Tii na Ukae

Mkizishika amri zangu, mtakaa katika pendo langu—Yohana 15:10

Katika tafakari yetu iliyotangulia tulitaja kuingia katika maisha ya raha na nguvu ambako mara nyingi kumekuja kwa njia ya kuufahamu kwa kweli upendo wa Kristo binafsi, na uhakika ya kwamba upendo huo kwa hakika ulimaanisha ya kuwa yeye angeitunza nafsi. Kuhusiana na kugeuka huko, na imani ionayo na kukubali jambo hilo, neno kujisalimisha au kujiweka wakfu hutumiwa mara kwa mara. Nafsi huona ya kuwa haiwezi kudai kutunzwa na upendo huu wa ajabu isipojitoa yenyewe kwa maisha ya utii kamili. Huona pia ya kuwa imani iwezayo kumtumaini Kristo isitende dhambi, yapasa iithibitishe unyofu wake kwa kuthubutu mara moja kumtumaini kwa nguvu za kutii. Katika imani hiyo huthubutu kuacha na kukatilia mbali kila kitu kilichoizuia hata sasa, na kuahidi na kutumaini kuishi maisha yampendezayo Mungu.

Hili ndilo wazo tulilo nalo hapa sasa katika mafundisho ya Mwokozi wetu. Baada ya kunena, katika maneno yale, “Kaeni katika pendo langu,” juu ya maisha katika pendo lake kuwa jambo la lazima, kwa sababu ni jambo linalowezekana na ni wajibu pia, aeleza sharti lake moja lilivyo: “Mkizishika amri zangu, mtakaa katika pendo langu.” Hakika hili halikusudiwi kufunga mlango wa makao ya pendo lake aliokuwa amekwisha kuufungua. Wala kwa vyo vyote halidokezi wazo ambalo wengine wako tayari mno kulikubali, ya kwamba kwa kuwa hatuwezi kuzishika amri zake, hatuwezi kukaa katika pendo lake. La; agizo ni ahadi: “Kaeni katika pendo langu,” lisingaliweza kuwa agizo kama lisingalikuwa ahadi. Na hivyo maelekezo juu ya njia ipitiayo katika mlango huu uliofunguliwa hayaelekezi kwenye ndoto isiyoweza kufikiwa; pendo lialikalo kwenye makao yake yenye baraka lanyosha mkono, na kutuwezesha kuzishika amri. Tusiogope, katika nguvu za Bwana wetu aliyepaa, kuweka nadhiri ya utii, na kujitoa kuzishika amri zake. Kwa njia ya mapenzi yake, yaliyopendwa na kutendwa, ndimo ipitiayo njia ya kufikia pendo lake.

Ila na tuelewe vema maana yake. Yahusu utendaji wetu wa yote tunayoyajua kuwa ni mapenzi ya Mungu. Kwaweza kuwapo mambo yenye shaka, ambayo hatuna hakika nayo. Dhambi ya kutojua ingali ina asili ya dhambi ndani yake. Kwaweza kuwapo dhambi zisizo za kukusudia, ziinukazo katika mwili, ambazo hatuwezi kuzizuia au kuzishinda. Kwa habari ya hizi Mungu atazishughulikia kwa wakati wake kwa njia ya kupekua na kunyenyekeza, na kama tukiwa wanyofu na waaminifu, atatupa ukombozi mkubwa kuliko tuthubutuvyo kutumaini. Lakini haya yote yaweza kuonekana katika nafsi iliyo tii kwa kweli. Utii wahusu kuzishika kwa hakika amri za Bwana wetu, na kuyatenda mapenzi yake katika kila jambo ambalo twalijua. Hii ni daraja iwezekanayo ya neema, na ni kukubali huku katika nguvu za Kristo utii wa namna hii kama kusudi la moyo wetu, ambako juu yake Mwokozi wetu ananena hapa. Imani katika Kristo kama Mzabibu wetu, katika uwezo wake wa kuwezesha na kutakasa, hutufaa kwa utii huu wa imani, na hutuhakikishia maisha ya kukaa katika pendo lake.

Mkizishika amri zangu, mtakaa katika pendo langu—Ni Mzabibu wa mbinguni akifunua siri ya uzima autoao. Ni kwa wale wakaao ndani yake ndio afunulia siri ya kukaa kamili katika pendo lake. Ni kujisalimisha kwa moyo wote katika kila jambo ili kuyatenda mapenzi yake, ndiko kutoako njia ya kuingia katika maisha ya kufurahia daima pendo lake.

Tii na ukae. Bwana mwenye neema, nifundishe somo hili, ya kwamba ni kwa kuyajua mapenzi yako tu ndipo mtu aweza kuujua moyo wako, na ni kwa kuyatenda mapenzi hayo tu ndipo mtu aweza kukaa katika pendo lako. Bwana, nifundishe ya kuwa kama vile kutenda kwa nguvu zangu mwenyewe kusivyofaa kitu, ndivyo kutenda kwa imani katika nguvu zako kulivyo kwa lazima na muhimu kabisa kusikoepukika, kama nataka kukaa katika pendo lako.