Ninyi, Kama Mimi

Mkizishika amri zangu, mtakaa katika pendo langu, kama vile mimi nilivyozishika amri za Baba yangu, na kukaa katika pendo lake—Yohana 15:10

Zaidi ya mara moja tumepata nafasi ya kunena juu ya kufanana kamili kwa mzabibu na tawi katika asili, na kwa hiyo katika lengo. Hapa Kristo hanenei tena kwa mfano, bali atuambia waziwazi jinsi maisha yake mwenyewe yalivyo kielelezo kamili cha yetu. Alikuwa amesema ya kuwa ni kwa utii peke yake tuwezavyo kukaa katika pendo lake. Sasa atuambia ya kuwa hii ndiyo njia aliyokaa yeye katika pendo la Baba. Kama Mzabibu, ndivyo na tawi. Maisha yake na nguvu zake na furaha yake vilikuwamo katika pendo la Baba: ni kwa utii peke yake alikaa ndani yake. Twaweza kuyapata maisha yetu na nguvu zetu na furaha yetu katika pendo lake mchana kutwa, lakini ni kwa utii mfano wa wake tu tuwezavyo kukaa ndani yake. Kufanana kamili na Mzabibu ni mojawapo ya masomo ya thamani kuliko yote ya tawi. Ni kwa utii Kristo kama Mzabibu alimheshimu Baba kama Mkulima; ni kwa utii mwaminio kama tawi humheshimu Kristo kama Mzabibu.

Tii na ukae—Hiyo ndiyo iliyokuwa sheria ya maisha ya Kristo kama vile ipasavyo kuwa sheria ya yetu. Alifanywa kama sisi katika mambo yote, ili sisi tupate kuwa kama yeye katika mambo yote. Alifungua njia ambayo katika hiyo twaweza kuenenda kama vile yeye alivyoenenda. Aliutwaa umbile letu la kibinadamu ili atufundishe jinsi ya kuuvaa, na kutuonyesha jinsi utii, kama ulivyo wajibu wa kwanza wa kiumbe, ulivyo njia pekee ya kukaa katika upendeleo wa Mungu na kuingia katika utukufu wake. Na sasa aja kutufundisha na kututia moyo, na kutuomba tuzishike amri zake, kama vile yeye alivyozishika amri za Baba yake na kukaa katika pendo lake.

Ufaafu wa kimungu wa uhusiano huu kati ya kutii na kukaa, kati ya amri za Mungu na pendo lake, waonekana kwa urahisi. Mapenzi ya Mungu ndiyo kiini hasa cha ukamilifu wake wa kimungu. Kama yalivyofunuliwa katika amri zake, hufungua njia kwa kiumbe kukua kufikia mfano wa Muumba. Katika kuyakubali na kuyatenda mapenzi yake, napanda kuingia katika ushirika naye. Kwa sababu hiyo ndipo Mwana, alipokuja ulimwenguni, akanena: “Nimekuja niyatende mapenzi yako, Ee Mungu”! Hapa ndipo palipokuwa mahali pa kiumbe na hii ndiyo ingekuwa baraka yake. Hivi ndivyo alivyopoteza katika Anguko. Hivi ndivyo Kristo alivyokuja kurejeza. Hivi ndivyo, kama Mzabibu wa mbinguni, atuombavyo na kutupatia, ya kwamba kama vile yeye kwa kuzishika amri za Baba yake alivyokaa katika pendo lake, sisi nasi tuzishike amri zake na kukaa katika pendo lake.

Ninyi, kama mimi—Tawi haliwezi kuzaa tunda ila kama lina uzima ule ule kabisa wa Mzabibu. Maisha yetu yapasa kuwa nakala kamili ya maisha ya Kristo. Yaweza kuwa hivyo, kwa kadiri ile ile tumwaminivyo yeye kama Mzabibu, akijitoa nafsi yake na uzima wake kwa matawi yake. “Ninyi, kama mimi,” asema Mzabibu: sheria moja, asili moja, tunda moja. Basi na tupokee kwa Bwana wetu somo la utii kama siri ya kukaa. Na tukiri ya kuwa utii ulio sahili, wa moyoni, wa kila jambo umepewa nafasi ndogo mno kuliko upasavyo kuwa nayo. Kristo alifia sisi tulipokuwa adui, tulipokuwa waasi. Alitutwaa ndani ya pendo lake; sasa kwa kuwa tumo ndani yake, Neno lake ni: “Tii na ukae; ninyi, kama mimi.” Na tujitoe kwa utii wa hiari na wa upendo. Yeye atatutunza tukikaa katika pendo lake.

Ninyi, kama mimi. Ee Mzabibu wangu uliyebarikiwa, ufanyaye tawi kushiriki katika kila jambo uzima wako na mfano wako, katika hili pia napasa kuwa kama wewe: kama uzima wako katika pendo la Baba kwa njia ya utii, ndivyo wangu katika pendo lako! Mwokozi, nisaidie, ili utii uwe kweli kiungo kati yako na mimi.