kila siku kitu cha furaha isiyoelezeka. Nao mbona wengi hivi walalamika ya kuwa sivyo? Ni kwa sababu hawaamini ya kuwa hakuna furaha kama furaha ya kukaa ndani ya Kristo na katika pendo lake, na kuwa matawi ambayo kwayo aweza kulimimina pendo lake juu ya ulimwengu unaokufa.

Laiti sauti ya Kristo ingeufikia moyo wa kila Mkristo kijana, na kumsihi aamini ya kuwa furaha yake ndiyo furaha pekee ya kweli, ya kuwa furaha yake yaweza kuwa yetu na kutujaza kweli kweli, na ya kuwa njia iliyo hakika na sahili ya kuishi ndani yake ni—hii tu—kukaa kama matawi ndani yake yeye Mzabibu wetu wa mbinguni. Kweli hii na iingie ndani yetu sana—maadamu furaha yetu haijakamilika, ni ishara ya kuwa hatumjui bado Mzabibu wetu wa mbinguni ipasavyo; kila shauku ya furaha iliyo timilifu zaidi yapasa tu kutuhimiza tukae kwa usahili zaidi na kwa ukamilifu zaidi katika pendo lake.

Furaha yangu—furaha yenu. Katika hili pia ndivyo ilivyo: kama Mzabibu, ndivyo na tawi; Mzabibu wote ndani ya tawi. Furaha yako ni furaha yetu—furaha yako ndani yetu, na furaha yetu ikitimizwa. Ee Bwana mbarikiwa, unijaze furaha yako—furaha ya kupendwa na kubarikiwa kwa pendo la kimungu; furaha ya kupenda na kubariki wengine.