Upendo wa Ajabu

Kama vile Baba alivyonipenda mimi, nami nilivyowapenda ninyi—Yohana 15:9

Hapa Kristo aacha lugha ya mfano, na kunena waziwazi juu ya Baba. Ijapokuwa mfano ungeweza kufundisha mengi, haukuweza kufundisha somo la upendo. Yote ambayo mzabibu huutendea tawi, huyatenda chini ya lazima ya sheria ya asili: hapana upendo wa kibinafsi ulio hai kwa tawi. Tuko katika hatari ya kumtazama Kristo kama Mwokozi na mtoaji wa kila hitaji, aliyewekwa na Mungu, aliyekubaliwa na kuaminiwa nasi, pasipo hisia yo yote ya kina cha mapenzi ya kibinafsi ambayo kwayo Kristo hutukumbatia, na ambamo peke yake maisha yetu yaweza kupata furaha yake ya kweli. Kristo hutafuta kutuelekeza kwenye hili.

Naye hufanyaje hivyo? Hutuongoza tena kwake mwenyewe, ili kutuonyesha jinsi maisha yake yalivyo sawa kabisa na yetu. Kama vile Baba alivyompenda, ndivyo atupendavyo sisi. Maisha yake kama mzabibu ategemeaye Baba yalikuwa maisha katika upendo wa Baba; upendo huo ulikuwa nguvu yake na furaha yake; katika nguvu ya upendo huo wa kimungu uliokaa juu yake aliishi na kufa. Kama tutaishi kama yeye, kama matawi tuwe kweli kama Mzabibu wetu, hapana budi tushiriki katika hili pia. Maisha yetu hayana budi kuwa na pumzi yake na kuwako kwake katika upendo wa mbinguni kama vile yake. Kile upendo wa Baba ulichokuwa kwake, ndicho upendo wake utakachokuwa kwetu. Kama upendo huo ulimfanya kuwa Mzabibu wa kweli, upendo wake waweza kutufanya kuwa matawi ya kweli. “Kama vile Baba alivyonipenda mimi, nami nilivyowapenda ninyi.”

Kama vile Baba alivyonipenda mimi—Basi Baba alimpendaje? Shauku na furaha isiyo na kikomo ya Mungu ya kumshirikisha Mwana yote aliyokuwa nayo yeye mwenyewe, kumtwaa Mwana katika usawa uliokamilika kabisa naye mwenyewe, kuishi ndani ya Mwana na kumfanya Mwana aishi ndani yake—huu ndio ulikuwa upendo wa Mungu kwa Kristo. Ni siri ya utukufu ambayo hatuwezi kuipata dhana yake, twaweza tu kuinama na kuabudu tunapojaribu kuifikiri. Na kwa upendo kama huo, kwa upendo uo huo, Kristo hutamani kwa shauku na furaha isiyo na kikomo kutushirikisha yote aliyo nayo na alivyo, kutufanya washiriki wa asili yake mwenyewe na heri yake, kuishi ndani yetu na kutufanya tuishi ndani yake mwenyewe.

Na sasa, kama Kristo hutupenda kwa upendo mkuu hivyo, wa kimungu usio na kikomo, ni nini kizuiacho usishinde kila kizuizi na kutumiliki kabisa? Jibu ni rahisi. Kama vile upendo wa Baba kwa Kristo, ndivyo upendo wake kwetu ni siri ya kimungu, iliyo juu mno kwetu kuielewa au kuifikia kwa juhudi yo yote yetu wenyewe. Ni Roho Mtakatifu peke yake awezaye kuumwaga na kuufunua kwa nguvu yake ishindayo yote pasipo kukoma upendo huu wa ajabu wa Mungu katika Kristo. Ni mzabibu wenyewe upasao kulipa tawi ukuaji wake na tunda kwa kuupeleka juu utomvu wake. Ni Kristo mwenyewe apasaye kwa Roho wake Mtakatifu kukaa moyoni; ndipo tutakapoujua na kuwa nao ndani yetu upendo upitao ufahamu.

Kama vile Baba alivyonipenda mimi, nami nilivyowapenda ninyi—Je, hatutamkaribia Kristo aliye hai na wa kibinafsi, na kumwamini, na kumtolea yote, ili aweze kutupenda upendo huu ndani yetu? Kama vile yeye alivyojua na kufurahi kila saa—Baba anipenda mimi—sisi pia twaweza kuishi katika utambuzi usiokoma—kama vile Baba alivyompenda, ndivyo anipendavyo mimi.

Kama vile Baba alivyonipenda mimi, nami nilivyowapenda ninyi. Bwana mpendwa, ndipo tu naanza kufahamu jinsi hasa maisha ya Mzabibu yanavyopaswa kuwa ndiyo maisha ya tawi pia. Wewe u Mzabibu, kwa sababu Baba alikupenda, na kumwaga upendo wake kupitia wewe. Na hivyo wewe wanipenda mimi, na maisha yangu kama tawi yanapaswa kuwa kama yako, kupokea na kutoa nje upendo wa mbinguni.