Baba Atukuzwa

Hivyo hutukuzwa Baba yangu, kwa vile mzaavyo sana—Yohana 15:8

Twawezaje kumtukuza Mungu? Si kwa kuongeza utukufu wake au kumletea utukufu mpya asio nao. Bali kwa kuuacha tu utukufu wake ung’ae kupitia sisi, kwa kujitoa kwake, ili utukufu wake ujidhihirishe ndani yetu na kupitia sisi kwa ulimwengu. Katika shamba la mizabibu au mzabibu uzaao sana, mwenye shamba hutukuzwa, kwa maana huonyesha ustadi na uangalifu wake. Katika mwanafunzi azaaye sana, Baba hutukuzwa. Mbele ya wanadamu na malaika, uthibitisho hutolewa wa utukufu wa neema na nguvu ya Mungu; utukufu wa Mungu hung’aa kupitia yeye.

Hivi ndivyo Petro amaanishavyo aandikapo: “Mtu akihudumu, na ahudumu kwa nguvu anazopewa na Mungu; ili Mungu atukuzwe katika mambo yote kwa Yesu Kristo.” Mtu afanyapo kazi na kutumika kwa nguvu itokayo kwa Mungu peke yake, Mungu hupata utukufu wote. Tukiri kwamba uwezo ulitoka kwa Mungu peke yake, yeye afanyaye kazi, na wale waionao, wote sawasawa humtukuza Mungu. Ni Mungu aliyeifanya. Wanadamu huhukumu jinsi mtunza-bustani alivyo kwa tunda la bustani. Wanadamu humhukumu Mungu kwa tunda lizaalo matawi ya Mzabibu wa upandaji wake. Tunda haba huleta utukufu haba kwa Mungu. Haumletei heshima yo yote Mzabibu wala Mkulima. “Kwamba mzaa sana, hivyo hutukuzwa Baba yangu.”

Nyakati nyingine tumeomboleza upungufu wetu wa tunda, kama hasara kwetu sisi na kwa wenzetu, tukilalamika juu ya udhaifu wetu kuwa ndio sababu. Afadhali tuufikirie dhambi na aibu ya tunda haba kama kumnyang’anya Mungu utukufu ampasao kuupata kutoka kwetu. Na tujifunze siri ya kumletea Mungu utukufu, tukitumika kwa nguvu ile Mungu aitoayo. Kukubali kikamilifu Neno la Kristo, “Hamwezi kufanya neno lo lote”; imani rahisi kwa Mungu, atendaye mambo yote katika wote; kukaa ndani ya Kristo ambaye kwa yeye Mkulima wa kimungu hufanya kazi yake na kupata tunda tele—haya ndiyo maisha yatakayomletea Mungu utukufu.

Tunda tele—Mungu hulitaka; angalia ulitoe. Mungu haridhiki na kilicho pungufu; wewe pia usiridhike na kilicho pungufu. Maneno haya ya Kristo—tunda, tunda zaidi, tunda tele—na yakae ndani yako, hata ufikiri kama afikirivyo yeye, nawe uwe tayari kupokea kutoka kwake, Mzabibu wa mbinguni, alicho nacho kwa ajili yako. Tunda tele: hivyo hutukuzwa Baba yangu. Kimo chenyewe cha dai hili na kiwe faraja yako. Ni jambo lililo nje kabisa ya uwezo wako, hata lakutupa zaidi kikamilifu juu ya Kristo, Mzabibu wako wa kweli. Yeye aweza, naye atafanya, liwe kweli ndani yako.

Tunda tele—Mungu hulitaka kwa sababu analihitaji. Halitaki tunda kutoka matawi ya Mzabibu wake kwa maonyesho, kudhihirisha awezalo kufanya. La; analihitaji kwa ajili ya wokovu wa wanadamu: ni katika hilo apaswapo kutukuzwa. Jitupe katika maombi mengi juu ya Mzabibu wako na Mkulima wako. Mlilie Mungu na Baba yako akupe tunda uwaletee wanadamu. Chukua mzigo wa wenye njaa na wanaoangamia juu yako, kama Yesu alivyofanya alipoingiwa na huruma, nao uwezo wako katika maombi, na kukaa kwako, na kuzaa kwako tunda tele kwa utukufu wa Baba vitakuwa na uhalisi na hakika usiyowahi kuijua kabla.

Baba atukuzwa. Tumaini lililobarikiwa—Mungu akijitukuza mwenyewe ndani yangu, akidhihirisha utukufu wa wema wake na nguvu yake katika lile alifanyalo ndani yangu, na kupitia mimi. Ni kichocheo kikubwa namna gani cha kuzaa tunda tele, kadiri ile ile afanyayo ndani yangu! Baba, jitukuze mwenyewe ndani yangu.