Wanafunzi wa Kweli

Hivyo hutukuzwa Baba yangu, kwa vile mzaavyo sana; nanyi mtakuwa wanafunzi wangu—Yohana 15:8

Je, na wale wasiozaa tunda tele si wanafunzi? Waweza kuwa wanafunzi, lakini katika hali ya nyuma na isiyokomaa. Juu ya wale wazaao tunda tele, Kristo asema: “Hawa ni wanafunzi wangu, kama vile ningependa wawe—hawa ni wanafunzi wa kweli.” Kama vile tunavyosema juu ya mtu ambaye ndani yake wazo la uanaume limetimizwa: Huyo ni mtu! Ndivyo Bwana wetu aelezavyo ni akina nani walio wanafunzi wa moyoni mwake, wanaostahili jina hilo: Wale wazaao tunda tele. Twaona maana hii maradufu ya neno mwanafunzi katika Injili. Nyakati nyingine hutumika kwa wote waliolikubali fundisho la Kristo. Nyakati nyingine humhusu tu mduara wa ndani wa wale waliomfuata Kristo kikamilifu, wakajitoa kwa mafunzo yake kwa ajili ya utumishi. Tofauti hii imekuwapo katika vizazi vyote. Sikuzote pamekuwa na idadi ndogo ya watu wa Mungu waliotafuta kumtumikia kwa moyo wao wote, hali wengi wameridhika na kipimo kidogo sana cha kuijua neema na mapenzi yake.

Na tofauti kati ya huu mduara mdogo wa ndani na wale wengi wasiotafuta kuingia humo ni nini? Twaiona katika maneno haya: tunda tele. Kwa Wakristo wengi wazo la usalama binafsi, ambalo katika kuamka kwao kwanza lilikuwa halali, hubaki hata mwisho kuwa lengo pekee la dini yao. Wazo la utumishi na tunda daima ni la pili na la chini sana. Shauku ya kweli ya tunda tele haiwasumbui. Nafsi zilizosikia wito wa kuishi kikamilifu kwa ajili ya Bwana wao, kuutoa uhai wao kwa ajili yake kama yeye alivyotoa wake kwa ajili yao, kamwe haziwezi kuridhika na hili. Kilio chao ni kuzaa tunda tele kadiri wawezavyo, kadiri Bwana wao awezavyo kutamani au kutoa ndani yao.

Zaeni tunda tele: ndivyo mtakavyokuwa wanafunzi wangu—Naomba kila msomaji ayatafakari maneno haya kwa uzito mkubwa. Usiridhike na wazo la kufanya kazi kidogo zaidi au vizuri zaidi hatua kwa hatua. Kwa njia hii huenda lisije kamwe. Chukua maneno haya, tunda tele, kama ufunuo wa Mzabibu wako wa mbinguni juu ya kile upasacho kuwa, kile uwezacho kuwa. Kubali kikamilifu kutowezekana kwake, upumbavu kamili wa kujaribu kwa nguvu yako mwenyewe. Maneno haya na yakuite uutazame upya Mzabibu, ukijitwika kuishi ndani yako utimilifu wake wa mbinguni. Na yaamshe ndani yako tena imani na ukiri: “Mimi ni tawi la Mzabibu wa kweli; naweza kuzaa tunda tele kwa utukufu wake, na utukufu wa Baba.”

Hatuna haja ya kuwahukumu wengine. Lakini twaona katika Neno la Mungu kila mahali makundi mawili ya wanafunzi. Isiwepo kusitasita juu ya wapi tutakapoweka nafasi yetu. Na tumwombe atufunulie jinsi anavyoyataka na kuyadai maisha yaliyotolewa kwake kikamilifu, tuwe wenye kujaa Roho yake kadiri awezavyo kutufanya. Shauku yetu isiwe kitu pungufu ila utakaso mkamilifu, kukaa kusikokatika, ushirika ulio wa karibu zaidi, kuzaa tunda kwa wingi—matawi ya kweli ya Mzabibu wa kweli.

Ulimwengu unaangamia, kanisa linalegea, kusudi la Kristo linateseka, Kristo anahuzunika kwa sababu ya upungufu wa Wakristo wenye moyo mmoja, wazaao tunda tele. Ijapokuwa waona kwa shida kile kinachomaanishwa au jinsi kitakavyokuja, mwambie kwamba wewe ni tawi lake la kuzaa tunda tele; kwamba u tayari kuwa mwanafunzi wake kwa maana yake mwenyewe ya neno hilo.

Wanafunzi wangu. Ee Bwana mwenye baraka, tunda tele ndio uthibitisho kwamba wewe Mzabibu wa kweli una ndani yangu tawi la kweli, mwanafunzi aliye kabisa mikononi mwako. Nakuomba unipe ile hali ya kitoto ya kutambua kwamba tunda langu lakupendeza wewe, kile uhesabuo kuwa tunda tele.