Kaeni katika Pendo Langu

Kama vile Baba alivyonipenda mimi, nami nilivyowapenda ninyi; kaeni katika pendo langu—Yohana 15:9

Kaeni katika pendo langu—Twanena juu ya nyumba ya mtu kuwa ndiyo makao yake. Makao yetu, nyumba ya nafsi yetu, yapasa kuwa pendo la Kristo. Twapasa kuishi maisha yetu humo, kukaa humo kama nyumbani mchana kutwa: hivi ndivyo Kristo akusudiavyo maisha yetu yawe, na kwa kweli aweza kuyafanya yawe hivyo. Kukaa kwetu daima ndani ya Mzabibu ni kukaa katika pendo lake.

Yamkini umekwisha sikia au kusoma juu ya kile kiitwacho maisha ya juu zaidi, au maisha ya ndani zaidi, ya maisha yaliyo na utajiri au ukamilifu zaidi, ya maisha yaliyo tele. Nawe yamkini wafahamu ya kuwa wengine wamesimulia juu ya badiliko la ajabu, ambalo kwalo maisha yao ya kushindwa na kujikwaa daima yaligeuzwa kuwa hali ya baraka mno ya kutunzwa na kutiwa nguvu na kufanywa kuwa na furaha kuu. Ukiwauliza jinsi baraka hii kubwa ilivyowajia, wengi wangekuambia ni hili tu, ya kwamba waliongozwa kuamini ya kuwa kukaa huku katika pendo la Kristo kulikusudiwa kuwa jambo la kweli halisi, na ya kwamba walifanywa kuwa radhi kuacha kila kitu kwa ajili yake, kisha wakawezeshwa kumtumaini Kristo aifanye kuwa kweli kwao.

Pendo la Baba kwa Mwana si hisia tu—ni uzima wa kimungu, nguvu isiyo na mwisho, uwezo usioweza kuzuiwa. Lilimchukua Kristo katika maisha na mauti na kaburi. Baba alimpenda na kukaa ndani yake, na kumtendea yote. Vivyo hivyo pendo la Kristo kwetu nalo ni uwezo hai usio na mwisho utakaotenda ndani yetu yote apendayo kutupatia. Udhaifu wa maisha yetu ya Kikristo ni huu, ya kwamba hatuchukui wakati wa kuamini ya kuwa pendo hili la kimungu kwa kweli hupendezwa nasi, nalo litatumiliki na kutenda yote ndani yetu. Hatuchukui wakati wa kumtazama Mzabibu akilichukua tawi kwa ukamilifu hivyo, akitenda yote ndani yake kwa utimilifu hivyo. Twajitahidi kujitendea wenyewe yale ambayo Kristo peke yake aweza, yale ambayo Kristo, ee, kwa upendo mwingi hivyo, atamaniyo kututendea.

Na hii sasa ndiyo siri ya badiliko tulilolinena, na mwanzo wa maisha mapya, hapo nafsi ionapo pendo hili lisilo na mwisho likiwa radhi kutenda yote, na kujitoa kwake. “Kaeni katika pendo langu.” Kuamini ya kwamba yamkinika kuishi hivyo kila dakika kwa dakika; kuamini ya kwamba kila lifanyalo jambo hilo kuwa gumu au lisilowezekana litashindwa na Kristo mwenyewe; kuamini ya kwamba Pendo kwa kweli lamaanisha shauku isiyo na mwisho ya kujitoa lote kwetu na kutokutuacha kamwe; na katika imani hii kujitupa juu ya Kristo alitende ndani yetu; hii ndiyo siri ya maisha ya kweli ya Kikristo.

Nawe watawezaje kuifikia imani hii? Geuka uache vinavyoonekana kama wataka kuona na kumiliki visivyoonekana. Chukua wakati zaidi pamoja na Yesu, ukimkazia macho kama Mzabibu wa mbinguni, akiishi katika pendo la Baba, akitaka wewe uishi katika pendo lake. Jigeuze ujiache nafsi yako na juhudi zako na imani yako, kama wataka moyo ujazwe naye na uhakika wa pendo lake. Kukaa humaanisha kutoka katika kila kitu kingine, ili kukalia mahali pamoja na kudumu hapo. Njoo mbali na yote mengine, ukauelekeze moyo wako kwa Yesu, na pendo lake, pendo hilo litaiamsha imani yako na kuitia nguvu. Jishughulishe na pendo hilo, uliabudu, ulingoje. Waweza kuwa na hakika litakufikilia, na kwa uwezo wake litakuchukua ndani yake liwe makao yako na nyumbani kwako.

Kaeni katika pendo langu. Bwana Yesu, naliona, ni kukaa kwako katika pendo la Baba yako kulikofanya wewe kuwa Mzabibu wa kweli, ukiwa na utimilifu wako wa kimungu wa pendo na baraka kwa ajili yetu. Ee, laiti nami nipate vivyo hivyo, kama tawi, kukaa katika pendo lako, ili utimilifu wake unijaze na kufurika juu ya wote wanaonizunguka.